Za kulisy manufaktury pohladali
Na lětušim wulěće Domowinskeje skupiny Šunow-Konjecy podachmy so do Mišna. Jónkrótny Mišnjanski pórclin wšak je po cyłym swěće derje znaty. Z kelko prócu a rjemjeslniskej wušiknosću jón přistajeni w manufakturje zhotowjeja, to smy na wopyće tam zhonili.
Zamołwići nas přez jednotliwe zhotowjenske wotrjady starodawneje manufaktury wodźachu, při čimž nam produkciske procesy znazornichu. W filmje tójšto wo stawiznach a wuwiću pórclina zhonichmy. Nimo toho w muzeju krasne wudźěłki z Mišnjanskeho pórclina wobdźiwachmy. W jednej z witrinow samo serbske figury – družku a brašku – wuhladachmy. Dopomnichmy so na wustajeńcu ze serbskimi figurami z Mišnjanskeho pórclina před lětami w Budyskim Serbskim muzeju. Po słódnym wobjedźe podachmy so na hród Albrechtsburg. Jón mjenuja tež „kolebku Sakskeje“. Na stawiznach bohaty blečk je sej kóždy po swójskim zajimje wotkrył.
Rjadowniske zetkanje po 60 lětach
We wjesnej korčmičce w Pančicach su so minjeny pjatk wotchadnicy lětnika 1964 tamnišeje bywšeje wyšeje šule zešli, zo bychu 60lětny jubilej wotchada zhromadnje woswjećili.
Dźensa je drje nanajmjenje Serbam wědome, zo bu w Pančicach w lěće 1953 prěnja wjesna serbska wyša šula załožena, na kotrejž su šulerjo tež dźewjaty a dźesaty lětnik šulskeho kubłanja absolwowali. Tamne serbske wjesne šule tehdy jenož hač do wosmeho lětnika wuwučowachu. Łubja Pančanskeje šule běše so na internat wutwariła, w kotrymž so wjetšina šulerjow zaměstni. Šulske a internatne žiwjenje běše wot spočatka sem serbske.
Šulu wopytachu wosebje dźěći a młodostni z wokoliny, z teritorija župy Michał Hórnik. Dalši pochadźachu z wjeskow Rakecy, Njeswačidło, Bóšicy a Bukecy. Wosebje holcy su so po zakónčenju dźesateho lětnika na Serbski wučerski wustaw do Małeho Wjelkowa podali. Tam su potom powołanje wučerki abo pěstowarki nawuknyli. Hólcy rozsudźichu so hustohdy za techniske powołanja.
Dožiwjenje na Rujanach
Kóžde lěto wotměwa so w městačku Ralswieku na kupje Rujanach lěćne dźiwadło pod titulom „Hrajny festiwal Störtebeckera“. W lětušich prózdninach sym tež zhromadnje ze swójbu předstajenje wopytał. Přirodne jewišćo při zaliwje baltiskeho morja je nas wobkuzłało. Dohromady 8 800 ludźi ma na trawersach městno. W inscenaciji skutkuja 150 hrajerjow, 30 koni kaž tež štyri łódźe sobu. Podawki wo historiskej wosobinje Klausa Störtebeckera su při Baltiskim a Sewjernym morju zakótwjene a so tam hižo z lěta 1993 poskićuja. Lětuše předstajenje hraje w lěće 1401 w měsće Hamburgu. Hłowna wosoba Klaus Störtebecker je pirat. Tón bydli we wjesce Marienhafen, w kotrejž je žiwjenje měrne a spokojne. Tam je tež přistaw za jeho łódź. Jeho žiwjenski kredo je: Bohatym brać a chudym dawać. Z tutym nastajenjom njeje wón runjewon přećel Hamburgskich bohačkow. Měšćanska rada chce worakawstwa zakónčić, nima pak prawu ideju. To ma Simon z Ütrechta genialny plan.
London wulke město, wjele hudźby
Lětsa sym sej rjane štwórće města Londona wobhladała. Wosebje zajimawe běchu runje te, w kotrychž běše jónu wulka hudźbna scena swěta po puću. Swětoznaći hudźbnicy a skupiny kaž Sex Pistols, Beatles, Amy Winehouse, Pink Floyd a Rolling Stones, su před lětami ze swojimi wustupami w małych barach w měšćanskimaj štwórćomaj Soho abo Camden swoju karjeru załožili. Wobě stej hač do dźensnišeho za swoje wosebite bary, party-scenu a wulke wiki znatej.
We winowej pincy spěwali a domoródnych překwapili
Wjace hač połsta zajimcow je sej kónc junija/spočatk julija do Stražnicy dojěło. Tamniši mjezynarodny folklorny festiwal, lětsa běchu jón 79. raz wuhotowali, wabi Serbow sej lokalnu, narodnu a mjezynarodnu folkloru lubić dać. Dr. Jan Christ, mnohe lěta nawoda tohole podawka a wjelelětny přećel Serbow běše jedyn, hdyž nic rozsudny pohon dał, tajki festiwal tež we Łužicy wuhotować. Před mnohimi lětami nastate zwiski sej wosebje folklornej skupinje Wudwor a Smjerdźaca wobchowatej.
Starodawne rjemjesło zahoriło
Stajnje dźeń do swjedźenja Božeho spěća organizuje Domowinska skupina Pančicy-Kukow wulět do blišeje wokoliny, hdźež sej wobdźělnicy zajimawosće wobhladaja. Tak pobychu hižo w Njebjelčanskej cyrkwi, na wodźenju po Kamjencu, w drastowym fundusu w Nowej Jaseńcy a w Hornjowujězdźanskej cyrkwi. Najnowši cil bě minjeny tydźeń Bukec sedłarnja w Róžeńće. Na zwučene wašnje sej tam někotři z kolesom dojědźechu druzy so z awtom přidružichu.
Wot lěta 2022 dźěła Marek Buk w swojej sedłarni, kotruž je sej w tykowanym twarjenju na třoch poschodach zaměstnił. Nawuknył je rodźeny Wotrowčan powołanje sedłarja w Kamjencu. Po politiskim přewróće bě wón 25 lět blisko Münstera žiwy, hdźež je tež mišterske wukubłanje złožił. 2016 so do domizny nawróći a najprjedy w staršiskim domje we Wotrowje sedłarnju załoži, doniž ju takrjec do Róžanta njepřepołoži.
Wosebity wulět čěskich šulerjow na rozžohnowanje
Budyšin (SN). Za wuprawu do Budyšina zašłu wutoru je 29 čěskich šulerjow 8. a 9. lětnika zawěrno odyseju zabsolwowało. A při tym je jich městačko w Šluknovskim wuběžku blisko němskeje mjezy. To bě takle: Z Mikulašovic su so rano z busom do Rumburka podali, hdźež přelězechu do busa do Habrachćic. Wottam jědźechu z ćahom do Biskopic, hdźež třeći raz přelězechu: do ćaha na Budyšin, hdźež su w dźesaćich dojěli.
Wjetšina šulerjow w šuli němčinu wuknje. Ze swojim wučerjom Petrom Pánekom su hižo wospjet w Němskej pobyli. Za lětušu ekskursiju pak je sej Petr Pánek něšto wosebiteho wumyslił, wšako wón sam wot zašłeje nazymy sem serbšćinu na kursu w Budyšinje wuknje: zo pojědźe ze šulerjemi drje zaso do Němskeje, ale maja tam něšto wo Serbach zhonić.
Z Budyskeho dwórnišća nóžkowachu tuž runu smuhu do Serbskeho muzeja. Jako Petr Pánek při recepciji wšitko serbsce zrjadowa, so šulerjo dźiwachu, kelko rozumja. Wězo, wšako bě wučer jich hižo rěčnje tróšku „preparował“. Tuž tež hižo wědźachu, kak so serbsce dźakuješ. Muzej pak sej z čěskim awdijo-přewodnikom wobhladachu.
Z přećelemi so znowa zetkali
Rowno. Po słowjanskim wašnju z chlěbom a selu su čłonojo Slepjanskeho serbskeho folklorneho ansambla njedawno 40 wosobow wopřijacu skupinu krajanstwa dunajskich šwabow z badensko-württembergskeho Mosbacha na Rownjanskim Njepilic statoku witali. Mjez nimi běštaj předsyda krajanstwa Anton Kindtner a krajny rada dr. Achim Brötel. Zetkanje bě wjeršk třidnjowskeje jězby, z kotrejž pokročowachu partnerstwo swojeho wokrjesa Neckar-Odenwald ze Zhorjelskim wokrjesom. Wone wobsteji hižo z lěta 1990. Prěnje zetkanje ze Slepjanami wotmě so 2019, štyri lěta pozdźišo pobychu serbscy hosćo na nalětnim swjedźenju w Mosbachu. Předsydka folklorneho ansambla Stephanie Bierholdtec wopytowarjow witaše. Wulki wuznam zetkanja wotbłyšćowaše so w tym, zo wobdźělištej so wiceprezidentka Sakskeje krajneje direkcije Carolin Schreck a zamołwita za serbske prašenja Zhorjelskeho wokrjesa Kati Struckowa.
Wuprawa do Berlina so poradźiła
Sobotu podachu so čłonojo Budyskeje župy „Jan Arnošt Smoler“ při krasnym słónčnym wjedrje na wuprawu, tónraz do Berlina.
Wosebita wustajeńca „Wo pčołkach a ludźoch“ w Muzeju Europskich kulturow běše prěni cil. Před muzejom so wšitcy za foto zestupichmy. Wěcywustojne wjedźenje a žiwe komentary k wosebitosćam pčołarjenja w Słowjenskej wšitkich zajimowachu. Škoda, zo nazajtra tutu wustajeńcu hižo wottwarichu, hewak bychu sej dalši pčołarjo z Łužicy eksponaty ze Słowjenskeje runjež wuslědźić móhli. Wobhladujo sej druhe rumnosće tutoho wosebiteho muzeja Europskich kulturow nam napadny, zo Serbja tam nimo jedneje klanki zastupjeni njejsu. To by tola jónu projekt za Serbskej muzejej w Budyšinje a Choćebuzu było, wopytowarjam němskeje stolicy z wysokim niwowom Serbow předstajić!
