We wsy bórze zaso wěrowanja
Radwor (UM/SN). Stawniske wěrowanja w Radworju hižo wjele lět nimaja. „Wobsteješe raz móžnosć, so na žurli gmejnskeho zarjadnistwa wěrować dać“, wě wjesnjanostka Madeleine Rjenčowa. A tež w torožu blisko hrodu su so pory hižo wěrować dali, ale to bě před wjele lětdźesatkami. „Naš wotpohlad wot wšeho spočatka bě, torožo zjawnosći přistupnić, a to nic jenož jónu wob lěto k dnjej wotewrjeneho pomnika“, praji wobsedźerka Annette Lehder.
To hodźeše so derje k přeću gmejnskeho zarjadnistwa, nimo Minakałskeho hrodu dalše městno za stawniske wěrowanja w Radworju samym wutworić. A tak su mału wjelbowanu žurlu, kotraž je hnydom pódla wjelbowaneho přejězda, spočatk lěta 2025 jako městnosć wěrowanjow wěnowali. Wobzamknjenje Radworskeje gmejnskeje rady za to trěbne njebě, za to pak Malešanskeje. „Přičina je, zo přisłuša Radworska gmejna Malešanskemu stawniskemu wobwodej a Malešanska gmejna tónle nadawk za nas runje tak sobu wukonja kaž za Wulkodubrawsku gmejnu“, Madeleine Rjenčowa rozłoži.
Swoje durje šěroko wočinili
Kulow. Zo bychu šulerjam 4. lětnika, jich staršim a dalšim zajimcam swoje kubłanišćo předstajili, wuhotowachu wučerjo a šulerjo Kulowskeje wyšeje šule „Korla Awgust Kocor“ tele dny dźeń wotewrjenych duri. Mnozy wopytowarjo so po šulskim twarjenju rozhladowachu a so wo wobsahach wučby kaž tež wo wšědnym dnju na šuli wobhonichu. Z eksperimentami spytachu fachowi wučerjo přichodnych šulerjow za jednotliwe předmjety zahorić. Nimo toho rozłožichu jim najwšelakoriše cyłodnjowske poskitki. Tež něhdyši šulerjo do swojeho bywšeho kubłanišća pohladnychu a něhdyšich wučerjow postrowichu.
Tekst a foto: Kerstin Streit
Hudźba kaž wubědźowanje
Johannes Krahl na Chróšćanskich pišćelach koncertował
Chrósćicy. Směć dožiwić njewšědnje wuspěšneho 26lětneho organista Johannesa Krahla je jara wjele zajimowanych njedźelu do Chrósćic k nyšporu pohnuło. Kaž wosadny farar Měrćin Deleńk při witanju wuzběhny, je młody muž we Wotrowskej pěstowarni běžnje serbsce nawuknył a na Serbskim gymnaziju w Budyšinje maturował. Na předwječoru swjedźenja swjateho Bosćana, kotrehož we wosadźe přez lětstotki z wosebitymi wobrjadami wopominaja, běše hudźbny nyšpor dźěl česćowanja martrarja we 800lětnych Chrósćicach.
Běše to prěni raz, zo z Dobranec pochadźacy a nětko w Lipsku žiwy Johannes Krahl na tudyšich Eulowych pišćelach hraješe a z improwizaciju na kěrluš „Bosćano, ty wosrjedź rjekow“ překwapi. Šěsć a poł minutow rozpominaše hudźbnik z registrami pišćelow hłósny material kěrluša w najwšelakorišich fasetach zynkow a rytmow, skerje cunjo hač z duše a wutroby wótře, kaž wosada tutón woblubowany kěrluš z pjera Michała Nawki wot lěta 1951 z Wosadnika spěwa.
Při stanowanišću so paliło
Krótkopowěsće (21.01.25)
Tři hawby za Juwel we Wjazońcy
Wjazońca. Hosćenc z mjenom Juwel we Wjazońčanskim hotelu Schumann je w najnowšim wudaću „Gault&Millau“ tři čorny hawby spožčeny dóstał. Testowarjo su tuž přeswědčeni, zo kucharjo hosćenca wulce wuměłsce warić zamóža a kreatiwnje a kwalitatiwnje dźěłaja. Po cyłej Sakskej su 27 hosćencow w přewodniku restaurantow „Gault&Millau“ mjenowane.
Piwarz chce lutować
Drježdźany. Hladajo na napjatu hospodarsku situaciju chce sakski financny minister Christian Piwarz (CDU) lutować. W nowym dwójnym etaće zwjazkoweho kraja štyri miliardy eurow pobrachuja. Piwarz chce předewšěm we wobłukach kóšty za personal, budget ministerstwow a spěchowanske programy lutować. Tohorunja Piwarz wo tym rozmysluje fonds pensijow za zastojnikow přikrótšić.
Njewšědne neandertalske sydlišćo
Policija (21.01.25)
Ze zmylka ničo nawuknyła
Wojerecy. Móhłrjec staru znatu su policisća njedźelu wječor we Wojerecach zadźerželi a kontrolowali. 44lětna žona bě tam ze swojim Opelom po puću, štož pak wona scyła njeby směła. Přetož wona steješe pod wliwom alkohola. Pola njeje naměrichu 0,5 promilow w kreji. Hórje pak bě, zo žona hižo žanu jězbnu dowolnosć njeměješe. Papjery běchu jej mjenujcy hakle před krótkim wobchadneho delikta dla wotewzali. Zo bychu dalšim jeje přeńdźenjam zadźěwali, sej policisća tónraz kluč jeje awta wobchowachu. Nimo toho zahajichu přećiwo 44lětnej jednanje dla jězdźenja bjez jězbneje dowolnosće.
Předstaja nowu knihu
Slepo. Drasta Slepjanskich Serbow, kotruž nošachu něhdy na křćiznach, steji w srjedźišću noweje knihi „Gładźarnica“. Ju předstaji towarstwo Kólesko srjedu, 22. januara, w 17 hodź. w Slepjanskej cyrkwi. Lawdaciju změje dr. Justyna Michniuk. Spěwna skupina towarstwa Kólesko zarjadowanje hudźbnje wobrubi. Wšitcy zajimcy su wutrobnje přeprošeni.
Radźićeljo wuradźuja
Njebjelčicy. Přichodne posedźenje Njebjelčanskeje gmejnskeje rady wotměje so jutře, srjedu, w 19 hodź. w sydarni gmejnskeho zarjadnistwa w Njebjelčicach. Mjez druhim póńdźe wo twarski plan w Pěskecach.
W duchu na putnikowanje po Jakubowym puću hač do Santiaga de ...
Rynk ludźi dale a dlěši był
Rowno (JoS/SN). Wjele dźěła čakaše minjeny tydźeń na pilnych pomocnikow w Rownom. Na Njepilic statoku přeprošowachu na wulke swinjorězanje. Bě to mjeztym hižo 24. tajki swjedźeń po załoženju tamnišeho spěchowanskeho towarstwa. Po tym zo běchu něšto dnjow do toho hišće camprowali, so akterojo hižo dźensa před tydźenjom prěni raz zetkachu, zo bychu wšo trěbne přihotowali. Kóždy jednotliwc wědźeše, kotre nadawki ma. Na dworje bě wšědnje něhdźe 20 pomocnikow zasadźenych. To njeběchu jenož čłonojo towarstwa, ale mnozy dalši zwólniwi ze wsy.
Dalše plany za jězorinu
Gmejna měri so na projekty při Lejnjanskim a Parcowskim jězoru
Hory (AK/SN). Turistiski přichod łužiskeje jězoriny chce gmejna Halštrowska hola dale aktiwnje přewodźeć. Tole wuzběhnje wjesnjanostka Antje Gasterstädt (CDU), hdyž zhladuje na lońše lěto 2024 a hdyž hlada na přichodne měsacy. Konkretnej projektaj stej přizamknjenje medijow při Lejnjanskim jězoru a twar přistawa při Parcowskim jězoru.
