Awtor dźensa
Toni Ryćer
Tuchwilu kónči so nimale tydźensce někajke mišterstwo w motorsporće. Dočasnje doby wčera Lewis Hamilton swój třeći titul swětoweho mištra formule 1, a to tři jězby před finalnym běhom w Abu Dhabiju kónc nowembra. Wón dominowaše wot spočatka lěta z wurjadnymi wukonami. Wězo měješe z Mercedesom nimoměry dobry material k dispoziciji.
Kajkej běštej to wčera dźiwnej rozsudaj! Dwoje njeregularne wrota su hrě w prěnjej koparskej zwjazkowej lize rozsudźili. A hižo je znowa horca diskusija wokoło wukonow koparskich sudnikow wudyriła. Bjez dźiwa, zo sej tón abo tamny funkcionar podležaceju mustwow swoje wuprajenja po tym hižo předokładnje přemyslił njeje. Na přikład Kölnski manager Jörg Schmadtke , kiž měnješe, zo drje jednaše so w padźe sudnika tónraz wo „muža, kiž najskerje hewak w mjetańcy sudźi“.
Što bě so stało? W hrě mjez 1. FC Kölnom a Hannoverom 96 docpě Leon Andreasen dobyćerske wrota z ruku. To rěka ... wočiwidnje za 48 000 přihladowarjow w stadionje, nic pak za někajkeho ze štyrjoch sudnikow. Dosć zabawjacy tež komentar „winika“. Tón praji po tym: „Wězo móžeš to tež wothwizdać, ale w tajkej hrě wšitko chětro spěšnje dźe.“ Koho chcyše z tymle wuprajenjom wuzamołwić? Sudnika Bastiana Dankerta? Abo sebje samoho? W mojimaj wočomaj je to prosće njefairnosć danskeho koparja.
Awtor dźensa
Jan Hrjehor
Před dwěmaj njedźelomaj dyrbjach tule swoje linki na temu njezbožo w zbožu přetorhnyć. Awstriska sportowa elita w sněhakowarskim skakanju steješe potajkim w lifće na połojcy puća k najwyšemu dypkej skakanišća Bergisel. Třo Serbja bachtachu před kabinu, w kotrejž so sportowcy fyzisce a psychisce warjachu. Kabina dźěłaše kaž rostlinarnja a Schlierenzauer a co. so chětro poćachu. Winicy njeplanowaneho stopa běchu po zdaću hnydom jasni – serbska trójka z Janom Hrjehorjom. Mjezwoča sportowcow w kabinje byšće widźeć dyrbjeli! Zo so nam tajke něšto stanje?! A ja chcych sej jako dopomnjenku awtogram wobstarać a k tomu hišće wobraz z awstriskimi skakarjemi, kotřiž słušeja w sněhakowarskim skakanju k najlěpšim swěta. Moje šansy běchu nadobo pola nule, to sej znajmjeńša myslach.
Awtor dźensa
Halena Jancyna
W Drježdźanach njehraješe wčera Dynamo, za to pak wotmě so konjacy sport na jěchanskej čarje Drježdźany-Seidnitz. Tam bě lětuši 6. wubědźowanski dźeń, kotryž bě za swójby mysleny. Zastup běše darmotny a tuž naličichu 10 621 wopytowarjow jěchanskeho sporta. Lubješe być wulkotny dźeń k wubědźowanju. Słónco swěćeše, při a na jěchansekej čarje bě tež wšitko w porjadku. Za wšitkich akterow, konje a čłowjekow, potajkim prima wuměnjenja.
Awtor dźensa
Jan Hrjehor
Wulke njezbožo we wulkim zbožu! Tak někak móhli nadpismo za dožiwjenje wosebiteho razu mjenować, kotrež běchmy – mój syn, přiwuzny a ja – lětsa w juliju w Innsbrucku dožiwili. Tróšku wšak sym wahał, hač wo tym pisam abo nic, dokelž bě akcija při skakanišću Bergisel za nas chětro njepřijomna, ale tež dožiwjenjowpołna. W dowolu w Chiemgauskich Alpach bě so mi na wonym horcym dnju poradźiło dweju z našeje dowoloweje skupiny přeswědčić, zo byštaj sej ze mnu do Innsbrucka na skakanišćo Bergisel dojěłoj. Wone dźě steji kóžde lěto spočatk januara w fokusu zymskeho sportoweho rozprawnistwa. Innsbruck je mjenujcy třeća stacija turneje po štyrjoch skakanišćach.
Awtor dźensa
Jurij Bjeńš
Borussia Dortmund a FC Energija Choćebuz stej mustwje, za kotrejž moja wutroba bije. Hdys a hdys sej wězo do Dortmunda dojědu – dokelž pak sej to mało časa a fenkow dla tak často dowolić njemóžu, sym husćišo w Choćebuzu. Lětsa pak so tež raz wudani, stadiony na wuchodźe wopytać. Wšako wutroba kóždeho koparskeho přiwisnika spěšnišo pukoce, hdyž wobhlada sej hrajny plan třećeje ligi. Wosom mustwow je z wuchoda, wšitke z tradicionalnych towarstwow, kotrež maja hoberske fanowe žro. Kóždy kónc tydźenja znajmjeńša jedyn derby! Wulkotnje, to dyrbimy wužiwać! Tři tajke derbyje sej tuž hižo live w stadionje wobhladach. Prěni z nich bě Dynamo přećiwo Čerwjenoběłym z Erfurta. Štwórtk wječor pod swětłomjetakami, połny blok hosći, legendarny K-blok w Drježdźanach a napjatosć hač do kónca hry. Njejsym drje přiwisnik wobeju mustwow, hač do dźensnišeho pak njewobžaruju, zo sym tam był. Nalada bě kaž přeco w Drježdźanskim nowym stadionje fenomenalna.
Awtor dźensa
Křesćan Korjeńk
„Ha widźu-li ptačata ćahnyć, hdyž“ je swjedźeń Marije naroda a nazyma so bliži. Mnozy znaja tónle spěw jako zahajenski nazymskich koncertow. Wšako nam je na plakatach nětko hižo připowědźeja. Tola nochcu so tule dźensa wěnować horliwym spěwarjam-sportowcam, hačrunjež bychu sej to cyle wěsće tež zasłužili.
Tour de France, swětowe mišterstwa w płuwanju, swětowe mišterstwa w lochkoatletice, při wšitkich sportowych wjerškach so rěči a tuka, zo sportowcy njedowolene srědki wužiwaja, zo bychu swoje wukony stopnjowali. Njewěm hač je dobyćer lětušeje Tour de France, Jendźelčan Fromme, někajki doping brał abo nic. Jeho pak njejsu jenož tukanjow dla werbalnje atakowali, ale tež fyzisce. Je škoda, zo so doping cyle přewinyć njehodźi a zo někotre „čorne wowcy“ cyłkownemu wukonowemu sportej tak špatny image wobradźeja.
Podhlad, zo běchu tež sportowcy NDR njedowolene srědki wužiwali, je so dawno wobkrućił. Wězo stej tež wulkomyslne spěchowanje wěstych – předewšěm olympiskich – sportowych družin a njesměrny ćišć, dobyć medalje, k tomu přinošowałoj. Zajimawe na přikład je, zo su němscy sportowcy na 24. lětnej olympiadźe 1988 w Seoulu cyłkownje 142 medaljow dobyli, na olympiadźe 2012 w Londonje pak sto mjenje.
Awtor dźensa
Mikławš Krawc
Wo serbskej koparskej wubrance lětsa přewjele słyšeli njejsmy. Zo pak přihoty na klětuše zetkanje mustwow narodnych mjeńšin w Južnym Tirolu běža, je mi njedawno Józef Šwon na přikładźe skazanja wjacorych busow za fanow rysował. W dorosće wutwori Serbski Sokoł lětsa hnydom tři wubranki w starobnych klasach młodźina C, D a E – prawje tak! Loni mějachmy jenož wubranku D.
Awtor dźensa
Achim Kowar
Sym přiwisnik lochkoatletiki, a tohodla zajimuju so tež za lětuše swětowe mišterstwa lochkoatletow w chinskej stolicy Pekingu. Štož pak w přihotach na tele wjerškowe měrjenje mocow w našich medijach zhonich, bě podtykowanje dopinga za kóždy nadpřerězny wukon. Nětko je prěni kónc tydźenja tež Němskej wunjesł złotu a slěbornu medalju w kulostorku a we wjaceboju pjate městno. Nimam atletow za dopinga podhladnych a zarjadowarjow za njekmanych abo podhladnych. Njewěm, što ma tajke pawšalne podtykowanje tu pytać. Wone sportej skerje škodźi hač tyje. Wjeselmy so nad wukonami našich wysokoskakarjow z tyčku kaž tež nad wurjadnym kónčnym běhom muži na 100 metrow a nad tym, směć wuběrne wukony dožiwić. Wězo tež bolostne poražki k tomu słušeja. Móžno, zo to prawje njewidźu z tym do-błóta-ćahanjom. Ale wočinu-li nowiny, napadnu mi złóstnistwa a mordarstwa, a dobreho je dźeń a mjenje na swěće!