Grodk (JoS/SN). Papjerowa fabrika, zawod Dunapack a milinarnja Spreerecycling w Grodku, kotrež maja jako wotnožki předewzaća Hamburger Rieger dohromady 500 direktnych dźěłowych městnow, su druhi najwjetši dźěłodawar regiona. Z twarom noweje mašiny za produkciju papjery PM“ budu hišće dalši sobudźěłaćerjo trěbni. To wobkrućichu nawodźa papjernika (Papierfabrik) tele dny na swjedźenskim zarjadowanju w Grodkowskim hrodźe, hdźež su 17 młodych fachowcow z wuspěšneho wukubłanja wuwjazali. Wšitkim móžachu dźěłowe městno w jednej z mjenowanych třoch twornjow poskićić. Hladajo na 38 wučomnikow leži tam wukubłanska kwota pola sydom procentow, štož ma tež tak wostać. Wšako dósta samsny dźeń dźewjeć młodostnych swoje wukubłanske a studijne zrěčenje. Nowi wučomnicy pochadźeja z Wojerec, Grodka, Wjelceje a Žitawy.
Zhorjelc (SN/BŠe). Dlěje hač dwě lěće wojowachu wobydlerjo regiona poboku sobudźěłaćerjow Zhorjelskeju zawodow Bombardier a Siemens wo to, stejnišći zachować. Hač běchu to akciske dny, demonstracije, rjećazy ludźi, napominanske straže a dalše protestne zarjadowanja – wšudźe su přistajenych předewzaćow podpěrali. „Zawodaj zdźeržeć bě jenož móžno dźakowano wulkej solidariće. Z tej mocu móžachmy rozsudy koncernow wobwliwować. Smy dopokazali, zo móže wuchod wojować. Tež hdyž mamy hišće wjele dźěła před sobu, je načasu so dźakować“, wuzběhny prěni społnomócnjeny dźěłarnistwa IG metal wuchodna Sakska Jan Otto do dźakneho zarjadowanja „Zhorjelc wostanje! Naš zhromadny wuspěch!“. Wone wotmě wčera na Zhorjelskim Marijinym naměsće, hdźež wuhotowachu měšćanski swjedźeń.
Hač do lěta 2021 wostanje Hórnikečanski jězor zawrjeny. Přičina su saněrowanske dźěła Łužiskeje a srjedźoněmskeje towaršnosće hórnistwoweho zarjadnistwa (LMBV). Towarstwo Rebelojo Hórnikečanskeho jězora wojuje wo wolóženja a wo bórzomne znowawožiwjenje jězora. Wo wudobyćach, dalšich zaměrach a předewzaćach je so Andreas Kirschke z předsydu Rebelow Wernerom Petrickom rozmołwjał.
Wjacore lěta hižo zasadźeće so za to, dźěl južneho přibrjoha wot měrca do septembra za kupanje spřistupnić. Što sće dotal docpěli?
W. Petrick: Bohužel ničo. Kóžde lěto stajamy próstwu Sakskemu wyšemu hórnistwowemu zarjadej. W zhromadnym wuradźowanju z nim, z LMBV kaž tež ze sakskim hospodarskim ministerstwom 23. junija 2016 běchu nam připowědźili, zo chcedźa Wulkoždźarowski přibrjóh klětu za kupanje wotewrěć. Hač k tomu dóńdźe, wotwisuje wot toho, hač fachowcy wyšeho hórnistwoweho zarjada nowe dopóznaća geotechniki akceptuja a zwoprawdźa.
Na Sprjewinej dróze mjez Hamorom a Mułkecami pisaja nowy kapitl stawiznow hórnistwa. To je trjeba, dokelž ma LMBV tam nowe wěstotne směrnicy zaručić.
Łužiska a srjedźoněmska towaršnosć hórnistwoweho zarjadnistwa (LMBV) dohladuje na kromje Wochožanskeje jamy mnohe stare filtrowe studnje. Wone nastachu spočatk 1960tych lět, zo bychu dnownu wodu wotklumpali, doniž njezapočachu 1966 w jamje brunicu wudobywać. Tajke stare filtrowe studnje maš tež we wobłuku wokrjesneje dróhi K 8481, tak mjenowaneje Sprjewineje dróhi. LMBV je jako nadawkar a projektny nošer zamołwita za to, zo stare studnje zawěsći.
Po dołhosći 2,5 kilometrow direktnje pod Sprjewinej dróhu a jeje nakromnymi pasmami je 120 tajkich studnjow. Prěnjotne zawrjenje kolesowarskeje šćežki pódla dróhi su zaso zběhnyli, dokelž wopokaza so jako njetrjebawše. Kolesowarjo pak měli kedźbliwje po twarskim wobłuku jězdźić a w datym padźe wěstotne pokiwy personala na twarnišću sćěhować.
Tony mortwych rybow su minjeny tydźeń ze Slěborneho jězora pola Łaza wułójili. Běše-li tam wudźenje a kupanje dotal dowolene, to nětko najprjedy raz radźomne njeje. Potrjechene gmejny, w kotrychž jězor leži, su hižo reagowali a wotpowědne taflički připrawili.
Bjedrichecy (AK/SN). Mrěća rybow w Slěbornym jězoru dla njeměli so tam ludźo najprjedy raz kupać a wudźić. To radźitej strowotniski zarjad Budyskeho wokrjesa a Sakski zarjad krajnych rěčnych zawěrow (LTV). „Ze stron gmejnow su hižo taflički nastajene, kotrež na to skedźbnjeja, zo njeje kupanje radźomne“, zdźěli nowinski rěčnik Budyskeho wokrjesa Peter Stange. „Přičiny zahinjenych a na přibrjohu jězora ležacych rybow dla njeměło so tohorunja wudźić.“
Budyšin (UM/SN). Ella přijědźe. Na njej hnydom njepytnješ, zo je wona něšto cyle wosebite – mjenujcy pućrubarka elektromobility. Spočatnje skutkuje Łastojčka kaž tróšku starši moped z NDRskeho časa. Hakle, hdyž Andrzej Serwecinski na tym městnje pokrywadło zběhnje, hdźež dyrbjało poprawom wěko tanka być, wuhladaš wurjadne „nutřkowne žiwjenje“ z bateriju. „Kóždy móže sej z cyle normalneho mopeda Łastojčki z twarskej sadźbu, kotruž rozšěrjamy, swójsku ,Ellu‘ twarić“, přeradźa mějićel Němsko-Pólskeho informaciskeho běrowa we Wojerecach. Dźesać tajkich setow su w interneće hižo předali.
Hózk (aha/SN). Bjezposrědnje do towaršnostneho přewróta bě so Hózkowčan Christian Schmidt jako hornčer zesamostatnił. Zo móhł swój zawod powjetšić, je sej po přewróće zhromadnje z Gundu Gleimig něhdyši Hózkowski młyn kupił. Impozantny twar je w chronice klóštra Marijineje hwězdy 1380 prěni raz naspomnjeny. Před połdra lětstotkom wulki woheń młyn dospołnje zniči. Lěta 1861 młyn zaso tak natwarichu, kaž jón ludźo dźensa znaja. 1935 běchu tam poslednju muku mlěli.
Nowaj wobsedźerjej bywšeho młyna zarjadowaštaj sej w stawiznisce zajimawym twarje 1996 keramisku dźěłarnju. Swoje wudźěłki staj spočatnje wokolnym wobchodam poskićałoj. Nimo toho wobdźěleštaj so w běhu lěta na wjace hač 15 hornčerskich wikach. Při tym zrodźištaj ideju, samaj tajke wiki zarjadować. Wšako so teren wokoło Hózkowskeho młyna za tajke zarjadowanje wuběrnje hodźi.
Choćebuz (SN/at). Tři štwórćiny wučomnikow na terenje wuchodoněmskich Industrijnych a wikowanskich komorow (IHK) wuknu swoje wusonjene powołanje. To wuchadźa z naprašowanja mjez 28 000 wučomnikami prěnjeho wukubłanskeho lěta, kotrež su IHK nalěto přewjedli. Jara požadane je dale dźěło předewšěm w zjawnej słužbje. „Štóž pak so na wone mało powołanjow njekoncentruje, ma na wukubłanskich wikach wjele wjetše šansy hač hišće před lětami“, zwěsća Anke Schuldt, nawodnica wobłuka wukubłanje Choćebuskeje IHK.
Lěpše šansy na wukubłanske městno pokazuja so tež w tym, zo su młodostni porno naprašowanjomaj 2016 a 2017 mjenje požadanjow rozesłali.
Zdobom wšak wujewja so negatiwna stronka: We wjesnych kónčinach dyrbi kóždy pjaty młodostny za wukubłanske městno bydlišćo změnić, kóždy štwórty dyrbi za wopyt powołanskeje šule dalši kwartěr wotnajeć. Tohodla je po słowach Anki Schuldt „jedne z najwjetšich wužadanjow, w dobje demografiskeho wotmacha bydlišću bliske šulske wukubłanje zaručić“.