To a tamne (20.12.24)
Najebać wulku zahoritosć za Dubaisku šokolodu jewja so prěnje warnowace hłosy. W jednotliwych probach w laborach su zanjerodźenja, barby, alergeny a cuzy tuk namakali, strowotniske ministerstwo Badensko-Württembergskeje zdźěla. Ličba zanjerodźenych probow je drje snadna, wuslědki pak zamołwitych starosćeja. Nětko chcedźa Dubaisku šokolodu po wšěm kraju pruwować.
Gigantiski swětoznaty wohnjostroj w awstralskim Sydneyju je lětsa wohroženy. Přičina je hrožacy stawk železnicarjow silwester. Tež lětsa wočakuja zaso něhdźe milion wopytowarjow w pobrjóžnej metropoli, kotřiž chcedźa spektakl před kulisu sławneje Harbour Bridge a opery dožiwić. Ludźo přijědu z wulkeho dźěla z ćahom. Hrožaceho wobchadneho chaosa dla so zamołwići chutnje z myslu noša, wohnjostroj lětsa wotprajić.
To a tamne (19.12.24)
Hodowne žiwidła pokradnyli su paduši we wobchodźe w Drježdźanach. Kaž policija zdźěla, spakosćichu woni mjaso kački, kołbaski k praženju a čerwjene wino. Rubizna je něhdźe 250 eurow hódna. Dokelž njejsu paduši durje chłódźaka zaso začinili, dyrbjachu přistajeni žiwidła w hódnoće 800 eurow preč ćisnyć. Nimo toho wobškodźichu paduši wokno.
Wólby najrjeńšeje žony w Nižozemskej po 35 lětach skónča. Wubědźowanje njehodźi so hižo do noweho časa, su sej organizatorojo wěsći. Město miss-wólbow zarjaduja internetnu platformu wokoło psychiskeje strowoty, socialnych medijow a mnohotnosće. Nastała je myslička, miss-wólby wotstronić, na zjawnej diskusiji wo prašenju, čehodla towaršnosć přeco hišće mjeztym dawno zestarjene ideale wo rjanosći a towaršnostnych wočakowanjach na jednotliwca pěstuje.
To a tamne (18.12.24)
Šokoloda z Dubaja bywšemu moderatorej zabawnych zarjadowanjow Thomasej Gottschalkej njesłodźi. Tole je Gottschalk sćelakej RTL přeradźił. Showmaster njemóže cyły hermank wokoło šokolody scyła rozumić. Jemu běchu šokolodu z Dubaja darili. „Ta bě chětro hórka“, 74lětny rjekny. Šokolodu běchu z wušiknym wabjenjom w socialnych medijach jako nowy trend wuwili. Ludźo steja za šokoladu w dołhich rynkach před wobchodami.
Na njewšědne wašnje žiwjenje přisadźił je hajnik w USA w staće Virginia. Jeho partner bě mjedwjedźa zatřělił, kiž na wysokim štomje sedźeše. Smjertnje zranjene zwěrjo padny na 58lětneho hajnika, kiž pod štomom steješe, medije rozprawjeja. Po informacijach nowinarjow bě skupina hajnikow mjedwjedźa hižo dlěši čas přesćěhowała. Wustróžane zwěrjo je sej na to na štom wućeknyło.
To a tamne (17.12.24)
Wosom hodźiny zawrjena bě awtodróha A 72 pola Šwikawy do směra na Lipsk. Nakładne awto dróhoweje słužby bě wčera dopołdnja při rumowanju nadróžneho twarnišća ze swojim kranom železny móst z nastrojemi za wotličenje popłatka nakładnych awtow potorhnyło. Při tym so šofer awta a dalši dźěłaćer zraništaj. Wěcna škoda wučinja 755 000 eurow.
Wulki chaos načinja w italskich wulkoměstach nowa winowatosć za wužiwarjow elektriskich rolerow, nahłownik nosyć. Policija je minjeny kónc tydźenja prěnje chłostanki 50 eurow rozdźěliła. Ludźo skorža, zo njebuchu informowani, wosebje turisća. Wupožčowarjo jězdźidłow starosća so wo swój wobchodny model. Knježerstwo chce z naprawami ličbu smjertnych woporow we wobchadźe znižić. Štóž za wodźidłom awta telefonuje, płaći wotnětka znajmjeńša 250 eurow.
To a tamne (16.12.24)
Wosamoćeny kófer na Kölnskich dohodownych wikach je so jako njestrašny wukopał. Policija namaka w nim jenož pěsk. Do toho běchu wčera adwentne wiki na Synowych wikach w Kölnje ewakuowali a wšu kónčinu zaraćili. Hižo sobotu dyrbjachu adwentne wiki na Kölnskim Rudolfowym naměsće podhladneho kófra dla ewakuować. Tež w nim namakachu jenož pěsk. Policija wšak nima žane zrozumjenje za tajke žorty.
Kuriozne misnjenje na jednej z Erfurtskich šulow: Wobydler wołaše policiju, po tym zo bě paduchow z retlemi w ruce wuhladał, kotřiž so na šulu měrjachu. Jako zastojnicy přijědźechu, paduši ani njećeknychu, ale so policistow zadźiwani prašachu, što wot nich chcedźa. Pozdatni paduši běchu sobudźěłaćerjo rjedźenskeje firmy a retle běchu chošća.
To a tamne (13.12.24)
Wjace hač 3,5 milionow eurow nazběrał je José Careras we wobłuku swojeje mjeztym 30. telewizijneje gale na dobro ludźi, kotřiž su na leukemiju schorjeli. „Sym přemóženy a jara dźakowny za trajacu podpěru darićelow. Na prěnim zarjadowanju 1995 njebych sej zwažił, wo tym sonić“, rjekny 78lětny operowy spěwar k wuslědkej akcije w Lipsku, kotryž sćelak MDR wusyłaše. Loni běchu po tutym puću 3,3 miliony eurow nazběrali.
Mysteriozne truty na njebju wuchodneho pobrjoha USA nuzuja Běły dom we Washingtonje k oficialnemu stejišću. „Nimamy žane dopokazy, zo su informacije wo wobkedźbowanych lětacych objektach za wěstotu USA wohrožowace“, rjekny direktor za komunikaciju Běłho domu John Kirby. Swědkojo rozprawjeja stajnje zaso wo wulkich potajnych trutach na nócnym njebju.
To a tamne (12.12.24)
Na wšěch 46 620 namakankow su lětsa hač do kónc nowembra w běrowje Berlinskich wobchadnych zawodow wotedali. Najčasćišo wotedachu toše, nachribjetniki a wačoki, rěčnica zdźěli. Wosebje kuriozne zhubjene wěcy su drohotny kožuch za šiju, fetišowe drasty, kostimy a dźěćace plastowe awto. Něhdźe 35 procentow namakankow wobsedźerjam zaso wróća. Jeli so nichtó njepřizjewi, wěcy po šěsć tydźenjach přesadźuja.
Wulkowikowarja drogow su w Drježdźanach zajeli. 24lětnemu wumjetuja, zo je něhdźe 70 kilogramow Crystal Metha w Drježdźanach a Lipsku předawał. Tež w Berlinje je kilogramaj kokaina předał. Hódnotu drogow trochuja na 785 000 eurow. Při přepytowanju jeho bydlenja w Drježdźanach namakachu 30 000 eurow a brónje. Fachowcy běchu so do komunikaciskeje syće dealera zadobyli.
To a tamne (11.12.24)
Telefonaty z wulkim hłosom, harowaca hudźba a čuwy rubjace wideja z wótřerěčaka šmóratka – přećiwo tomu Berlinske wobchadne zawody nětko postupuja. Z wosebitymi wozjewjenjemi w busach wo to proša, so telefonatow wzdać a wideja njewothrawać. Hižo wot nalěća w busach za to wabja, na sobujěducych wjace kedźbnosće brać, so kruće dźeržeć a hladać, hač snadź něchtó druhi městno za sedźenje nuznišo njetrjeba.
Hrózbna namakanka we Wienje policiju a zjawnosć zaběra: Při twarskich dźěłach běchu w plastowym měše zapakowane ćěło něhdźe 30lětneho muža namakali, kotrež hižo 25 lět w pincy domu ležeše. Slědy na to pokazuja, zo jedna so wo mordarstwo. Kriminalisća nadźijeja so pomocy zjawnosće: Muž w joggingowym wobleku bě 1,70 metrow wulki a strowy.
To a tamne (10.12.24)
Chrobły sobudźěłaćer tankownje je w Berlinje-Marienfelde rubježny nadpad wotwobarał. Po dotalnych dopóznaćach staj zakuklenaj mužej do tankownje přišłoj a sej z pistolu a popjerjowym sprayjom w ruce wot 29lětneho pjenjezy žadałoj. Přistajeny pak so spjećowaše a wšelake wěcy do rubježnikow mjetaše, doniž su wobaj njezminyštaj. Do toho pryskaštaj hišće spray do tankownje.
Pospyt wudrěwanja swójby bywšeho jězdźerja Formule 1 Michaela Schumachera wot dźensnišeho na Wuppertalskim sudnistwje wobjednawaja. Wobskorženi su třo mužojo. Hłownje wobskorženy, kiž sedźi w přepytowanskej jatbje, bě sej wot swójby 15 milionow eurow žadał a hrozył, zo priwatne fota swójby w interneće wozjewi. 53lětny bě jako sobudźěłaćer wěstotneje firmy pola Schumacherec dźěłał a tam tajnje fota zhotowił.
To a tamne (09.12.24)
Z čerwjenej šklu na hłowje ja 82lětny starc w delnjosakskim Brake zasadźenje policije zawinił. Muž bě ze swojim kijom wo wokno znateho kłapał a so po tym w zahrodźe schował. 51lětny wobydler tukaše na rubježny nadpad a wołaše policiju. Na to so wukopa, zo chcyše 82lětny swojeho znateho jako Mikławš překwapić. Dokelž njeměješe čerwjenu čapku, hrabny sej čerwjenu šklu.
Rozbuchnjeny aku elektriskeho rolera je w Brandenburgu nad Habolu woheń we wjaceswójbnym domje zamiškrił. 17lětny bě bateriju w koridorje nabiwał. Ta so zapali a na to runjewon rozbuchny. Młodostny ćekny z bydlenja a druhich wobydlerjow warnowaše. Wohnjowa wobora wjacore bydlenja jědojtych płunow dla ewakuowaše. Twarjenje je tuchwilu zawrjene. Měšćanske zarjadnistwo je wobydlerjow prowizorisce zaměstniło.
