Policija (16.04.25)
Njezbožo so w haće skónčiło
Kulow. Zbožo w njezbožu měješe wutoru rano muž w Kulowje. 82lětny bě na Młynskej z dotal njeznateje přičiny na lěwy bok jězdnje zajěł. Na kromje Měšćanskeho hata so jeho jězdźidło strašnje nachiliło. Kaž policija rozprawja, je wuměnkar po wšěm zdaću z awta do wody padnył. Dokelž swědka spěšnje jednaše, móžeše wona muža wuchować. Hewak drje by so wón zatepił. Přiwołane wuchowanske mocy 82lětneho skónčnje z wody wućahnychu a jeho do chorownje dowjezechu.
Policija (15.04.25)
Zapakowane kolesa namakali
Bukecy. Minjene měsacy je policija wuchodnje Budyšina wjacore kolesa namakała. Wone ležachu w přirowach w Delnjej Kinje, Kubšicach a Bukecach a běchu hišće originalnje zapakowane. Jedna so wo kolesa markow Versiliana a Frejus. Nětko pytaja swědkow, kotřiž su minjene tydźenje něšto podhladneho wobkedźbowali. Pokiwy přijimuje policija pod telefonowym čisłom 03591 3560.
Policija (11.04.25)
„Kóń“ na jězdni stał
Zhorjelc. Swědk je w nocy na štwórtk na zwjazkowej dróze B 6 w Zhorjelcu konja na jězdni wuhladał a policiju informował. Skoćo popadnyć njebě ćežko, dokelž jednaše so wo wulke plyšowe zwěrjo. Njeznaći běchu je po wšěm zdaću jako žort na puć stajili. Zastojnicy konika sobu wzachu a wotjědźechu. Policija prosy, so tajkich akcijow wzdać.
Policija (10.04.25)
Wobšudnistwu zadźěwała
Kamjenc. Dospołnje prawje zadźeržała je so minjene dny młoda žona z Kamjenca. 23lětna chcyše w awtowym domje w Göttingenje online awto kupić. Jako bě sej wona z předawarjom přezjedna, dyrbješe wona kupnu sumu zapłaćić. Za to dósta IBAN-čisło z Nižozemskeje. Jako na to najprjedy raz pjenjezy njepřepokaza, pósłachu jej wobšudnicy IBAN-čisło z Madźarskeje. Nětko bě Kamjenčanka dospołnje zadźiwana a so w awtowym domje nadrobnišo wobhoni. Při jeje rešerši zwěsći, zo běchu to po wšěm zdaću wobšudźerjo. Młoda žona wšitke dotalne jednanja cofny a pad pola policije přizjewi.
Policija (07.04.25)
Na awtodróze mórali
Słona Boršć. Kedźbliwi šoferojo policiju w nocy na njedźelu informowachu, zo při awtodróze A 4 mjez Słonej Boršću a Hornim Wujězdom něchtó škitne sćěny pomóra. Na městnje zwěsćichu zastojnicy dwě wosobje, kotrejž pěši ćeknyštej. 22lětneho hišće w bliskosći dosahnychu. Wón swój njeskutk hnydom přizna. Dalši 20lětny so sam wot so k městnu njeskutka wróći a móranje tohorunja přizna. Wobaj běštaj wjacore metry wulke pismiki na sćěny napryskałoj a tak něhdźe 5 000 eurow škody načiniłoj. Jedyn z njeju steješe pod wliwom drogow.
Policija (04.04.25)
Trawusyčak kradnyli
Rakecy. Nimale 1 700 eurow škody načinichu njeznaći, kotřiž so w nocy na srjedu na ležownosć w Rakecach zadobychu. Tam pokradnychu nimo wšelakich gratow trawusyčak. Ležownosć drje bě z płotom wobdata, ale nic zamknjena, tak zo žana dalša škoda njenasta.
Policija (03.04.25)
Pazoraka wuchował
Jitro. Ze swojim chrobłym jednanjom je póndźelu wječor 31lětny muž zranjeneho pazoraka w Jitru (Milstrich) we Wóslinčanskej gmejnje wuchował. Najprjedy muž policiji rozprawješe, zo je zranjene zwěrjo na lěsnym puću blisko wsy namakał. Hišće prjedy hač wobsadka policajskeho awta tam přijědźe, so młody muž zwaži a pazoraka popadny. Policisća přepodachu ptaka na to skótnej lěkarce, kotraž jeho pozdźišo lěkarsce zastara.
Policija (02.04.25)
Z přetwarjenym elektrokolesom jěł
Budyšin. Hnydom wjacore přeńdźenja přećiwo předpisam zastojnicy Budyskeho rewěra zwěsćichu, jako póndźelu wječor wodźerja elektrokolesa na Budyskej Walskej kontrolowachu. Policisća pytnychu, zo bě jězdźidło 21lětneho z připrawu wuhotowane, z kotrejž móžeše płun dać. Nimo toho koleso hač do 45 km/h jědźeše, bjez toho zo wužiwar do pedalow teptaše. A skónčnje drogowy test na konop a amfetaminy pozitiwnje reagowaše. Z tym bě wječorna jězba młodeho muža nimo. Zamołwić změje so wón mjez druhim za jězdźenje bjez jězbneje dowolnosće a pod wliwom drogow.
Policija (01.04.25)
Z bitcoinami pjenjezy zhubił
Šěrachow. Internetni wobšudnicy su minjene tydźenje mužej w Šěrachowje wjele pjenjez wulišćili. Njeznaći 55lětneho spočatk měrca přerěčachu, konto za bitcoiny załožić. Na tele konto Šerachowčan we wjacorych krokach wysoku pjećcyfrowu sumu pjenjez přepokaza. Jako měješe so pozdźišo slubjeny dobytk wupłaćić, škodowany hižo žadyn kontakt k wobšudnikam njeměješe. Kriminalna słužba Budyskeho policajskeho rewěra pad nětko přepytuje. Při tej składnosći policija před inwesticijemi w interneće wuraznje warnuje. Ludźo měli tohorunja kedźbować, hdyž jim něchtó wulki dobytk za pjenjezy slubi.
Policija (31.03.25)
„Dyrdomdej“ w měsće
Kamjenc. Wulka rozhorjenosć knježeše sobotu popołdnju w Kamjencu. Tam bě so třilětne dźěćo na Hraničnej hasy na dyrdomdejske pućowanje po měsće podało. Něhdźe połtřeća hodźiny bě holčka zhubjena. Kaž policija rozprawja, běštaj sej staršej připołdniši wotpočink popřałoj a sej mysleštaj, zo tež jeju dźěćo spi. Te pak z wočinjenymi durjemi z domu twochny. Třilětna bě jeničce w pjeluškach. To napadny kedźbliwej wobydlerce na Karla Marxowej. Žona dźěćo policiji přepoda. Na zbožo so ničo stało njeje, tak zo móžachu holčku spěšnje zaso maćeri a nanej dowjezć. Žonje, kotraž bě ju wuhladała, so policija wuraznje dźakuje.
Dźěćo tragisce znjezbožiło
Brěznja. Tragiske dźěłowe njezbožo je so sobotu popołdnju w Brězni pola Kamjenca stało. Při bagrowanju na priwatnej ležownosći je sydomlětny hólc ćežko znjezbožił a hišće na městnje zemrěł. 54lětneho wodźerja bagera a mać dźěsća lěkarsce zastarachu. Kriminalna policija pad přepytuje.
