Hory/Wojerecy (MaKr/SN). Šulske lěto po wosebitym wašnju wuklinčeć dać móžachu minjenu sobotu wobdźělnicy serbskich rěčnych kursow. Marija Beuttenmüllerowa a Marek Krawc, zamołwitaj za kubłanje dorosćenych w Rěčnym centrumje WITAJ, běštaj swojich kursistow do srjedźneje Łužicy na swjedźeń serbšćinarjow přeprosyłoj.
Cyłodnjowski swjedźenski program zahajištaj dopołdnja małaj lutkaj z Horjanskeje pěstowarnje. Z hrónčkom w serbskej rěči a čerstwym chlěbom zbudźištaj zajim wuknjacych za serbske powěsće. W bjezposrědnjej bliskosći hórki, w kotrejž lutki pječa w starodawnych časach bydlachu, su šulerjo serbske sady do rěče tutych małych ludźi přełožili. Wužitne gramatiske zwučowanje to, lutki mjenujcy nimale wšitke sadowe dźěle negěrowachu ...
Worklecy (JK/SN). Bóle spokojom a zdobom hordźi šulerjo na sebje być njemóža, hač to wčera wječor we Worklečanskej sportowej hali šulerjo tamnišeje wyšeje šule „Michał Hórnik“ běchu. Prezentowachu mjenujcy w bohatej ličbje přichwatanym staršim, přećelam a wučerjam swoju samospisanu knihu „Sće hižo wědźeli ...“, wušłu w Ludowym nakładnistwje Domowina.
Wot lětušeho januara su wosebje šulerjo 6. lětnika, přewodźane wot wučerjow serbšćiny Worklečanskeje wyšeje šule, napisali wulkotne teksty. K tomu su hižo znate powěsće abo legendy jako zakład wzali a ze swójskimi słowami zasopowědali, štož je so jim na zajimawe wašnje jara derje poradźiło. Čitajo wujimki přeswědčichu připosłucharjow wo tym, zo mějachu wulke wjeselo při pisanju. Prócu a pilnosć, ale tež zaměrnosć šulerjow hódnoćeštaj jednaćel nakładnistwa Syman Pětr Cyž runje tak kaž lektorka Weronika Žurowa. Wobaj wuzběhnyštaj zdobom angažement šulerjow, kotřiž běchu na nastaću knihi wobdźěleni. Šulerjo dźě njeběchu jenož teksty napisali, ale tež ilustracije zhotowili, kajkež tež z wosebitej přehladku pokazachu.
Hdyž młodostni z wulkeho poskitka najlěpše knihi wubjeru, potom wotměje so po cyłej Sakskej knižne lěćo. Budyska dźěćaca a młodźinska biblioteka bě lětsa z wosebitym nadawkom na po-dawku wobdźělena.
Budyšin (SN/MiR). 18 młodostnych je so na dobro wšitkich, kotřiž rady čitaja, zaběrało ze 47 knihami. To rěka: młodostni su wot lońšeho oktobra hač do lětušeho měrca wudaća přečitali, kotrež su wšelke němskorěčne nakładnistwa, kiž młodźinsku literaturu wudawaja, Budyskej dźěćacej a młodźinskej bibliotece přewostajili. Potom su po swojim słodźe dźesać najlěpšich nowowudaćow wubrali, kotrež běchu loni nazymu abo lětsa w nalěću wuchadźeli.
Jedyn wjeršk po druhim wotměwa so w Serbach tuchwilu na česć Korle Awgusta Kocora a Handrija Zejlerja. Wužitk z nich maja wšitke generacije, młódša dožiwi tajke zarjadowanje tón tydźeń we Wojerecach.
Wojerecy (SN/MiR). Štyri dny knježeše na zahrodźe doma Domowiny we Wojerecach čiłe žiwjenje. Wot wutory hač do pjatka přebywaše tam něhdźe 220 šulerjow 4. lětnika ze serbskich a serbšćinu wuwučowacych zakładnych šulow. Dźěći běchu přijěli z Budyšina, Chrósćic, Pančic-Kukowa, Worklec, Ralbic, Radworja, Kulowa, Wojerec a ze Slepoho, zo bychu so ze serbskimaj wótčincomaj pod hesłom „Zetkanje ze Zejlerjom a z Kocorom“ zaběrali. Zhromadny projekt Wojerowskeje župy „Handrij Zejler“ a Budyskeho Rěčneho centruma WITAJ (RCW) bě dobył we wobłuku wubědźowanja SIMUL pjenježne myto. Projektne dny su wobstatk „Lěta Zejlerja a Kocora“, dopominace na 150. posmjertniny basnika Handrija Zejlerja a 200. narodniny komponista Korle Awgusta Kocora.
Čorny Chołmc (MBc/SN/bn). Prěni „Krabaoke“ je minjenu sobotu něhdźe 30 zajimcow – mjez nimi samo spontani hosćo, kaž cyle čerstwje zmandźelenaj a někotryžkuli wandrowski – ke Krabatowemu młynej w Čornym Chołmcu přiwabił. Zhromadnje spěwachu najwšelakoriše spěwy, kaž na přikład „Wjasele źinsa“ we wersiji skupiny Die Folksamen, předewšěm pak hity w hornjo- a delnjoserbskim přełožku, mjez druhim „Mama mója“ (ABBA) a „Pśez ten monsun“ (Tokio Hotel).
Wotpowědne brošurki z tekstami kaž tež cedle z QR-kodom z linkom na nje běštej zarjadowarjej, towarstwo Krabatowy młyn a Choćebuski Kolektiw Wakuum, spřihotowałoj a wupołožiłoj. Nalada bě po jich podaću „wulkotna“. Wosebity karaoke bě projekt idejoweho wubědźowanja „Rěc zwjazuje“ Załožby za serbski lud. Tomule titulej wotpowědowachu tež wupójšane plakaty z „wažnymi wokablemi a wobrotami“ w serbšćinomaj a němčinje, kaž na přikład „Chceš ze mnu rejować?“ a „Chceš jenož hišće ze mnu rejować?“