Kaž kóžde lěto přewjeduja so nětko hač do měrca najprjedy raz swětowe mišterstwa we wšelakich sportowych družinach.
W Egyptowskej běchu so swětowe mišterstwa w mjetańcy přewjedli, a w Słowjenskej wojuja bórze najlěpše biatletki a najlěpši biatleća swěta wo medalje. W juniju wubědźuja so najkmańši koparjo w dwanaće europskich městach, mjez druhim w Mnichowje, wo krónu Europy, a kónc julija budźe cyły swět do japanskeho Tokija hladać, hdyž wotměja so tam potom Olympiske lětnje hry.
Wšitke swětowe abo europske mišterstwa wšěch móžnych sportowych družin tule naličić by předołho trało. Ale tež, hdyž tučasnje koronapandemija naše žiwjenje postaja, je chětro wěste, zo mjenowane sportowe podawki budu.
W januarje 2020 přewjedźechu w delnjołužiskim Łukowje (Luckau) halowy koparski turněr žónskich mustwow, na kotrymž wobdźělichu so tež žony a holcy FC Energije Choćebuz. Młoda hrajerka Lara Schmidt wubědźi sej tehdy pokal, dokelž bě najwjac wrotow třěliła.
Hnydom po turněrje pak 13lětna koparka pytny, zo hrajerki kontrahenta SG Gießmannsdorf zdźěla płakajo w kruhu steja. Jako Lara zhoni, zo bě někotre dny do turněra 38lětna koparka Michaela Powelz na raka schorjeła, přewostaji pokal hnydom jej. „Myslach sej, zo móže jej pokal jako talisman dosć mocow za přichod spožčić“, Lara Schmidt zwurazni. „Běch tehdy jara překwapjena a hnuta, zo njeznata młodostna takle reaguje“, so Michaela Powelz dopomina. „Mějach pokal potom tež přeco při sebi, a tón je mi woprawdźe stajnje móc a zmužitosć dał.“
Tež trenar Tobias Kroll sej kapitanku C-juniorow chwali: „Tajka gesta Laru woprawdźe charakterizuje, wona so za wšo zajimuje a je jara komunikatiwna.“
Němska lodohokejowa liga DEL2
1. EC Kassel Huskies 25 55 99:51 +48
2. Ravensburg Tower.26 44 87:77 +10
3. Bietigheim Steelers 26 44 98:90 +8
4. LP Crimmitschau27 44 93:93 0
5. Tölzske Lawy 23 42 96:69 +27
6. EHC Freiburg 26 39 91:84 +7
7. EV Landshut 26 37 86:95 -9
8. Bayreuth Tigers 26 35 83:90 -7
9. Lawy Frankfurt 21 33 59:65 -6
10. EC Bad Nauheim 22 32 68:87 -19
11. LL Drježdźany 26 32 66:85 -19
12. Łužiske liški 26 30 65:86 -21
13. ESV Kaufbeuren 24 28 85:94 -9
14. Sokoły Heilbronn 22 24 75:85 -10
... njedóstanu Běłowodźanske lodohokejowe liški puk do přećiwniskich wrotow. Wobhladamy-li sej jich wrotowy přerězk minjene dźewjeć razow, wothladajo wot wuspěcha 7:3 přećiwo Bad Nauheimej, leži tón pola 1,3 na hru. Přećiwo Kaufbeurenej a Drježdźanam Hornjołužičenjo scyła do čorneho trjechili njejsu. A dokelž móžachu njedźelu wječor doma znowa jenož jónu wyskać, dźěchu wospjet jako přěhračk z lodu. Dokelž hosćo jeničce z 13 a domjacy z 15 hrajerjemi nastupichu, běše to duel deciměrowaneju mustwow. A hladajo na wotběh partije móhli ju chowancy trenarja Correyja Neilsona tež dobyć, bychu-li skónčnje raz swoje móžnosće wužili.
W prěnjej třećinje pak mějachu najprjedy raz jara mało tajkich. Jenož trójce třělichu crackojo z Běłeje Wody na wrota, hosćo cyłkownje dźewjeć króć a jónu tež wyskachu. A to po pjeć mjeńšinach, jako steješe nadběhowar hosći samlutki před Mac Carruthom a přemyslenje přetwori. Cyłkownje móžachu Liški wjesołe być, zo dźěchu jeno ze snadnym zastatkom do prěnjeje přestawki. Wšako běchu hosćo dalše wulke šansy měli.
Zo smědźa profijowi koparjo nadal za bulom honić, njeje žane potajnstwo. Tež hrajerjo FC Energije Choćebuz w regionalnej lize pod profesionelnymi wuměnjenjemi trenuja a su takrjec powołanscy koparjo. Přiwšěm woni hišće hrać a wo dalše dypki wojować njesmědźa. Kak to trenar Dirk Lottner hódnoći, je wón Georgej Zielonkowskemu po telefonje prajił.
Knježe Lottnero, najprjedy raz zbožowne a strowe lěto 2021!
D. Lottner: Wutrobny dźak! Strowota dźě je stajnje najwažniša, tohodla sej ju lětsa wosebje přeju, wězo tež Wam a wšěm čitarjam.
Koparjo Energije su tučasnje doma a dźěłaja dźělnje, po tym zo běchu loni 1. nowembra přećiwo Luckenwalde swoju poslednju partiju přewjedli. Wy sam sće cyły čas w Kölnje pola sojeje swójby był. Tróštuje Was swójbne žiwjenje, zo njemóžeće runje jako coach při liniji stać?
D. Lottner: Wězo je rjenje, tak dołho ze swójbnymi doma być směć. Ale runje tak kaž koparjo sym tež ja ze zapalom z kopańcu zwjazany a tohodla bych radšo nam zwučeny wšědny dźeń wzał. Mi by potajkim dosahało, hdyž bych jenož na swobodnych dnjach raz domoj jěł.
Kopańca
regionalna liga muži (staw: 1.11.2020)
1. Viktoria Berlin 11 26 : 9 33
2. VSG Altglienicke 11 29 : 14 25
3. BSG Chemija Lipsk 13 25 : 12 24
4. FC Carl Zeiss Jena 12 24 : 16 21
5. Berlinski AK 12 25 : 21 20
6. Lok Lipsk 12 20 : 17 19
7. BFC Dynamo 11 26 : 17 18
8. FC Energija Choćebuz 13 18 : 19 18
9. Kamjeničanski FC 13 20 : 17 17
10. SV Babelsberg 13 18 : 20 17
11. Union Fürstenwalde 11 22 : 20 16
12. SV Lichtenberg 47 13 15 : 20 16
13. FSV 63 Luckenwalde 13 14 : 22 15
14. Hertha BSC II 11 12 : 15 14
15. Germania Halberstadt 13 12 : 18 11
16. VfB Auerbach 12 18 : 26 11
17. ZFC Meuselwitz 13 14 : 22 11
18. Optik Rathenow 13 15 : 25 11
19. Tennis Borussia Berlin 10 15 : 20 9
20. Biskopičanske KT 12 12 : 30 7
To drje bě zašły tydźeń najprjedy raz mała kročel po puću k normaliće. Po njedźelnym koronatesće podachu so koparjo FC Energije Choćebuz póndźelu na trening w Stadionje přećelstwa. Mjez nimi bě tež Iven Löffler, kiž běše so na prěnim treningu w sezonje 2020/2021, loni 11. julija, na kolenje zranił. Prěni raz sedźeše U19-hrajer Energije w kabinje prěnjeho mustwa: „Za mnje bě to ćežke prěnje połlěto, sym pak dołhu treningowu přestawku z wjele běhami intensiwnje wužiwał. Nětko so nadźijam, zo so skónčnje porjadnje w kadrje muži zažiwju.“
Štóž so dobyća Běłowodźanskich lodohokejowych liškow nadźija, tón njeje minjeny čas přehusto dobru naladu měł. Minjeny pjatk wječor pokazachu Hornjołužičenjo w sakskej stolicy nimale cyły čas wjac hač jenož dobry lodohokej. Woni běchu hosćićelej runohódni, jeli nic samo lěpši. Ale čim bóle so jeho wrotam bližachu, ćim njestrašnišo agěrowachu. A jako dyrbješe bjezwrotowy duel do podlěšenja (overtime), njejsu hrajerjo z Běłeje Wody najlěpše šansy wužiwali a dyrbjachu po konteru domjacych samo wrota přijimać. Wrotar Mac Carruth bě w situaciji „štyrjo přećiwo dwěmaj“ bjezmócny, a tak móžachu sej Lodowe lawy přidatny dypk wuwojować. Prěnju hiobowu powěsć dósta trenar Łužiskich liškow hižo do hry. Tophrajer Rylan Schwartz njemóžeše so zranjenja dla na hrě wobdźělić. Za to je krótkodobnje Nino Kinder wupomhał. A runje tón měješe jenož někotre sekundy do kónčneje sireny regularneho časa wulku składnosć, wrota dnja docpěć a tak hosćom dwaj dypkaj zaručić.
Dźěłowa skupina Sewjerowuchodneho koparskeho zwjazka (NOFV) „Kak dale w regionalnej lize“ je we widejowej konferency w januarje rozsudźiła, zo w regionalnej lize Sewjerowuchod znajmjeńša hač do 28. februara žane hry njebudu.
„Winowatostne dypkowe hry w februarje 2021 wokomiknje zamołwić njemóžemy!“, komentowaše Uwe Dietrich, předsyda hrajneho wuběrka NOFV. Koparski zwjazk drje chce ručež móžno dypkowe hry zaso dowolić, dyrbi pak so přeco znowa pozicioněrować.
Předsyda FC Energije Choćebuz Sebastian Lemke so postajenja dla njedźiwa: „Sprawnje! Tajke rozsudy tola nikoho njezadźiwaja. Hladamy-li na aktualne pandemijowe połoženje w Němskej a specielnje we wokrjesu Sprjewja-Nysa a w Choćebuzu, njejsu docyła hinak rozsudźić móhli. Wšo druhe njeby so zamołwić hodźało, tež hdyž chcedźa naši hólcy wězo kopańcu hrać a zhromadnje trenować.“ Georg Zielonkowski