To a tamne (22.03.22)
Internetnu stronu k zeznaću noweho partnera je francoski duchowny załožił – po ryzy katolskich prawidłach. Zajimcy njemóža so sami přizjewić, ale trjebaja poručenje duchowneho. Tón wobswědča, zo jedna so wo prawidłowneho kemšerja a dobreho katolika z chutnym wotpohladom so zmandźelić. Čłonojo platformy dyrbja prawidłownje k spowědźi chodźić a tež po slubje zdźeržliwi wostać.
Njewšědnu šulsku hodźinu planuja na hłownym torhošću južnobraniborskeho Grabina (Finsterwalde). 7. apryla chce wjace hač 300 dźěći a młodostnych z dźesać šulow wokrjesa naměsto na pisane morjo kwětkow přeměnić a tam pod fachowym dohladom 3 000 kwětkow nasadźeć. Hłowny iniciator je zahrodkar Rüdiger Winde. Jemu dźe w projekće wo to, šulerjam zakładnu wědu wo rostlinach a jich prawym hladanju posrědkować.
To a tamne (21.03.22)
Ławku za sobu ćahajo je pos w Oldenburgu mać a jeje dźěsći snadnje zranił. 42lětna žona bě swojeho wulkeho psa za ławku přiwjazała, zo by w apotece nakupowała. Njejapcy 50 kilogramow ćežke zwěrjo ćekny, ćahajo wo wjele lóšu ławku za sobu, a ta zrazy najprjedy do awta. Jako pos kolesowansku šćežku přeprěči, njemóžeše so tam jěduca kolesowarka z dźěćacym připowěšakom wuwinyć a padny. Wona kaž tež w připowěšaku sedźacej dźěsći so snadnje zranichu.
Na wšě 14 kilometrow do wopačneho směra jěł je wodźer wosoboweho awta na awtodróze A 9 njedaloko Podstupima – a měješe wulke zbožo. Snadneho wječorneho wobchada a kedźbliwych šoferow dla njedóńdźe k zražce. Policistam muž rjekny, zo bě so zajěł a chcyše swój zmylk skorigować. Policisća napołožichu jemu pjenježnu pokutu a jeho zaso pušćichu.
To a tamne (18.03.22)
Z bankowej kartku maćerje je sydomlětna holca w badensko-württembergskim Immendingenje nakupować była. Dźěćo poda so ze swojim rolerom na puć do nakupowanskeho centruma a w dwěmaj wobchodomaj za něhdźe 70 eurow nakupowało. W dalšim wobchodźe sobudźěłaćerce napadny, zo holca samalutka z połnym nakupowanskim wozom z ec-kartku w ruce při kasy steješe. Přiwołana policija informowaše mać, kotraž hižo za dźowku pytaše.
Z desku w ruce staj njeznataj skućićelej dźensa rano w Mannheimje pjekarnju nadpadnyłoj a wurubiłoj. Policija nětko za nimaj pyta. Skućićelej běštaj wokoło 6 hodź. do pjekarskeho wobchoda přišłoj a předawarku z drjewjanej desku wohrozyłoj. Po tym zo běštaj dotal njeznatu sumu pjenjez dóstałoj, so wobaj do njeznateho směra zminyštaj.
To a tamne (17.03.22)
Z kocorom ma jedna z Oldenburgskich kupnicow žiwidłow hižo někotre tydźenje njewšědneho stajneho hosća. Mjeztym wón wšědnje přichadźa, zo by před zachodom přebywał, nawodnica wobchoda rozprawja. Běło-čerwjeny kocor, kotrehož Čeker mjenuja, lěha tam na składowanych wěcach, druhdy pak tež po parkowanišću běha. Sobudźěłaćerjo pak na to dźiwaja, zo so do kupnicy njedóstawa, dokelž njeje to hygieny dla dowolene.
Pawk we wosobowym awće bě šofera w Essenje tak wustróžił, zo je tón kontrolu nad wodźidłom zhubił. Jako muž pawka wuhlada, zajědźe wón ze stróželemi z jězdnje. Na to prasny ze swojim jězdźidłom do murje a do płotu. Snadnje zranjeneho 40lětneho dowjezechu do chorownje, kotruž pak móžeše wón samsny wječor zaso wopušćić. Wěcna škoda přiwšěm 8 000 eurow wučinja.
To a tamne (16.03.22)
Wubědźowanje psyčich sankowych zapřahow Iditarod w Alasce je prěni króć Brent Sass z USA dobył. 42lětny ze zwjazkoweho stata Minnesota přeprěči wčera z jědnaće zapřehnjenymi psami cilowu smuhu – po 1 800 kilometrach we wosom dnjach, 14 hodźinach, 38 mjeńšinach a 43 sekundach, kaž zarjadowarjo pisaja. Iditarod je najćeše wubědźowanje psyčich zapřahow, zwjetša pod ekstremnymi temperaturami. Lětsa měješe 49 wobdźělnikow skerje miłe wjedro.
Kóčki dla dyrbješe wohnjowa wobora w Augsburgu awto rozebrać. Pěšcy běchu skoćatko wuhladali, kotrež njemóžeše so same wuswobodźić. Wobornicy prošachu wobsedźerja wo dowolnosć, dźěle motoroweje rumnosće wutwarić směć. Spočatnje twochnjenu kóčku dyrbjachu popadnyć, zo móhli ju skótnemu lěkarjej dowjezć, rěčnica policije zdźěli.
To a tamne (15.03.22)
Z najdlěšim triatlonom na lodźe je sportowc Dirk Leonhard wčera w Frankfurće nad Mohanom nowy swětowy rekord nastajił. Na wonkownej čarje lodosportoweje hale bě sej za swój projekt „IceMan“ naročny program předewzał: 42,2 kilometraj na smykačach, 80 kilometrow na kolesu a 42,2 kilometraj po lodźe běhać. Koleso, z kotrymž bě na lodźe po puću, měješe wosebite wobruče. Leonhard bě rano startował a je swój zaměr wječor po 164,4 kilometrach docpěł.
Z chorobnym stołom je so 87lětny starc na awtodróhu A 39 pola delnjosakskeho Salzgittera zabłudźił. Swědcy informowachu policiju. Jej muž rozłoži, zo je mylnje wopak wotbočił a nětko hižo njewě, kak móhł so zawróćić. Zastojnicy městnosć najprjedy raz zawěsćichu, přiwołachu wotwlečensku słužbu za koleskaty stoł a dowjezechu muža domoj.
To a tamne (14.03.22)
Protestujo přećiwo horendnym płaćiznam bencina a swarjacych šoferow dla je wobhospodarjer tankownje w Francoskej tankownju zawrěł. „Spjećuju so liter ćěriwa za 2,50 eurow předawać, njepodpěruju padustwo“, napisa tankownik Oliver Thomas na papjerku, kotruž je na tankowni we wsy Saint-Paulien wupowěsnył. „Njemóžu produkt za 2,47 eurow předawać, derje wědźo, zo sam wjace hač 0,04 centy na liter njezasłužam“, wón doda.
Krej na sćěnje wjaceposchodoweho domu je w Erfurće zasadźenje wohnjoweje wobory zawiniła. Wobydlerjo so starosćachu, dokelž njebě 22lětna wobydlerka durje wočiniła. Na to wohnjowi wobornicy durje namócnje wotewrěchu a naležnosć rozrisachu: 22lětna bě na balkonje krawe nutriny za swoje psy w dźěratym sudobju składowała. Zasadźenje wobornikow a nowe durje dyrbi wona nětko zapłaćić.
To a tamne (11.03.22)
Slěd wjace hač 15 000 ličbow spomjatkować móže sej policajska hłowna komisarka Susanne Hippauf a chce tak přichodnu póndźelu nowy němski rekord nastajić. Při tym dźe wo to, městna po komje Pi-ličby z hłowy nawuknyć. Z 11 104 cyframi bě 40lětna z Frankfurta hižo raz rekord nastajiła, konkurent pak bě jón na 15 000 zwyšił. Hippauf chce 15 600 cyfrow naličić. „Dźeń Pi“ swjeća kóžde lěto 14. měrca, a to na česć ličby 3,14.
Z nahubnikami FFP 2 scomt zatwarjenej kameru je 43lětny ludźom při teoretiskim pruwowanju jězbneje dowolnosće ilegalnje pomhał. Muž je swoje posłužby internetnje poskićał, srjedu pak su jeho při wobchadnej kontroli lepili. Wobšudnik je swojim kupcam nahubnik z kameru a małe štepsle do wucha přewostajił a wotmołwy posrědkował. Kelko kupcow 43lětny měješe, dotal njewědźa.
To a tamne (10.03.22)
Město žadaneje jězbneje dowolnosće je šofer awta policistam w Kölnje swojorazny dokument pokazał: skazanku na sudniski termin. Přičina sudniskeho jednanja wšak bě łoskoćiwa: Dźěše wo jězdźenje bjez jězbneje dowolnosće. Kaž so wukopa, njeje 23lětny hišće ženje žanu płaćiwu jězbnu dowolnosć měł. Policisća, kotřiž běchu muža zadźerželi, jeho na to na hamtske sudnistwo dowjezechu. Na 23lětneho čaka tuž dalše jednanje.
Policistka w Francoskej, kotraž bě swojeho kolegu za wodźidłom w pryzlach z elektrošokowakom nadpadnyła a tak wobchadne njezbožo zawiniła, wostanje bjez chłostanja. Sudnistwo w Roubaixju přiliča jej wulke zasadźenje pola policije na dobro. Wo disciplinarnych konsekwencach měli zamołwići rozsudźić. Policistaj běštaj po šoku do parkowaceho awta zrazyłoj, ale dale jěłoj.
