Wulke wjeselo knježeše njedawno we Worklečanskej sportowni. Šulerjo zakładneje šule „Michał Hórnik“ dóstachu za koparski trening nowe bule.

Program němskeho koparskeho zwjazka DFB z mjenom „Šula a zjednoćenstwo“ přewjedźe so mjeztym hižo štwórty raz a měri so wosebje na zakładne šule. Z poskitkom ma so lóšt a wjeselo nad pohibom a sportowanju zbudźić. Nimo toho pak na tute wašnje tež lóši přistup do towarstwa­ zmóžnja. Zo bychu młodźi sportowcy prawje trenowali, podpěruje DFB kóždy projekt z trěbnymi materia­lijemi.

Jako kooperaciske towarstwo za projekt funguje znowa SJ Njebjelčicy, z ko­trejež so tež tójšto dźěći na cyłodnjowskim poskitku wobdźěla. Wosebje ličba aktiwnych sobustawow w dorosće je so minjene lěta konstantnje zwyšiła. Dalše dźěći, kotrež tež za bulom honja, hraja mjez druhim za SJ Chrósćicy, Sokoł Ralbicy Hórki abo so prosće tak za kopańcu horja.

Tak je to přidatny sportowy poskitk, na kotrymž móža młodźi koparjo z wjeselom swójske kmanosće dale skrućić a dalše nazhonjenja hromadźić.

Tadej Cyž

Po dobyću 2:0 (1:0, woboje wrota Jonas Hofmann) we wosmifinalu w krajnym pokalnym kole Braniborskeho koparskeho zwjazka FLB přećiwo Přezjednoće Oranienburg, płuwa mustwo FC Energije Choćebuz tež w třećej koparskej lize Němskeje dale na žołmje wuspěcha.

FC Energija Choćebuz –

HZ Unterhaching 2:0 (1:0)

Zestawa Energije: Bethke – Rorig, Campulka, Slamar, Bretschneider, Proničew (73. Juckel), Putze (73. Borgmann), Möker (90.+1 Hasse), Copado (46. Halbauer), Thiele, Krauß (83. Hofmann)

Hosćo běchu spočatnje derje na Choćebusku taktiku nastajeni. Tak prezentowaše hra najprjedy zasadnu wurunanosć, doniž njedocpě po nimale poł hodźinje Maksimilian Krauss z perfektnej třělwu z połlěweje pozicije nawjedowanje za FC Energiju. Jako poradźi so zaměnjenemu Philej Halbauerej spočatk duheho połčasa wótre zapodaće, bu Tim Hoops wot Timmyja Thiele w pjećmetrowskim rumje fairnje powaleny a bul ležeše nadobo w saku. Po tym měještaj Thiele a Maksimiliana Proničew dalše jara dobre šansy. Hóstny wrotar pak pokaza swoje kmanosće. Kónčny rezultat 2:0 wjedźeše nowačka po 16. hrajnym dnju wróćo na čoło 3. ligi.

Šesty raz wuhra so w sportowni Budyskeho Powołanskošulskeho centruma abicup přichodnych maturantow Sprjewineho města we wolejbulu. Dwanatkarjo Budyskeho Serbskeho gymnazija (SGB) dobychu znowa turněr z wosom startowacymi cyłkami. Jědnatkarjo wubědźichu sej 3. městno.

Minjenu srjedu powita hłowny organizator a sportowy wučer Budyskeho Powołanskošulskeho centruma Alf Müller šulerjow 11. do 13. lětnika Sprjewineho města do tamnišeje sportownje na tak mjenowany abi-cup. Wosom wolejbulowych cyłkow, wobstejacych z dweju holcow a štyrjoch hólcow, wojowaše šesty raz wo dobyće pućowanskeho pokala. Dotal běchu abiturienća SGB trójce wuspěšni, a to w lěće 2018 z kapitanom Dawidom­ Wowčerjom, w lěće 2019 z kapitanom Jakubom Bobku a w lěće 2023 z najlěpšim hrajerjom turněra Eliasom Kummerom.

Tónraz juskachu znowa přichodni maturanća serbskeho kubłanišća wokoło sylneho nadběhowarja Benedikta Šołty. Woni přesadźichu so w finalu přećiwo dobyćerjej lěta 2022 Melanchthonoweho gymnazija 2:0.

EC Bad Nauheim –

Łužiske lodohokej liški 4:3

(1:2, 2:0, 0:1, 1:0) p.p.

Prěnje składnosće přez Alexandera Doscha a Louisa Andersa parěrowaše wrotar domjacych Jerry Kuhn hišće bjez ćežow, wón pak bě při třělwje Lane Scheidla bjezmócny, 0:1 (5.). Dołho njetraješe prjed hač ECN wurunanje přez Taylora Vause docpě (12.). Po tym so dołho ničo njesta, doniž Liški krótko do přestawki wulki zmylk Bad Nauheima njepochłostachu: Scheidl přetwori lesćiwje k zasłuženemu 2:1 (19.).

W srjedźnym wotrězku mytowaše Julian Lautenschlager hosćićelow za trajny ćišć a přetwori čorny puk pod łatu k wurunanju (27.). Na kóncu druheho wotrězka přińdźechu hosćo z Łužicy tež zaso wróćo do hry, ale 100 sekundow do druheje přestawki dyrbješe Eric Valentin foula dla na chłostansku ławku, štož Čerty hnydom k 3:2 wužiwachu.

Krótko do kónca bu hišće raz kuriozne. Po dołhim čakanju wuprajichu sudnicy po widejowym dopokazu chłostanje přećiwo Mariusej Erkej. Na to wzachu Łužičenjo wrotarja z lodu a běchu z hrajerjomaj wjac na polu (59.). To so tež wupłaći, dwanaće sekundow do kónca docpě Jérémy Beaudry wurunanje (60.), tak zo dyrbješe so partija w podlěšenju rozsudźić.