Stipendije za kurs čěšćiny
Budyšin. Štóž ma zajim za rěčny kurs čěšćiny wot 17. julija hač do 14. awgusta 2025 w Praze abo wot 3. hač do 25. awgusta 2025 w Českich Budějovicach, njech w Rěčnym centrumje WITAJ hač do 23. měrca swoje přizjewjenske podłožki woteda (Póstowe naměsto 2, 02625 Budyšin, e-mail ). Formular a dalše informacije su na internetnej stronje www.witaj-sprachzentrum.de přistupne.
Někotre městna swobodne
Smjerdźaca. Serbske šulske towarstwo přewjedźe w měrcu a aprylu dźěłarničku, w kotrejž móža wobdźělnicy stawiznički wuwiwać a je powědać abo hrać. Wona měri so wosebje na kubłarjow, wučerjow zakładnych šulow, staršich, wowki a dźědow kaž tež na wšitkich „wulkich“ powědarjow bajkow. Kurs wotměje so 13. a 14. měrca kaž tež 10. a 11. apryla stajnje wot 14 do 17.30 hodź. w Smjerdźečanskim Serbskim kubłanskim srjedźišću LIPA. Dokelž maja hišće někotre swobodne městna, móža so zajimcy hišće hač do kónca februara přizjewić, a to pola Hanki Šěnec pod telefonowym čisłom 01520 20 92 170.
Kniha změje premjeru
Lisćiki za póstnicy
Spominaja na awtorku
Wojerecy. Składnostnje 51. posmjertnin spisowaćelki Brigitte Reimann přeprošuje Wojerowska měšćanska biblioteka, kotraž nosy jeje mjeno, wšitkich zajimowanych srjedu, 19. februara, w 17 hodź. na čitanje do tamnišeje kofejownje. Na zarjadowanju słyšiće wujimki z listow, kotrež je awtorka přećelam-wuměłcam pisała. Zastup je darmotny. Zarjadowarjo proša wo přizjewjenje pod čo. 03571 607753 abo z mejlku na
Kamjentnu dobu dožiwić
Wojerecy. Přichodny poskitk za dźěći, kotryž ma Hród a Wojerowski měšćanski muzej w swojim programje, je srjedu, 19. februara, w 13 hodź. Dźěći w starobje 7 do 12 lět su na pućowanje do kamjentneje doby přeprošene, na kotrymž zhonja, kak su ludźo tehdy žiwi byli.
Za dźěći a młodostnych
Stróža. Serbski šulski muzej w Stróži poskićuje w zymskich prózdninach stajnje wutoru, srjedu a štwórtk wot 9.30 do 14.30 hodź. zabawu za mjeńše a wjetše dźěći kaž tež młodostnych. Wutoru zaběraja so z picu za ptački a twarja picowanske stacije. Srjedu chcedźa z přirodnymi materialijemi paslić a nawuknu makramee. Štwórtk pak změšeja balsam za hubje a přećiwo kašelej. Za wobdźělenje zběraja zamołwići na wosobu wosom eurow. Přizjewjenja su pod telefoniskim čisłom 0176 40525934 móžne.
Jazz Maika Krahla dožiwić
Budyšin. W Budyskim Kamjentnym domje móžeće dźensa wječor w 20 hodź. wuběrneho jazzoweho trompetarja Maika Krahla a jeho hudźbny cyłk live dožiwić. Swoje jónkrótne kmanosće na instrumenće je sej rodźeny Budyšan mjez druhim při studiju pola sławnych wučerjow kaž trompetarja Tilla Brönnera abo Malte Burba zdobył. Zastupny lisćik při wječornej kasy płaći 24 eurow resp. zniženy 21 eurow.
Předstaja kandidatow
Nowe předsydstwo wolili
Nowa Wjeska. Nowowješćanske wjesne towarstwo je kónc januara na wólbnej zhromadźiznje Jana Hellnera jako noweho předsydu woliło.
Dubrjenske bahno a wuměłstwo
Kamjenc. Muzej zapadneje Łužicy w Kamjencu přeprošuje pjatk, 14. februara, w 19 hodź. wšitkich zajimcow na wotewrjenje wosebiteje wustajeńcy „TERRA INCOGNITA Dubrjenske bahno – wuměłstwo zetka přirodu“ w tamnišim elementariju. Wuměłski kružk z wokrjesa Hornje Błóta-Łužica je so do Dubrjenskeho bahna podał a so z krajinu wuměłsce rozestajał. Nastali su cyle rozdźělne wurazliwe twórby w najwšelakorišich barbach, strukturach a materialijach. Kuratorka Julija Baumbachowa je wuběrk twórbow, kotrež su wot lěta 2021 nastali, za wustajeńcu zestajała.
Nowy pad mrětwy ASP zwěsćili
Komorow. Krajny přepytowanski wustaw (LUA) je pola dźiwjeho swinjeća, kotrež bu kónc januara w Komorowje zatřělene, infekciju swinjaceje mrětwy (ASP) zwěsćił. Narodny referencny labor je wuslědk wobkrućił. W zwisku z dalšimi přepytowanjemi afriskeje mrětwy zasadźuja fachowcy tež truty. Dokelž su nowy pad w eksistowacym škitnym pasmje II zwěsćili, njetrjebaja nowe škitne naprawy zarjadować. Předpisy za plahowarjow skotu w pasmje dale płaća. W aprylu 2025 planowane zniženje škitneho schodźenka pak nětko hižo móžne njeje.
Kino w Kamjentnym domje
Budyšin. Kino w Budyskim Kamjentnym domje předstaji jutře, 12. februara, w 20 hodź. thriller-dramu „Die Saat des heiligen Feigenbaumes“ na filmowym festiwalu Berlinale wuznamjenjeneho režisera Mohammada Rasulofa, kotryž tematizuje patriarchaliske poměry w Iranje pod mula-režimom. Film je w lěće 2022 w času nazymskich protestow tajnje nastał. Režiser je swoju domiznu wopušćić dyrbjał, dokelž bě sam wohroženy. Zastupny lisćik płaći 7 eurow.
Gmejnska rada Ralbicy-Róžant
Ralbicy-Róžant. Gmejna Ralbicy-Róžant přeprošuje wutrobnje wšitkich zajimcow na zjawne posedźenje gmejnskeje rady štwórtk, 13. februara we 18.30 hodź. do sydarnje gmejnskeho zarjada w Róžeńće. Mjez druhim informuje za přetwar a nowotwar Ralbičanskeje pěstowarnje społnomócnjeny planowanski běrow wo stawje tuchwilnych dźěłow.
Hłowna zhromadźizna TCM
Chrósćicy. Předsydstwo Towarstwa Cyrila a Metoda (TCM) přeprošuje čłonow towarstwa, sekcijow kaž tež korporacijow na hłownu a wólbnu zhromadźiznu do Chrósćic. Zarjadowanje štwórtk, 13. februara, zahaji so ze zhromadnej Božej mšu we 18.00 hodź. w tamnišej cyrkwi. Přizamknje so zhromadźizna na farje. Tu maja čłonojo składnosć, swój lětny přinošk we wysokosći dźesać eurow zapłaćić.
Njepłaćiwe wólby wospjetować
Thalloris Quartett zahudźi
Budyšin. W swojim koncertnym rjedźe prezentuja Budyske komorne koncerty sobotu, 8. februara, w 19.30 hodź. wosebity hudźbny wjeršk na žurli Serbskeho muzeja: renoměrowany Thalloris Quartett z Pólskeje. To je w lěće 2019 załoženy žónski smyčkowy ansambl, kotremuž přisłušeja solistki Zielonogórskeje filharmonije kaž tež filharmonije Sudecka z Wałbrzycha. Mjez druhim zahraja kruchi z koncertow „Nalěćo“ a „Lěćo“ Antonia Vivaldija a „Madźarsku reju“ Johannesa Brahmsa.
Požadansku dobu podlěšili
Budyšin. Hač do pjatka, 14. februara, móža Budyšenjo w měšćanskim zarjadnistwje próstwy wo spěchowanje swojeho powšitkownowužitneho projekta ze srědkami z wobydlerskeho etata zapodać. Tež juristiske wosoby (na přikład towarstwa a firmy) su woprawnjene. Wažne je, zo próstwystajerjo projekt jasnje wopisaja a zo cyłkowne kóšty kaž tež předstawu wo spěchowanskej sumje podadźa. Cyłkownje steji lětsa 20 000 eurow k dispoziciji. Zajimcy dóstanu nadrobniše informacije online na abo pod telefoniskim čisłom 03591 534609.
Na póstnicy do Nuknicy
Nuknicy. W Nukničanskej barace swjeća sobotu, 8. februara, póstnicy. Pod hesłom „Čornoběłe je pisane dosć“ su wot 15.30 do 17.30 hodź. wosebje dźěći na hejsowanje přeprošene. Po kemšach, w 19.30 hodź. je wjesoły wječork za wšitke dorosćene nory. Za dźěći je zastup darmotny, dorosćeni płaća sydom eurow.
Zahudźa w měšćanskim muzeju
Budyšin. W Budyskim měšćanskim muzeju maja wosebitu rumnosć, w kotrejž wustajeja křesćanske wuměłstwo, mjez druhim wołtarje ze srjedźowěka. Njedźelu, 9. februara, w 15 hodź. zahudźi tu instrumentalny kruh Consonare swj. Pětra. Mjez druhim zaklinča tež serbske pěsnje. Wustajenych eksponatow dla je w rumnosći chłódne. Zamołwići doporuča, so ćopłu drastu zwoblěkać. Dorosćeni płaća 7 eurow zastupa. Za dźěći a młodostnych hač do 16 lět je zastup darmotny.
Žiwe stawizny dožiwić
Na Qigong
Smjerdźaca. Serbske šulske towarstwo poskića kurs k zesylnjenju ćěła a ducha. Tónle štwórtk, 6. februara, chce wukubłana wučerka za medicinski Qigong Hanka Šěnec ze zajimcami wot 19 do 20.30 hodź. na gmejnskim zarjedźe w Chrósćicach trenować. Zwučowanja přisporjeja pohibliwosć ćěła a pomhaja stres wottwarić. Popłatk za poskitk wučinja 100 eurow.
Kwalitu pitneje wody pruwować
Sernjany. Kotru kwalitu jich pitna woda ma, móža zajimcy štwórtk, 6. februara, w rumnosćach předewzaća K.IM.S. tzwr w Sernjanach Při rězaku 9 zhonić. Wot 19 hodź. poskićuja fachowcy wotpowědne testowanja wody z honača abo mineralneje wody. Zarjadowarjo proša wo přizjewjenje pod telefoniskim čisłom 0173 9140520.
Strategije rěčneho spěchowanja
