Lětuše Hornjoserbske słowo lěta předewšěm w młodźinje woblubowane

Budyšin (SN/bn). „Kadla“ je Hornjoserbske słowo lěta 2024 (HSSL). Stary wuraz z dohromady dźesać w Soblexxu jewjacymi so woznamami nałožuje so dźensa z němym „d“ předewšěm w rěči młodostnych jako pendant k němskemu „Alter“. Hesło přesadźi so ze 17,7 procentami přećiwo nowotwórbje „přesłapjenka“ (17 proc.), kotraž bu ze stron čitarstwa jako „słowo, kotrež wopisuje situaciju, w kotrejž so ći tak prawje zecnje a wostrózbnjace začuće, hdyž njejsy docyła spokojom“ namjetowane. Na třećim městnje slěduje dalši neologizm, mjenujcy „paypalować“ (14,3 proc.). Tónle werb wotwodźuje so z drje najznaćišeho posłužowarja za digitalne zapłaćenje a hodźi so mjeztym skupinje družinowych zapřijećow přirjadować. Towaršnostno-politisce lětsa dominowace hesła resp. kombinacije „wólbne superlěto“, „ćernjowkowa koalicija“ a „legalizacija“ wopokazachu so wobsadźiwši z dwójce 0,7 a jónu 2,7 proc. troje městna na kóncu tabulki jako poměrnje njepopularne wobroty.

Budyšin (SN/bn). Doba zapodaća namjetow za Hornjoserbske słowo lěta 2024 (HSSL) je zakónčena. Z cyłkownje 20 słowow a wobrotow je jury dźesać kandidatow wuzwoliła. Lisćina wopřijima „wjacore hesła lětušich ćežišćow w politice resp. towaršnosći, wjele lubjacej nowotwórbje a přikładaj přewšo kreatiwneho wobchada z rěču“. Wuběr bě wšo druhe hač lochki. Tak hodźała so wunamakanka „Radhor“ za Radeberg na kóncu mjenowanej klasifikaciji přirjadować, mjeztym zo sej jurorojo wo kombinaciji „tramwajkowa trać“ podarmo hłowy łamachu. Tohorunja wotpokazanej buštej germanizmaj „lazwać“ a „fecich“, byrnjež z krutym wobstatkom wobchadneje rěče wšědneho dnja byłoj. Njestej pak wosebity fenomen lěta 2024, štož płaći tež za namjetaj „popječenka“ a „pryskać“.

Po dobrym měsacu w redakciji našeho wječornika je so Vanessa Žurec dawno do wšědneho dnja redakciskeho dźěła zažiwiła. 18lětna Radworčanka je lětsa abituru złožiła. Hižo w šuli su so jej rěčne předmjety wosebje lubili. Pisanje kóždehožkuli teksta je jej wosebje wjele wjesela wobradźiło. Ze swojej žiłku za to, mysle do słowow zjeć, by wona tak a tak dobra kandidatka za serbski žurnalizm była. Napadnyła je nam jeje skutkownosć za młodźinski klub „Radworske“, hdźež so jako aktiwna čłonka hłownje wo wabjenje stara – tež w socialnych syćach interneta. A Serbske Nowiny trjebaja po lětušim zahajenju přidatneho aktualneho rozprawnistwa na Instagramje kaž tež do klětušich dalšich kročelow wšědneje prezency w digitalnym swěće młodych „Digital Natives“, kotřiž su z internetom wotrostli. Tak je derje, zo mamy nimo třoch 60+ lět starych a „frakcije“ srjedźneje generacije tež třoch 20+ lět młodych, kotřiž stajnje za serbski dźenik dźěłaja.