Serbja trjebaja mjeńšu šulu
W Braniborskej so rozšěrjenju Delnjoserbskeho gymnazija spjećuja
Choćebuz (SN/mb). Digitalnje je Mina Witkojc (1893-1975) zaso z rowa stanyła: Pod jeje mjenom je mejlka z pokazku na wčerawše wuradźowanje wuběrka za kubłanje, sport, kulturu a serbske naležnosće Choćebuskeje měšćanskeje rady dóšła. Po zhromadnym posedźenju z wuběrkom za twar a wobchad su so wuběrkownicy swójskemu dnjowemu porjadej wěnowali, na kotrymž steješe tema „zaručenje a zesylnjenje serbskeho profila specielneje šule Delnjoserbski gymnazij“. Za to bě šula, kotraž je w nošerstwje Choćebuza, prezentaciju přihotowała.
„Njeeksistuje jenož ‚ta jedna‘ serbska identita“
Tworjaca wuměłča a filmowča Hella Stoletzki zaběra so kritisce z bytostnym zwobraznjenjom serbskeho žiwjenja
„Identita“ je wosebje w Serbach stajna tema. Tele wopřijeće sugeruje něšto trajace a wobstajne. A wězo trjebaš wěste kajkosće, kotrež ći zmóžnja, w našim turbulentnym swěće při sebi wostawać. Něšto, štož spožča zepěru. Přetož to jeničke wobstajne w žiwjenju su změny. Tak je identita cyle wosobinska wěc, a tola čas žiwjenja napjate prašenje. Štó sy, zwotkel přińdźeš a dokal chceš? Sy spokojna duša, abo teptaš njejapcy w stawje kognitiwneje disonancy? Kóždy čłowjek ma sam za sebje rozsudźić, štó a što je. Někotrych tajkele prašenja mjenje zaběraja, tamnym pak su z přičinu wěnować tejle tematice swoje wuměłstwo a žiwjenje. Hella Stoletzki je w tym zwisku tuchwilu w Serbach z najlěpšim přikładom. Jeje twórby zaběraja so bytostnje ze zwobraznjenjom serbskeho žiwjenja a kritiskim rozestajenjom, hač traděrowane předstawy wo serbskich identitach dźensa hišće přitrjechja.
Z konceptom pokročować
Chrósćicy (SN). Fachowy dźeń k temje „Koncept 2plus – analyzy a opcije“ su sakske kultusowe ministerstwo, krajny zarjad za šule a kubłanje (LaSuB) a Budyski Rěčny centrum WITAJ minjenu sobotu w Chrósćicach přewjedli. Medije njeběchu na zarjadowanje přeprošene. Wčera su jim organizatorojo němsku nowinsku zdźělenku k dispoziciji stajili.
W dwěmaj přednoškomaj buchu w Chrósćicach wuslědki ewaluacije koncepta 2plus předstajene. Prof. Jonas Flöter z Lipšćanskeje uniwersity reziměrowaše wuslědki ewaluacije z jasnym doporučenjom, z konceptom 2plus tež přichodnje na serbskich a serbsko-němskich šulach pokročować. Mnohe přičiny rěča pozdatnje za to, wšěch šulerjow dale w kombinaciji zhromadneho wuknjenja a wuknjenja w rěčnych skupinach wuwučować. W tutym zmysle ma so dźěło ze staršimi intensiwować a dźěło koordinatorow 2plus na šulach zaměrnje wukonjeć.
Dohlad do słucharnje
Nowe puće za serbske dźěći: Online-čitanja w „dźěćacej uniwersiće“
Radwor (SN/VaŽ). Na Wulkej žurli Němskeho hygienoweho muzeja wotmě so wčera wječor dźěćace čitanje z titulom „Njeskónčnosć w matematice“. Što woznamjenja „njeskónčnje“ poprawom? Husto myslimy na něšto gigantiske abo bjezčasne – wjetše hač wšitko, štož znajemy! Tola je woprawdźe něšto na swěće, štož je njeskónčne? W matematice su w běhu stawiznow puće wotkryli, z konceptom bjezkónčnosće wobchadźeć. Su samo swójski symbol za to stworili: ležacu wosom (∞).
Serbšćinu z radosću a kreatiwitu wuknyć
Pisany swjedźeń w Slepom jako přinošk k Europskemu dnjej rěčow
.Serbšćina móže so z wjeselom, rozpalom a kreatiwitu nawuknyć. To wotbłyšćowaše so njedawno na rěčnym swjedźenju, kotryž wotmě so na Slepjanskim farskim dworje. Organizowali a wuhotowali su jón rěčnimotiwatorojo syće za serbsku rěč a regionalnu identitu (ZARI). „Swjedźeń zarjadowachu we wobłuku prěnich akciskich dnjow po cyłej Sakskej kołowokoło susodstwa a rěčow. To je naš přinošk za Europski dźeń rěčow“, podšmórny organizatorka Juliana Kaulfürstowa. Wona je sobudźěłaćerka Domowiny a wot 2023 motiwatorka za serbsku rěč w regionje Slepo a Wochozy.
Z błyšćatymi wočimi steja dźěći w „Fabmobilu“, kiž je ...
Studenća Serbow zeznali
Budyšin (Łu/SN). Sydom studentow pedagogiki z Techniskeje uniwersity z Liberec pobychu wčera w Budyšinje, zo bychu so ze Serbami zeznajomnili. W Serbskim instituće powita studentow druheho a třećeho studijneho lěta dr. Susana Hozyna a předstaji jim wědomostny institut. Referent Domowiny za kulturu a wukraj Clemens Škoda rozłoži wopytowarjam w Serbskim domje dźěławosć a skutkowanje třěšneho zwjazka. Dalša stacija ekskursije studentow bě Smolerjec kniharnja. A skónčnje wopytachu hosćo ze susodneho kraja Serbski muzej, kotrež jim sobudźěłaćerka institucije Monika Ošikowa předstaji.
Studentow kursa „narodne mjenšiny Pólskeje a Němskeje“ přewodźeštaj docent prof. Petr Kaleta a prof. Hubert Chudzio, direktor Narodno-kubłanskeje komisije Uniwersity Krakowa.
„Njeje to prěnja a njebudźe to poslednja studijna jězba do Łužicy, zo bychu so młodźi studenća ze stawiznami, kulturu a rěču Serbow zeznajomnili“, zwurazni docent Petr Kaleta. Wón běše wjelelětny předsyda Towarstwa přećelow Serbow w Praze a je čłon Maćicy Serbskeje.
Što w prózdninach činić?
Nazyma je so započinała a oktoberske prózdniny steja před durjemi. Štóž doma sydać a čas brojić nochce, město toho pak za zajimawej zabawu pyta, tón dyrbi so do spěcha měć. Mnohe prózdninske poskitki su mjenujcy hižo wuknihowane.
Budyšin (SN/lmc). Štóž chce so do swěta bajow zanurić, je wutrobnje do Serbskeho muzeja w Budyšinje přeprošeny. W nazymskich prózdninach zaběraja so tam z bajowej postawu Krabata kaž tež z historiskej wosobinu Janka Šajatovića. Zajimowani šulerjo móža so na wodźenje podać, wustajeńcu wobdźiwać, so wot kuzłarskich činkow zakuzłać dać abo so na paslenskich akcijach wobdźělić. Cyły wuběr prózdninskich poskitkow namakaće na webstronje Serbskeho muzeja pod hesłom „prózdninski program“.
Dekanatne dušepastyrstwo za dźěći přeprošuje 10. abo 17. oktobra šulerjow 1. a 2. lětnika na zhromadny dźeń pod hesłom „Jězus – mój přećel“ do Don Boskoweho domu we Worklecach. Přinošk wučinja pjeć eurow. Zajimcy njech so hač do 4. oktobra pod wotpowědnym linkom www.posol.de. přizjewja. Ličba městnow je wobmjezowana.
Namrěwstwo Łužicy sej hrajo wotkryć
Ralbicy (SN). Překwapjenku dožiwichu wčera šulerki a šulerjo 5. lětnika Ralbičanskeje serbskeje zakładneje šule. Woni dožiwichu we wučbje hrajo, kotre městnosće UNESCO nam naša Łužica skići. Nawodnica projekta „Namrěwstwo Łužicy“ (UNESCO 5) Susann Troppa, je zhromadnje z referentom Domowiny Clemensom Škodu w Ralbicach pobyła a memory-hru přepodała. We wučbnej hodźinje su dźěći šulski material hnydom wuspytali a sej tak mnohostronske herbstwo Łužicy hrajo wotkryli.
„Wulkotnje je widźeć, kelko wjesela dźěći při hraću a hódanju mějachu. Rjenje je tež, kelko wědy móžachmy wo namrěwstwje Łužicy w běhu šulskeje hodźiny zabawnje sposrědkować“, Susann Troppa zwurazni. Nimo hry přepoda wona nawodnicy wyšeje šule Milence Koberowej kaž tež UNESCO-koordinatorce šule Francisce Wróblowej wjacore wudaća serbskeho dźěćaceho časopisa Lutki z informacijemi wo UNESCO-městnach.
