Narodniny skónčnje hódnje woswjećili
Budyski industrijny zawod – wagonownja so před wjac hač 175 lětami załožiła
Najwjetši Budyski industrijny zawod, zhotowjer wagonow Alstom, so w lěće 1846 jako železowa lijernja a dźěłarnja mašinow załoži. Předewzaće móhło potajkim w lěće 2021 swoje 175. narodniny swjećić. Koronapandemije dla pak tole njemóžachu a to sobotu, 17. september nachwatachu. Na něhdźe 300 000 kwadratnych metrach wulkej ležownosći mjez Fabrikskej dróhu a Sprjewju su sobudźěłaćerjo twornje na dnju wotewrjenych duri wjele wopytowarjow witali. Wjace hač 4 600 hosći su tam naličili.
Wulki nawal na wukubłanskich wikach
Grodk (JoS/SN). Mjeztym 20. wukubłanske a studijne wiki na powołanja orientowanej wyšej šuli w Grodku běchu zańdźenu sobotu wulki wuspěch. A to wosebje za zajimowanych šulerjow, kotřiž dyrbja so w swojim poslednim šulskim lěće za powołanje rozsudźić kaž tež za předewzaća, kotrež so prezentowachu. Wobjim poskitkow sahaše wot rjemjesła přez srjedźny staw hač k we Łužicy a zwonka njeje zasydlenym wulkim zawodam. K tomu podachu hišće mnohe a najwšelakoriše poskitki ze zarjadnistwow. Z rozmołwow ze zastupjerjemi firmow wuchadźa, zo we wšěch branšach wučomnikow trjebaja, tež pola policije a cłownistwa. Studijne móžnosće rozłožichu zajimcam zastupjerjo agentury za dualny studij Braniborska, Powołanska akademija Sakska a BTU Choćebuz-Zły Komorow.
Přezjednje a chwalobnje wuprajichu so wustajerjo wo wuběrnej organizaciji wukubłanskeje bursy. Dźeń bě derje wuzwoleny, wšako móžachu so swójby wobdźělić a rozhladować. Tak přichadźachu w bohatej ličbje a so zaměrnje wobhonichu.
Ludźo w jězorinje dlěje přebywaja
Nic jenož w sakskim dźělu Łužiskeje jězoriny so wjele hiba, ale tež w braniborskim. Tam zwěsćichu lětsa samo nowy trend, rozłoži zastupjer zaměroweho zwjazka Braniborska Martin Wolf.
Hamor (AK/SN). Za Łužisku jězorinu w Braniborskej so w lěće 2022 nowy dowolowy trend wotbłyšćuje. „Ludźo su tu dlěje wostali“, podšmórny nawoda wobłuka infrastruktury zaměroweho zwjazka Łužiska jězorina Braniborska Martin Wolf na njedawnym posedźenju w Hamorje. Na zhromadźiznje susodneho zaměroweho zwjazka wón wo aktualnym wuwiću rozprawješe.
Před dwěmaj lětomaj zliči zaměrowy zwjazk braniborskeho dźěla jězoriny ke kóncej awgusta 47 200 wopytowarjow z cyłkownje 208 158 přenocowanjemi. Lětsa bě jich w samsnym času 46 581 hosći z 217 679 přenocowanjemi. Ličba wopytowarjow je wo 1,3 procentow woteběrała. Ličba přenocowanjow pak je wo 4,57 procentow stupała. Hač trend dale tajki wostanje, je njejasne.
Dojednanje mjez lěsnej železnicu a LEAG je měznik
Běła Woda (AK/SN). Mužakowska lěsna železnica chce strukturnu změnu aktiwnje a dołhodobnje sobu wuhotować. Ze 7,6 milionow eurow wopřijacym cyłkownym projektom inwestuje zawod do přichoda. „Nadźijamy so 90 procentow spěchowanja ze Zakonja k zesylnjenju strukturow. Dźesać procentow swójskeho podźěla su srědki towaršnosće lěsneje železnicy (w nošerstwje Zhorjelskeho wokrjesa a komunow), předewzaća Łužiska energija a milinarnje (LEAG), lutowarnje Hornja Łužica-Delnja Šleska a wobchadneho zaměroweho zwjazka Hornja Łužica-Delnja Šleska (ZVON)“, wujasni jednaćel Lěsneje železnicy Mužakow tzwr Heiko Lichnok dźensa tydźenja w Běłej Wodźe. Ze 160 000 eurami LEAG projekt podpěruje. Tak je swójski podźěl w cyłkownym projekće zawěsćeny. „Dojednanje sponsorow je měznik w stawiznach železnicy“, Heiko Lichnok podšmórny.
Zaso wukubłanska bursa w Grodku
Powołanska orientacija je šulerjam a jich staršim wažna pomoc, hdyž dźe wo wukubłanje a wo přihoty na nowy žiwjenski wotrězk po zakónčenju šule. Na 20. wukubłansku a studijnu bursu jutře do Powołansko-orientowaceje wyšeje šule (BOS) w Grodku přeproša.
Grodk (JoS/SN). Koronapandemije dla bě w měšćanskim žiwjenju kruće zakótwjene zarjadowanje dwójce wupadnyło. Kubłanišćo na Wirthowej w Grodku je jutře wot 9 do 13 hodź. k 20. razej z hosćićelom tejele bursy, kotruž hromadźe z agenturu za dźěło, Staroměšćanskej saněrowanskej towaršnosću (ASG) a tudyšimi měšćanskimi zawodami organizuje.
Dulig na fachowej rozmołwje pobył
Wobhospodarja z Choćebuza našli
Hamor (AK/SN). Choćebuska BAUTEC wobdźělenska towaršnosć zwr budźe wot 2023 campingowanišćo „Marina camping při Lejnjanskim jězoru“ wobhospodarić. To je zhromadźizna zaměroweho zwjazka Łužiska jězorina Sakskeje minjenu wutoru w Hamoru rozsudźiła. Intensiwnje běše so zaměrowy zwjazk wo wobhospodarja prócował, w lětušej sezonje je nadawk krótkodobnje sam přewzał. „Nětko běše pytanje za wobhospodarjom wuspěšne“, rjekny Daniel Just, jednaćel zaměroweho zwjazka. Docpěty wuslědk złoži so na tak mjenowanu proceduru po přizjewjenju zajima.
Po předležacym koncepće je załoženje objektneje towaršnosće předwidźane. BAUTEC areal znajmjeńša wot apryla hač do oktobra wotewrja. Na płoninje planuja dźesać do dwanaće prózdninskich domčkow z wulkosću 25 do 31 kwadratnych metrow, wosom stejnišćow za bydlenske mobile a wosom do dźesać městnow za stany. Prózdninske domčki nastupajo orientuje so firma na Kóšynskim prózdninskim parku. Po słowach jednaćela Justa ma zaměrowy zwjazk „koncept BAUTEC za plawsibelny“.
Přihotuja wosebite pječwo za wozrodźenje tradicije
Radworska zakładna a wyša šula, tamniša gmejna kaž tež pjekarjej chcedźa starodawny nałožk swjateje Borbory wožiwić a planuja spočatk decembra wosebite zarjadowanje.
Radwor (SN/BŠe). Poprawom wotměwaja so w Radworskej wjacezaměrowej hali Slavia kóždej dwě lěće hodowne wiki, kotrež tamniša wyša šula we wobłuku projektoweho tydźenja organizuje. Tam předawachu dotal předewšěm wudźěłki, zhotowjene wot šulerjow we wobłuku tydźenja. Tohorunja wužiwachu někotři rjemjeslnicy składnosć a tam swoje wudźěłki poskićachu. Koronapandemije dla pak njemóžachu minjene lěta zarjadowanje na dotalne wašnje přewjesć.
Angažuja so za regionalnych producentow
Towarstwo perspektiwa Hamor z. t. chce w regionje tworjene hódnoty zwyšić a jich direktne zwičnjenje zaměrnje sylnić. Jedyn tajki puć su prěnje přirodowe a regionalne wiki na Hamorskim přibrjohu Bjerwałdskeho jězora.
Hamor (AK/SN). Christine Zeidler, čłonka předsydstwa towarstwa Perspektiwa Hamor z. t., podšmórny sobotu na prěnich přirodowych a regionalnych wikach na Hamorskim přibrjohu Bjerwałdskeho jězora: „Regionalni wikowarjo trjebaja wjace móžnosćow, zo bychu swoje produkty předawali.“ 15 wikowarjow ze Zhorjelskeho a Budyskeho wokrjesa bě so na poskitku wobdźěliło. Woni su wopytowarjow z originelnej, luboznje přihotowanej snědanju witali. Zarjadowanje je start projekta „Přirodowe a regionalne wiki“ było. Zaměr je, kóždu třeću sobotu měsaca tajke wiki přewjesć. Nošny zaměr towarstwa je, wutworić małe wobchody, kotrež bychu wsy wožiwili a regionalnym wikowarjam šansu skićili, swoje produkty poskićeć a předawać.
