Kapitan Borgmann – woprawdźity kapitan FC Energije!

Z dobreje přičiny je zaso raz tak daloko, myslić na znate zwěsćenje, kotrež rěka „Čas leći!“ Čłowjek móže lědma wěrić, zo Axel Borgmann mjeztym hižo pjeć a poł lěta za FC Energiju Choćebuz swoje kopački šnóruje. Wot nižozemskeho prěnjeho ligista VVV-Venlo bě škitar w awgusće 2019 k FC Energiji Choćebuz přišoł, a so tam hnydom ze stajnym hrajerjom runje hakle do regionalneje ligi zestupjeneho mustwa stał. A tež za Axela Borgmanna runaše so tuta změna towarstwa sportowemu zestupej. Jeho předchadźacej mustwje słušeštej mjenujcy k prěnim ligam w Němskej a Šwicarskej. Ze šěsć lětami bě Borgmann pola Schalke 04 hrać započał. Wot tamnišeho druheho mustwa změni wón do Šwicarskeje, do prěnjeje ligi k FC Vaduz. Tam bě wón tři lět, po tym hraješe pola VV-Venlo.