Waršawa. Opoziciska a něhdy knježaca Wobydlerska platforma (PO) w Pólskej chce při wólbach prezidenta z nowym kandidatom nastupić. Dotalna kandidatka PO, Małgorzata Kidawa-Błońska, je swoju kandidaturu cofnyła. Tole su minjeny kónc tydźenja wozjewili. Hłowna přičina wotstupa dotalneje kandidatki PO su w prěnim rjedźe dosć špatne wuslědki woprašowanjow nastupajo jeje šansy, kotrež wěšćachu jej naposledk runje hišće štyri procenty hłosow wolerjow. Porno tomu móžeše so amtěrowacy prezident Andrzej Duda dotal stajnje wjace hač 60 procentow hłosow nadźijeć. Nawoda PO Boris Budka rjekny, zo by Kidawa-Błońska „dobra prezidentka w normalnych časach“ była. Časy pak su tuchwilu wšo druhe hač normalne.
Waršawa (JBR/SN). Najrjeńši měsac lěta meja je w cyrkwi Pólskeje za prěnje swjate woprawjenje předwidźany. To so dźewjećlětne holcy kaž hólcy na drohe dary a wobjed z wjele ludźimi w hosćencach wjesela. Swjatočnosće su kaž małe kwasy. W běłych, pyšnych šatach holčki kaž njewjesty wupadaja. Tež kmótřa a swójbni tón dźeń na pjenjezach njelutuja.
Lětsa pak je koronawirusa dla wšitko hinak. Biskopja su tuž namjetowali swjatočnosć na klětu přestorčić. Móža pak dźěsću sakrament tež w małej skupinje – jeno ze staršimaj a kmótru/kmótom – spožčić, a to na Božich mšach přez cyły tydźeń, štož móže hač do junija/julija trać. Dale kruće předpisany pak je wěriwym škit za hubu a nós tež w cyrkwi. Jenož měšnik tajki njetrjeba. Dalši swójbni móža sej ceremoniju w interneće wobhladać, su-li so sčasom přizjewili.
Na cyle wosebity škit nosa a huby za prěnjowoprawjenske dźěći su křesćanske wobchody přihotowane. Za holcy maja běłe a za hólcow čorne zakryća, a to ze złoćanym abo slěbornym monogramom IHS, symbolizowacym Chrystusa. A handl z tajkimi škitnymi srědkami kćěje.
Waršawa (dpa/SN). Policija we Waršawje swoje rigorozne postupowanje přećiwo demonstrantam minjenu sobotu zakituje. Tak mjenowany protest předewzaćelow přećiwo wobmjezowanjam hospodarskeho žiwjenja koronapandemije dla bě wot wšeho spočatka njezakonski, rozłoži rěčnik policije telewizijnemu sćelakej TVN24. Cyłkownje 380 ludźi su w stolicy nachwilnje zajeli, nic jenož, dokelž běchu zakaz zhromadźowanja ranili, ale tež, dokelž běchu so policistam napřećo agresiwnje zadźerželi. Wobdźělnicy protestow wumjetuja policiji njetrjebawšu namóc a zasadźenje sylzopłuna.
Najebać zakaz běchu so samostatni předewzaćeljo zhromadźili, zo bychu sej spěšniše wožiwjenje hospodarskeho žiwjenja žadali. To su dalše skupiny za protest přećiwo knježerstwu a wukazanym naprawam wužili. W telewiziji pokazowachu młodych ludźi z pólskimi chorhojemi a z parolu „Za swobodnu Pólsku“. Po tumultach su sej demonstranća a policija mjez sobu agresiwne zadźerženje a šěrjenje wopačnosćow wumjetowali. Reporter TVN24 rěčeše hladajo na njeměry wo „hotowym chaosu“.
Waršawa. Pólska zběhnje někotre wobmjezowanja koronawirusa dla, wobstawa pak dale na namjeznych kontrolach hač do 12. junija. Wot přichodneje póndźele smědźa frizerske a kosmetiske salony, hosćency a kofejownje zaso wotewrjene być. To je ministerski prezident Mateusz Morawiecki tele dny připowědźił. „Nawrót k normaliće je jara wažny“, wón rjekny. Přiwšěm maja so škitne naprawy dodźeržeć. Tak su terminy pola frizera a kosmetikarki jenož bjez čakanja móžne, to rěka, zo dyrbiš so do toho přizjewić. W hosćencach ma wotstawk mjez blidami dwaj metraj wučinjeć. Pinčnicy dyrbja hubu a nós zakrytej měć. Zjawne wobchadne srědki smědźa zaso wjace ludźi sobu brać, kóžde druhe městno za sedźenje ma přiwšěm swobodne wostać.
Po dwěmaj měsacomaj so wšědne žiwjenje Čechow skónčnje zaso normalizuje. Tak je třeća žołma připowědźenych wolóženjow póndźelu płaćiwosće nabyła. Muzeje a galerije su zaso přistupne, frizerske a kosmetiske salony, solarije a masažowe studija nětko zaso ludźi posłužuja. Tež kucharjo a pinčnicy njetrjebaja wjace w prózdnych hosćencach a kofejownjach na hłódnych a lačnych łakać a jim jědź do ruki předawać. W piwowych zahrodach móža zaso z połnej paru dźěłać – wězo ze škitom za hubu a nós a z wukazanym wotstawkom. Kina, dźiwadła a dalše kulturne institucije smědźa so tohorunja swojich swěrnych přiwisnikow nadźijeć. Předstajenja kaž tež kulturne a sportowe zarjadowanja za publikum hač do 100 přihladowarjow su zaso dowolene. Nic naposledk su wulke nakupowanišća zaso wočinjene. Tak čakaše póndźelu rano dołhi rynk ludźi před wobchodom Ikea w Praze, dokelž wabja swojich kupcow tam kaž druhdźe z wosebitymi poskitkami.
Waršawa. Tójšto Polakow – na wšě šěsć milionow ludźi – je sej srjedu wječor wusyłanje statneje telewizije wobhladało. Tam mějachu kandidaća za zastojnstwo prezidenta kraja składnosć, swoje programy w padźe wólbneho dobyća rozłožić. W tym času wšak njebě hišće znate, zo za njedźelu planowane wólby koronapandemije dla nětko tola njebudu.
Hnydom dwójny jubilej swjeći Praski časopis Česko-lužický věstník: W lěće 1920 wuńdźe prěnje čisło, 1990 wobnowjeny powěstnik, tehdy wšak najprjedy pod titulom Zpravodaj česko-lužické mládeže.
Dwójne čisło věstníka za januar a februar prezentuje so w nowym šaće z lěpšej papjeru, z barbnej titulnej stronu a z lěpšim wuhotowanjom. Prěnje barbne foto je wot Jürgena Maćija, jeho motiwy budu přichodnje prawidłownje wozjewjene. Připowědźene su tež nastawki z něhdyšich wudaćow časopisa. Tónkróć móžemy přinošk dr. Josefa Páty „Naše Serbstwo z procha stawa“ z lěta 1920 čitać. Wozjewjeny budźe tež přełožk powědančka „Dwě sotře“ („Sestry“) Boženy Němcoveje, wo kotryž bě so z Lubochowa pochadźacy Pětr Lipič (1844–1882) postarał a kotryž bě rukopisnje w lětniku Serbowki 1869–1870 wozjewjeny. Božena Němcová, znata wosebje přez dźěło „Wowka“ (přełožene wot Jurja Libša), narodźi so 4. februara 1820. Eliška Oberhelová njebudźe hižo zamołwita redaktorka měsačnika, wona swójbnych přičin dla redakciju wopušći.