Tež we Łužicy mało dorosta
Monika Cyžowa je předsydka Zwjazka serbskich rjemjeslnikow a předewzaćelow (ZSRP), kotryž je w lěće 2000 Domowinje přistupił. Wona starosći so, dokelž ličba serbskich rjemjeslnikow a předewzaćelow dale a bóle woteběra.
Nowa Jaseńca (SN/MiP). „Lěto 2024 zahajili smy kaž kóžde lěto z ekskursiju do Drježdźan w januarje. Mjez druhim smy Muzej hygieny wopytali“, Monika Cyžowa rozprawja. Na dalšu zhromadnu wuprawu podachu so čłonojo towarstwa w juniju z kolesom do Krabatoweho młyna w Čornym Chołmcu a sej tam hornčernju Andreasa Hegewalda wobhladachu. Na dalšej tři-dnjowskej ekskursiji wobhladachu sej zběharnju łódźow w Eberswaldźe. „Lěto zakónčili smy w decembrje z wjedźenjom po starym Budyšinje a wopytom rejowanskeje estrady w Serbskim ludowym ansamblu“, předsydka towarstwa naspomni.
W zymje štomy wurězać
Zahaja Zeleny tydźeń
Malešan wosebite wopismo dóstał
Přihotuja jubilej
Malešecy (SN). Čłonojo Domowinskeje skupiny Malešecy dorozumichu so wčera wo serbskich zarjadowanjach we wobłuku swjedźenskeho tydźenja w Malešecach. Tam swjeća wot njedźele, 15. junija hač do 22. junija, 800lětny jubilej. Serbske poskitki su kruty wobstatk tydźenja. Na njedźeli zahajenja jubileja prezentuje so wjes pod hesłom „Malešecy dožiwić“. Domowinska skupina přihotuje hromadźe z partnerami serbske poskitki a zabawu w hosćencu „Wódny muž“. Na žurli chcedźa wustajeńcu 80 lět Domowinska skupina Malešecy z chroniki wjelelětneho předsydy skupiny Klawsa Petrenca, pokazać. Při tym jich regionalna rěčnica Domowiny Katja Liznarjec, podpěruje. Dale chcedźa fota Jurja Helgesta wo serbskich zarjadowanjach předchadźacych lět spřistupnić. Zdobom prezentuja tež drastowu wustajeńcu Moniki Cyžoweje. Tuta wobsahuje klanki ze wšelakich regionow Łužicy a ze słowjanskeho wukraja. Dźěći změja móžnosć paslić, jejka wóskować a jejka kuleć. Za hudźbne wobrubjenje pytaja nětko serbskich hudźbnikow resp. serbsku skupinu.
Towarstwo zhladuje na dźěła połne lěto
Slepo (SN/BŠe). Zwjazk za serbski kulturny turizm chce tež lětsa zaso zaměrnje na swojich předewzaćach dale dźěłać. Předewšěm maja so turistiske zwiski a syće dale wutwarić. Tohorunja chcedźa zastupjerjo zwjazka nowych partnerow zeznać a nowe móžnosće spěchowanja namakać.
Hornčerjo pěstuja dołhu tradiciju
Zwjazk z nowym jednaćelom
W jězorinje stacije twarić
Tornow (AK/SN). We Łužiskej jězorinje ma bórze wosom stacijow ADAC za reparowanje kolesow nastać. Tole su čłonojo zwjazka Łužiska jězorina Sakska jednohłósnje na zašłej zhromadźiznje wobzamknyli. Zhromadnje z wobchadnym zwjazkom ADAC Sakska, komunami a priwatnymi wobsedźerjemi ležownosćow chcedźa projekt zwoprawdźić.
Tam, hdźež wjele turistow přichadźa – při jězorach, kolesowarskich šćežkach, při škitnych hětach abo informaciskich taflach – maja so stacije natwarić. Po móžnosći hač do apryla, takrjec do spočatka noweje sezony, dyrbi wšitko hotowe być.
ADAC chce stacije darmotnje k dispoziciji stajić. Nimo toho wobchadny zwjazk hladanje stacijow a narunanje skóncowanych abo zhubjenych gratow zawěsći. Dale přewozmje ADAC kóšty za material w zwisku z instalaciju kolesowanskich stacijow. Sobudźěłaćerjo zaměroweho zwjazka pak maja fundamenty přihotować a so wo wotpowědne dojednanja z mějićelemi ležownosćow starać. Tohorunja změja woni prawidłownje staw stacijow kontrolować. Hdźe stacije dokładnje nastanu, to akterojo hišće wothłosuja.
Saněrowanje jězora w kónčnej fazy
Saněrowanje Hórnikečanskeho jězora je kónčnu fazu docpěło. Na to skedźbni Karsten Handro, nawoda saněrowanskeho wobłuka Łužica pola Łužiskeje a srjedźoněmskeje towaršnosće hórnistwoweho zarjadnistwa (LMBV) na decemberskim posedźenju gmejnskeje rady we Łazu.
Łaz (AK/SN). „Wuchodny pobrjóh Hórnikečanskeho jězora ma w druhim kwartalu 2025 zawěsćeny być. Po tym zawěsćimy wobłuk, kotryž je so zesunył“, wón wuswětli. Wotpowědne dźěła za to chcedźa w februarje wupisać.
