Nimo brunicy chce LEAG w milinarnjach mjez druhim z narunanskim paliwom energiju w regionje zaručić

Energijowy koncern inwestuje 13 milionow eurow do twara připra­wy za spalenje smjećow Ha­morskeje milinarnje. Tež w Janšojcach su tajke plany předwidźane.

Předewzaće Łužiska energija a milinarnje (LEAG) chce swoje Hamorske stejnišćo přichodne lěta dale wuwić. To rjekny nawoda tamnišeje milinarnje Carsten Marschner na njedawnym posedźenju Hamorskeje gmejnskeje rady w Krynhelčanskim kulturnym domje.

Hač do kónca lěta 2022 ma w Hamorje připrawa za spalenje smjećow nastać. Zhromadnje z brunicu maja so tam wotpowědne zbytki sobu spalić, kotrež w regionje nastawaja. Fachowy wuraz za nje je narunanske paliwo. Wotpadki so takrjec stoprocentnje wužiwaja, a wustork wuhlikoweho dioksida milinarnje so cyłkownje trochu pomjeńši. LEAG chce na stejnišću skutkownje k škitej přirody přinošować a za to cyłkownje 13 milionow eurow nałožić.

Wot měrca bědźi so tež łužiske hospodarstwo z wuskutkami koronapandemije. Na Čornopumpskim industrijnišću wšak tajke poprawom mjenowanjahódne njeběchu.

Čorna Pumpa (JoS/SN). Z wužadanjemi koronapandemije su na Čornopump­skim industrijnišću (ISP) dosć derje wobchadźeć móhli. Na wšědne wobchodnistwa a běžne projekty su so wosebite wobstejnosće mało wuskutkowali. Wobjim nadawkow je dale wulki ze stupacej tendencu. Jenož někotre projekty su so časowje trochu přesunyli, hewak zamóchu wšitke wobknježić. Spočatne ćeže w komunikaciji předewšěm ze zarjadami a předewzaćemi su přewinyli.

Homeoffice a karantena wšak stej wuradźowanjam z wosobinskej přitomnosću runje tak kaž terminam na městnje zadźěwałoj. Na cyłe lěto zhladujo pak zwěsćeja tež tu pozitiwne wuwiće. Hdźež wu­tworichu techniske wuměnjenja za widejowe a telefonowe konferency, móžachu sej wuradźowanske terminy na městnje často zalutować. Firmy a zarjadnišća buchu za procesy digitalizacije sensibilizowane. Wosebje srjedźostawske předewzaća běchu zajimowane so poradźować dać.

Budyšin (SN/at). W njewěstym času koronapandemije je to na spočatku adwenta pozitiwna powěsć: We wuchodnej Sakskej bě w nowembrje 17 756 bjezdźěłnych, 127 (0,7 procentow) mjenje hač w předměsacu, ale 1 662 (+10,3 procenty) wjace hač loni w nazymniku. Wo tym je Budyska wotnožka agentury za dźěło dźensa informowała. „Pytanje za dźěłowymi mocami tež w nowembrje swój čas traje. W dobje přiběraceho naprašowanja za fachowcami wudani so wid na ludźi ze zbrašenjom ćim bóle. Runje swojeho handicapa dla su tući husto nadpřerěznje motiwowani a derje kwalifikowani“, wabi Kathrin Groschwald, předsydka jednaćelstwa Budyskeje agentury za dźěło.

75,4 procenty ćežkozbrašenych, kotřiž su w Budyskim wobwodźe bjezdźěłnje přizjewjeni, maja wotzamknjene powołanske wukubłanje abo studij. Mjez wšitkimi bjezdźěłnymi ma 69,7 procentow powołanske wotzamknjenje.

Dźěłodawarskemu serwisej agentury w Budyšinje přizjewichu předewzaća w nowembrje 885 swobodnych dźěłowych městnow. To je 109 (-11 procentow) mjenje hač hišće w oktobrje.

Zły Komorow (AK/SN). Mjezypřesahowacy turistiski zwjazk Łužiska jězorina zasadźuje so dale za wjace bjezbarjernosće podłu jězorow regiona. „Ze sepju dźěłarničkow skedźbnjamy na móžnosće so bjez zadźěwkow na přibrjohach pohibować. Po přepytowanju štyrjoch modelowych jězorow chcemy nětko praktiske poručenja zajimcam pokazać“, zdźěli ­minjeny tydźeń nowinska rěčnica turistiskeho zwjazka Katja Wersch. Jako čłon dźěłoweho zjednoćenstwa „Lóšo pu­ćować – bjezbarjerne dowolowe cile w Němskej“ sadźa zwjazk tež na dowol w jězorinje. Hižo loni a tež lětsa su k tomu dźěłarnički přewjedli. Management za turizm a strowotne hospodarstwo braniborskeho marketinga (TMB) iniciatiwu łužiskeho zwjazka podpěruje.