Přichod njewěsty

Freitag, 22. März 2024 geschrieben von:
Budyšin/ Zhorjelc (SN).  Čłonki a čłonojo IG Metall w němskich Alstom-twornjach su so po wjetšinje za to wuprajili, loni schwalene tarifowe zrěčenje přichoda wupowědźić. Ze zrěčenjom mějachu so někak 9600 dźěłowych městnow nachwilnje zachować. „Njeje wotwidźeć, zo budźe Alstom dojednanje dodźeržeć“, praji prěni społnomócnjeny IG Metall we wuchodnej Sakskej, Uwe Garbe a dale rozkładuje: „Management njeje hač donětka hišće zwurazniło, kak maja so rezultaty dołhich jednanjow kołowokoło zrěčenja přesadźić. Nawopak je Alstom samo připowědźił, zo chcedźa ludźi tež w němskich stejnišćach pušćeć.“ IG Metall pyta nětko za móžnosćemi dźěłowe městna zachować. Po informaciji zawoda je tuchwilu 290 dźěłowych městnow wohroženych. Stejnišći w Zhorjelcu a Henningsdorfje su zaso akutnje wohrožene. Loni w měrcu běštej so zawodna rada cyłkowneho koncerna a jednaćelstwo Alstom na to dojednałoj, zo so porno planam 1 300 dźěłowych městnow nješmórnje. Za to slubi zawodna rada, dowoloweho pjenjeza so wzdać, doniž njejsu wěste produkciske ličby spjelnjene.

Inwestuja do wuwića jězoriny

Freitag, 22. März 2024 geschrieben von:

Na regionalnej konferency Łužiska jězorina su zastupjerjo wšelakich wobłukow wóndano dźěłowe ćežišća hač do lěta 2026 wobzamknyli. Nadal chcedźa wjele pjenjez inwestować.

Kóšyna (AK/SN). We Łužiskej jězorinje maja hač do lěta 2026 dalše přistawy nastawać. Na jězorowym rjećazu ma priwatnikam a zjawnemu łódźnistwu potom móžno być, wot Złokomorowskeho jězora do dalšich jězorow jězdźić. Za turistow chcedźa dale Sedličanski-, Lejnjanski-, Bjezdowčanski- a Rański jězor dale wutwarić.

Tute cile wozjewi srjedu regionalna konferenca Łužiska jězorina. Na posedźenju w Kóšynje wobdźělichu so zastupjerjo turizma, komunow, wokrjesow a ministerstwow kaž tež towarstwow a zwjazkow. „Za lěto 2025 trjebamy přechodnje rjadowanje, zo by so łódźnistwo z pasažěrami mjez Saksej a Braniborskej po kanalach bjez łódźe ,aqua phönix‘ zrjadowało. Trjebamy jednotne rjadowanje łódźnistwa. Te hač do dźensa nimamy – hačrunjež staj wobaj nutřkownaj ministraj to slubiłoj“, podšmórny Siegurd Heinze, krajny rada wokrjesa Hornje Błóta-Łu­žica.

Poskićuje dokładne přepruwowanje woči

Freitag, 22. März 2024 geschrieben von:

Optometriske přepytowanje – kóždy fachowc njech hlada přez kromu swojeho talerja

Wjele staršich, kubłarjow a wučerjow sej rady njewě, hdyž zwěsća, zo so dźěćo přiběrajcy spodźiwnje zadźerža runje, hdyž wo čitanje abo ­pisanje dźe. Abo hdyž často skorža, zo je hłowa boli, a přepytowanja ­pola lěkarjow wuslědki njepřinjesu. Pomhać móhło jemu snano ­optometriske přepytowanje a z tym zwjetša zwjazany wizualny ­trening. W bliskej wokolinje – a to hnydom w Budyšinje – poskićuje ­tole optikar Rüdiger Lenz. Anja Nowakowa je so z nim rozmołwjała.

Knježe Lenzo, byšće sebje a swoju dźěławosć skrótka předstajił?

R. Lenz: Chcych so hižo wot 6. lětnika sem z optikarjom stać. Staršej wšak měještaj tajki wobchod a tak dožiwjach nimale wšědnje zajimawe dźěła wukubłančow a wukubłancow w dźěłarni, kotrež chcych tež wukonjeć. Tak podach so 1986 na wukubłanje, kotrež po třoch lětach zakónčich. Po tym čakaše na mnje wojerska słužba a pozdźišo dźěłach hišće dwě lěće jako fachowy dźěłaćer za wóčnu optiku pola rjemjeslniskeje komory w Drježdźanach.

Slepjanska ewangelska wosada je wčera wječor wospjet do wjesneho zetkawanskeho centruma na wobydlersku diskusiju wo přichodźe brunicoweho rewěra přeprosyła.

Slepo (AK/SN). Čłon brunicoweho wuběrka kraja Braniborskeje a rěčnik Zeleneje ligi René Schuster, přednošowaše srjedu wječor w zetkawanskim centrumje w Slepom wo přichodźe při brunicowej jamje. „Je hišće wjele wotewrjenych prašenjow. Předźěłanje plana za zdobywanje brunicy, wuswojenje priwatneho lěsa wot lěta 2026, podlěšenje hłowneho wobhospodarjenskeho plana brunicoweje jamy wot lěta 2026, podlěšenje ramikoweho plana wot lěta 2027 a dowolnosć w zwisku z prawom wody wot lěta 2027 su hišće wotewrjene.“

Chcedźa linijowy wobchad zmóžnić

Donnerstag, 21. März 2024 geschrieben von:

Loni je so łódź Aqua Phönix wohenja dla wobškodźiła. Nětko pyta zaměrowy zwjazk Łužiska jězorina za rozrisanjom, kak móhli łódźnistwo po wodźiznach zaručić.

Hory (AK/SN). Łódźnistwo za pasažěrow we Łužiskej jězorinje mjez Braniborskej a Sakskej ma so znowa po cyłej Europje wupisać. Tole wobzamkny dźensa tydźenja jednohłósnje zwjazkowa zhromadźizna zaměroweho zwjazka Łužiska jězorina Sakskeje. Zwjazk a susodny zaměrowy zwjazk Łužiska jězorina Braniborska zhromadnje na wupisanju dźěłatej. Gmejna Hamor je jimaj partner, wšako ma so łódźnistwo na Bjerwałdskim jězoru jako opcija we wobłuku wupisanja sobu zapřijeć. Zaměr je, kraje přesahowace łódźnistwo za pasažěrow najpozdźišo wot sezony w lěće 2026 zaso zmóžnić.

„To drje njefunguje!“

Mittwoch, 20. März 2024 geschrieben von:

Kriterije za zatřělenje problematiskich wjelkow změnili

Budyšin (SN/BŠe). Zwjazkowe kraje z přiběracymi wjelčimi populacijemi su so minjeny tydźeń na to dojednali, zo maja so kriterije za zatřělenje tak mjenowanych problematiskich wjelkow změnić. Wotpowědne kónčiny smědźa same postajić, kak ma so postupować. Ale po wšěm zdaću je to wšo druhe hač jednore.

„Smy informaciju na wědomje brali. Přichodne dny je rozmołwa ze sakskim fachowym běrowom wjelk předwidźana, zo móhli přesadźenje nowych rjadowanjow wobrěčeć. Hakle potom móžemy wo tym hódnoćić“, zdźěli nowinska rěčnica krajnoradneho zarjada Budyskeho wokrjesa Sabine Rötschke.

Rjemjeslnicy hospodarska móc

Dienstag, 19. März 2024 geschrieben von:

Budyšin (CS/SN). Woni su ći, kotřiž wysoko hódnotne dźěło wukonjeja – rjemjeslnicy. Tohodla je wažne, zo so stajnje dosć dorosta wuwučuje. Wot něhdźe 4 000 rjemjeslniskich zawodow we wobwodźe Budyskeje rjemjeslniskeje komory jenož něhdźe dźesać procentow młodostnych wukubłuje. Swjatočnosć k wuwjazanju wučomnikow je tuž tež dźak wukubłarjam. Po tři a połlětnym wukubłanju su zastupjerjo komory minjeny pjatk w Budyskej Krónje wučomnikow z wobłukow metalotwarstwa, mechanikarjow sanitarnych, tepjenskich a klimowych připrawow, elektronikarjow a třěchikryjerjow z wukubłanja wuwjazali. Wokrjesny rjemjeslniski mišter Frank Scholze so wjeseleše, zo zaso wjace wučomnikow wukubłanje zahaji a zakónči. Wuznam rjemjesła zaso přiběra, přetož je fachowa wěda rjemjeslnikow dale a trěbniša. Bohužel politikarjo špatne połoženje srjedźneho stawa dosć na wědomje njebjeru. Běrokratija zadźěwa často tomu, zo so rjemjeslnicy zesamostatnja.

505 kilometrow we Łužicy z kolesom po puću

Freitag, 15. März 2024 geschrieben von:

Martin Steiniger je šćežku, na hórnistwo wusměrjenu, čestnohamtsce přepruwował a wjele njedostatkow wotkrył

Štóž kolesuje, dožiwja krajinu z hinašeho wida. „Nasrěbaš so čerstweho powětra a so nad přirodu zawjeseliš. Słónco, wětřik, dešć, wónje – wšo to wo wjele intensiwnišo na wědomje bjerješ hač hewak“, powěda Martin Steiniger z Brjazyny (Brieske). Wóń čerstweho chlěba pola wjesneho pjekarja ma 50lětny krajměrjenski inženjer najradšo. Za turistiski zwjazk Łužiska jězorina kolesowaše wón loni čestnohamtsce po 505 kilometrow dołhej delnjołužiskej čarje hórnistwa. Při tym pruwowaše wuhotowanje taflow, kajkosće pućow, pokazki na zajimawostki, poćah k hórnistwu a móžnosće za přikusk, gastronomiju kaž tež pře­nocowanje.

Škitna sćěna dale tema zwady

Mittwoch, 13. März 2024 geschrieben von:

Zwada wo wodoškitnym projekće koncerna LEAG traje dale. Přičina je njedo­twarjena podzemska škitna murja při brunicowej jamje Wjelcej-juh. Wobswětowe zwjazki su přećiwo přizwolenju braniborskeho krajneho hórnistwoweho zarjada (LGBR) skoržili.

Choćebuz (dpa/SN). LEAG njeje dotal škitnu murju mjez Łužiskej jězorinu a brunicowej jamu Wjelcej-juh do­twarił. Z njej chcedźa tomu zadźěwać, zo woda z rjećaza łužiskich jězorow do hišće aktiwneje jamy čeće. Najebać njedospołnu škitnu murju je krajny hórnistwowy zarjad dowolił, zo LEAG wodu wužiwa.

Wobswětowi škitarjo wočakuja problemy, woda móhła so zhubić abo přez blisku jamu zanjerodźena być. Tohodla wobskorža nětko hórnistwowy zarjad. Tón pak po słowach swojeho prezidenta Sebastiana Fritze wumjetowanja wotpokazuje, „problem za region, saněrowanje hórnistwa a wobběh wody z toho spó­znać njemóžu“.

Po informacijach LEAG je 70 procentow škitneje murje hotowych. Twarske dźěła chcedźa hač do 2030 dokónčić.

Dowol wšitkim w regionje zmóžnić

Mittwoch, 13. März 2024 geschrieben von:

Turistiski zwjazk Łužiska jězorina je njedawno projekt „Syć bjez zadźěwkow we Łužiskej jězorinje“ zahajił. Spěchowanski projekt ma tři lěta trać. Zaměr naprawy je turizm bjez zadźěwkow spěchować a wutwarić. Pućowanje a dowol bjez barjerow je přiběracy segment w turizmje a skići wulki ekonomiski potencial. Tohorunja přinošuje wobłuk k tomu, zo so dowolowy region wuspěšnje dale wuwije. Z jednotliwych naprawow, kaž na přikład lift w Złym Komorowskim přistawje, profituja domoródni a hosćo kónčiny. Nimo toho je hišće wjele dalšich wobłukow, kotrež hodźa so wobdźěłać, tak zo je region za wšitkich zajimcow dožiwjenjowpołny wuhotowany.

Foto: turistiski zwjazk Łužiska jězorina/Nada Quenzel

Serbska debata

Neuheiten LND