Köln (dpa/K/SN). Třidnjowski stronski zjězd Alternatiwy za Němsku (AfD) bě turbulentny a wuńdźe ze zesylnjenym prawicarsko-nacionalnym křidłom. To znazornja fakt, zo wuzwolichu delegaća konserwatiwneho městopředsydu Alexandera Gaulanda a skerje liberalnu čłonku předsydstwa Alicu Weidel jako načolny tandem za wólbny bój. Šefinu strony Frauku Petry stajichu za to do róžka a zaćisnychu jeje pospyt, AfD wusměrić na realno-politiski kurs. Prawicowi populisća schwalichu nimo toho swój program za septemberske wólby, w kotrymž wotpokazuja njerjadowanu masowu imigraciju do Němskeje a do jeje socialnych systemow. Na druhim boku propaguja wustup zwjazkoweje republiki z europasma. Hłowny rěčnik AfD Jörg Meuthen je z wotběhom a wuslědkami zjězda wulce spokojom. Strona ma nětko program, kotryž hromadźe z načolnym teamom spektrum AfD derje wotbłyšćuje.
Zhorjelc (FP/SN). Hornjołužiska towaršnosć wědomosćow je so sobotu tradicionelnje schadźowała. Čłonojo zhromadźichu so w pyšnje ponowjenym baroknym domje na Nysowej w Zhorjelcu. Lětsa bě tež Załožba srjedźoněmskeje kulturneje rady w kooperaciji ze Zhorjelskej zběrku a Mjezynarodnym institutom Jacoba Böhmy na přihotach zjězda wobdźělena. Wjace hač 70 hosći sćěhowaše přeprošenje, kotrež lubješe dosć wotměnjawy program.
Hižo wosmy króć móžachu Myto Hermanna Knothy za wusahowace dorostowe slědźenje spožčić. Lawreat Christoph Hanzig z Drježdźan bě so w swojim zapodatym dźěle ze stawiznami psychiatriskeje institucije Großschweidnitz pola Lubija rozestajał. Tam běchu nacionalsocialisća w lětach 1939 do 1945 sta dźěći a młodostnych morić dali.
Lětuše Myto Jacoba Böhmy dósta stawiznar Martin Renghart z delnjobayerskeho Julbacha. Wón bě poměr Böhmy k Martinej Lutherej nadrobnje přeslědźił a dokumentował.
We wobłuku swjatočneje ceremonije přepodachu předewzaću Hamburger Rieger tzwr minjeny pjatk w Čornopumpskej papjercowni certifikat EMAS za papjercowu mašinu 2, kotruž firma tuchwilu planuje. Za skrótšenku EMAS chowa so dobrowólny wobswětowy management Europskeje unije.
Grodk (JoS/SN). „Wobswětowa certifikacija je wšitkim sobudźěłaćerjam nowe wužadanje“, podšmórny zawodny nawoda Arno Liendl. Certifikat EMAS je najwyši hódnotny zyglyšk za zawodny wobswětowy škit a wopřijima wyše žadanja hač normalne zakonitosće. Firmje Hamburger Rieger zmóžnja to njekomplikowany přistup k europskim spěchowanskim srědkam kaž tež wolóženja we wobłuku přizwolenskeho jednanja nastupajo planowanu druhu papjercowu mašinu.
Při chětro wětřikojtym zymnym wjedrje je so minjenu srjedu hižo 30. jubilejny běh wo hórskeju kralow wot Hornjohórčanskeje sportoweje hale hač na wjeršk 449 metrow wysokeje hory Mnišonc přewjedł. Při tymle wubědźowanju ze zdźěla jara nahłymi stupanjemi mějachu mužojo kaž žony wšitkich starobnych skupin, tež ći najstarši, 230 metrow wysokostneho rozdźěla přewinyć. Cil běše za nich direktnje při woblubowanym hosćencu z wuhladnej wěžu, ke kotremuž je so 62 atletow a 15 atletkow zdračowało.
Mjez mužemi je sej 31lětny Hartmut Engert z Budyšina titul hórskeho krala w 14:36 min zawěsćił. Pola žonow bě 32lětna Franziska Kranich z Niskeje hórska kralowna w 17:17 min. Na 3,3 kilometrach wubědźowaštaj so tež zaso najstaršej wobdźělnikaj cyłeho zarjadowanja: 70lětna Hella Helmowa z Rakec (37:32 min) a 82lětny Jurij Nuk z Budyšina (33:10 min), kotrajž so tohorunja hač na wjeršk dodrapaštaj. Wobeju počesći Hornjohórčanske sportowe towarstwo w starobnymaj klasomaj.
SJ Chrósćicy
– LSV Nowe Město nad Sprjewju 0:0
Zestawa domjacych: Králíček – Teichmann, Cyž, Sentivan, Šafář, Žur (84. Gries), Schulze, Dórnik (70. Bětnar), Runt (65. Młynk), Henčl, Věchet
Při typiskim haperlejskim wjedrje wočakowaše prěnje koparske mustwo Sportoweje jednoty Chrósćicy njedźelu tabulkoweho susoda z Noweho Města nad Sprjewju. Nalětnje słónco, dešć, sylny wětr a krupy njeskićachu pak žane dobre wuměnjenja za šwarnu kopańcu. W cyłym prěnim połčasu hosćo lěpje nadběhowachu. Před wrotami pak wostachu přiwšěm njestrašni. Chróšćanam pobrachowachu cyle jednorje organizacija w defensiwnym dźěle, měr kaž tež ideje při natwarje a trěbna agresiwnosć a wola w dwubojach. Přeco zaso kombinowachu so Nowoměšćenjo z dwójnymi přihrawkami před šěsnatku. Na zbožo njezamóchu nadběhi konsekwentnje zakónčić. Krótko do połčasa pak dóstachu jědnatku, štož wuwabi prašace so mjezwoča a reklamaciju mjez domjacymi. Tež fanam běše hwizdanje njejasne. Kaž pak zawinowar Petr Šafář po hrě přizna, njebě rozsud tola tak wopačny. Domjacy wrotar Petr Králíček třělwu wotwobara.
Awtor dźensa
André Strelow
Mjeztym hižo jubilejne 40. běhi na dlěše distancy wotměchu so při wětřikojtym a zymnym wjedrje sobotu do jutrow w Biskopicach. Po swojim wašnju je tele wubědźowanje sobu najstarše w Sakskej, kotrež měješe z nimale 700 wobdźělnikami 1989 swój dotalny rekord. Hosćićelske Biskopičanske sportowe towarstwo TV 1848 zliči pak tež lětsa cyłkownje 420 starterow, kotřiž doběžachu na hłownych distancach 4,5 km, 10 km, 21,1 km (połmarathon) a na 0,8 km kaž tež na 2,3 km za dźěći a šulerjow do cila.
Na třoch hłownych distancach je so tež sydom serbskich starterow wuspěšnje wubědźowało. Woni wuwojowachu sej w starobnej klasy jedne prěnje a jedne 3. městno, tři štwórte, jedne šeste a jedne 14. městno. Cyłkownaj dobyćerjej w połmarathonje běštaj Sebastian Guhr z Kamjenca (1:17:05 h) a Franziska Kranich z Niskeje (1:32:53 h). Kathrin Mehnertowa z Budyšina wubědźi sej w sk 40 chwalobne 3. městno w spěšnych 1:55:00 h.
Krajna koparska klasa
Horni kraj Sprjewja – Mužakow 1:2 (0:0)
Biskopicy II – Nowosólc-Hródk 1:5 (1:3)
Chrósćicy – Nowe Město 0:0 (0:0)
Trjebin – Neugersdorf II 3:1 (1:0)
1. Radebeulski BC 18 41 : 14 46
2. Mužakow 18 44 : 25 39
3. Laubegast 18 54 : 25 38
4. FC Neugersdorf II 18 45 : 24 31
5. Nowosólc-Hródk 19 38 : 35 29
6. Horni kraj Sprjewja 18 45 : 41 27
7. Drježdźanski SC 18 34 : 31 25
8. Nowe Město n. Sprje. 17 28 : 33 22
9. SJ Chrósćicy 19 27 : 34 22
10. SG Weixdorf 19 32 : 46 20
11. Trjebin 19 30 : 50 20
12. Zschachwitz 19 35 : 57 16
13. Biskopičanske KT II 18 15 : 53 0
wokrjesna wyša liga
Kulow – Ralbicy/Hórki 0:2 (0:2)
Großröhrsdorf – Kumwałd 3:0 (2:0)
Połčnica – Germania Budyšin 3:2 (0:0)
Bukecy – Ottendorf-Okrilla 2:1 (0:0)
1. ST Ćisk 23 80 : 17 55
2. Sokoł Ralbicy/Hórki 23 61 : 30 46
3. Rakečanske ST 23 56 : 35 45
4. ST Hnašecy-Dobruša 23 46 : 35 42
5. SC Großröhrsdorf 23 33 : 26 35
6. Póst Germ. Budyšin 23 39 : 44 31
7. Motor Kumwałd 23 42 : 51 31
8. LSV Hory 23 52 : 42 29
9. Wojerowski FC 23 48 : 44 28
10. ST Kinspork/Łužnica 23 43 : 39 28
11. Módro-běli Kulow 23 39 : 44 26
12. Drohotka Ramnow 23 33 : 50 23
13. Zeleno-běli Bukecy 23 36 : 68 22
14. ST Wjelećin 23 44 : 78 22
15. FV Ottendorf-Okrilla 23 33 : 58 21
16. TSV Połčnica 23 35 : 59 18