To a tamne (25.06.21)
Ćelo na awtodróze A 4 je w nocy na štwórtk zasadźenje policije zawiniło. Zastojnicy dyrbjachu A 4 njedaloko wot-jězdki Wüstenbrand do směra na Erfurt dospołnje zawrěć. Skónčnje so poradźi, skoćo popadnyć. Wutoru bě cyłkownje wosom ćelatow ćeknyło. Za někotrymi přeco hišće pytaja. Policija prosy šoferow w regionje wo wosebitu kedźbnosć.
Nimale tři promile alkohola w kreji měještaj wodźerjej nakładneju awtow, jako jeju policija kontrolowaše. 37lětny jědźeše po awtodróze A 2, jako ze swojim Lkw-jom škitne wobhrodźenje po dołhosći něhdźe sto metrow wobškodźi. Šofera pak to njestaraše. Něšto pozdźišo jeho policija kontrolowaše a zwěsći 2,58 promilow. Dalši, 35lětny bě na A 14 do směra na Schwerin po puću, hdźež je chětro njewěsteho jězdźenja dla napadnył. Pola njeho naměrichu 2,96 promilow.
To a tamne (24.06.21)
Mužej w kostimje spidermana ruku dał je bamž Franciskus a je tak wulku kedźbnosć zbudźił. Maskěrowany muž bě Italčan, kiž w kostimje chorownje wopytuje, zo by tam předewšěm dźěćom wjeselo wobradźił. Tydźenska generalna awdienca 84lětneho Franciskusa wotměwa so mjeztym zaso z wopytowarjemi. Bamž je dawno přećiwo koronje šćěpjeny.
Postawa praženeho prosatka wuskutkuje w Romje wótre diskusije. Wuměłska uniwersita italskeje stolicy bě skulpturu w měšćanskim dźělu Trastevere postajiła, hdźež je wosebje wjele turistow. Tući widźa tam nětko mortwe prosatko z kamjenja, bjez nohow a kaž ke grilowanju zwjazane – tak mjenowanu „porchetta“, tradicionalne pražene prosatko. Zwěrinoškitne organizacije přećiwo postawje raznje protestuja, dokelž maja ju za ranjenje zasadow derjeměća skotu a wšitkich ludźi w Romje.
To a tamne (23.06.21)
Paducha w swojim bydlenju přewinyłoj staj mandźelskaj w Berlinje Charlottenburgu. 27lětny bě pozdatnje z wotewrjenymi durjemi terasy do bydlenja w přizemju zalězł. Mandźelski słyšeše podhladne zwuki a wuhlada paducha, kak je runje nachribjetnik muža přeborkał. Přewiny a dźeržeše jeho, doniž wot mandźelskeje přiwołana policija njepřijědźe. Ta dyrbješe 27lětneho jenož hišće sobu wzać.
Čwěle myšow dla dyrbja na juhowuchodźe Awstralskeje jastwo ewakuować. Naprawa je trěbna, zo bychu strowotu jatych a přistajenych škitali, zdźěli nawodnistwo jastwa njedaloko Wellingtona w staće New South Wales. Hrymzaki su hižo milinowody a izolaciski material wobškodźili. W New South Walesu bědźa so z najhóršej myšacej kwaklu minjenych 40 lět. Zwěrjatka su wosebje w ratarstwje hižo hoberske škody načinili.
To a tamne (22.06.21)
Pjany muž je so w horcej nocy do cuzeho domu zabłudźił a so tam nahi wuslěkał. Wobydlerjo wuhladachu 33lětneho wosrjedź nocy w kuchni jednoswójbneho domu w hornjopfalcskim Eschenbachu. Jako jeho narěčachu, so wón zwoblěka a so zminy. Kaž so wukopa, bě 33lětny w susodstwje swjećił a bě skónčnje chětro natutkany a bjez orientacije.
Lětacy omlet je zwadu mjez hosćimi hotela w Brandenburgu nad Habolu přiwótřił. Zwada bě nastała, jako so někotre wosoby na skupinu dalšich hosći na nutřkownym dworje hotela hary dla hóršachu. Při tym z hotelowym woknom wěcy na dwór mjetachu. Jako skónčnje omlet přileća, poda so 33lětny z dalšimi wosobami k hotelowej stwě. Tam so wón namócnje zadoby, storkaše do 17lětneho a jeho snadnje zrani. Policija namócnosće nětko přepytuje.
To a tamne (21.06.21)
70 metrow dołhe cholowy je krawc w šwicarskim Beromünsteru zhotowił. Tekstilny hober waži 700 kilogramow, jeno zasmyk je 16 metrow dołhi. Gigantiske cholowy, kiž bě Xwendekar Kelesh z normalnej šijawu zešił, su wčera zjawnosći předstajili. Po zapisku do Guinnessoweje knihi rekordow chce krawc z cholowow płatowe měški zhotowić. Z akciju chce wón na zanjerodźenje swěta z plastowymi wotpadkami skedźbnić.
Z kolesom na awtodróze 20 po puću do Pólskeje był je muž w Mecklenburgsko-Předpomorskej. Šofer busa bě muža wuhladał a policiju informował. Zastojnikam wón rozłoži, zo njeznaje hinašeho puća do domjaceho Szczecina. Po dokładnym powučenju přepodachu policisća kolesowarja busowemu šoferej, kiž přilubi, muža na přichodnej wotjězdce wotsadźić, zo móhł dale jěć.
To a tamne (18.06.21)
Jědojteho pawka dla su w Čěskej šulu zawrěli. Čłonkonohač bě šulerja na nuzniku kusnył, hólcej pak so na zbožo derje dźe. Toksikologiske přepytowanje je wunjesło, zo jedna so wo ptakopawka. Fachowcy su samsneho měnjenja. Kak bě so tón do twarjenja dóstał, njewědźa. Šulski dom w Mladej Boleslavje chcedźa nětko najprjedy raz dospołnje desinficěrować.
Wosrjedź jězby je šofer wosoboweho awta spytał zadnju lampu sporjedźeć. Dalša šoferka informowaše policiju, zo bě ju runje awto bjez zadnjeje swěcy přesćahnyło, z dźěry pak sahaše ruka. Zastojnicy wóz w Langerwehenje njedaloko Aachena zadźeržachu. Wobsedźer wobkrući, zo bě to jeho ruka była. Wón bě w kófrowym rumje ležo spytał kontaktny problem rozrisać. Awto je w tym času znaty wodźił. Muž měješe dowidźenje a wuńdźe z napominanjom.
To a tamne (17.06.21)
Z hłowu w betonowym bloku tčacy wostała je liška w jendźelskim Littlehamptonje a dyrbješe tam pjeć hodźin wutrać, doniž ju njewuswobodźichu. Młode zwěrjo bě kusk tykanca wuslědźiło, kotryž měješe poprawom kuntwory přiwabić. Čłonojo organizacije za zwěrinoškit su lišku w mjezyčasu z wodu zastarali. Skónčnje so wohnjowym wobornikam poradźi betonowy element rozrězać.
Přesadźowanje stareho awta ma za badensku gmejnu Oberwolfach bolostne sćěhi: Gmejna bě ležownosć ze starej kólnju kupiła. W njej steješe za staplowanym drjewom dawno zabyty oldtimer, kotryž je gmejna bjez wahanja za 24 500 eurow na awkciji předawa. Sudnistwo pak nětko rozsudźi, zo dyrbi gmejna pjenjezy a dań bywšej wobsedźerce kólnje wróćić. Citroën 2 CV steješe tam nimale 30 lět a je runje 14 kilometrow jěł.
To a tamne (16.06.21)
Za wobsedźerjom nopawy pytaja w Hohensteinje-Ernstthalu. Šoferka wosoboweho awta bě ju póndźelu namakała a sobu domoj wzała. Prawdźepodobnje jedna so wo grjeksku nakrajnu nopawu. Podarmo je žona spytała wobsedźerja přez socialne medije wuslědźić. Policija jeho nětko namołwja so přizjewić.
W błóćanej dźěrje potepiło je so wosobowe awto w indiskim Mumbaiju. W interneće wozjewjeny widejo wobsedźerja awta pokazuje, kak so jeho jězdźidło přez prědni dźěl w běhu někotrych sekundow w błóće zhubi. Parkowanišćo běchu swój čas na bywšej studni twarili, a tak drje je betonowa struktura přez lěta wosłabnyła. Wulki zliwk je nětko k dospołnemu rozpadej konstrukcije wjedł. Dokelž tež infrastruktura dobra njeje, tam stajnje zaso tajke dźěry nastawaja, kotrež móža samo čłowjekam strašne być.
To a tamne (15.06.21)
Nawoda indiskeje sekty z 38 mandźelskimi a 89 dźěćimi je 76lětny zemrěł. Ziona Chana bydleše ze swójbu w domje z wjace hač sto stwami. Mjeztym je wjes, w kotrymž bydleše, turistiska atrakcija. Někotre medije rozprawjeja, zo měješe Chana hišće wjace žonow a dźěći. Prěnju žonu bě sej jako teenager wzał, poslednju jako 60lětny. Polygamija je drje tež w Indiskej zakazana, někotre kmjeny pak maja wuwzaćnu dowolnosć.
W nohajcach je policist w nocy podhladneho přesćěhał, doniž jemu kolegojo na pomoc njepřijědźechu. W swojim swobodnym času policist wobkedźbował, kak so porik na dróze wadźi. Krótko na to 20lětny muž špihele parkowacych awtow wotkopa. „Chwile sej črije wobuć policist w chwatku njeměješe“, policija piše. Jako zastojnicy 20lětneho dosahnychu, so tón mócnje wobaraše.
To a tamne (14.06.21)
Mylnje wopačnu pincu wurumowało je předewzaće za přećahowanje we wjaceswójbnym domje w Plauenje. Wobydlerka domu so njemało stróži, jako wuhlada po wjacorych dnjach dospołnje wuprózdnjenu a wumjećenu pincu. Jewješe so podhlad, zo jedna so wo zaměnjenje. Rešerša policije wunjese, zo je předewzaće mylnje wobsydstwo 50lětneje sobu wzało, po tym zo bě bydlenje zemrěteje wobydlerki wurumowało.
Swojeho psa přećiwo paducham zakitowała je zmužita žona w Berlinje. Po informacijach policije běchu třo paduši spytali, žonje jeje staffordshire bullterriera w měšćanskim dźělu Tempelhofje wutorhnyć. Jedyn z paduchow bě psa majkał a sej žadał, zo žona powjaz pušći. Jako so wona spjećowaše, biješe ju do mjezwoča. Najebać to žona powjaz kruće dźeržeše, doniž so trójka njezminy.
