Waršawa. Poražka pólskeje narodneje wubranki přećiwo Senegalej na koparskich swětowych mišterstwach w Ruskej je Polakow dospołnje šokowała. Hač do dźensnišeho medije susodneho kraja „katastrofu“, „blamažu“ a „kompromitaciju“ analyzuja a přepytuja.
Něhdźe 18 milionow ludźi dyrbješe plajtu mustwa před telewizorami sobu dožiwić. Dźesaćitysacy běchu so nimo toho na fanowych milach a w stadionach kraja zhromadźili, chcyjo hru a dobyće Pólskeje live dožiwić. Dźeń po tym wuńdźe Gazeta Wyborcza z titulowym fotom, kotrež pokazowaše poraženych a bjezradnych přiwisnikow kopańcy na fanowej mili we Waršawje.
Praha (ČŽ/K). Čěske piwo je na swěće tak požadane, zo z jeho produkciju lědma dočinja. Zo by potrjebu lěpje kryć móhła, zwyši znata Plzeňska piwarnja Prazdroj kapacitu wo cyłu třećinu. Do noweje technologije, hłownje kotołow a tankow, inwestuje předewzaće něhdźe 280 milionow krónow (ca. 11 mio. eurow). Prazdrojej budźe tak móžno wob lěto nawarić 3,5 milionow hektolitrow předewšěm ležaka Pilsner Urquell. „Tale marka je naša chorhoj, a naprašowanje za njej spochi přiběra“ rjekny generalny direktor Prazdroja Grant Liversage. Wón dodawa, zo Pilsner Urquell do cyłeho swěta dźe, zo pak wotbytk na aziskich wikach najbóle rosće. Z Pilsner Urquell je předewzaće w Južnej Koreji jara wuspěšne, a wot najnowšeho tež w Japanskej. Najwjetši potencial wšak je po słowach Liversageho w Chinje.
Česko-Budějovicska piwarnja Budvar je loni nastupajo wuwoz nowy rekord docpěła – do 76 krajow swěta eksportowaše wona 900 000 hektolitrow piwa. Dohromady nawarjenych 1,517 milionow hektolitrow su přiwšěm štyri procenty mjenje hač lěta 2016. W hosćencach a korčmach su loni mjenje piwa točili.
Praha (ČŽ/K). Porno městnam tajkeho razu so čěske resp. słowakske zwěsćowarnje měnjenjow mjez ludnosću njewobhonjeja jenož wo wólbnych wuhladach jednotliwych politiskich stron abo wo nahladnosći načolnych politikarjow – to wězo tež činja –, prawidłownje zajimuja so za najwšelakoriše temy. Što maja woni za „najwažniši podawk w historiji“ a „kotre wosobiny sej najbóle waža?“, za tym buchu wobydlerjo Čěskeje a tohorunja Słowakskeje w aprylu prašani. Měnjenja w tej naležnosći zhromadnje zběrali su čěska agentura CVVM a sociologiski wotrjad Akademije wědomosćow ČR kaž tež sociologiski wotrjad Słowakskeje akademije wědomosćow.
Waršawa (JBR/SN). W južnopólskim wojewódstwje Podkarpackie wisaja na fasadach pjeć šulow gmejny Tuszów Narodowy marmorowe tafle z dźesać Božimi kaznjemi. W swojej formje dopominaja wone na bibliske Mójzesowe tafle.
Lokalny politikar narodnokonserwatiwneje strony PiS a zdobom wjesnjanosta gmejny Andrzej Głas twjerdźi, zo su tafle jako reakciju na „diskriminaciju katolikow“ w zapadnej Europje připrawili. Woni njemóža swoju wěru dosć wuznawać, w Šwedskej na přikład njesmědźa zwony zwonić. Porno tomu smědźa so tam muslimojo na puću modlić, homoseksualnosć a ličba wotehnaćow přiběratej. „Dyrbimy swoju domiznu wot zapadneho zła wuswobodźić“, podpěruje Głasa tež direktorka jedneje z mjenowanych šulow Małgorzata Wieczerzak. „Šule dyrbja kubłać, a to z podpěru z cyrkwju.“ Wučba započina a kónči so z modlitwu. Wšitke dźěći su katolske a staršej matej hladajo na nabožinu jedne měnjenje.
Nětko čakaja šule na to, zo cyrkej Mójzesowe tafle poswjeći. Za 1. julij je so tež prezident Andrzej Duda na wopyt přizjewił, kiž swoju wěru zjawnje wuznawa.
Praha (dpa/SN). W čěskej stolicy dopominaja z nowymi wopomnjenskimi taflemi na čěskosłowakskich wojowarjow, kotřiž běchu 1942 na atentaće na wysokorjadneho zastupnika SS a nacistiskeho funkcionara Reinharda Heydricha wobdźěleni. Do chódnika napřećo cyrkwi Cyrila a Metoda pušćene mosazowe platy su wčera w přitomnosći mnohich wodźacych politikarjow wotkryli. „Tući ludźo su za našu swobodu swoje žiwjenje woprowali, rjekny předsyda čěskeje socialdemokratiskeje strony ČSSD a wiceprezident parlamenta Jan Hamáček po informacijach powěsćernje ČTK.
Słowak Jozef Gabčík a Čech Jan Kubiš běštaj 27. meje 1942 w Praze z ručnej granatu atentat na Heydricha skućiłoj, po tym zo bě mašinska třělba zaprajiła. Nacionalsocialistiski funkcionar dny po tym na sćěhi zranjenjow zemrě. Gabčík a Kubiš so zhromadnje ze swojimi sobuwojowarjemi w prawosławnej cyrkwi Cyrila a Metoda chowaštaj. Buchu pak přeradźeni a padnychu 18. junija 1942 po wjace hodźiny trajacej třěleńcy z SSowcami. Němcy so za atentat wjećachu a zničichu mjez druhim wjes Lidice.
Praha (ČŽ/K). Nowe čěske mjeńšinowe knježerstwo móhło nětko nastać. Wjetšina čłonow socialdemokratiskeje ČSSD je w nutřkostronskim referendumje namjetej předsydstwa přihłosowała, přichodnje z ANO hromadźe knježić. 59 procentow hłosowaše z haj, 41 procentow z ně. Wobdźělenje na wotumje wučinješe 65 procentow. Premier w demisiji a předsyda Aliancy njespokojnych wobydlerjow Andrej Babiš pozitiwny rozsud socialdemokratow wita. Kabinet z ministrow ANO a ČSSD ma skerje wuhlady dóstać dowěru sejma, jeli KSČM jón toleruje. To komunisća přilubjeja, přiwozmje-li knježerstwo sydom jich žadanjow do swojeho programa.
Waršawa. Pólski prezident Andrzej Duda chcył Zakładny zakoń kraja aktualizować a nowym poměram přiměrić. Zwoprawdźić chce swój zaměr z ludowym wothłosowanjom, při kotrymž wobydlerjo wo změnach rozsudźa. Projekt to, kotryž bě Duda minjene lěta stajnje zaso připowědźił. Tola samo w swójskich rjadach so přiběrajcy kritika jewi.
Prezident Duda je cyłkownje 15 prašenjow zestajał, na kotrež měli ludźo we wólbnej kabinje z haj abo ně wotmołwić. Tak dyrbja mjez druhim rozsudźić, hač měła Pólska w Europskej uniji wostać, hač měło pólske narodne prawo nad europskim prawom stać abo hač njedyrbjeli so kompetency prezidenta rozšěrić. Haj samo prašenje, hač dyrbjał kraj potrěbne swójby abo tajke z wjele dźěćimi pjenježnje dale podpěrać, měło so po woli prezidenta we wustawje zakótwić.