Z wudaća: pjatk, 21 apryla 2017

Po bombowym nadpadźe na Dortmundske mustwo pohladny zajaty

Berlin (dpa/SN). Dobry tydźeń po bombowym nadpadźe na mustwowy bus koparskeho prěnjoligista Borussia Dortmund je policija dźensa rano w Tübingenskej kónčinje 28lětneho podhladneho zajała. Po informacijach zwjazkoweho statneho rěčnistwa jednaše podhladny z pjenježnych přičin. Wón na to spekulowaše, zo akcije koparskeho kluba po atentaće dramatisce na hódnoće pozhubja a zo móže po tutym puću wjacore miliony eurow zasłužić. Policija měješe wot wšeho spočatka wulke dwěle, zo ma njeskutk islamistiski abo ekstremistiski pozadk.

Podhladny je 28lětny muž z němskim kaž tež z ruskim staćanstwom. Jemu wumjetuja nětko pospytane morjenje, rozbuchnjenje a strašne ranjenje ćěła.

Tydźenja wutoru běchu do hry Dortmundskeho mustwa přećiwo AS Monaco tři bomby w bjezposrědnim susodstwje busa Dortmundźanow rozbuchnyli. Jedyn z hrajerjow a policist so zraništaj.

Kak wuskutkuje so nowy rewěrowy plan LEAG na wobstejacu wudobywansku dowolnosć, kotruž bě Regionalny planowanski zwjazk Hornja Łužica-Delnja Šleska lě­ta­ 2014 po wosomlětnym planowanskim jednanju přizwolił? Aspekt to, kotryž njeje minjene tydźenje našu kedźbnosć hižo­ docpěł. Kajka je procedura w tajkim dotal njedožiwjenym padźe? Je energijowe předewzaće winowate, planowanskemu zwjaz- kej z noweho plana wuchadźacu „njepo­trjebu krajiny“ přizjewić? Je dowolnosć scyła hišće płaćiwa, hdyž so nowe wobstejnosće bytostnje wotchileja wot tych, na kotrež so wobzamknjenje złožowaše? Prašenjow je zawěsće dosć a spěšneje wotmołwy na žane z nich nichtó nima. Tohodla je derje, zo planowanski zwjazk fachowcow w nutřkownym a hospodarskim ministerstwje zapřija, zo bychu hromadźe nastate połoženje wuswětlili a so dorozumili, kak postupować. Axel Arlt

Praha (ČŽ/K). Wjetšinje čěskich ludźi je zhromadna europska měna euro hódź, financny minister Andrej Babiš pak wo njón njerodźi. W diskusiji na Karlowej uniwersiće pokaza wón na to, zo je króna za Čěsku wužitniša. Z njej by kraj w ewentualnej­ dalšej hospodarskej krizy skerje wobstać móhł. „W europasmje nochcył ja tež tohodla być, dokelž njebych chcył rukować za grjekske ani za italske banki“, šef hibanja ANO dale praji. Wón přizna, zo je zhromadna měna była spočatnje dobry projekt a zo tež nětko někak funguje, prašenje wšak je „što potom,­ hdyž přińdźe kriza?“. Wěstotu skića to swójska měna. Předsyda opozicionelneje strony TOP 09 Miroslav Kalousek so porno tomu za to wupraji, euro přiwzać nanajručišo, a to z politiskich přičin. „TOP 09 je za to, zo by Čěska w spěšnišim dźělu Europy była, z pomałšeho ničo njewuskoči.“ Europasmo po jeho­ přeswědčenju Europu dźěli do spěšneho a do pomałšeho dźěla. Štóž w EU zhromadnu měnu nima, bywa w hinašej kategoriji hač staty europasma.

Towarstwo za polarnu filateliju počesći serbskeho misionara a polarneho slědźerja Jana Awgusta Měrćinka (1817–1875) składnostnje jeho 200. posmjertnych narodnin z wosebitej listowej znamku a wotpowědnym kołkom Němskeje póšty. Wobě buštej na wikach listowych znamkow spočatk apryla w sewjerorynskim Leverkusenje předstajenej.

Techniski pomnik při Budyskim dwórnišću dyrbi so hač do junija tohole lěta zminyć. Za njón su nětko nowe městno a samo sponsorow za přesadźenje namakali.

Budyšin (CK/SN). Stara parna lokomotiwa při Budyskim dwórnišću so městu Budyšinej zachowa. Jeje nowi wobsedźerjo budu Wuchodosakscy přećeljo žele­znicy. Towarstwo drje lokomotiwu nje­trjeba, dokelž hižo dwě ma, a tež zrěčenje hišće podpisane njeje, je pak na dobrym puću. Tole rozprawja čłon frakcije CDU Budyskeje­ měšćanskeje rady Heinrich Schleppers. Fachowcy zwěsćichu, zo hodźi so 124 tonow ćežke a 24 metrow dołhe jězdźidło tež bjez krana pohibować. Při­wšěm płaći přesadźenje 50 000 eurow. Schleppers je transportne předewzaće zdobył, kotrež by projekt sponsorowało. Dalša firma trěbne kolije na nowe městno přepołoži a tež wobchadny zwjazk ZVON so pjenježnje wobdźěli.

Swoje wčerawše posedźenje w Nukničanskej barace wotměchu Chróšćanscy gmejnscy radźićeljo bjez schorjeneho wjesnjanosty Marka Klimana (CDU). Posedźenje nawjedował je zastupjer Jan Wjesela.

Nuknica (JK/SN). Chelnjanski planowanski běrow Hagena Wjacławka ma nowe tepjenje Chróšćanskeje „Jednoty“ a susodneje zakładneje šule planować. Tole su čłonojo Chróšćanskeje gmejnskeje rady wčera jednohłósnje rozsudźili.

Na kartowej čarje pobyli

Łaz. Z towarstwoweho domu při Łazowskej kartowej čarje su njeznaći w nocy na srjedu telewizor a žiwidła w hódnoće tysac eurow kradnyli. So do rumnosćow z jězdźidłami zadobyć pak so jim poradźiło njeje, tak zo tam žana škoda njenasta.

Budyšin. We wulkim domje NěmskoSerbskeho ludoweho dźiwadła wotměje so wutoru, 9. meje, w 16 hodź. wopominanska swjatočnosć za njedawno zemrěteho dr. Franka Stübnera. Kaž wotrjad za zjawnostne dźěło NSLDź zdźěli, su wšitcy přeprošeni, kotřiž su dr. Franka Stübnera na jeho žiwjenskim puću zetkali. Zhromadnje chcedźa so na njeho wosobinsce, literarnje a hudźbnje dopominać.

Sportowy kurs za žony

Ralbicy. Sportowu hodźinu za žony a hol­cy poskićuje wotnětka Ralbičanska fyzioterapeutka Sylwija Šołćina. Zajimowane žony su přeprošene kóždy štwórtk wot 20 do 21 hodź. do Ralbičanskeje sportownje.

Jutře koncertuja

Zhorjelc. W Smochčanskim Domje biskopa­ Bena wotměchu so tele dny dźěćace­ chórowe dny Zhorjelskeho a Drjež­dźansko-Mišnjanskeho biskopstwa. Zwučowanje zakónči so z koncertom pod hesłom „Hudźba je barba po notach­“ jutře, sobotu, w 15 hodź. w něhdyšej Zhorjelskej synagoze.

Wopominanje při pomniku

Budyšin (CS/SN). Přichodne měsacy na pućach Budyskeho wokrjesa zaso wjele twarja. Kaž rěčnica krajneho zarjada za dróhotwar a wobchad (LASuV) Isabel Siebert­ praji, pokaza so při tym wuwiće, wo kotrymž wobswětoškitarjo zahorjeni njebudu. Powołanske drustwa dróho­twarske zarjady napominaja, dróhotwarske projekty jeno zwoprawdźić, hdyž je puć dospołnje zawrjeny, a nic jenož połojčnje. Přičina je wěstota dźěłaćerjow. Při wuskich pućach často wěstotny wotstawk 1,2 metraj k nimo jěducym awtam dodźeržeć njemóža. Tohodla ma so bórze postajenje zawjesć, po kotrymž jenož hišće při dospołnje zawrjenych pućach twarja. Sćěh toho su dołhe wokołopuće a přidatne poćežowanje wobswěta.

Na mnohich městnach kuzło łužiskich jutrow sylnje skutkowało

Jutry 2017 su nimo a z wotběhom su zawěsće wšitcy spokojom. Přede­wšem 1 564 křižerjow serbskich a dwurěčnych procesionow kaž tež dalši­ jutrowni jěcharjo we Wóstrowcu a Cerkwicy bě zwjeselene. Jónu,­ zo je wšitko bjez wjetšich njezbožow wotběžało, a zdobom, zo bě wjedro lětsa – hač na mjeńše wuwzaća – jara dobre. A to byrnjež wjedrarjo něšto­ cyle hinaše wěšćili. Tule je kuzło łužiskich jutrow sylnje skutkowało a dobremu poradźenju přinošowało.

Skutkowało je tež wozjewjenje poselstwa wo zrowastanjenju Chrystusa přez křižerjow na konjach na přichwatanych hosći. Wopytowar z Plessy pola Elsterwerdy, kotryž wobdźiwaše křižerjow ze swojej pře­ćelku lětsa prěni króć, rjekny, zo běchu tole za njeho najrjeńše jutry, kotrež­ bě hdy dožiwił. Runje tak skutkowaše po wšěm zdaću kuzło łužiskich­ jutrow na Drježdźansko-Mišnjanskeho biskopa Heinricha Timmereversa,­ kotryž dožiwi křižerjow w Radworju a Budyšinje. Chětro emocionalnje dźakowaše so wón serbskim mužam za spjelnjenje nadawka­ na wutornej dźaknej Boži mši w Róžeńće.