Znowa „Swět wokoło nas“
Budyšin. Dźěćaca kniha „Swět wokoło nas“, wudata wot Rěčneho centruma WITAJ, je w druhim, rozšěrjenym nakładźe wušła. Ilustrowany wobrazowy słownik z dohromady wjace hač 1 150 hesłami hodźi so z BOOKii-pisakom wužiwać. W ludowym nakładnistwje Domowina wušła publikacija měri so předewšěm na čitarjow w starobje wot štyrjoch lět.
W Sakskej wjace dźěłaja
Kamjenc. Přistajeni sobudźěłaćerjo w Sakskej su loni přerěznje 35,7 hodźinow wob tydźeń dźěłali, zdźěli wčera krajny statistiski zarjad ze sydłom w Kamjencu. To je 1,6 hodźinow wjace hač přerězna hódnota po cyłej Němskej. Mužojo w Sakskej dźěłaja 4,4 hodźinow wjace hač žony w Swobodnym staće. Po cyłej Zwjazku je diferenca hišće wjetša a 7,1 hodźin wučinja.
Wuradźuja we Łužicy
Hamor. Sakski ministerski prezident Michael Kretschmer (CDU) a jeho braniborski kolega Dietmar Woidke (SPD) zeńdźetaj so dźensa ze swojimi ministrami kabineta w Hamorje. Ćežišćo zhromadneho posedźenja su mjez druhim změna strukturow we Łužicy, kubłanska politika, wjelči management a zhromadne dźěło ze susodnej Pólskej.
Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich lubuškow prócuja. K tomu přinošować chce naša serija z pokiwami z weterinarneje mediciny. (31)
Najrjeńšo za skótneho lěkarja je, hdyž su zwěrjata wšitke strowe. Tohodla su terminy šćěpjenja jara woblubowane. Zwjetša šćěpi so přećiwo chorosćam, kotrež často w bliskosći zwěrjeća wudyrja a móža wěste škody abo samo smjerć natyknjeneho zwěrjeća wuskutkować.
Dźensa wěnujemy so pola nas najčasćišo wužiwanym šćěpjenjam pola kóčkow.
Tule najwažniše zasady za šćěpjenje: Sprěnja njesmě pacient někajke symptomy měć, kotrež na schorjenje pokazuja, kaž na př. židlawu, zahorjenje, čerwjene slinowe kóžki, wysoku temperaturu atd. Imunowy system schorjeneho zwěrjeća njemóže na šćěpjenski srědk wotpowědnje reagować. Je přežadany a njemóže tuž spušćomnje přećiwo chorosći škitać.
Zdruha dyrbi zwěrjo wěstu starobu měć, zo by imunowy system dosć wuwity był.
Dale njesmě so na př. nošne (trächtig) abo imuno-słabe zwěrjo šćěpić.
Hory (AK/SN). Gmejna Halštrowska Hola chce nowe twarske ležownosće wutworić. Z dwěmaj napřećiwnymaj hłosomaj je gmejnska rada nětko wobzamknyła, zo nastaji wona twarski plan za wuchodnu nawjes w Blunju. Při tym jedna so wo płoninu połdra hektara. Tam ma wosom do dźewjeć jednoswójbnych domow nastać. „Tam móhli fachowcy z bliskeho industrijnišća Čorna Pumpa runje tak twarić kaž domoródni zajimcy“, rjekny sobudźěłaćerka twarskeho wotrjada gmejnskeho zarjadnistwa Heidrun Eger.
Dokelž je předwidźane městno w planje wužiwanja ležownosćow jako ratarska płonina wupisana, dyrbi so plan nowemu wužiwanju přiměrić. Blunjanska wjesna rada je projektej hižo přihłosowała. „Hdyž so ratarske płoniny za bydlenjotwar wužiwaja, potom dyrbja wurunanske naprawy slědować“, měnješe radźićel Roland Nuck (CDU), kiž je jednaćel Horjanskeje ratarskeje towaršnosće. Tomu chce gmejna wotpowědować, Heidrun Eger přilubi. Rjadować chcedźa tohorunja přijězdy na jednotliwe ležownosće. Móžny by zhromadny přijězd był abo jednotliwe k zwjazkowej dróze B 156.
Pančicy-Kukow (SN/MWj). Kónc lěta 2025 budu so wopytowarjo klóštra Marijineje hwězdy w Pančicach-Kukowje a gmejnow zarjadniskeho zwjazka Při Klóšterskej wodźe z pomocu šmóratka a interneta wo stawizniskim wuwiću a dźensnišim žiwjenju kaž tež wo serbskich wosebitosćach teritorija wobhonić móc. Za to ma nastać digitalny a multimedialny informaciski a wodźenski system pod hesłom „Marijina hwězda inowatiwnje“. Za njón je sakska ministerka za kulturu a turizm Barbara Klepsch (CDU) pjatk w Pančicach-Kukowje přepodała 200 000 eurow předsydźe zarjadniskeho zwjazka Stefanej Andersej. Pjenjezy pochadźeja ze zamóženstwa stronow a masowych organizacijow něhdyšeje NDR. Při tym jedna so wo stoprocentowske spěchowanje, tak zo njetrjebaja so swójske srědki zapřijeć.
Chorhoj wohnjowych wobornikow je wonkowne znamjo a symbol za sylnosć a zhromadnosć. W Radworju su sej wobornicy tajku dali zhotowić, minjeny pjatk bu chorhoj poswjećena.
Radwor (SN/BŠe). Na swjatočnej Božej mši je Radworski wosadny farar Beno Jakubaš minjeny pjatk nowu chorhoj tamnišeje wohnjoweje wobory žohnował. Nimo kameradow z gmejny běchu tež wobornicy mjez druhim z Rakec, Sćijec a Hućiny na swjatočnosć přijěli. Dwurěčnu swjatočnosć w cyrkwi dujerjo a chór „Meja“ hudźbnje wobrubichu. Po tym běchu wšitcy přitomni do Radworskeje wohnjoweje wobory přeprošeni. Wjesnjanostka gmejny Madeleine Rynčowa (Minakałske wolerske zjednoćenstwo) wuzběhny wažnosć dobreje zhromadnosće wobornikow, při čimž je chorhoj bytostny symbol. Chorhoj skedźbnja na hódnoty wohnjowych wobornikow. Tele tradicije – hajenje chorhoje – měli na kóždy pad dale pěstować.
Mały Wjelkow (CS/SN). Němsce, serbsce (a z pomocu QR-coda samo jendźelsce) móža so wopytowarjo nětko wo stawiznach sotrownje informować. Sobotu su w ramiku přiwzaća sotrownje do lisćiny „městnow žonow w Sakskej“ taflu wotkryli, kotraž najwažniše detaile sotrownje předstaja.
Geywitz we Wojerecach pobyła
Wojerecy. Zwjazkowa ministerka za bydlenje, měšćanske wuwiće a twarstwo Klara Geywitz (SPD) poby dźensa we Wojerecach. W centrumje města informowaše so wona wo wuwiću města a tuchwilnych wužadanjach předewšěm tež w zwisku ze změnu strukturow. Tež tema managementa nastupajo prózdne bydlenja ju zajimowaše.
Tři projekty z Łužicy
Drježdźany. Sakska podpěruje ze swojim programom „Demografija“ lětsa cyłkownje šěsć projektow we wysokosći 340 000 eurow. We Łutach nadźěłaja koncept za sport w halach a na sportnišćach. Zhorjelski wokrjes zaběra so z wuwićom moderneho dźěłoweho wobswěta. Město Zhorjelc pak chce w radnicy informaciski terminal za wobydlerjow wutworić.
Wopomnišćo wotewrjene
Bukecy (MK/SN). Po lětdźesatkach přestawki chcedźa w Bukecach lětsa zaso meju stajeć a mjetać. Bukečanska Bjesada a Kulturu spěchowace towarstwo přihotujetej nałožk zhromadnje z dalšimi partnerami ze wsy. Tak chcedźa organizatorojo serbsku tradiciju w Bukecach wožiwić a do kulturneho žiwjenja wsy zapřijeć. Planowane je, zo 30. apryla wot 15 do 17 hodź. na wulkim parkowanišću při zwjazkowej dróze B 6 meju staja.
11. meje w 15 hodź. započnje so mejemjetanje. Za to přihotuja organizatorojo tež mały program, mjez druhim z Bukečanskej drastowej skupinu. Program wobrubja dujerjo wosady, kotřiž za to hižo pilnje serbske ludowe spěwy zwučuja. Přizamknje so pisany swójbny program, mjez druhim z poskitkom za dźěći, we „Wjesnej hospodźe“ při B 6 hač do něhdźe 21 hodź. Wo hudźbne wobrubjenje postara so serbska skupina Logarhythmus. Na tutej wjerškaj kulturneho žiwjenja w Bukecach tamniša Bjesada a Kulturu spěchowace towarstwo wšitkich zajimcow wutrobnje přeprošujetej.