Šula za delnjoserbsku rěč a kulturu w Choćebuzu je minjeny kónc ...
Wutworja dźiwadłowu skupinu
Skupina zajimčow je poskitk Serbskeho šulskeho towarstwa (SŠT) pod hesłom „Knihi a klankodźiwadło“ knihowała. Dalekubłanje w Serbskim kubłanskim srjedźišću LIPA w Smjerdźacej běše přewšo intensiwne dožiwjenje.
Najlěpšej čitarce z Kašec a Njebjelčic
Předstaji wuslědki
Budyšin (SN). Dr. Cordula Ratajczakowa, nawodnica rěčespyta w projekće ZARI – syće za serbsku rěč a regionalnu identitu, je so we wobłuku swojeho slědźenja mjez druhim z 30 wosobami ze serbskeje Hornjeje Łužicy rozmołwjała, kotřiž serbšćinu w swójbje hižo nawuknyli njejsu. Rozmołwy je wona hromadźe z koleginu prof. dr. Nicole Dołowy-Rybińskej wuhódnoćiła a po wosebitym mustrje koděrowała. Nětko předstaji wuslědki prěni raz zjawnosći. We wobłuku pućowanskeje wustajeńcy Mjeńšinoweho sekretariata w Berlinje pod hesłom „Što rěka tu mjeńšina?“ přeprošuje Budyski Serbski muzej přichodny tydźeń srjedu, 16. apryla, w 19 hodź. na přednošk wědomostnicy.
Pod titulom „Wot bolostneho woněmjenja k ćežkemu wróćenju serbšćiny. Dohlad do rěčnych biografijow z ewangelskeje Hornjeje Łužicy“ wobswětla dr. Cordula Ratajczakowa wosobinske nazhonjenja a dožiwjenja ludźi, kotrež su womjelknjenju serbskeje rěče w swójbje přinošowali. Hańba, strachi abo zranjenja hrajachu při tym hustohdy wažnu rólu. Tež wo pućach a móžnosćach wozrodźenja serbšćiny chce slědźerka rozprawjeć.
Nowe towarstwo chce šuli a swójbam poboku być
Pančicy-Kukow. Dohromady 24 akterow su minjeny štwórtk spěchowanske towarstwo Serbskeje zakładneje šule „Šula Ćišinskeho“ Pančicy-Kukow załožili. Za prěnjeho předsydu sobustawojo Svena Schrötera wuzwolichu. Dalši čłonojo předsydstwa su Lorenc Jankowsky (městopředsyda), Stephan Zarjeńk (pokładnik), Stephanie Domašcyna (zapisowarka), Aleksander Kozak (zastupnistwo šulskeho wjednistwa), kaž tež Christoph Knobloch a Weronika Wawrichowa (přisydnikaj). Zaměr čłonow je stworjenje ramikowych wuměnjenjow, kotrež lóšt za wuknjenje spěchuja. To su mjez druhim wuknjenske dźěłarnje, biblioteka abo kreatiwitu a fantaziju spěchowace wuhotowanje sćěnow. Při zwoprawdźenju zapřija dźěći. Na druhej stronje budu swójby a dźěći podpěrać, kotřiž sami wšitko financować njemóža abo wosebite wuknjenske materialije trjebaja. Štóž ma zajim, so towarstwu přizamknyć, njech so w šuli přizjewi abo z mejlku na foerderverein.panschwitz.kuckau@ gmail.com wobroći.
Na ekskursiji w Krakowje byli
Wědomostne temy tři dny w srjedźišću stali
Worklecy (SN/MiR). Šulerjo a šulerki Worklečanskeje wyšeje šule „Michał Hórnik“ zaběraja so wot póndźele hač do dźensa intensiwnje ze wědomostnymi temami. Třidnjowski šulski projekt pod hesłom „72H wědomosć“ zapřija wšitkich na šuli wuknjacych a wuwučowacych. Před dwěmaj lětomaj běše tema „Wšitko digitalne“. Loni bě lěto Michała Hórnika a šulerjo wěnowachu so jeho žiwjenju, wosebje pak jeho skutkowanju hač do dźensnišeho časa. Tradiciju lětsa dale wjedu, tež hdyž jich twarske dźěła přidatnje wužadaja. W srjedźišću steja MINT-předmjety, matematika, informatika, přirodowěda a technika. Šulerki a šulerjo su sej sami 15 hodźinow wopřijacy plan z poskitka zestajili. „Wuwichu samo swójski projekt. Za wšitko su wulku samostatnosć trjebali“, rjekny šulska nawodnica Diana Šołćina. Prěni narok projekta běše wobjednawanje wědomosće w serbskim konteksće. „Cyle so to poradźiło njeje“, tak Šołćina, „mamy drje serbskich referentow, kaž Hrjehorja Marka z Drježdźanskeje techniskeje uniwersity, kiž so wo projekty w serbskich šulach prócuje, a ratarja Romana Wjeselu.
Tež šulerjo z Ralbic a Worklec mjez wobdźělnikami
Wojerecy (SN/tb). Serbscy šulerjo ze serbskeju wyšeju šulow z Ralbic a Worklec su so wčera na wubědźowanju w předmjeće hospodarstwo, technika a domjacnosć we Wojerecach wobdźělili. 12 šulerjow je so tam mjez sobu měriło. Wobdźěleni šulerjo mějachu składnosć, pod wubědźowanskimi wuměnjenjemi nazhonjenja zběrać. Tole jich kaž tež wučerjow motiwuje, so sylnišo z wobsahami techniskeho a hospodarskeho kubłanja rozestajeć.
Wubědźowanje wobsteješe z teoretiskeho a praktiskeho dźěla. Na kóncu předstajichu produkt před jury. Prěni třo šulerjo ze šulow, za kotrež je Budyski zarjad za šulu a kubłanje (LaSuB) zamołwity, smědźa so na regionalnym wurisanju w Drježdźanach wobdźělić. Třeće městno wudoby sej Sulšečan Cornelius Korch z Ralbičanskeje wyšeje šule. 21. meje smě so wón na krajnym wubědźowanju wobdźělić. Jemu wjele zboža a wuspěcha!
Šulerki a šulerjo 8. lětnika Delnjoserbskeho gymnazija z Choćebuza ...
Ze šulskeje ławki do rozhłosa
Budyšin (SN). „Moja hłowa“ a „Wuši smój“ rěkatej spěwaj, kotrejž je 19 hólcow a holcow 4. lětnika zakładneje šule Ćišinskeho z Pančic-Kukowa loni krótko do hód w Budyskim studiju MDR serbskeho rozhłosa nahrawało. Dołho je trało, doniž njeje hudźbny producent Měrćin Weclich w nadawku MDR z hudźbnym redaktorom Handrijom Špitankom a aranžerom kaž tež nahrawanskim nawodu Friedrichom Steinke z Berlina projekt zakónčił. Wotnětka stej spěwaj mjez druhim na internetnej stronje serbskeho radija přistupnej a hodźitej so tam nimo mnohich druhich štučkow darmotnje na šmóratko přenjesć.
Hudźbny projekt šule Ćišinskeho z rozhłosowym sćelakom MDR je bjez dwěla něšto wosebiteho. Cyła rjadownja jednoho lětnika kubłanišća je so z busom do Budyšina podała, zo by tam w rozhłosowym studiju spěwaj nahrawa. Projekt zmištrowachu w běhu jenož jednoho tydźenja. To bě mjenujcy tydźeń do patoržicy.
