Worklečanki tři dypki sej zaručili
VV Žitawa 09 II – Viktoria Worklecy I 1:3 (26:24, 12:25, 18:25, 22:25)
Za Viktoriju Worklecy hrajachu: Diana Hajnec, Marina Köhler, Stefanie Köhler, Jenny Otto, Constance Pötschke, Rejzka Rawšec, Anja Šmidtowa, Emma Šustrec, Hannah Šustrec, Jana Žurowa; trenarka: Daniela Kralec
Na wonkowny hrajny dźeń dojědźechu sej Worklečanki do Žitawy. Tam nastupichu přećiwo druhemu zastupnistwu VV Žitawa 09. Dokelž bě hra za Žitawčanki druha na tutym dnju, běchu wone hižo zahrate.
3. Juniorcup – halowy koparski turněr dorosta
Chróšćenjo we Worklecach juniorowy cup dobyli
Wobě mustwje starobneje klasy młodźiny E Sportoweje jednotki Chrósćicy stej na druhej soboće lěta we Worklecach prěnje a druhe městno při dorostowym halowym koparskim turněrje SJ Njebjelčicy wobsadźiłoj. Na třećim tak mjenowanym juniorcupje bě so wosom koparskich cyłkow z Radworja, Pančic-Kukowa, Njebjelčic, Ralbic a Chrósćic wobdźěliło. W modusu kóždy přećiwo kóždemu hraješe so stajnje dźewjeć mjeńšinow. Po nimale pjeć hodźinach, 28 hrach a wjac hač 100 wrotach bě dobyćer jasny: Prěnje mustwo młodźiny E sportoweje jednotki Chrósćicy. Zakitowar pokala wšitke sydom duelow doby.
Najlěpša hrajerka turněra bě Marie Šnajdrec z Radworja (ST Radwor), najlěpši hrajer Smječkečan Elias Jakubaš (SJ Chrósćicy), najlěpši wrotar Kukowčan Mato Škoda (ST Marijina hwězda) a pokal za najlěpšeho třělca wrotow přepodachu Mackec bratromaj Jurjej a Józefej (wobaj SJ Chrósćicy). Wobaj trjechištaj 12 razow.
30 šulerjow a sydom dorosćenych Wyšeje šule Slepo je minjeny ...
Negatiwny rekord nastajili
ST Łobjowy kraj Coswig-Mišno –
ST Viktoria Worklecy 3:1
(25:23, 18:25, 25:22, 25:20)
Viktorianojo podachu so sebjewědomje do połobskeho kraja k hrajnemu zjednoćenstwu Coswig-Mišno. Kontrahent bě sej dotal w dźewjeć volleyballowych hrach jenož snadne šěsć dypkow wudobył. Nimo toho přěhra hižo prěnju partiju hrajneho dnja přećiwo Freitalej jasnje 0:3. Worklecy běchu potajkim na papjerje jasny faworit.
Hosćo tuž hru zahajichu a po někotrych kedźby hódnych nadběhach spěšnje 6:2 nawjedowachu. Tola domjacy wužichu někotre njekoncentrowanosće Worklečanow při přiwzaću a při pólnym wotwobaranju, a při stawje 12:12 zaso wurunachu. Tež w druhej połojcy sadźby mějachu hosćo zwjetša snadnu lěpšinu, njemóžachu pak přehusto dypkować. Zaso wužichu Łobjenjo dźěry w bloku a móžachu prěnju sadźbu snadnje 25:23 za sebje rozsudźić.
Po změnje stronow agěrowachu Viktorianojo přewšo motiwowani a wutwarichu sej předskok sydom dypkow. Domjacy pak samo při stawje 22:11 dale wojowachu a móžachu zastatk hišće wo něšto skrótšić. Na kóncu pak skónčichu hosćo sadźbu 25:18.
Liški prěnju hońtwu lěta dobyli
Łužiske lodohokejowe liški –
Krefeldske pinguiny 5:2 (2:0, 1:1, 2:1)
Prěnju hońtwu, za požadanymi třomi dypkami noweje sezony su Łužiske liški suwerenje dobyli. Přećiwo druhemu tabulki přesadźichu so jasnje 5:2.
Hra započa so za Pinguiny ze stróželemi. Hižo w třećej mjeńšinje zadźěwa najprjedy žerdź wrotam prjedy hač Felix Bick z wažnej paradu zažnemu zastatkej zadźěwa. Tola Łužiske liški běchu wot spočatka eficientne. W 11. min. wuži Matej Leden překwapjacu třělwu direktnje po bullyju k 1:0. Hišće do přestawki zwyši Roope Mäkitalo po sylnje wuhratym konteru na 2:0.
Tež w druhej třećinje wostachu Liški eficientne. Lewis Zerter-Gossage trjechi w 21. min. kedźby hódnje do krótkeho róžka na 3:0. Hakle w 27. min. přińdźechu Pinguiny lěpje do hry. Lucas Lessio wuži druhi pospyt před wrotami liškow a skrótši na 3:1. Tola najebać wjacorych situacijow z jednym hrajerjom wjac na lodźe, mjez nimi tež dwójce z nadličbu, zwrěšći cyłk Thomasa Popiescha přeco zaso na wrotarju liškow Anthony Morronje, kiž měješe wusahowacy wječor.
Krasne zymske wjedro we Łužicy, ale tež w susodnej Čěskej je ...
Widźał,słyšał, napisał (13.01.25)
Awtor dźensa
André Strelow
Bul kula so zaso w zwjazkowej lize, a skónčnje dźe zaso wo dypki. Prěni hrajny dźeń w nowym lěće skićeše hižo dosć zapala za horce diskusije, na hrajnišću kaž tež w socialnych syćach. Kedźbyhódny wokomik sta so při partiji mjez Hoffenheimom a Wolfsburgom (0:1). Tu bu sudnik zwjazkoweje ligi Christian Dingert přez telewizijne mikrofony zapopadnjeny. „Sy ty klepnjeny?!“, zawoła wón do směra Hoffenheimskeho hrajerja Antona Stacha, po tym zo bě tutón diskusiju wo postajenym róžku nastorčił. Při tym činješe Dingert markantnu „woknotrějakowu“ gestu. Skóržby Hoffenheimerow přez tute wuprajenje njebě za čas hry žadyn indic za to, zo drje njeje Stach komentar nadhódnoćił. By hrajer z tutymi słowami na sudnika wotešoł, by to najskerje konsekwency měło. Po zasadźe dwanaće koparskich prawidłow by w tajkim padźe znajmjeńša žołta, hdyž nic samo čerwjena kartka, sćěh był.
Dynamo jako mišter do přestawki
HZ Unterhaching –
Dynamo Drježdźany 0:3 (0:1)
Zestajenje Dynamo Drježdźany: Schreiber – Risch, Boeder, Kubatta, Sterner, Casar (35. Menzel), Šapina, Hauptmann (85. Bünning), Oehmichen (70. Meißner), Daferner (70. Kutschke), Lemmer (85. Berger)
Koparske lěto 2024 je so za Dynamo Drježdźany wuspěšnje zakónčiło.
W 7. min. flankowaše Lemmer z połpola do šěsnatki, tola Drježdźanscy nadběhowarjo bul směr wrota njedóstachu. Jenož mjeńšinu pozdźišo bě wospjetna flanka wuspěšna. Flanka Sternera trjechi na dołhu žerdź, hdźež Casar bul přez wrotowu liniju stłóči. W 20. min. agěrowaše tež Unterhaching prěni raz trochu strašnišo před wrotami Schreibera. Kapitan Bayerow Schwabl trjechi z flanku na hłowu nadběhowarja Kügela. Tola tón bul naprawo nimo wrotow zhłójčkowa. Po času ćišć popušći. Tež domjacy cyłk dósta nětko hdys a hdys dobre móžnosće. Dynamo pak měješe wjace hrajnych podźělow.
Sport (10.01.25)
Juniorcup we Worklecach
Sportowa jednotka Njebjelčicy budźe jutře we Worklečanskej ćěłozwučowarni zarjadowar a wuhotowar 3. koparskeho turněra z mjenom „Juniorcup“. Hrać budu tam wot 10 hodź. wosom koparskich mustwow starobneje klasy młodźina E z Ralbic, Radworja, Pančic-Kukowa, Njebjelčic a Chrósćic.
Serbske mustwo žonow hraje
Njedźelu, 26. januara, zarjaduje a wuhotuje hrajne zjednoćenstwo koparkow ST 1948 Nadrózna Hrabowka/Módro-běli Kulow 6. TDDK-cup, a to wot 13 hodź. w sportowej hali w Njedźichowje. Šěsć cyłkow je připrajiło: KT Ottendorf-Okrilla 05, ST Lubuš, Wartenbergske ST Berlin 1974, SZ Gerbergrund Goppeln, Serbske mustwo žonow a Zeleno-běli Bukecy.
Worklečanki nastupja w Žitawje
Wobě mustwje žonow a holcow Viktorije Worklecy hrajetej jutře w Žitawje. Prěnje mustwo ma so z rezerwu VV Žitawy rozestajeć a druhe mustwo Viktorije z třećim mustwom VV Žitawy.
11.01. 14:00 VV Žitawa 09 II –
Viktoria Worklecy (ž)
11.01. 14:00 VV Žitawa 09 III –
Viktoria Worklecy II (ž)
16.01. 19:30 ST Marijina hwězda –
Sokoł Budyšin (m)
16.01. 19:30 Sokoł Budyšin –
ST Hnašecy-Dobruša (m)
16.01. 19:30 ST Marijina hwězda –
Sokoł Budyšin (m)
16.01. 19:30 ST Marijina hwězda –
Wupisanje za 40. Sokołski turněr wo pokal Domowiny
termin turněra: 29. měrca 2025
městnosć: sportowa hala w Radworju
čas: 9 do 16 hodź.
zarjadowar: Serbski Sokoł z.t.
wuhotowar: ST 1922 Radwor, Škit Budyšin z.t., Mustwo 1296
zaměr turněra: Pod sokołskim hesłom „Sportej a narodej – zdar!“ chcemy so k lóštnemu sportowanju a wjesołej zabawje zetkać. Zdobom chcemy styki mjez serbskimi wolejbulistkami a wolejbulistami a dalšimi sportowčemi a sportowcami skrućić a k popularizowanju Serbskeho Sokoła přinošować.
přeprošene mustwa: Na turněr su na dotalnych turněrach wobdźělene mustwa a nowačcy přeprošene. Wolejbulowe cyłki z Pólskeje, Čěskeje a dalšich słowjanskich krajow su lubje witane, runje tak kaž zastupnistwa narodnych mjeńšin Europy. Kóždy, kiž so do jednoho mustwa zarjaduje, njech so w swójbje sportowcow derje čuje.
