Starožitnosće znowa wotkryć
Budyšin. Twjerde a papjerjane pjenjezy, medalje, wuznamjenjenja, pohladnicy, literatura, listowe znamki a wšo móžne dalše, štož ludźo zběraja, steja w srjedźišću jutrowneje bursy zběrarjow w Budyšinje. Wona wotměje so wulki pjatk, 18. apryla, wot 9 do 14 hodź. w Budyskim Serbskim domje. Tam móža so zajimcy poradźować dać. Wo ćělne derjeměće budźe postarane..
Wosebity poskitk za prózdniny
Zhorjelc. Pod hesłom „Mission Exoplanet“ wuhotuje Astrocentrum Łužica wot 21. hač do 25. julija wosebity poskitk za prózdniny w Zhorjelcu a wokolinje. 20 dźěći a młodostnych změje w tym času składnosć, dopołdnja slědźersce skutkować a so popołdnju sportowym zaběram wěnować. Mjez druhim chcedźa za nowymi planetami w swětnišću pytać a k nim swětnišćowu łódź pósłać. Nimo toho steja kopańca, kicker a krosnowanje na programje. Zajimcy njech přizjewja so hač do 31. meje e-mailnje pod mission-exoplanet.de.
Zetkanje zabawne a powučne
Nutrnosć w bróžni
Přednošuje we wustajeńcy
Wiki na Nastupnišću 19
Pytaja bobra
Njeswačidło. Přirodowa centrala Budyskeho wokrjesa pyta wot tohole tydźenja informacije wo tym, hdźe je bobr aktiwny a hdźe je swoje slědy zawostajił. Přičina je, zo chcedźa jednotliwe rewěry bobra we wokrjesu zwěsćić a dokumentować. Iniciator je spěchowanske towarstwo Njeswačanskeje ptakoškitneje stacije. Kónc 18. lětstotka je so bobr z Hornjeje Łužicy zhubił. Dźensa wón tu zaso je a so podłu rěkow w regionje hornjołužiskeje hole a hatow wupřestrěwa. Bobr je kruće škitany. Štóž je jeho slědy wuhladał, móže to na stronje abo e-mailnje pod zdźělić.
Twarja móst nad Čornicu
Radźićeljo wuradźuja
Róžant. Štwórtk, 10. apryla, wuradźuje gmejnska rada Ralbicy-Róžant. Započatk budźe we 18.30 hodź. w Róžeńčanskej sydarni. Hłowna tema budźe wobtwarjenski plan „Sernjany – Při rězaku“.
Rěčna hodźina zapósłanče
Kamjenc. Zapósłanča Sakskeho krajneho sejma Elaine Jenčec (CDU) přewjedźe swoju přichodnu wobydlersku rěčnu hodźinu póndźelu, 14. apryla. Wot 15 do 17 hodź. maja wobydlerjo móžnosć, we wólbnym běrowje w Kamjencu na Zapadnej 4 swoje naležnosće přednjesć. Termin móža sej zajimcy pod telefonowym čisłom 03578 305383 dojednać.
Pjeku kmótřisku całtu
Delni Wujězd. Domizniske towarstwo Delni Wujězd přeprošuje hromadźe z projektom Domowiny ZARI na zhromadne popołdnjo pod hesłom „Serbska kuchnja“. Srjedu, 16. apryla, wot 17 hodź. wobdźělnicy dožiwja, kak so kmótřiska całta pječe. Wobdźělenje płaći na wosobu pjeć eurow. Přizjewjenja přijimuja pod .
Radźićeljo wuradźuja
Radwor/Njebjelčicy. Přichodne posedźenje Radworskeje gmejnskeje rady wotměje so jutře, srjedu, we 18.30 hodź. w sydarni gmejnskeho zarjadnistwa. Dnjowy porjad wopřijima mjez druhim njeplanowane wudawki za financowanje wohnjowoborneju jězdźidłow a přihłosowanje wólbam nawjedowacych wohnjowych wobornikow we Łupoji a Chelnje. Tohorunja jutře, ale w 19 hodź., zetka so Njebjelčanska gmejnska rada w sydarni gmejnskeho zarjadnistwa. Na dnjowym porjedźe steja mjez druhim hospodarski planje 2025, wotnajenske zrěčenje za bywšu předawarnju w Miłoćicach a wobtwarjenski plan w Pěskecach.
Serbskej ćežišći na festiwalu
Drježdźany. Filmowy swjedźeń Drježdźany zahaji so jutře, srjedu, mjez druhim z formatom Regionalny fokus, lětsa pod hesłom Sagenhaft sorbisch, kaž tež z popołdnjom krótkofilmow pod nadpismom Wiźeś – Sichtbar – Widźomne. Kooperaciskej partneraj wobeju zarjadowanjow stej mjez druhim syć Łužycafilm a Sakski filmowy zwjazk.
Powjedźe po lěsu
Pěskecy. Za wobsedźerjow lěsow we Worklečanskim rewěrje wotměje so sobotu, 5. apryla, informaciske a kubłanske zarjadowanje. Zajimcy zetkaja so w 9 hodź. na parkowanišću při Pěskečanskim sportowym domje. Wottam powjedźe dwě hodźinje trajaca ekskursija pěši něhdźe dwaj kilometraj po lěsu. Rewěrowy nawoda Michał Zahon rozkładźe, što maja wobsedźerjo při hladanju swojeho lěsa wobkedźbować. Wobdźělnicy měli na kmanu drastu a krute črije myslić.
Wo kumštnej inteligency
Radwor. Chór Meja přeprošuje wutrobnje wšitkich zajimcow na přednošk wo temje „Kumštna inteligenca a digitalne medije – šansa, strachi a wjeselo“ póndźelu, 7. apryla, w 19.30 hodź. do Słodeńka. Přednošować budźe Michał Cyž.
Jutrowne jejka debić
Kamjenc. Serbske jutrowne jejka debić móža zajimcy jutře, sobotu, wot 14 do 17 hodź. w elementariju Kamjenskeho muzeja zapadneje Łužicy. Pod nawodom Astrid Homolic-Domašcyneje z Kulowa pospytaja so woni w bosěrowanju. Debjenje jejkow je w zastupnym pjenjezu za muzej sobu zapřijate. Jeja w muzeju změja.
Bursa za twarcow modelow
Nóc bibliotekow w instituće
Budyšin. Serbska centralna biblioteka (SCB) wobdźěli so prěni raz na cyłoněmskej nocy bibliotekow. Ju wotměja pjatk, 4. apryla, wot 18 hodź. pod hesłom „Wědu dźělić a sej wotkryć“ w BudyskimSerbskim instituće na Dwórnišćowej 6. We 18 hodź. wotewru tam kabinetnu wustajeńcu wo dźěławosći nakładnistwa Lusatia. Dale předstaji dr. Robert Lorenc Mukowu „Statistiku łužiskich Serbow“ z lěta 1886 (w němskej rěči). Sćěhuja krótke a zabawne čitanja powědkow, krimijow a lyriki z wobstatka biblioteki serbsce a němsce. Čitaja Madleńka Šołćic, Měrćin Wjenk, Anja Pohončowa a Měrana Cušcyna. W sydarni předstaji młode towarstwo Serbska murja swoje wideja wo serbskich stawiznach a přeprošuje zajimcow, so w hrě „QuizSerb“ wubědźować. Zajimcy su wutrobnje witani.
... a w gmejnje
