To a tamne (17.04.25)
Venedig žada sej zaso zastup, lětsa pak telko kaž hišće nihdy. Wot kónca tydźenja dyrbja turisća dźesać eurow wob dźeń zapłaćić, hdyž chcedźa po lagunowym měsće dundać. Při zawjedźenju popłatka loni bě to runje połojca. Hač do spočatka meje maja hosćo popłatk wšědnje zapłaćić, po tym hač do awgusta jenož wěste dny. Cyłkownje zběraja popłatk lětsa na 54 dnjach, tež to je dwójce telko kaž loni.
Mnóstwo mikroplasty we wobswěće spochi přiběra. Hač do lěta 2026 móhło wone wo wjacore króć rozrosć. Tole płaći tež potom, hdyž so poradźi, njedostatki we wobchadźenju z plastowymi wotpadkami wotstronić, rozprawjeja slědźerjo fachoweho magacina „Science Advances“. Po jich wěšćenju docpěje mnóstwo plastowych wotpadkow w morjach swěta lěta 2045 swój wjeršk: Cyłkownje 23 milionow tonow.
To a tamne (16.04.25)
Swoju softair-pistolu na předawarja ćisnył je maskěrowany młodostny, jako w Osnabrücku kiosk napadny. Do toho bě so 43lětny předawar spjećował, rubježnikej pjenjezy dać. Na to młodostny pistolu za nim ćisny a ćekny. Policija jeho krótko po tym njedaloko wobchoda zaja. Zastojnicy zwěsćichu, zo bě młody muž minjeny čas wospjet spytał wobchody nadpadnyć.
Na kuplowanku ćaha a wagona skočił je muž na dwórnišću w badensko-württembergskim Rottweilu, po tym zo bě so po kurjenskej přestawce přepozdźe do ćaha wróćił. Durje běchu so hižo zawrěli a ćah wotjědźe. 27lětny, kotryž měješe swój wačok w ćahu, po nastupnišću běžeše a skónčnje na ćah skoči. Lokomotiwnik je tole widźał a ćah z nuzowym borzdźidłom zadźeržał. Policisća personalije muža zwěsćichu a přepytowanje přećiwo njemu zahajichu.
To a tamne (15.04.25)
Sto hodźin žiwy pohrjebany być – z tutej nowej show chce internetny poskićowar Joyn zajim přihladowarjow budźić. Šěsć němskich, w interneće aktiwnych wosobinow chce so na eksperiment zwažić, mjez nimi entertainer Jens Knosalla. Pospyt ma „psychiske mjezy zwěsćić a prastary strach čłowjeka“ zapřijeć. 16 dźělow wopřijaca show „Deep Down – zahrjebani“ započina so 4. meje, Joyn zdźěla.
Zranjeny hołbik na dróze je w Porynsko-Pfalcy wobchadne njezbožo zawinował, při kotrymž so dwě wosobje zraništej. 40lětna šoferka wosoboweho awta bě borzdźidła, jako ptačka wuhlada. Wodźerka awta za njej móžeše drje hišće reagować, 23lětny motorski pak situaciju přepozdźe spózna a do awtow zrazy. Wón a sobujěduca so zraništaj.
To a tamne (14.04.25)
Z namocu je sej 71lětna w Hornjej Frankskej zubnolěkarski termin wunuzować spytała. Najebać namołwu policistow so wona spjećowaše praksu wopušćić, po tym zo njebě termin dóstała. Jako so žona do lěkarskeje stwy zadoby, ju zastojnicy sputachu a wotwjedźechu. 81lětny mandźelski podarmo spytaše, ju wuswobodźić. Skónčnje smědźeštaj wobaj domoj jěć. Chłostanka pak je jimaj wěsta.
Přemało fantazije při falšowanju čisłoweje taflički změje za 43lětneho w Alsdorfje pola Aachena njelube sćěhi. Muž njebě nowy e-scooter pola zawěsćernje přizjewił, ale bě sej zelenu čisłowu tafličku sam spaslił. Jako čisło wuzwoli sej „genialnu“ kombinaciju 123XYZ. Z njej pak prawje bórze policistam napadny. Woni jězbu muža skónčichu a tafličku sćazachu. Nětko dyrbi so wón falšowanja dokumentow dla zamołwić.
To a tamne (11.04.25)
To a tamne (10.04.25)
Na priwatnu rozmołwu we Vatikanje witał je bamž Francisku wulkobritaniskeho krala Charlesa II. a toho mandźelsku kralownu Camillu. Britiski kralowski por je tuchwilu na statnym wopyće w Italskej. Franciskus gratulowaše woběmaj k 20. kwasnemu dnjej. Charles přeješe Franciskusej bórzomne wustrowjenje.
Legalnu plantažu cannabisa zničiła je policija w sewjerorynsko-westfalskim Hagenje. Nětko ju potrjecheni ze žadanjom za zarunanjom konfrontuja. Cannabisowy klub wočakowaše wot swojich 900 młodych rostlinow 45 kilogramow konopje, štož wotpowěduje 270 000 euram. Policija bě při přepytowanjach přećiwo wikowarjej drogow twarske podłožki namakała, kotrež zastojnikow k plahowarni wjedźechu. Policisća běchu sej wěsći, zo steja před profesionalnej ilegalnej plantažu a hnydom wšitke rostliny zničichu.
To a tamne (09.04.25)
Kaž w filmje su skućićeljo na awtodróze A 2 w Delnjej Sakskej jěduce nakładne awto wurubili. Swědkojo wčera rano wobkedźbowachu, zo ćmowe wosobowe awto nakładne awto do směra na Berlin přesćěhuje. Njedaloko Luhdena mužej na motorowu hawbu awta zalězeštaj a durje připowěšaka wočiništaj. Na to wobrazowki a laptopy kradnještaj. Šoferej tole hakle na přichodnym parkowanišću napadny. Škoda wučinja 10 000 eurow.
Zlutniwje z pitnej wodu wobchadźeć maja ludźo hladajo na trajacu suchotu. Tole namołwja hłowny jednaćel zwjazka městow Němskeje Helmut Dedy. Změna klimy je dale a bóle widźomna. Tohodla je rozumne wužiwanje wody w městach, ratarstwje a industriji jara wažne, wón rjekny. Dołho trajaca suchota móhła komuny wužadać. Tuchwilu pak je zastaranje ludźi z wodu zaručene.
To a tamne (08.04.25)
Pjeršćeń w žołdku kruwy je rěznik w bayerskim Vilshofenje namakał. Młody ratar bě pjeršćeń do toho při picowanju přisadźił a njemóžeše jón hižo namakać. Štyri měsacy po tym dowjezechu mjeztym dwě lěće staru jałojcu k rězanju do małeho rězniskeho zawoda. Bychu-li skoćo we wulkorězarni rozebrali, njeby nichtó wjace do žołdka pohladał. Tak pak je so pjeršćeń do swójby ratarja nawróćił. Tež toho mandźelska je zbožowna.
Wody we wulětniskej łódźi „Baltica“ dla bu jězba mjez Kühlungsbornom a Warnemünde na Baltiskim morju njejapcy skónčena. Dźesać mjeńšin po wotjězdźe łódźe bě so woda zadobyła. Kapitan so na to do Kühlungsborna nawróći. Pasažěrojo móžachu njezranjeni wulězć, policija zdźěli. „Baltica“ poča so na to podnurić. Mjeztym pak maja situaciju pod kontrolu. Přičinu hawarije nětko pruwuja.
To a tamne (07.04.25)
Wjace hač 60 pokradnjenych dźěćacych wozyčkow, sedłow a podobnych wěcow su policisća pola porika w Karlsfeldźe blisko Mnichowa našli. Do toho bě młody nan policiji zdźělił, zo su njeznaći dźěćacy wóz swójby pokradnyli. Při wozyčku pak bě sćelak schowany, kotryž dowjedźe policistow k bydlenju podhladneju. Tam namakachu wóz a dalše wěcy w hódnoće wjacorych sta eurow, kotrež bě porik pokradnył a dale předawał.
Nowy wěstotny koncept su krótko do zahajenja turistiskeje sezony w dowolowym srjedźišću Palma na kupje Mallorca předstajili. Alkoholowym ekscesam minjenych lět chcedźa wotnětka zadźěwać, měšćanosta Jaime Mertínez připowědźi. Tak su tři nowe policajske awta kupili. Nimo toho zasadźuja 170 přidatnych uniformowanych a ciwilnych policistow, zo móhli spěšnje zapřimnyć.
To a tamne (04.04.25)
Tysac eurow pokuty dyrbi bywši wrotar němskeho narodneho koparskeho mustwa Jens Lehmann zapłaćić. Jeho běchu po Oktoberskim swjedźenju z 0,7 promilemi alkohola za wodźidłom awta lepili. Mnichowske hamtske sudnistwo ma tole za přeńdźenje přećiwo wobchadnemu porjadej. Jězbnu dowolnosć je Lehmann hižo před měsacom wotedał. Tuž je naležnosć za njeho wotbyta.
Wjace hač 200 pasažěrow luksusoweje wulětniskeje łódźe „Queen Mary II“ je na norovirus schorjeło. Prěnje rozprawy wo pasažěrach, kiž běchu bluwali a na židlawu skoržachu, su so w měrcu jewili, jako bě łódź w New Yorku pozastała. Po informacijach zarjadnišća za škit před mrětwami USA je 224 z cyłkownje 2 538 sobujěducych schorjeło, nimo toho 17 čłonow mustwa. Woni su izolowani. Łódź tuchwilu desinficěruja.
