Budyšin. Twjerde a papjerjane pjenjezy, medalje, wuznamjenjenja, pohladnicy, literatura, listowe znamki a wšo móžne dalše, štož ludźo zběraja, steja w srjedźišću jutrowneje bursy zběrarjow w Budyšinje. Wona wotměje so wulki pjatk, 18. apryla, wot 9 do 14 hodź. w Budyskim Serbskim domje. Tam móža so zajimcy poradźować dać. Wo ćělne derjeměće budźe postarane..

Wosebity poskitk za prózdniny

Zhorjelc. Pod hesłom „Mission Exoplanet“ wuhotuje Astrocentrum Łužica wot 21. hač do 25. julija wosebity poskitk za prózdniny w Zhorjelcu a wokolinje. 20 dźěći a młodostnych změje w tym času składnosć, dopołdnja slědźersce skutkować a so popołdnju sportowym zaběram wěnować. Mjez druhim chcedźa za nowymi planetami w swětnišću pytać a k nim swětnišćowu łódź pósłać. Nimo toho steja kopańca, kicker a krosnowanje na programje. Zajimcy njech přizjewja so hač do 31. meje e-mailnje pod mission-exoplanet.de.

Zetkanje zabawne a powučne

Jutrońčku drje budźe klóšter Marijina hwězda jedne z tych městnow, hdźež sej wosebje wjele ludźi křižerjow wobhlada. Hižo krótko po jutrach pak změja tam dalšej wjerškaj.

Pančicy-Kukow (SN/MWj). W prózdninskich dnjach po jutrach móžeš na kló­šterskej zahrodźe w Pančicach-Kukowje hnydom dwě zarjadowani wopytać. Srjedu, 23. apryla, pokročuja tam rjanu tradiciju a organizuja dźeń dožiwjenja za swójby. Wot 14 do 18 hodź. wuhotuje Křesćansko-socialny kubłanski skutk zajimawe hodźiny za staršich z dźěćimi. Najwšelakoriše poskitki přeprošuja na, spěwanje, woptawanje a pohibowanje. Při debjenju jutrownych jejkow budu wobdźělnicy kreatiwnosć a wušiknosć trjebać. Při klóšterskim wobchodźe móža wopytowarjo w tomboli rjane myta dobyć. Nimo toho poskića wodźenja po klóštrje.

Wosebity jutrowny postrow wuhladaš tuchwilu w Róžeńće. Na skłoninje k putniskej łuce su wjetšu ličbu cyblow narcisy do zemje tykali, kotrež tuchwilu rjenje kćěja. Stupiš-li so na napřećiwny bok jězdnje, abo tež z awtom nimo jěducy wučitaš HALELUJA. Škoda, zo tónle postrow poněčim zaso zwjadnje. Najprjedy raz pak smědźa so wjesnjenjo a wšitcy dalši nad njewšědnym ­napohladom zwjeselić. Foto: Alfons Ryćer

Chrósćicy (SN/MiR). Dočasna starosć wo strowotu woči je zaměr mobilneje wóčneje ambulancy za wobydlerjow na wsach. Pjatk po jutrach, 25. apryla, přijědźe Mirantus-mobil do Chrósćic k wjacezaměrowej hali „Jednota“. Kaž Simon Zabel, nawoda projekta Mirantus Health zdźěli, su hižo wuspěšnje w druhich kónčinach skutkowali. „Wjeselimy so, zo smy zhromadnje z Chróšćanskej gmejnu prěni termin za wopyt našeho wóčneho mobila našli.“ Wukubłani optometrisća přepytuja z modernymi nastrojemi woči pacientow, mjez druhim ćišć we wóčku. Zdobom woni měrja, kak wótrje ludźo widźa a zwěsća sylnosć škleńcow za nawoči. 69 eurow maja zajimcy za wužiwanje poskitka zapłaćić. Wuslědki přepy­towanja sposrědkuja so fachowym lěkarjam, kotřiž informacije z podpěru Mirantus­-platformy wuhódnoća. Pacienća dóstanu wo tym pisomnu informaciju a po potrjebje termin za rěčnu hodźinu online abo za wopyt lěkarskeje praksy. Zajimcy, kotřiž chcyli so w mobilu w Chrósćicach přepytować dać, njech so telefonisce pod čo. 030/232 578 130 abo online pod mirantus.com/crostwitz­ přizjewja.