Budyšin (SN/CoR). Ze šěsć wobdźělnikami wotmě so sobotu intensiwna literarna dźěłarnička pod nawodom Lubiny a Dušana Hajduk-Veljković w Budyskim Serbskim domje. Bě to mjeztym pjate a znowa wot Załožby za serbski lud spěchowane zarjadowanje tohole razu, tónkróć pod hesłom „Spěwy klinča – bórze zas“.

„Wěm, zo w serbskim rozhłosu stajnje nowych tekstarjow pytaja, tuž sym temu hižo přeco we hłowje měła. Zdobom maja tež młode spěwne skupiny potrjebu za nowe spěwy. A jako bě na lońšej dźěłarničce wo basnjach wobdźělnik spěwny tekst sobu přinjesł, z kotrymž smy so spontanje zaběrali, bě jasne, što w srjedźišću přichodneje steji“, zwurazni Lubina Hajduk-Veljkovićowa. „Ludźo drje čitaja basnje, jich pak njeje telko, kaž ći, kotřiž sej spěwy naposkaja. Docpěješ prosće šěrši publikum ze swojimi tekstami.“