Policija (21.02.25)
Diesel kradnyli
Chrósćicy. We wulkim stilu diesel kradnyli su njeznaći minjeny čas na Wićežnym puću w Chrósćicach. Kaž policija zdźěli, paduši tam w času wot 20. januara hač do předwčerawšim z priwatneho zawoda něhdźe 5 000 litrow ćěriwa spakosćichu. Při tym nasta něhdźe 8 000 eurow škody. Nětko pytaja swědkow, kotřiž su w mjenowanym času něšto podhladne wobkedźbowali. Pokiwy přijimuja w kóždym policajskim běrowje.
Policija (18.02.25)
Namakane pjenjezy wudałoj
Zhorjelc. Tobołu z wjacorymi tysac eurami je 55lětna žona njedźelu popołdnju w Zhorjelskim nakupowanišću zhubiła. Tole pytny porik, kotryž sej móšeń z pjenjezami přiswoji a so zminy. Dokelž bě 55lětna mjeztym policiju informowała, zastojnicy pad přepytowachu a hromadźe ze zwjazkowej policiju za pjenjezami pytachu. Bórze na to woni podhladny porik wuslědźichu. 36lětna žona a 43lětny muž běštaj mjeztym hižo tójšto pjenjez wudałoj. Wulki dźěl drje móžachu policisća zawěsćić, 1 500 eurow pak na kóncu přiwšěm pobrachowaše. Za to změjetaj so wobaj nětko zamołwić.
Policija (17.02.25)
Wopojeny jězdźer twochnyć spytał
Budyšin. Jako chcychu zastojnicy policije w nocy wot soboty na njedźelu w rutinowej kontroli na Budyskim Třělnišću šofera awta kaž tež wjacorych sobujěducych přepruwować, stłóči tón na płun a twochny z wulkej spěšnosću. Zastojnicy policije jeho bjezposrědnje přesćěhowachu. W swojej dźiwjej jězbje přez město ignorowaše šofer jězdźidła typa Seat Altea wospjet čerwjene ample, zadźerža potom zrazom a spyta pěši ćeknyć. Policisća pak jeho bórze dosćahnychu. Test na alkohol dopokaza 0,9 promilow a dalši test na drogi dopokaza substancu amfetaminow. Nimo toho zwěsćichu zastojnicy, zo 24lětny němski staćan płaćiwu jězbnu dowolnosć njewobsedźi. Zastojnicy zakazachu jemu dale jěć a dowjezechu jeho do chorownje zo bychu jemu krej wotewzali. Wšitkich swojich přeńdźenjow dla změje so młody muž před sudnistwom zamołwić. Přiwšěm ma zbožo, zo so sobujěducym ničo stało njeje.
Policija (14.02.25)
Pytaja za 15lětnej
Zhorjelc. Wot srjedy pyta Zhorjelska policija za 15lětnej Cora-Jolie L. Naposledk su ju swědkojo wčera popołdnju na Landeskronstraße w Zhorjelcu widźeli. Dotalne prócowanja policije, holcu namakać, wuspěšne byli njejsu. Tohodla proša zastojnicy ludnosć nětko wo pomoc. Cora-Jolie L. je něhdźe 1,60 metrow wulka, ma nawoči, šwižnu postawu a hładke, dołhe, swětło-ćěmne włosy. Naposledk měješe módry kabat a jeansy zwoblěkane a bě w běłych sportowych črijach. Pokiwy a informacije podajće prošu Zhorjelskemu policajskemu rewěrej pod telefoniskim čisłom 03581 6500 abo na kóždym druhim lokalnym rewěrje.
Policija (11.02.25)
Muž holcy wohrožował
Budyšin. Před Budyskim dwórnišćom je wopity muž pjatk wječor dwě holcy přesćěhał a jimaj z trašacej pistolu hrozył. 14 a 17lětna ćeknyštej na nakładny areal dwórnišća. Policisća zwjazkoweje policije muža zajachu. Při tym so pjany zwjeze, wobchowa pak wědomje. Wuchowanska słužba je do chorownje dowjeze. Muž, kiž bě pistolu w tunlu schował, nima po zdaću dowolnosć, brónje wobsedźeć.
Policija (07.02.25)
Drogi w spódnich cholowach schował
Zhorjelc. Hnydom trójne přeńdźenje su zastojnicy awtodróhoweje policije srjedu dopołdnja na parkowanišću Při Nysy zwěsćili, jako šofera awta marki Opel kontrolowachu. Najprjedy zwěsćichu, zo 37lětny pólski staćan płaćiwu jězbnu dowolnosć njeměješe. Test na drogi dopokaza nimo toho zakazanu substancu amfetamin w jeho ćěle. Na kóncu namakachu zastojnicy w spódnich cholowach wobwinowaneho titku z podhladnej kristalojtej substancu kaž tež wosebitu trubku. Pólski šofer dósta wotpowědne wozjewjenki.
Policija (06.02.25)
Spěšnosć přepruwowali
Konjecy/Njebjelčicy. Zastojnicy wobchadneje policije su zawčerawšim rano w Konjecach na Křižerskim puću dodźerženje předpisaneje spěšnosće přepruwowali. Mjez dohromady 16 měrjenymi jězdźidłami je šěsć dowolene 30 km/h jasnje překročiło. Negatiwny rekord překročenja běchu 22 km/h. Za šofera rěka to: 70 eurow pokutneho pjenjeza. Na samsnym dnju dopołdnja přepruwowachu zastojnicy wjacore hodźiny dołho dodźerženje spěšnosće 70 km/h na dróze S 94 při wotbóčce Kamjenc-Brěznja/Njebjelčicy. Mjez 1 102 přepruwowanymi jězdźidłami běše 71 přespěšnje po puću. „Najspěšniši“ šofer z Kamjenca smaleše ze 110 km/h. Po wobchadnym pokutnym katalogu wočakuja jeho za to dypk w Flensburgu a 200 eurow pokuty.
Policija (04.02.25)
Pjany policistow skřiwdźił
Wojerecy. Zastojnicy Wojerowskeho policajskeho rewěra su njedźelu popołdnju na Budyskej aleji we Wojerecach wočiwidnje sylnje alkoholizowaneho kolesowarja zadźerželi. Test na alkohol pokaza 1,86 promilow. Policisća jemu na blaku zakazachu dale jěć. To pak so pjanemu kolesowarjej scyła lubiło njeje. Wón započa so huntorić a swarjeć, při čimž policistow z wudmami tež wosobinsce skřiwdźi. Jako chcyše swoje koleso při sćežoru na kromje puća wotstajić, zhubi 64-lětny němski staćan runowahu a wali so na kromu chódnika. Při tym so zrani, tak zo dyrbjachu jeho zastojnicy do chorownje dowjezć, zo bychu jemu tam krejnu probu wotewzali a blesury lěkowali. Wojerowčana wočakuja nětko prawniske konsekwency pjanosće w nadróžnym wobchadźe a skřiwdźenja zastojnikow dla.
Wopačne parkowanje z wuskutkami
Policija (31.01.25)
Wandalizm na parkowanišćomaj
Porchow/Błohašecy. Na parkowanišću za dojězdźowarjow w Porchowje su njeznaći skućićeljo w dotal njeznatej dobje wot póndźele do srjedy dwě awće wobškodźili. Woni zadobychu so do awta typa Audi A3 a zapalichu znutřka rozbuchadło. Eksplozija wobškodźi jězdźidło masiwnje. Pola druheho awta marki Mazda rozbichu wšitke škleńcy. Zamołwići policije trochuja sumu wěcneje škody na něhdźe 15 000 eurow. Štwórtk zwěsćichu zastojnicy na parkowanišću za dojězdźowarjow w Błohašecach pad wandalizma: Dospołnje wupalene awto marki BMW. Kriminalna słužba padaj přepytuje a pruwuje, hač mjez sobu w zwisku stejitej.
Policija (30.01.25)
Wuspěšna němsko-čěska kooperacija
Zhorjelc/Petrovice. Dźakowano mjezy překročacej kooperaciji poradźi so zastojnikam čěskeje a němskeje policije w regionje Pardubice štyrjoch paduchow zajeć. Tući běchu wot lońšeho w namjeznych kónčinach na němskej kaž tež na čěskej stronje aktiwni. Wšitcy zajeći su čěscy staćenjo, mužej w starobje 23 a 29 lět kaž tež žonje w starobje 30 a 21 lět. W Hornim kraju běchu so skućićeljo do dohromady 18 bydlenskich domow a pensijow, mjez druhim tež we Wulkim Šunowje, zadobywali. Objekty požadosće běchu při tym trezory a klučiki awtow, kotrež pokradnychu. Na čěskej stronje mjezy su so paduši w regionach Ústí, Liberec a Hradec Děčín do 20 domskich zadobywali. Přepytowanja wšitkich njeskutkow wukonješe zhromadna němsko-čěska kriminalistiska skupina Lausche, kotraž hižo wot lěta 2019 eksistuje.
