Kónc lěta 2024 a započatk noweho lěta 2025 njejstej za mnje wosobinsce lochkej byłoj. Mějach mjenujcy ze swojim doktorskim dźěłom jara wjele prócy a wušparanja. Termin wotedaća so dźeń a njesmilnišo bliži – jelizo chcu k doktorskemu pruwowanju a zakitowanju disertacije w předwidźanym terminje nastupić, dyrbju wuslědk swojeje 4lětnjeje prócy nanajpozdźišo srjedź měrca hotowy a wućišćany wotedać. Měrny hodowny čas, silwester a nowe lěto wužiwach tuž k tomu, zo bych poslednje kapitle disertacije na swojim starym ličaku hysterisce wotklepał. Z horcej jehłu šite teksty sym pak jedyn po druhim našej wowce nosył, zo by mi prawopisne zmylki, njelepe stilistiske wobroty a sorabizmy, kotrež su mjeztym moju čěšćinu dospołnje skóncowali, korigować pomhała. Ze sorabizmami nježortuju, woprawdźe je mi wowka hustodosć prajiła, zo mój słowoslěd někak spodźiwnje wupada. Naša wowka bě mjenujcy wučerka čěšćiny a jeje wóčko žane zmylki njepřewidźi.
