Z wudaća: wutora, 29 nowembera 2016

Saarbrücken (dpa/K/SN). Nutřkowni ministrojo Zwjazka a krajow su dźensa w Saarbrückenje wo tym wuradźowali, kak skutkownišo wojować přećiwo terorizmej. Zaběrali su so tohorunja z přiwótřenjom zakonjow we wšelakich nastupanjach. Při tym dźe hłownje wo krućiše pochłostanje wobchadnych hrěšnikow, wo zakoń nastupajo namóc přećiwo policistam a wo jednotnu datowu banku padustwow. Dalša tema bě móžne přiwótřenje brónjoweho prawa. Wo wuslědkach konferency chcedźa jutře informować.

Pod nadpismom „Wowčerjowe rjane dźěło“ rozmysluje Jurij Koch z Choćebuza wo dźěćacej knize Křesćana Krawca „Jejdyrko“:

Sydom klankow w drasće wšitkich dźěćetkow Slepjanskeje wosady je nětko zaso w Serbskim kulturnym centrumje Slepo widźeć. Klanki nastachu w lětomaj 1999 a 2000 we wobłuku projekta ABM. Na wobrazu dźerži Hanka Zahrodnikec (nalěwo) z Ćiska Trjebinske dźěćetko na łónčku, w pozadku so sotře Lysann a Adina z Rownoho nad klankami wjeselitej. Foto: Jost Schmidtchen

Jónu wob lěto ma zjawnosć składnosć, sej w Pančicach-Kukowje dźěłarnje swjateho Michała wobhladać. Wosebje w najnowšim času tam stajnje něšto noweho nazhonješ.

Pančicy-Kukow (JK/SN). Dźěłarnja swjateho Michała w Pančicach-Kukowje bě minjeny pjatk swoje wrota zajimcam zaso­ šěroko wotewrěła. Hosćo dźěłarnje sej najwšelakoriše zaběry zbrašenych wobhladachu a běchu sej po tym pře­zjedni, zo stej dźěło a kreatiwne tworjenje jara dobra móžnosć, zbrašenych zapřijeć do wužitneho skutkowanja. Widźomne a čujomne wjeselo a hordosć zaběranych zbrašenych stej wuraz wuspěšneje integracije a posrědkuja začuće, zo su zbra­šeni na swoje wašnje zbožowni.

Posledni lětuši „kofej“

Budyšin. „Postrow ze Serbow“ – Serbske motiwy na historiskich fotach a pohladnicach“ je tema lětušeho poslednjeho „Kofeja w třoch“, kotryž wotměje so jutře, 30. nowembra, w 15 hodź. w Budyskim Serbskim muzeju. Tam nawjazaja na wobsah tučasneje wosebiteje wustajeńcy „Wotmolowane“. Přednošuje kuratorka Andrea Pawlikowa. Wopytowarjo smědźa rady tež swójske pohladnicy abo historiske fotografije ze serbskimi motiwami sobu přinjesć. Wšitcy zajimcy su wutrobnje přeprošeni.

Na Maćičnu akademiju

Budyšin. Stawizniska sekcija Maćicy Serbskeje přeproša štwórtk, 1. decembra, w 19.30 hodź. do Budyskeho hosćenca „Wjelbik“. Přednošuje stawiznar a wědomostny sobudźěłaćer Serbskeho instituta Friedrich Pollack na temu „Serbscy studenća we 18. lětstotku. Přinošk k (ně­hdźe) 300. jubilejej Serbskeho prědarskeho towarstwa w Lipsku“. Přednošk budźe w němskej rěči, zastup je darmotny.

Pytataj za rěčnymi pokładami

Wjesna rada chce w Konječanskej kapałce nowu techniku připrawić

Konjecy (aha/SN). Wjesna rada Šunow-Konjecy je wšěch wobydlerjow na swoje wčerawše posedźenje do Konječanskeho towarstwoweho domu „Delany“ přeprosyła. Mjeztym dwě lěće wukonja Frank Šołta zamołwitu funkciju wjesneho předstejićerja. Po jeho słowach maja tam wjacore chutne naležnosće rozrisać, a to nanajspěšnišo.

Tak chcedźa zaručić, zo zwón na Konječanskej kapałce tež přichodnje trójce wob dźeń zwoni – rano w šesćich, připołdnju w dwanaćich a wječor w šesćich. Regina Šołćina na to skedźbni, zo čini so to­ wot lěta 1894, jako bu kapałka w nowogotiskim stilu ze swojim 20 ki­logramow ćežkim zwonom wot biskopa Ludwiga Wahla poswjećena. Twar płaćeše tehdy něšto wjace hač 4 000 hriwnow. Swoju pod pomnikoškitom stejacu drohoćinku­ sej Konječenjo přewšo waža.

Budyšin. Chór, orchester a solisća Serbskeho ludoweho ansambla skića swojim připosłucharjam móžnosć, hektiskemu dohodownemu časej wućeknyć. Po zwučenym wašnju wopřijima adwentny koncert lětsa tež zaso mjezynarodne twórby a zaklinči hnydom dwójce w adwenće na žurli SLA w Budyšinje. Šarmantna moderatorka Kristina Nerad powjedźe po programje a překwapi tež z tej abo tamnej hodownej stawizničku. Premjera zaklinči štwórtk, 1. decembra, w 19.30 hodź. na žurli SLA. Dalše předstajenje tam budźe 18. decembra w 16 hodź.

Praskotaki na awto mjetali

Budyšin. Harowali a při tym tež hišće wosobowe awto wobškodźili su młodźi ludźo w nocy na njedźelu w Budyskej Strowotnej studni. Na Nagelowej mjetachu woni silwesterske praskotaki na VW Passat. Škoda na awće wučinja 2 000 eurow, kaž je to wobsedźer wobličił. Při prěnim přepytowanju wuslědźi policija třoch podhladnych muži w starobje 21, 22 a 29 lět. W bydlenju 29lětneho na­makachu zastojnicy 315 praskotakow, kotrež njeběchu z wěstotnej značku BAM woznamjenjene, a sćazachu je.

Łaz (AK/SN). Poprjancowy domčk wopytowarjow zawjesela. Před nim čaka Hanka na Janka. Sćěny su ze styroporowych platow a z deskow. „Jank a Hanka słušataj prosće k tomu“, měnja Veronika Sauer, Angelika Hammerschmidt a Gabriela Knothowa z Łazowskeho spěchowanskeho towarstwa Zetkanišćo Dom Zejlerja a Smolerja. Wot časa swojeho dźěćatstwa zwjazuja wone tule bajku z poprjancami. Chěžku běchu wone z wjele lubosću natwarili a wupyšili. Wona je dźěl hodowneje wustajeńcy „Połčničanske poprjancy“ w Domje Zejlerja a Smolerja. Zmóžnili běchu ju dźakowano požčonkam Połčničanskeje kulturneje a turistiskeje towaršnosće. Zawčerawšim su přehladku wotewrěli.

Wustajeńca ma k pječenju a woptanju pohnuwać. Mjez druhim wuhlada wopytowar originalne recepty, historiske receptowe knihi, najwšelakoriši grat, kotryž za zhotowjenje poprjancow trjebaš, a wězo wonjate poprjancy.