To a tamne (25.03.25)
Na wšěch 15 000 eurow je žona w spěšniku ICE ducy z Hannovera do Mnichowa namakała. 33lětna přizjewi so na to pola zwjazkoweje policije. Pjenjezy ležachu w tobole na prózdnym sedle w ćahu. Žona tošu policistam přepoda, kotřiž pjenjezy přeličichu. Dotal njeje so nichtó jako wobsedźer pjenjez přizjewił. Žona ma prawo na namakanske myto. Najprjedy raz pak policija pjenjezy wobchowa.
Pjany pasažěr je na lětanišću w Bremenje zapozdźenje wotlěta mašiny na kupu Mallorca zawinował. Jako pilot lětadło hižo na wotlět přihotowaše, sobudźěłaćerjam pjany muž napadny. 53lětny so přikazam stewardesow spjećowaše a jim dosć agresiwnje nadawaše. Pilot swoje přihoty na to přetorhny a muža z lětadła wupokaza. Mašina z dowolnikami móžeše hakle z 45 mjeńšinami zapozdźenja do směra na Španisku wotlećeć.
To a tamne (24.03.25)
Złota rubizna w hódnoće wjacorych statysac dolarow w staće Florida w USA je zaso pola swojeho wobsedźerja. Debjenki su ćěło paducha po přirodnym puću wopušćili, policija zdźěla. Paduch bě nawušnicy spóžrěł, jako jeho policija lepi. Na to běchu skućićela dwaj tydźenjej w chorowni pod dohladom policije wobkedźbowali. Röntgenowy nastroj zastojnikam při tym pomhaše.
Něhdźe 500 dróhow francoskeje stolicy w přichodnym času za awta zawru. Při woprašowanju wobydlerjow je so wjetšina za to wuprajiła, nowe pasma za pěškow wutworić. Na wothłosowanju pak so jeničce štyri procenty ze wšěch 1,4 milionow zapisanych wolerjow wobdźěli. Přichodne lěta móhło w Parisu 10 000 parkowanišćow wotpadnyć. Šoferojo awtow dyrbja so na wulke wokołopuće nastajić. Kotre drohi to potrjechi, hišće njewědźa.
To a tamne (21.03.25)
Hdyž lube domjace zwěrjo zahinje, potom su wobsedźerjo často hórko zrudźeni. W Chinje spyta tuž dźeń a wjace ludźi so z klonom swojeho lubuška tróštować. Za to dyrbja žarowacy často wjele pjenjez zapłaćić. Kaž rozprawja Hongkongska nowina „South China Morning Post“, płaći klonowanje w normalnym padźe něhdźe 150 000 do 380 000 Yuan, to je něhdźe 19 000 do 48 000 eurow.
Svenja Suhr zhotowja w swojej tkajerni w Oranienburgu płaty z cyle wosebiteho materiala: z psyčeje wołmy. Wosebje derje hodźa so za to dołhe psyče kosmy, kaž maja je Labradory, leobergery abo samojedy. Tkalča rozprawja, zo je husty kožuch woblubowanych štyrinohačow nimale 80 procentow ćopliši hač tón wowcow. Najwjace zajimcow da sej płat jako dopomnjenku na swoje domjace zwěrjo zhotowić.
To a tamne (20.03.25)
Finska wostanje kraj z najzbožownišimi ludźimi swěta. Kraj na sewjeru Europy je sej wosmy raz za sobu wodźace městno na swět wopřijacej lisćinje zbožownych ludźi zawěsćił. Sćěhuja Danska, Islandska a Šwedska. Němska je wot 24. na 22. Městno postupiła. USA je wo jedne městno na 24. poziciju zestupiła, najšpatniše hódnoćenje w stawiznach kraja.
Nadměrne wužiwanje digitalnych medijow wuskutkuje so špatnje na derjeměće dorosćenych w Němskej. To je wuslědk reprezentatiwneho naprašowanja instituta Stragetija & slědźenje. 1 680 dorosćenych je so na naprašowanju wobdźěliło. Najbóle ćerpi skupina 18 do 27lětnych. 92 procentow ludźi tuteje starobneje skupiny wužiwa socialne medije. Jenož 32 proc. čuje so po tym hišće derje. Zwěsćichu zdobom, zo su młodostni w Němskej mjeztym dźesać hodźin wob dźeń w interneće po puću.
To a tamne (19.03.25)
Sudniske jednanje wočakuje sakski kultusowy minister Conrad Clemens (CDU), po tym zo bě 2023 ze spěšnosću 80 km/h po dróze smalił, w kotrejž je jenož 30 km/h dowolenych. Najebać to, zo je Clemens zwólniwy, pokutu zapłaćić a jězbnu dowolnosć na wěsty čas wotedać, chce sudnik pruwować, hač njejedna so tola wo zakazane wubědźowanje awtow. To by raznišo pochłostał.
Honač Hermann njetrjeba hižo dlěje na wotpočnišću při awtodróze 28 we Wuchodnej Friziskej žiworić. Škitarjam zwěrjatow je so poradźiło, wosamoćeneho honača popadnyć a do zwěrjatownje dowjezć. Wot policije Hermann mjenowany honač bě tydźenje dołho kedźbnosć zbudźił, jako spłóšiwje po parkowanišću běhaše. Popadnyć pak jeho njemóžachu. Přiwšěm njeje zwěrjo ženje nadróžny wobchad wohrožowało.
To a tamne (18.03.25)
Njemdry muž je w Magdeburgu tomu zadźěwał, zo jeho awto wotwjezu. Sobudźěłaćerjo zarjada za porjad chcychu wóz wotwjezć dać. Pasy krana běchu hižo přiwjazane, jako so muž do awta sydny. Wón storkaše awto tak dołho doprědka a dozady, doniž so pasy njepušćichu. Potom wón přez chódnik twochny.
Mjenje drjewa su paduši naposledk w Braniborskej pokradnyli. Loni su 257 padow registrowali, 2023 bě jich hišće 328 padow. Policija z toho wuchadźa, zo płaćizna drjewa kriminelnu energiju paduchow wobwliwuje. Mjeztym wobsedźerjo lěsow drjewo z nastrojemi GPS škitaja.
To a tamne (17.03.25)
Na dwaj měsacaj dyrbi sakski kultusowy minister Conrad Clemens swoju jězbnu dowolnosć wotedać. Nimo toho dyrbi pokutu zapłaćić. Clemensa běchu lěće 2023 w Krušwicy błyskli, jako smaleše z 80 km/h po dróze, na kotrejž je jenož 30 km/h dowolenych. Clemens so hrožacej pokuće sudnisce wobaraše. Skóržbu pak potom zaso cofny a přizjewi so na seminar za pruwowanje wobchadnych kmanosćow. Podawk pochadźa z časa, jako Clemens hišće minister za kubłanje njebě.
Najebać temperatury wokoło nule je kupjel pod hołym njebjom w Karlsruhe minjeny kónc tydźenja kupansku sezonu zahajiła. Něhdźe 260 ludźi bě přišło, zo by w klasiskich kupanskich drastach abo w kostimje do basenka skočiło. Zymu mrěć pak nichtó njetrjebaše: 50 metrow dołhi płuwanski basenk je tepjeny, woda je 28 stopnjow ćopła.
To a tamne (14.03.25)
Z wótřerěčakom zwjazany budźak je wobydlerjow wjaceswójbneho domu w Bremerhavenje ze spara storhnył. Dokelž w potrjechenym bydlenju nichtó durje njewotewrě, zawołachu policiju. Skónčnje so wobydlerka nawróći: Wona bě wosebje zahe stanyła, zo by něšto wobstarała. Alarm bě jeje smartphone zawinował.
Skerje připadnje je policija njedaloko Mnichowa napiteho šofera nakładneho awta lepiła. Defekta dla dyrbješe muž na kromje awtodróhi stejo wostać, hdźež policija runje zražku dokumentowaše. Jako muža na kurjace so borzdźidła narěčachu, stupaše zastojnikam alkohol do nosa. 52lětny měješe 2,2 promilej w kreji.
To a tamne (13.03.25)
Hač do 150 listow za samsny wobchadny njeskutk su wjacori ludźo w Offenbachu dóstali. Přičina bě zmylk w kompjuterowej syći tamnišeho zarjada za porjadk, z kotrejž listy awtomatisce rozesćelu. Jedyn z potrjechenych je wopačneho parkowanja dla samo 300 listow přijał. Zarjad je so mjeztym zamołwił. Pokutu ludźo płaćić njetrjebaja.
Swój čas w jastwje je bywši tenisowy hrajer Boris Becker w knize předźěłał. Jatba we Wulkej Britaniskej słuša k najbolostnišim nazhonjenjam swojeho žiwjenja, piše 57lětny w interneće. Spisowaćelenje bě pospyt, tole wuhojić. Kniha z titulom „Inside. Dobyć – zhubić – znowa započeć“ wuńdźe po informacijach nakładnistwa Ullstein 10. septembra. Becker bě insolwencu přizjewił. Při tym je zamóženje milinow eurow zatajił. Wón dyrbješe dwě a poł lěta do jastwa.
To a tamne (12.03.25)
W spěšniku dźěćo porodźiła je žona w Francoskej. Při njewočakowanym porodźe pomhaštaj jej lěkarjej, kotrajž běštaj tohorunja z ćahom po puću. Holčka Kléa so strowa narodźi. Poprawom wočakowachu dźěćo hakle přichodny tydźeń. Poroda dla zadźeržany spěšnik hakle dwě hodźinje pozdźišo hač planowane do Parisa dojědźe.
Wjace hač 150 000 razow je mjezynarodna swětnišćowa stacija ISS zemju wobkružiła. Minjenych 26 lět je stacija 6,4 miliardy kilometrow lećała, ruska powěsćernja Tass zdźěla. Na swětnišćowej staciji ISS dźěłaja Ruska, USA, Kanada, Japanska a europska swětnišćowa agentura ESA hromadźe. Wědomostny wulkoprojekt najebać wójnu Ruskeje přećiwo Ukrainje dale pokročuja. Stacija leći 400 kilometrow nad zemju.
