Wuspěšne knižne wiki za łužiske nakładnistwa w Lipsku so skónčili
Lipsk (CS/SN/bn). Nimale 296 000 wopytowarjow – 13 000 wjace hač loni – zličichu wot minjeneho štwórtka do wčerawšeje njedźele na Lipšćanskich knižnych wikach. Na stejnišćach něhdźe 2 000 wustajerjow z 45 krajow su so zajimcy rozhladowali a čitanjam, diskusijam kaž tež knižnym prezentacijam sćěhowali.
Lawreaća Knižnych mytow Lipšćanskich knižnych wikow su němska romansjejka Kristine Bilkau (beletristika), ruska awtorka Irina Rastorgujewa (wěcna kniha/esejistika) a Thomas Weiler z Čorneho lěsa (přełožk); lawreat Lipšćanskeho knižneho myta za europske dorozumjenje je běłoruski spisowaćel Alhierd Bacharewič. „Je wulkotnje, kelko euforije kniha zbudźa a kak zamóže ludźi hromadu wjesć. Jako městnosć zetkanjow, rozmołwow a wotkryćow zaběraja wiki centralnu rólu w Němskej, na přikład nastupajo temy kaž kumštnu inteligencu a awdijo, kotrymž smy nowe formaty wěnowali. Wulki zajim pokazuje, kak wažne analogne dožiwjenje přeco hišće je“, zjima direktorka Astrid Böhmisch.
Slědźo za serbskimi stawiznami w Barće je dr. Lubina Malinkowa drohoćinku – dołho pytany dokument Arnošta Muki – našła.Budyšin (SN). Kniha „Statistika łužiskich Serbow“ (1884-86) Arnošta Muki słuša k najwuznamnišim serbskim publikacijam 19. lětstotka. Akribisce předstaja Arnošt Muka w njej kóždu wosadu Delnjeje a Hornjeje dwurěčneje Łužicy, podawa informacije wo stawiznach a aktualnym serbskim cyrkwinskim, šulskim a towaršnostnym žiwjenju kaž tež konkretne ličby Serbow a Němcow w jednotliwych wsach. Hižo dołho wědomostnicy z toho wuchadźeja, zo njeje Muka cyłu Łužicu sam přepućował a so na městnje za situaciju wobhonił, ale zo je informacije skerje, runje w Hornjej Łužicy, z pomocu naprašnika nazběrał.
Wolejbulowy cyłk SambuCa Allstars je sobotu w Radworju jubilejny 40. sokołski wolejbulowy turněr wo pokal Domowiny dobył. W finalnym kole přesadźichu so něhdyši gymnaziasća, kotřiž běchu loni hižo beachwolejbulowu turu Radija Satkule dobyli, přećiwo cyłkej Małowjelkowčana Měrka Korjeńka a zastupnistwu 12. lětnika Serbskeho gymnazija Budyšin. Cyłkownje je w Radworju jědnaće mustwow nastupiło. Foto: Konstantin Hrjehor
Indonescy muslimojo so na přibrjohu Parangkusumo w Bantulu zhromadnje ze swojimi swójbami modla. Po wšěm swěće su muslimojo wčera kónc póstneho měsaca Ramadana woswjećili. Po tym zhromadźichu so k wulkim hosćinam ze słódnymi jědźemi a zwjeselichu dźěći ze słódkosćemi. Foto: dpa/Rizqullah Hamiid
44 młodostnym je Drježdźansko-Mišnjanski biskop Heinrich Timmerevers wčera w Chrósćicach sakrament firmowanja wudźělił. 19 holcow bě družču drastu woblečenych. Swjedźenske kemše je Chróšćanski młodźinski chór wobrubił. Do toho bě biskopa dźewjeć porow křižerjow witało a jeho z korejtu do cyrkwje dowjezło. Pjatk a sobotu budźe biskop Timmerevers na wizitaciji w Chróšćanskej wosadźe po puću. Foto: Darius Budar
