Waršawa. Pólska so dale spjećuje ćěkancow, kotřiž w lěhwach w Grjekskej a Italske žiworja, do kraja pušćić. Komisija Europskeje unije bě minjenu wutoru Pólsku, Čěsku a Madźarsku direktnje namołwiła a sej doraznje žadała, „so skónčnje hibać“ a swojej winowatosći jako čłon EU wotpowědować. Komisija EU chcyła něhdźe 160 000 ćěkancow po cyłej Europje rozdźělić. Dokelž njeje Pólska dotal ani jeničkeho ćěkanca přiwzała, hrozy jej nětko drastiske chłostanje. Ministerska prezidentka Beata Szydło je bjezposrědnje po apelu EU hišće raz potwjerdźiła, zo njeje scyła móžno migrantow přiwzać. Pólska je po jeje słowach dotal štyri miliony złotych přewostajiła, zo móhli žiwjenske wuměnjenja w lěhwach ćěkancow we wukraju polěpšić.
PADUSTWO, kajkež sej je čłowjek njewšědniše a zdobom chrobliše njemóže předstajić, sta so spočatk tohole tydźenja w Ježovje, wsy z něšto wjace hač 700 wobydlerjemi na južnej Morawje njedaloko Hodonína. Njeskutk je dźě wam hotowa „köpenikiada“, móže dźě so bjeze wšeho runać wonemu znatemu „hauptmannskemu“ dyrdomdejej sławno-njesławneho Friedricha Wilhelma Voigta lěta 1906 w stolicy Němskeho kejžorstwa. Ježovski skućićel je, wudawajo so za policista, w městnej wotnožce Čěskeho pósta sej „wobstarał“ króny po dźesaćitysacach.
Moskwa (dpa/SN). Ruski prezident Wladimir Putin je nowemu francoskemu prezidentej Emmanuelej Macronej telefonisce k wuzwolenju do zastojnstwa gratulował. Wobaj statnaj šefaj so na to dojednaštaj, zo „w aktualnych mjezynarodnych a regionalnych prašenjach, kaž na přikład w boju přećiwo terorizmej, hromadźe dźěłataj“. Tole wuchadźa z wčerawšeje zdźělenki Krjemla w Moskwje. Nimo toho chcetaj wobaj tradicionalne přećelske rusko-francoske poćahi dale pohłubšić, kaž rěkaše.
Paris a Moskwa chcetej měrowe rozmołwy w tak mjenowanym „normandiejowym“ formaće dale wjesć. W nim so Francoska zhromadnje z Němskej prócuje, w konflikće na wuchodźe Ukrainy posrědkować a dalšej eskalaciji zadźěwać.
We wólbnym boju wo prezidentstwo w Francoskej bě Moskwa wospjet signalizowała, zo je prawicarskej populistce Marine Le Pen přichilena. Putin bě ju hakle w měrcu w Moskwje přijał. Fachowcy tuž z toho wuchadźeja, zo budźe poměr mjez Putinom a Macronom skerje wobćežny.