Skónčnje zaso šěsć ličaki za Běłu Wodu
Łužiske lodohokejowe liški –
Lodowe mjedwjedźe Regensburg 5:3 (2:2, 2:0, 1:1)
Łužiske liški su wažnu domjacu hru přećiwo Lodowym mjedwjedźam z Regensburga 5:3 dobyli. To bě hakle druhe dobyće ze zašłych wosom hrow.
Mustwo trenarja Petera Flache nachwata před 2 335 přihladowarjemi w prěnim přechodźe zastatk 0:2. Lane Scheidl (8.) a Tim Sezemsky (9.) docpěštaj hižo zahe za domjacych z dwójnymi wrotami nawjedowanje. Tola Jakob Weber (15.) a Pierre Preto (17.) dypkowaštaj tróšku pozdźišo njewočakowano za Mjedwjedźow.
Po dobrym starće do druheje třećiny pak Liški swojich hosći znowa šokowachu. Roope Mäkitalo docpě wrota a zdobom nawjedowanje (22.). Dylan Plouffe zwyši hrajny staw štyri mjeńšiny pozdźišo na 4:2. Hakle w kónčnej fazy dypkowachu mjedwjedźe hišće raz 3:4. Z jednym hrajerjom wjace na lodźe trjechi znowa Preto (55.). Tola jako trenar Flache wšitko na jednu kartu sadźi a wrotarja za šesteho pólneho hrajerja z lodu wza, třěli Max Kislinger rozsudne wrota 5:3 (59.).
Lodowe piraty Crimmitschau –
Łužiske lodohokejowe liški 1:2
(0:1, 1:1, 0:0)
Wažny dypk sej wudobyli
Zeleno-běli Drježdźany-Košicy –
ST Viktoria Worklecy 3:2
(23:25, 25:22, 24:26, 25:20, 15:5)
Po skerje słabej wonkownej hrě w Coswigu běchu sej Worklečanscy wolejbulisća kruće předewzali w Drježdźanach pola tabulkoweho susoda z Košic lěpši wukon pokazać. Hru w prěnjej połseriji 2024 su Worklečenjo 3:2 dobyli.
Hra bě spočatnje wurunana. To zaležeše runje tak na hrajnym wjeselu wobeju mustwow kaž tež na wulkej ličbje njetrjebawšich zmylkow na woběmaj bokomaj. Domjacy mějachu hač do 21:18 zwjetša snadnje nós prědku, prjed hač so Viktorianojo hišće raz zhrabachu, 22:22 wurunachu a potom samo 23:25 dobychu.
W druhej sadźbje mějachu hosćo spočatnje jasne lěpšiny a wuhrachu sej pjećdypkowy předskok. Při stawje 7:12 Košičenjo z wariabelnymi nadběhami přez diagonalnu poziciju nachwatachu. Zeleno-běli zwjertnychu sadźbu a dobychu ju zasłužbnje 25:22.
Sokoljo tónraz ći honjeni
Stari knježa Módro-běłych z Kulowa přeprosychu znowa wosom cyłkow do wjacezaměroweje hale w Kulowje. Zakitowarjo pokala běchu Sokoljo, wědźo zo su lětsa ći honjeni.
Hraješe so w dwěmaj staflomaj a to stajnje dwanaće mjeńšin. Prěnje dwě mustwje skwalifikowachu so za połfinale, hdźež w modusu přez křiž mocy měrjachu. Wrotar drje smě sobu hrać ale nic wrota docpěć a tež nic srjedźnu liniju překročić.
W stafli 1 Kulowčenjo kaž tež Weixdorf prěnjej hrě přećiwo Großröhrsdorfej a Horam dobyštej. W druhej hrě wonej přećiwo sebi hrajachu a Kulowčenjo nawjedowachu. Tola hosćo pokazachu spomóžnu kopańcu, wurunachu a na kóncu, takrjec w poslednjej sekundźe, hišće dobychu. Poslednju hru Kulowčenjo přećiwo Horam 6:1 dobychu.
Žane dobre wukony Sokołow na halowym parkeće
Na finalnym kole wokrjesnych mišterstwow minjenu sobotu měrjachu hnydom tři cyłki Sokoła Ralbicy/Hórki na halowym parkeće swoje mocy.
Turněr w Kamjenskej ćěłozwučowarni při lětanišću započina so z hrami starobneje klasy młodźina C. Kwalifikowali běchu so za tute cyłkownje šěsć mustwow. Jako najsylniši cyłk wopokaza so mustwo z Ottendorfa-Okrille, kotrež wšitke hry doby. Delanscy koparjo njemóžachu žanu hru dobyć a jenož dwójce njerozsudnje hrajachu. Tak wobsadźichu na kóncu pjate městno.
Sćěhowaše tak mjenowany RB-Supercup. Cyłkownje bě so tu pjeć mustwow přizjewiło kotrež hrajachu w modusu kóždy přećiwo kóždemu stajnje 16 mjeńšinow.
Sokoljo dobychu jeničce přećiwo Sepicam a tamne hry wšitke přěhrachu. To woznamjenješe na kóncu štwórte městno. Dobył je cyłk z Bretniga-Hauswalde před Natwarom Němske Pazlicy, a to lěpšeho wrotoweho poměra dla. Třeće městno zdobychu sej Rakečenjo.
Mały tróšt zwosta Sokołam, dokelž bu Denny Gloxyn do all-star teama (najlěpši hrajerjo turněra) wuzwoleny.
Ćiskowski master dobyli
W hali Wojerowskeho powołanskeho centruma „Konrad Zuse“ wuhra so njedźelu, 12. januara, tak mjenowany Ćiskowski master. Přeprošenju młodźina E-1 Sokoła Ralbicy/Hórki rady sćěhowaše a wobsadźi mjez šěsć mustwami prěnje městno. Jako najlěpšeho hrajerja wuznamjenichu Phila Waltera z Łazka (klečo deleka nalěwo).
Foto: Maik Brězan
Gymnaziasća w sněhakowarskim lěhwje
Wot 13. do 17. januara pobychu šulerki a šulerjo Budyskeho serbskeho gymnazija (SGB) w Krkonošach w Čěskej. W Jánskich Láznjach běchu w sněhakowarskim lěhwje w arealu „Černá hora“. Wuměnjenja za sněhakowanje běchu wuběrne.
Póndźelu rano čakachu tři rjadownje 8. lětnika hižo njesćerpliwje na wotjězd busa do Jánskich Láznjow.
Hižo na prěnim dnju podachu so započatkarjo po wupožčenju sněhakow na sněhakowarsku pistu w bliskosći wupožčowarnje, zo bychu so hižo ze sněhakowarskim materialom zeznajomnili a prěnje jězdźenske zwučowanja wuwjedli. Po wječeri slědowaše oficialne wotewrjenje sněhakowarskeho lěhwa.
Druhe wolejbulowe mustwo muži Viktorije Worklecy je wobě ...
Widźał,słyšał, napisał (20.01.25)
Awtor dźensa
Michał Nuk
Minjene měsacy je so často rozprawjało wo njespokojnosći w němskim wukonosportowym systemje. Lońše olympiske hry w Parisu zakónčichu so za Němski olympiski zwjazk znowa z minusowym rekordom pola ličby medaljow. Słowo kriza kursěruje mjeztym kaž mantra w němskim sporće a mnozy prašeja so, hač móže Němska docyła hišće na swětowym niwowje konkurować.
Někotre problemy so stajnje zaso pomjenuja. Jónu su to pobrachowace financne srědki za sportowcow, trenarjow a infrastrukturu. K přirunanju: Za złotu medalju w Parisu płaćeše Němska swojim dobyćerjam 20 000 eurow, mjeztym zo wuspěšniše kraje kaž USA, Francoska abo Italska dwójce do pjeć króć telko dawachu. Abo dopominam so na rozhorjenje, jako chcyše předlońšim, w času sylneje inflacije, financny ministeri etat za Institut za nałožowane treningowe wědomosće w Lipsku a za Institut za slědźenje a wuwiće sportowych nastrojow (FES) w Berlinje wo w cyłku 4 milionow eurow ( = 19 procentow) skrótšić.
Wuslědki (20.01.25)
Kopańca, 3. liga
1. FC Saarbrücken – Mnichow 4:0 (2:0)
VfB Stuttgart II – Hansa Rostock 0:3 (0:1)
VfL Osnabrück – Sandhausen 3:2 (2:1)
Unterhaching – B. Dortmund II 1:2 (1:1)
Arm. Bielefeld – FC E. Choćebuz 0:2 (0:1)
Wehen Wiesbaden – SC Verl 0:1 (0:1)
Dynamo Drježdźany – Köln 2:3 (1:2)
Alemannia Aachen – Essen 2:0 (0:0)
Mannheim – FC Ingolstadt 0:0 (0:0)
1. FC Energija Choćebuz 20 44 : 24 40
2. Dynamo Drježdźany 20 40 : 23 38
3. 1. FC Saarbrücken 20 28 : 18 35
4. Viktoria Köln 20 34 : 28 32
5. FC Ingolstadt 04 20 43 : 33 31
6. Hansa Rostock 20 28 : 22 31
7. Arminia Bielefeld 20 25 : 22 31
8. Borussia Dortmund II 20 37 : 31 29
9. SC Verl 20 31 : 27 29
10. FC Rudne horiny Aue 20 32 : 36 29
11. TSV Alemannia Aachen 20 20 : 21 28
12. Wehen Wiesbaden 20 30 : 33 28
13. Sandhausen 20 31 : 31 27
14. TSV 1860 Mnichow 20 29 : 38 24
15. Waldhof Mannheim 20 20 : 24 22
16. Hannover 96 U23 20 24 : 31 21
17. VfB Stuttgart II 20 26 : 37 20
18. VfL Osnabrück 20 25 : 38 18
19. Čerwjeno-běli Essen 20 23 : 36 17
20. HZ Unterhaching 20 23 : 40 14
Sport (17.01.25)
Dźewjaty RB-Supercup
Jutře přewjedźe so w Kamjenskej sportowni při lětanišću tradicionalny koparski turněr za mustwa Zapadołužiskeho koparskeho zwjazka (WFV). Z mjeztym 9. turněrom pod patronatstwom twarskich elementow Richter rozšěri koparski zwjazk Budyskeho wokrjesa znowa swój koparski poskitk we wobłuku dorosćenych. Šěsć mustwow z wokrjesa hraje 18. januara wot 14 hodź. wo pokal. To su cyłki FSV Bretnig-Hauswalde, Rakečanske ST, Natwar Němske Pazlicy, Sokoł Ralbicy/Hórki, SZ Steinigtwolmsdorf a Zeleno-běli Sepicy. Wot 9.30 hodź. wuhraje so finale halowych wokrjesnych mišterstwow młodźiny C.
Kónctydźenski wolejbul
Prěnje wolejbulowe mustwo muži Viktorije Worklecy pojědźe jutře do Drježdźan. Tam hraje přećiwo tabulkowemu susodej Zeleno-běłym Drježdźany-Coschütz I. W samsnym času hraje dotal njeporaženy načolnik wobwodneje klasy, druhe mustwo muži Viktorije Worklecy, doma we Worklecach přećiwo OSSV Kamjenc a přećiwo VV Žitawje II.
18.01. 14:00 Drježdźany-Coschütz I –
Viktoria Worklecy (m)
18.01. 14:00 Viktoria Worklecy II –
VV Žitawa 09 II (m)
18.01. 16:00 Viktoria Worklecy II –
OSSV Kamjenc (m)
