Z wudaća: póndźela, 24 apryla 2017

Módro-běli Kulow

– Sokoł Ralbicy/Hórki 0:2 (0:2)

Zestawa hosći: Ch. Gloxyn – Rawš, Zynda, Korjeńk, M. Matka, Šewc, B. Bjeńš, Wowčerk (52. K. Matka), Kurjat (77. Šěn), Bejma (90. J. Bjeńš), S. Bjeńš

Dohromady 27 dźěći je wčera w Radworju prěni raz sakrament wołtarja přijało. Na serbskich kemšach bě to 14 dźěći, z nich štyri holcy w družčej drasće. Tójšto žonow je so narodnu drastu woblekło, štož farar Beno Jakubaš chwalobnje wuzběhny. Maćerje­ njeběchu jenož wołtarnišćo rjenje spřihotowali, ale cyły wotběh sobu organizowali. Serbsku kaž tež němsku Božu mšu su dujerjo­ sobu wobrubili. Přichodny wjeršk Radworskeje wosady budźe 14. meje firmowanje. Foto: Bosćij Handrik

Mjeztym hižo 22. raz su sobotu w Budyšinje dźeń měšćanskeho lěsa přewjedli. Něhdźe 60 wobdźělnikow poda so w lěsu pod Čornobohom na slědy kamjentnych pomnikow.

Budyšin (CS/SN). Andreas Bültemeier, kiž je hromadźe z Thomasom Sobczykom knihu wo pomnikach w hornjołužiskich lěsach spisał, rozłoži, zo je w lěsach pod Čornobohom wjele tajkich swědkow zašłosće. Jónu su to mězniki, kotrež wobsydstwowe poměry rjaduja. Wšako njesłušeja wšitke lěsne płoniny wokoło Čornoboha městu Budyšinej. Jedyn z najnjewšědnišich kamjentnych pomnikow je na priwatnej ležownosći. Ale z dowolnosću wobsedźerja smědźachu sej wobdźělnicy ekskursije wobhladać refor­maciski pomnik, kotryž nadeńdźechu wosrjedź lěsa. Stworił bě jón Kumwałdski kamjenjećesar­ George Weickert składnostnje 300. jubileja reformacije 1817. Do wulkeho njewobdźěłaneho kamjenja zadypa wón wopomnjenski tekst.

Šwarna ličba hudźbnych cyłkow beneficny nyšpor wuhotowała

Chrósćicy (CRM/SN). „Najdrohotniši hudźbny nastroj w našej cyrkwi su pišćele. Wone su wšědnje trěbne“, praji Chróšćanski farar Měrćin Deleńk. Nětko je wjetša techniska reparatura trěbna. Wuměnjenje elektroniskeho wuhotowanja njeje hižo wobeńdźomne. Budyska pišćeletwarska firma poskići akceptabelny namjet. Financne móžnosće wosady pak wón přesahuje. Wčera, njedźelu, su tuž wosadne hudźbne a spěwne cyłki beneficny nyšpor wuhotowali.

We wołtarnišću přednjesechu dujerjo pod nawodom Jurja Hejduški a Jurja Jakubaša swjedźenske kruchi. Při tym złožowachu so předewšěm na pozběhowacy błyšć baroka, štož wosebje swjatočnje skutkowaše. Woni přewodźachu toho­runja kěrluše wosadnych. Dźěćaca šola z nawodnicu Gabrielu Brězanowej poda přihódny dźěl swojeho angažementa k Božej česći a spomóženju wěriwych. Kěrluš „Naš Knjez přesadźuje hory“ zaspěwa cyłk młodostnych Precatio. Dalšu zajimawu hudźbnu barbu poskićištaj Christin Popelic na pianje a jeje bratr Daniel­ ze spěwnym solom.

Třo zranjeni po zražce

Ohorn. Při ćežkim wobchadnym njezbožu na awtodróze A 4 pola Ohorna su so wčera něhdźe w 22.30 hodź. tři wosoby ćežko zranili. Dokelž njebě jasne, hač su dalše wosoby potrjechene, su za nimi pytali, njejsu pak nikoho namakali.

Socialne poradźowanje

Chrósćicy. Prawiznik, zapósłanc Sakskeho krajneho sejma a wokrjesny radźićel Hajko Kozel (Lěwica) přeproša jutře, wutoru, wot 15 do 17 hodź. na socialne poradźowanje do Chróšćanskeho Krawčikec hosćenca. Zhromadnje z prawiznikom Gregorom Janikom, kiž je w socialnym prawje wosobje wobhonjeny, pomha wón husto w socialnych prašenjach jewjace so problemy rozrisać. Termin dojednać móža sej zajimcy pod telefonowym čisłom 03591/ 31 89 904.

Hudźba z tekstami Jurja Brězana

Budyšin. Na komornym wječoru Serbskeho­ ludoweho ansambla srjedu, 26. apryla, w 19.30 hodź. w Budyskej Röhrscheidtowej bašće pytaja hudźbnicy trójki­ Trio con moto dialog z knihu Jurja Brězana „Moja archa Horni Hajnk“. Dialog­ je sensibelny, zabawjacy, ale tež brizantny, z widom na łamliwosć našeho swěta, z kotrymž bjezstarostnje wobchadźamy. Hudźbnicy Hanka Tiedemann (prěčna fleta / j.h.), Bettina Witke (husle / j.h.) a Helfried Knopsmeier (violoncello) přednjesu twórby zańdźenosće a přitomnosće, kotrež chcedźa hrajkajo z powědančkami Jurja Brězana splesć. Čitanja budu w němskej rěči.

Wojerecy/Njeswačidło (SN). Z nazběranymi pjenjezami z darowanskeho lika w swojim tropowym domje podpěruje Wojerowski coo nětko Njeswačansku přirodoškitnu staciju. „Za nas jako zwěrjenc je škit družin a přirody najwažniši. Tohodla so wjeselimy, hdyž móžemy Njeswačansku přirodoškitnu staciju při jeje wulkotnym dźěle podpěrać“, praji coologiski nawoda zwěrjenca Eugène Bruins k nowemu partnerstwu z Njeswačanskimi přirodoškitarjemi.

Eugène Bruins je fachowc za amfibije a reptilije. Z dźěłom přirodoškitneje stacije a jeje towarstwa je to wón njedawno bliže zeznajomił, jako pomhaše w Njeswačidle na kromje puća nazběrane krokawy­ přez puć k městnam jich njer­kanja nosyć. Dźěći, kotrež so we wobłuku swojeho prózdninskeho campa na akciji wobdźělichu, je Eugène Bruins minjene dny po Wojerowskim coowje wodźił a jim pokazał, kak so tam wo přirodoškit staraja. Dalše tajke kooperaciske předewzaća­ mjez zwěrjencom a staciju maja slědować.