Wo „Warnočanskim času“ rěčał

Donnerstag, 17. Januar 2019 geschrieben von:

Z tołstej mapu dokumentow wo po­wójnskich lětach w sewjernych Čechach, hdźež přebywaše tehdy něhdźe 2 000 Serbowkow a Serbow, přińdźe něhdyši wučer a wědomostny sobudźěłaćer Mikławš­ Krawc minjenu wutoru na zetkanje Budyskich serbskich katolskich seniorow.­ W lěće 1936 w Sernjanach narodźeny słušeše wón 1947 do najmłódšich serbskich chowancow gymnazija we Varnsdorfje-Warnoćicach. Za swój přednošk pak njetrjebaše w swojej dokumentaciskej mapje listować. Wažne fakty a wjele wosobinskich dopomnjenkow wón čile z pomjatka powědaše.

Štyrjoch nowych čłonow witali

Freitag, 11. Januar 2019 geschrieben von:

Po dobrej tradiciji wotmě naša wjesna Domowinska skupina Šunow-Konjecy njedawno zaso swoju hodowničku, zwjazanu z hłownej zhromadźiznu w Konječanskej Burskej stwě. Pilne žony běchu z wjesnymi dźěćimi tónraz bajku „Připołdnica“ nazwučowali. Wšitko běchu dźěći ze swojimi pomocnicami zhromadnje zmištrowali a sej mjez druhim wosoby wumyslili, teksty zestajeli, kulisy wobstarali a so staru dźěłansku drastu woblekli. Za swoju spodobnu inscenaciju žnějachu młodźi dźiwadźelnicy wulki dźak a připóznaće.

Předsydka Kerstin Mauwowa poda rozprawu wo dźěle skupiny, Andreja Lanzyna rozprawješe wo tuchwilnym stawje našeje skupinskeje pokładnje. Wobě rozprawje čłonojo schwalichu. Zwjeselace je, zo móžachmy kónc minjeneho lěta štyrjoch dalšich wjesnjanow do našeje Domowinskeje skupiny witać.

Při bjesadźe a spěwje rjana hodownička wuklinča. Alojs Langa

Wosadna hodownička z hosćimi

Mittwoch, 09. Januar 2019 geschrieben von:

Po ekumeniskim nyšporje na swjedźenju Třoch kralow minjenu njedźelu w Budyskej cyrkwi Našeje lubeje knjenje wotmě so na žurli swj. Bena na Tzschirnerowej tradicionalna hodownička Serbow katolskeje tachantskeje wosady. Přeprošenje pak běchu tež ewangelscy wěriwi sćěhowali, mjez nimi wospjet superintendent Jan Malink. Tak móžeše tachantski farar Wito­ Sćapan přibližnje 120 wobdźělnikow witać, mjez nimi něhdźe połsta dźěći a młodostnych.

Wězo słušeja hodowne pječwo a kofej a rjenje wupyšene blida dlěje hač poł lětstotka k tutomu schadźowanju zwonka Božeho domu. Tola dźakowano iniciatiwje wučerki na wuměnku Ludmiły Bizoldoweje dožiwichu wopytowarjo zaso tohorunja dosć bohaty kulturny program, po kotrymž wjedźeštej šulerce Sahra a Josefina­ Bretschneiderec.

Kniha kružkarjam elan spožčiła

Freitag, 04. Januar 2019 geschrieben von:

Po hodownych swjatych dnjach zetka so Róžeńčan kružk pisacych na swoje kónclětne zarjadowanje. Kaž kóždy raz bě blido ze słódnymi přikuskami a kofejom pola Marije R.-Šołćineje kryte. Mjeztym hižo trochu starše dźěći hosćićelki kružkarjow z kulturnym programom zawjeselichu. Bě to wulkotne dožiwjenje, spěwy, instrumentalne kruchi a samozbasnjene přinoški słyšeć. Za to wšěm sobuskutkowacym wutrobny dźak. Tež kruž­ka­rjo běchu ze samopaslenymi­ darikami a z dobrej naladu na zeńdźenje derje přihotowani.

Delnjowujězdźan najlěpši škotowar

Mittwoch, 19. Dezember 2018 geschrieben von:

Srjedź decembra wotzamknychu serbscy seniorojo-škotowarjo w Radworskim hosćencu „Meja“ swoje turněry lěta 2018. Dnjowy dobyćer, Křesćan Weclich z Nuknicy, bě z wukonom 2 659 dypkow spokojom, njemóžeše so pak po wuspěšnych lětach tónraz mjez prěnimi třomi zaměstnić. Nimale přez cyłe lěto bě Franc Nowak z Noweje Wjeski tabulku nawjedował, na poslednim turněrje pak je jeho Wolfgang Kühne z Delnjeho Wujězda hišće přesćahnył. Ze solidnym wukonom bu Jurij Hanto z Budyšina dobry třeći. Dalši zaměstnjeni su Křesćan Weclich, Herman Woko, Siegfried Rawa a Pawoł Šołta-Šunowski.

Cyłkownje je so lětsa 32 škotowarjow na dwanaće turněrach wobdźěliło, štož je snadnje mjenje porno minjenym lětam. Najebać to zahaja woni w januaru 2019 w Lejnjanskim Kubicec hosćencu swoju jubilejnu „slěbornu“ sezonu.

Dujerjo z Njeswačidła Jasčanow zawjeselili

Dienstag, 18. Dezember 2018 geschrieben von:

Hodownik njeje jenož čas dołhich wječorow, ale tež čas wočakowanjow kaž tež nutřkownych a wonkownych přihotow na hody. Rěči so wo tym, zo je adwentny čas měrny čas, často pak to nawopačne zwěsćamy. Za mnohich ludźi je adwent z hektiku a stresom zwjazany. Tež na dohodownych wikach knježi njeměr. Runje tak móža adwentnički w pěstowarnjach, šulach, zawodach abo komunach napinace być, móža pak tež změrować a zhromadnosć přisporjeć. Adwentnički, kotrež w Jaseńcy hižo wjele lět srjedź decembra za cyłu wjes organizujemy, su tajke změrowace a k zhromadnosći přinošowace zarjadowanja. Tež minjenu sobotu su so Jasčenjo w kulturnym domje zetkali a sej po witanju kofej z wosuškom a poprjančkami zesłodźeć dali. Wjele lět hižo zawjeseleja jich dujerjo Njeswačanskeje wosady z dohodownej hudźbu. Tónraz su woni na wjacorych wsach Bóščanskeje gmejny we womłodźenej zestawje zapiskali.

Dźak za dohodownu naladu

Dienstag, 11. Dezember 2018 geschrieben von:

Minjenu srjedu móžeše Němčanski wjesny předstejićel Wolfgang Neubert znowa wjac hač 70 seniorow ze wsy w Grofic „La Galeriji“ na lětušu adwentničku witać. Spřihotowała bě ju znowa Monika Neubertowa ze skupinu pilnych žonow.

We Wěteńcy znowa škotowali

Mittwoch, 05. Dezember 2018 geschrieben von:

Po dobrym wothłosu loni wotmě so minjenu sobotu znowa škotowy turněr we Wěteńcy. Mikławš Zahon je sej młódšich kaž tež staršich přećelow zbliska a zdaloka přeprosył, zo bychu najlěpšich kartyplacarjow ze swojich rjadow zwěsćili. Wubědźowali su so wo pućowanski pokal. Cyłkownje wobdźěli so 22 lubowarjow škota.

Po tym zo bě po prěnim kole z 21 wobdźělnikami dobyćer wječora z 1 827 dypkami hižo nimale wěsty, popřachmy sej přestawku z ćopłym přikuskom. ­Nalada při rozmołwje a wosebje napjatosć na wuslědk druheho koła w běhu wječora widźomnje přiběraše. 22. hrajerjej, kiž so hakle druhemu kołu přidruži, přiznachu přerězk dypkow prěnjeho koła ze šwarnymi 1 008 dypkami. W prěnim kole bě so za sydom blidami ze stajnje třomi škotowarjemi 36 hrow wotměło. W druhim kole rozrjadowachu so hrajerjo na štyri blida ze stajnje štyrjomi a na dwě blidźe z třomi hrajerjemi.

„Witajće k nam do Łužicy“ rěkaše hesło jězbneho předewzaća Vivat kultura ze St. Gallena za minjenu njedźelu, jako wopyta dwaceći seniorow ze Šwicarskeje – zwjetša bywši předewzaćeljo – Łužicu, zo bychu so tež ze Serbami zeznajomili. Hižo na jězbje z Drježdźan do Budyšina informowaše Jurij Łušćanski hosći wo stawiznach, kulturje, dźensnišim žiwjenju a narodnych stykach. Dr. Manfred Thiemann wodźeše jich na to po starym měsće hač na Mikławšk a rozłoži jim wosebitosće historiskeho města. Wosebje zajimowachu so wopytarjo za medije a dwurěčne kubłanje, ale tež za hospodarstwo regiona.

„W Šwicarskej wšak mamy wjacore rěčne ­regiony a narodnu mjeńšinu Retoromanow. Tohodla bě runje za nas jara zajimawe, štož smy we Łužicy wo Serbach zhonili“, praji ­nawoda jězbneho předewzaća Christoph Hug. Na dźesać­dnjowskej jězbje wopytachu šwicarscy wulětnikarjo w Lipsku a Drježdźanach předewšěm muzeje a koncerty. Minjenu ­njedźelu wječor dožiwichu w Drježdźanskej Křižnej ­cyrkwi Johannesa Brahmsowy „Němski rekwiem“. ­

Ministerskeho prezidenta wopytali

Mittwoch, 14. November 2018 geschrieben von:

Kulow. Šulerjo 10. lětnika Kulowskeje wyšeje šule „Korla Awgust Kocor“ běchu spočatk tydźenja trochu njesćerpni. Woni so hižo wjeselachu na zajězd do statneje kenclije w Drježdźanach. Kak je k tomu dóšło? Lětsa 4. meje přewjedźechu na šuli „europski dźeń“. Tón dźeń witachu w šuli sakskeho ministerskeho prezidenta Michaela Kretschmera (CDU) jako rozmołwneho partnera. Na kóncu přeprosy wón jich, tehdom šulerjo 9. lětnika, na wopyt do statneje kenclije.

Anzeige

  • 21. jolka-swjedźeń w Nuknicy je nimo. Štož zwostanje su dopomnjenki na rjany žortny a zabawny wječor w Nukničanskej Brězanec bróžni. Někotre impresije serbskeho wječora w Nuknicy, kotrež je naša fotografowka-wolontarka Hanka Šěnec zhotowiła, wam tule
  • Serbske Nowiny-LND-Tuchmacherstr. 27 02625 Bautzen: Jolka 12.01.2019
  • Serbske Nowiny-LND-Tuchmacherstr. 27 02625 Bautzen: Jolka 12.01.2019