Na 125. posedźenju su so čłonojo kulturneho konwenta Hornja Łužica-Delnja Šleska minjeny pjatk znowa w Budyskim Kamjentnym domje schadźowali.

Budyšin (SN/CoR). Tež za lěto 2023 ma spěchowanje Němsko-Serbskeho ludoweho dźiwadła, Gerharta Hauptmannoweho dźiwadła Zhorjelc-Žitawa (GHT) a Serbskeho ludoweho ansambla zawěsćene być. Za to je kulturny konwent minjeny pjatk wotpowědne „orientaciske hódnoty“ we wobjimje lětušeho spěchowanja (NSLDź 2,3 miliony eurow, GHT 6,8 milionow eurow, SLA 260 000 eurow) wobzamknył. Pozadk su po zdaću rozmyslowanja w njezjawnych gremijach Zhorjelskeho wokrjesa, wutworić móžne kooperaciske formy třoch jewišćow. „Kooperacija je w zmysle kulturneho ruma, najprjedy pak dyrbja jewišća planowansku wěstotu měć“, rjekny kulturny sekretar Joachim Mühle. Na oktoberskim posedźenju – to rěka po rozžohnowanju Budyskeje přirjadnicy Birgit Weber a předsydy konwenta Bernda Langi (CDU) z gremija w meji – chcedźa institucionelne spěchowanje wobzamknyć.