Z wudaća: pjatk, 21 apryla 2017

Zeleni Budyskeho krajneho radu Michaela Hariga (CDU) kritizowali

Budyšin/Rěčicy (SN/at). Jutry póndźelu je wjelk tři měsacy stare jehnjo a třilětnu maćernu wowcu w Debsecach zakusał. Zo bě to wjelk, je Budyski krajnoradny zarjad dźensa na naprašowanje „z wulkej prawdźepodobnosću“ wobkrućił.

Podawk bě za Budyskeho krajneho radu Michaela Hariga (CDU) z přičinu, so wuprajić za to znowa pruwować dać, hač je móžno wjelkow třěleć, kotřiž so bydlišćam přejara zbliža. W datym padźe leži pastwišćo wosrjedź wobydleneje kónčiny, k domskim połsta metrow zdalene.

Nowe předsydstwo župy Delnja Łužica je so wčera w Choćebuskim Serbskim domje prěni króć schadźowało. Mjez druhim wuhódnoćichu lětušu hłownu zhromadźiznu Domowiny.

Choćebuz (HA/SN). K swojemu prěnjemu wuradźowanju po hłownej a wólbnej zhromadźiznje župy Delnja Łužica 10. měrca w Turjeju je so nowowuzwolene předsydstwo župy wčera w Choćebuskim Serbskim domje zetkało. Do předsydstwa běchu delegaća 13 čłonow wuzwolili. Jako­ župan skutkuje William Janhoefer, kiž je tež předsyda Brjazynskeje Domowinskeje skupiny. Na lětušej hłownej zhromadźiznje Domowiny we Wojerecach su Janhoefera z wulkej wjetšinu wobdźělnych delegatow tež wuzwolili za jednoho­ z dweju městopředsydow Do­mowinskeho předsydy Dawida Statnika. Mjez čłonami noweho župneho předsydstwa, kotrež ma nawjetšu Domowinsku župu hač do lěta 2020 nawjedować, je pjeć nowych čłonow. Mjez nimi je Marja Elikowska-Winklerowa, wjelelětna nawodnica Choćebuzkeje Šule za delnjoserbsku rěč a kulturu kaž tež kulturnik Gerald Schön, serbski spěwar a nawoda wšelakich serbskich chórow.

Wobdźělnikaj w powołanskokubłanskim wobłuku dźěłarnjow Běłowodźanskeho zawoda­ Lebenshilfe Wilfried Timpe a Frank Pötzsch (wotl.) reparujetaj tuchwilu dźěćace kolesa. Tak podpěrujetaj wot Thomasa Schwarza (napr.) a towarstwa Lodowy sport Běła Woda iniciěrowanu spěchowansku akciju „Darće dźěćom koleso“. Dotal su při akciji 180 kolesow nahromadźili, kotrež maja nětko wobnowić. We wobłuku oswjedźenja­ dźěćaceho zwěrjenca 11. junija chcedźa je rozdźělić. Foto: Joachim Rjela

Drježdźany (SN/CoR). Dźesaty króć wupisa lětsa kultusowe ministerstwo Sakske krajne myto za domizniske slědźenje. Z nim chcedźa lajskich slědźerjow wu­znamjenjenić, kotřiž so z domiznu roze­stajeja, wosebje tež młodych ludźi.

Witane su přinoški k wšelakorym temam, kaž su to lokalne, regionalne a krajne stawizny, Němcy a Serbja, z domizny wućěrjeni, integracija zapućowarjow, industrijowe a techniske stawizny, přirodna wěda, ludowe wuměłstwo a wu­měłstwowe stawizny, narěč a mjeno­wěda, swjedźenje a nałožki.

Dohromady su myta z 8 000 eurami dotěrowane, mjez druhim młodźinske spěchowanske myto (hač do staroby 30 lět) z 1 000 eurami a tři šulerske myta we wysokosći 500 eurow. Tež awtorske kolektiwy kaž rjadownja móža so z přinoš­kom wobdźělić. Wažne je, zo njeje dźěło we wobłuku wědomostneho wukubłanja abo skutkowanja nastało.

Hač do 8. meje móža zajimcy hišće swoje slědźenske dźěła zapodać. Přepo- dać chcedźa myta w nazymje.

Berlin (dpa/SN). Něhdźe 2,8 milionow ludźi w Němskej ma časowje wobmjezowane dźěłowe zrěčenje. Předewšěm žony a młodźi ludźo su potrjecheni. Tole wuchadźa z wotmołwy zwjazkoweho knježerstwa na naprašowanje frakcije Lěwicy w zwjazkowym sejmje, kotrež medijam předleži. Mjez žonami ma 7,6 procentow dźěło na čas, mjez mužemi 6,5 procentow. Najhórje je mjez młodostnymi w starobje 15 do 24 lět. Tam dźěła nawšě 20 procentow w tajkim poměrje.

Prěnje protesty přećiwo AfD

Köln (dpa/SN). Do jutřišeho zwjazkoweho zjězda AfD w Kölnje su so tam dźensa prěni demonstranća k protestnym akcijam zhromadźili. Před hłownym dwórnišćom zestupachu so čłonojo hibanja Avaaz, maskěrowani jako politikarjo AfD Frauke Petry, Björn Höcke, Alexander Gauland a Beatrix von Storch. Čłonojo skupiny wumjetowachu AfD zastarsku ideologiju. Po informacijach hibanja je so 30 ludźi wobdźěliło. AfD wotměje kónc tydźenja w Kölnje swój cyłoněmski zjězd. Něhdźe 50 000 ludźi chce jutře přećiwo tomu protestować.

Dalši wopor zemrěł

Delegacija měšćanostow a wjesnjanostow schleswigsko-holsteinskeho wokrjesa Steinburg je wčera Serbow wopytała. Z 28 wosobow wobstejaca skupina je tele dny na studijnej jězbje w Drježdźanach. Při tutej składnosći chcychu tež Serbow zeznać. Marko Kowar, jednaćel Domowiny (prědku naprawo), hosći ze sewjerneje Němskeje w Serbskim domje witaše, zo by jim wo sta­wiznach a wo aktualnych problemach najmjeńšeho słowjansko ludu rozprawjał. Foto: SN/Maćij Bulank

Dospołnje rozhorjeny, dokelž njeměješe krajnoradny zarjad w braniborskim Prenzlauwje zawčerawšim, srjedu, žane rěčne hodźiny, je muž tam wohnjowy alarm zawinował. 31lětny bě papjeru zapalił, na čož alarmowy system reagowaše, policija zdźěli. 25 přistajenych móžeše so wuchować. Woheń hasny, po tym zo bě papjera spalena. Muž chcyše po swójskich wuprajenjach swój wupokaz wotewzać. Policisća jeho ranjenja domjaceho měra dla nachwilnje zajachu.

Policija pyta dale za njeznatym, kiž bě jutry w Konstanzu sta eurow rozdźělował. Tež dźensa hišće njewědźachu, štó wony dobroćiwy darićel je. „Pytamy za tutym čłowjekom“, rěčnik policije zdźěli. Papjerjane pjenjezy w hódnoće 20 a 50 eurow tčachu při woknach awtow abo w listowych kašćikach. Ludźo běchu na to policiju informowali. Zastojnicy pjenjezy zezběrachu, zo bychu pruwowali, hač pochadźeja z njeskutka.

Paris (dpa/K/SN). Po namócnym atentaće na policajske wozydło, skućenym wčera wječor w 21 hodź. na bulwaru Champs-Élysées, při kotrymž bu jedyn z policistow morjeny, je so dźensa francoski wěstotny kabinet schadźował. Pola skućićela, kotrehož su tamni zastojnicy hišće na městnje zatřělili, jedna so wo 39lětneho Francozu. Teroristiska organizacija Islamski stat (IS) wudawa, zo bu nadpad w jeje nadawku wuwjedźeny. Podawk zasćinja francoski prezidentski wólbny bój. Prezident François Hollande postaji hišće w nocy najwyšu stražliwosć nastupajo njedźelniše wólby. Němska kanclerka Angela Merkel (CDU) je prezidentej Hollandej kondolěrowała.

Seoul (dpa/K/SN). USA a jich zwjazkarjej Južna Koreja a Japanska chcedźa so přichodny tydźeń wo tym dorěčeć, kak přichodnje zhromadnje postupować přećiwo Sewjernej Koreji. Na zetkanju wysokich zastupnikow wšěch třoch krajow wutoru w Tokiju póńdźe naležnje wo to, kak hodźeli so Sewjernej Koreji dalše prowokacije znjemóžnić. Dalše ćežišćo budźe róla Chiny při rozrisanju woneho konflikta. Wjacore rezolucije UNO ignorujo, Pjöngjang ze swojim atomowym programom pokročuje a rakety wuwiwa, kotrež njedocpěja jenož Južnu Koreju a Japansku, ale tež přibrjóh USA. Po sudźenju ekspertow přihotuje Sewjerna Koreja tuchwilu dalši atomowy test.

Waršawa (dpa/SN). Zastupnicy hospodarstwa Němskeje a Pólskeje wobhladuja póndźelu so zahajace Hannoverske wiki jako šansu. „Je to dobra składnosć, nahladnosć Pólskeje zaso polěpšić“, rjekny Katarzyna Soszka-Ogrodnik, rěčnica Němsko-pólskeje industrijneje a wikowanskeje komory (AHK) powěsćerni dpa we Waršawje. Pólska je lětsa partnerski kraj wikow. Po nastupje noweho narodnokonserwatiwneho knježerstwa w lěće 2015 bě kraj mjez wukrajnymi inwestorami na atraktiwnosći zhubił. Zakonske změny noweho knježerstwa běchu předewzaćelow znjeměrnili, kotřiž njejsu na to w Pólskej dale inwestowali.

Wuhlady za tute lěto pak su po měnjenju fachowcow zaso pozitiwne. Přede­wšěm wočakowane spěchowanske srědki EU, kotrychž prud bě nachwilnje přetor­hnjeny, nowym inwesticijam polěkuja, je sej Soszka-Ogrodnik wěsta. Na industrijnej přehladce w Hannoveru móže so Pólska ze swojeje inowatiwneje a moderneje stronki prezentować. Tež tam je minjeny čas wjele nowych firmow nastało.