Stawizny cyle zbliska dožiwić
Budyšin (SN). Na třoch łužiskich městnosćach – při kupanskim jězoru Olbje w Zuborničce, w Slepom a w Parku błudźenkow w Hochozy – móža wopytowarjo nětko stawizny a krajinu na jónkrótnje nowe wašnje dožiwić. Marketingowa towaršnosć Hornja Łužica-Delnja Šleska (MGO) je tu interaktiwne stacije nastajiła, na kotrychž dóstanje zajimc z pomocu QR-koda přistup k swětej „rozšěrjeneje reality“ – jendźelsce: Augmented Reality (AR). Při tym wobhladuja sej wužiwarjo wokolinu na městnje z kameru swojeho šmóratka abo tableta. Na tute wašnje widźa „realitu rozšěrjace“ digitalne informacije, kotrež so do aktualneho wobraza implementuja. Po kliknjenju wuhladaja potom přidatne wirtuelne elementy, na přikład filmy, animacije abo wopisanja k stawiznam jednotliwych objektow we wobrazu. Zašłosć so tak z dźensnišim dnjom zwjaza.
Wubědźowanje wčera zahajili
Nowe wužadanje w nakładnistwje
Do kruha wjelelětnych sobudźěłaćerjow Ludoweho nakładnistwa Domowina słuša Jadwiga Krawcowa. Předwčerawšim zhladowaše wona na 25lětne skutkowanje w serbskej instituciji.
Wjace pólskich hosći za Łužisku jězorinu zajimować
Wojerecy (AK/SN). Turistiski zwjazk Łužiska jězorina chce w přichodźe wjace pólskich dowolnikow a turistow do regiona přiwabić. Tole podšmórny předsydka zwjazka Kathrin Winkler wutoru we Wojerecach. „Před dźesać lětami smy z wabjenjom na čěskich wikach započinali. Nětko so tež na pólske wiki zwažimy“, wona znazorni. W zwisku z tym ma zwjazk lětsa prěni raz dowolowu kartu jězoriny tež w pólšćinje, kotruž nochce jenož we Łužicy, ale z pomocu turistiskich partnerow tež w Pólskej šěrić. „Pólske wiki su dźeń a relewantniše za nas“, wuzběhny Kathrin Winkler a doda: „W lěće 2024 smy cyłkownje 311 347 wopytowarjow měli. Wot tutych běše 2 555 hosći z Pólskeje. Porno lětu 2023 je jich ličba wo 23,8 procentow stupała“.
Dowolowa karta w formaće A5 informuje wo turistiskich poskitkach we Łužiskej jězorinje. Wona pokazuje kolesowarske puće abo městnosće za wodosport a wočerstwjenje. Nimo toho znazornja temy kaž industrijowu kulturu, změnu krajiny kaž tež hrody, parki a zahrody regiona. Turistiski zwjazk Łužiska jězorina je dowolowu kartu w kooperaciji z regionalnymi a pólskimi partnerami zestajała.
Ralbičanski wjelk tola škitany
Drježdźany (dpa/SN). Dowolnosć za zatřělenje wjelka z Ralbičanskeho wjelčeho stadła, kotruž běše Budyski krajnoradny zarjad lětsa 11. měrca wudźělił, je zběhnjena. To wobzamkny wčera zarjadniske sudnistwo w Drježdźanach po přepruwowanju wobzamknjenja, kotrež běše sej přirodoškitna organizacija z Nižosakskeje žadała. Wjelki stadła běchu w januarje a februarje tutoho lěta we wjeskach gmejny Ralbicy-Róžant wjace hač 30 wowcow a kozow zakusali.
Přirodoškitna organizacija je mjez druhim měnjenja, zo maja škodowani plahowarjo skotu winowatosć, swoje pastwišća z wěstotnymi naprawami přećiwo nadpadam wjelkow škitać – to pak w dosahacej měrje činili njejsu. Nimo toho njeje Budyski krajnoradny zarjad před dowolnosću zatřělenja tež druhe alternatiwy postupowanja pruwował.
Wobě wobmysleni přirodoškitarjow maja Drježdźanscy sudnicy za woprawnjenej. Woni wuzběhnychu, zo su měnjenja, zo njeby zatřělenje jednotliweho wjelka w stadle dalšim nadpadam zadźěwało. To Budyski wokrjes w swojim rozsudźe tež jasnje dosć dopokazał njeběše.
Wabja intensiwnje za powołanja w strowotnistwje
Wojerecy (AK/SN). We Wojerecach wabja młodostnych sylnišo za powołanja we wobłukach strowota, medicina a hladanje. Syć z mjenom „Zukunfstfeld Gesundheit“ ma informacije w přichodźe zjimać a šulerjam sposrědkować. Powołanska orientacija dyrbi so tak zesylnić. Hižo lěto syć dźěła. Čłonojo su mjez druhim zastupjerjo klinikuma Łužiska jězorina, Dźěłaćerske dobroćelstwo (AWO) Łužica, Wojerowski powołanskošulski centrum Konrada Zusy, město z koordinaciskim městnom za kubłanje, Łužiske dźěłarnje za zbrašenych, strowotniski zarjad Budyskeho wokrjesa kaž tež dalši partnerojo. K nim słušeja HOY-REHA, sportowy klub Wojerecy a Hans Sachs tzwr za medicinske črije. „We Wojerecach maja wjele kompetency w strowotnistwje a hladanju. To je wysoke kubło“, jednaćelka klinikuma a rěčnica syće Juliane Kirfe podšmórny. „Wažne nam je akterow wjazać.“
Prominentnej wulosowałoj
Lipsk (SN/cš). W Lipsku su wčera popołdnju stafle za lětuši 40. Sokołski wolejbulowy turněr wo pokal Domowiny wulosowali. Turněr wuhraja sobotu za tydźeń, 29. měrca, w Radworskej Slaviji. Cyłkownje wobdźěli so na turněrje lětsa dwanaće mustwow, rozdźělene do třoch staflow. Při wulosowanju přitomnaj běštaj jako zastupjerjej Serbskeho Sokoła, předsyda Jan Hrjehor a Józef Šwon. Losowanskej soninje běštej moderatorce sportoweje redakcije MDR aktuell, Mo Krüger a Stefanie Blochwitz. Tole měješe wosebitu přičinu, wšako je to lětsa jubilejny 40. turněr.
Zo stej prominentnej soninje stafle wulosowałoj, je rodźeny Dubrjenčan Bosćij Wels zmóžnił. Wón je w Lipsku za livestreamy wusyłanjow zamołwity. „To nas wězo jara wjeseli“, wuzběhny předsyda Sokoła Jan Hrjehor.
Zo by wšitko swój porjadk měło a so protokol dodźeržał, to je Józef Šwon wčera na městnje zaručił. Dale wón rjekny: „Smy zbožowni, zo je so radźiło wulosowanje w Lipsku přewjesć a zo je so 12 mustwow přizjewiło. Tak móžemy turněr 29. měrca přewjesć.“
Dowolnosć nětko předleži
Čorna Pumpa (SN). W Čornej Pumpje chce předewzaće Altech twornju baterijow twarić. Nětko tež trěbna twarska dowolnosć za produkciske stejnišćo předleži. Z tym móže předewzaće z twarom započeć. Hladajo na financowanje nadźija so koncern na spěchowanske srědki tež ze stron Zwjazka a Sakskeje. Dohromady něhdźe 156 milinow eurow twornja płaći. Wotpowědne rozmołwy z bankami a inwestorami su zamołwići zahajili.
Wšelake přihoty za twarnišćo w Čornej Pumpje su hižo wuspěšnje zakónčili. Zhromadnje z partnerom – Drježdźanskim institutom Fraunhofer IKTS je Altech prěnje prototypy baterije Cerenergy zhotowił. Wobšěrne přepruwowanja pokazaja, zo su wočakowanja nad měru spjelnili.
Předewzaće so nětko nadźija, zo předležaca dowolnosć rozmołwam z potencielnymi inwestorami pozitiwnje přinošuje. „Twarska dowolnosć je dalša wažna kročel za zwoprawdźenje projekta a jasny signal inwestoram, dokelž wona wěstotu a dowěru wuprudźa“, wuzběhny Uwe Ahrens z předsydstwa předewzaća Altech.
Park błudźenkow lěto a woblubowaniši
Wochozy (AK/SN). Łužiski park błudźenkow je minjeny kónc tydźenja swoju 22. sezonu zahajił. A to z wotměnjawym, mnohostronskim programom. „Chcemy turistiski highlight w regionje być“, wuzběhny předsyda spěchowanskeho towarstwa Łužiski park błudźenkow Wochozy Peter Scholze. Wot wotewrjenja parka w lěće 2003 je jón hižo 1,6 milionow ludźi wopytało. Loni su 65 000 hosći zličili. Zamołwići parka zwěsćichu, zo ličba wopytowarjow wot lěta 2018 přiběra.
Swjatočny dźeń za rjemjeslniski dorost
Budyšin (SN/VaŽ). Minjeny pjatk wotmě so w Němsko-Serbskim ludowym dźiwadle w Budyšinje swjatočne wuwjazanje wučomnikow rjemjesła. Cyłkownje bu 52 wučomnikow swjatočnje ze swojim wuswědčenjom a rjemjeslniskim wopismom wuznamjenjenych. Mjez nimi bě 22 elektronikarjow, 15 mechanikarjow za připrawy sanitarneje, tepjenskeje a klimoweje techniki kaž tež štyrjo metalotwarcy. K tomu přińdu někotři nachwatarjo a wučomnicy z druhich powołanjow. Wosebje zwjeselace bě, zo dósta wosom absolwentow swoje wopismo ze znamku „derje“. Za swjedźensku narěč bě mjez druhim prezident Sakskeho krajneho sejma Alexander Dierks přeprošeny. Wón w swojej narěči hordźe wuzběhny, zo je telko młodych ludźi wuspěšnje swoje wukubłanje w rjemjeslniskim zawodźe zakónčiło. Zdobom chwaleše Dierks wulku zmužitosć, angažement a powšitkownje rjemjeslniske dźěło w regionje, kotrež je njeparujomne.
