Berlin/Drježdźany (dpa/SN/K). Dźiwajo na to, zo přichadźa do Němskeje spochi wjac ćěkancow, wołaja kraje a politikarjo za skutkownišej podpěru ze stron Zwjazka. Tak žada sej Sewjerorynsko-westfalski nutřkowny minister Ralf Jäger (SPD) wot Zwjazka „wjace financielneje zamołwitosće, zo by so komunam při zaměstnjenju přichadnikow wolóženje dóstało“, rjekny Jäger nowinje Die Welt. Trěbna je po jeho słowach pawšala na hłowu. Wobchadźenje z ćěkancami je narodny nadawk. Mjeztym je „to najwažniše, zadźěwać tomu, zo stanu so ćěkancy bjezdomni“. Politikar SPD wupraji so tež za to, próstwy wo azyl spěšnišo wobdźěłać. Nimo toho měli imobilije Zwjazka, na přikład kaserny, lóšo jako přebywarnje wužiwajomne być.
Dowěrnik zwjazkoweho knježerstwa za integraciju Aydan Özoguz (SPD) sej wot Zwjazka žada, podpěru komunam nastupajo ćěkancow na znajmjeńša dwě miliardźe eurow wob lěto podwojić. „Je njezbytne, zo poskići Zwjazk komunam klětu čujomnje wjetšu pomoc“, Özoguz zwurazni.
Njewšědna městnosć přenocowanja přiwisnika „gruftijoweje sceny“ w Frankskej je pěška njesměrnje wustróžiła. Muž bě při wječornym wuchodźowanju z psom na parkowanišću w Zirndorfje čorny kašć wuhladał a policiju informował. Ta namaka w nim 26lětneho spicy. Wón bě sej kašć sam kupił a tak wuhotował, zo móžeše w nim přenocować. To chcyše nětko zaso raz činić, kaž zastojnikam rozłoži. Tući jeho namołwichu, sej přichodnje druhe spanske městno pytać.
Njesměrnje so wadźacy a samo do so bijacy porik dyrbjachu policisća na awtodróze A 4 změrować. Žona a muž běštaj so wčera hižo w awće na so roznjemdriłoj. Mjez Kodersdorfom a Zhorjelcom biještaj so na pobóčnej smuze awtodróhi, doniž zastojnicy njezapřimnychu. Dotal njeje znate, čehodla so wonaj wadźeštaj a hač staj so zaso wujednałoj.
Dóstanu spěchowanske pjenjezy
Choćebuz (dpa/SN/ch). Centrum za čłowjeske prawa w Choćebuzu dóstanje něhdźe 312 000 eurow spěchowanja wot Zwjazka a Kraja Braniborskeje hač do lěta 2016. Pjenjezy słuža wobdźěłanju stawiznow w bywšim Choćebuskim jastwje. Při přepodaću spěchowanskeje zdźělenki kulturny statny sekretar Martin Gorholt wčera zwurazni, zo je bywše jastwo NDR symbol potłóčowanja a politiskeho přesćěhanja za čas nacionalsocializma kaž tež sowjetskeje wobsadniskeje mocy a diktatury strony SED. Lěta 2007 załožene nošerske towarstwo Centruma za čłowjeske prawa Choćebuz je 2012 wopominanske a zetkawanske městno wotewrěło a lěto pozdźišo trajnu wustajeńcu.
Podhlad zapalerstwa
Berlin/London (dpa/SN/K). Žołma ćěkancow nabywa rozměrow, zo to zamołwitym pomału přez hłowu rosće. K tomu přińdźe, zo dochadźa dale a husćišo k namócnym rozestajenjam w stanowych přebywanišćach, kaž kónc tydźenja w Drježdźanskim, hdźež běchu so přisłu- šnicy wšelakorych narodnosćow hroznje bili. Sakski minister za nutřkowne naležnosće Martin Ulbig (CDU) je hromadźe z dalšimi politikarjemi dźensa dopołdnja prowizoriske sydlišćo z tuchwilu 1 026 wobydlerjemi wopytał, zo by so wo połoženju próstwarjow wo azyl resp. wo atmosferje mjez nimi wobhonił. Kritizowało bě so, zo dyrbja ludźo přewusko hromadźe być a zo su hygieniske poměry njedosahace.