Čuješe so za nós wodźena
Miłoćicy (SN/JaW). Křesćansko-socialny kubłanski skutk (CSB) je w minjenych pjeć lětach 90 kubłarkow a kubłarjow přistajił. Z nich bě 23 Serbow. To zdźěli rěčnik CSB Maik Brězan na naprašowanje. Narěčany na wjacore změny personala w běhu krótkeho časa wón zwurazni, zo we wjetšinje zarjadnišćow CSB personal hižo mnohe lěta dźěła. „Minjene lěta smy wjacore wjednicy na wuměnk rozžohnowali a městna znowa wobsadźili.“
Tuchwilu maja w 15 zarjadnišćach CSB dosć kubłarkow a kubłarjow. Personalne změny pak mějachu předewšěm w Njebjelčicach, kaž SN z wjacorych žórłow zhonichu. Wjeršk je, zo derje wukubłana młoda serbska kubłarka hižo w Njebjelčanskej pěstowarni „Jan Skala – Barbojte kamuški“ njedźěła, štož mjez staršimi wulke zadźiwanje a zdźěla hněw zbudźi. Zo wjac za CSB njedźěła, je nam kubłarka wobkrućiła. CSB so škita datow a wosobow dla njewupraji. Tež wo tym, čehodla su derje wukubłanu serbsku pěstowarku hić dali, CSB mjelči.
Fairni wostać!
Ličby šulerjow za serbske šule su nětko jasne
Budyšin (SN/MiR). Ze 4 401 zakładnych šulerjow w Budyskim a Zhorjelskim wokrjesu, kotřiž tuchwilu hišće 4. lětnik wopytuja, je dóstało lětsa 2 157 – štož wučinja 49 procentow – kubłanske doporučenje za gymnazij. 2 227 hólcow a holcow – štož je 50,6 procentow – móže wot noweho šulskeho lěta wopytać wyšu šulu. Loni bě 41,4 procenty dóstało kubłanske doporučenje za gymnazij a 58,2 procentaj te za wyšu šulu. Z tym zhladuje Budyska wotnožka Sakskeho krajneho zarjada za šule a kubłanje (LaSuB) na stupacu ličbu dźěći, kotřiž móža wot 5. lětnika wopytać gymnazij. Kelko procentow wučinja to na jednotliwu šulu, w kotrejž wuknu zakładni šulerjo serbsku rěč, njemóže zarjad na naprašowanje SN wotmołwić.
Wuchowarjo serbšćiny pilnje naprojekće dźěłaja
Slepjanska šula loni hłowne myto sakskeho idejoweho wubědźowanja fondsa „Čiń sobu!“ dobyła
Runje před lětom bě šulski nawoda Slepjanskeje wyšeje šule „Dr. Marja Grólmusec“ Jan Hrjehor zhromadny šulerski a wučerski projekt za sakske idejowe wubědźowanje fondsa „Čiń sobu!“ zapodał, a to w kategoriji Łužiski rewěr. Tam požadachu so šulerjo a wučerjo z projektowym titulom „Nalěpił a čitał – słyšał a nawuknył / Serbšćinu wuknyć ze zwukowymi nalěpkami“. Loni w juniju dósta nawoda kubłanišća wot sakskeho ministerskeho prezidenta Michaela Kretschmera dobyćerske wopismo přepodate, kotrež wisa nětko při zachodźe do šule. Projekt ze zwukowymi nalěpkami bě hłowne myto dobył. Wo aktualnym stawje zwoprawdźenja projektoweje ideje dźensa rozprawjamy.
Nowa wučbnica
Hudźbna šula tež online wuspěšna
Wojerecy (SN). Jónu wob lěto wotměwace so wubědźowanje „Młodźina hudźi“ je aktualneho połoženja pandemije dla tónkróć digitalne a na tři kóncy tydźenja rozrjadowane. Wojerowska hudźbna šula je tójšto zmóžniła, zo by swojich šulerjow podpěrała a na wurisanje wotpowědnje přihotowała. Zo je so próca wudaniła, pokazuja wuslědki. Prěni kónc tydźenja je so w starobnej klasy hač do 14 lět Gustav Noack w kategoriji fagot wuspěšnje přesadźił. Jury bě zahorjena a rozsudźi, zo jeho dale na zwjazkowe wubědźowanje pósćele. Tež najmłódša Wojerowska hudźbna šulerka Greta Herold měješe wšu přičinu so wjeselić. W kategoriji blokowa pišćałka starobneje klasy hač do wosom lět je so wona z wulkim wuspěchom wobdźěliła.
„Hladajo na wobćežnosće su wukony jara dobre. Pokazujemy, zo ma tež digitalna wučba swoju kwalitu“, měni nawoda Wojerowskeje hudźbneje šule Klaus Peter Haselbauer. Tónle kónc tydźenja z wubědźowanjom pokročujemy, a to maja spěwne talenty swoje kmanosće dopokazać. Tež tu su hudźbni šulerjo hižo jara wćipni na wuslědki.
Wobstajny zwisk wažny
Stajnje njekomplikowana a njesebična była
Worklecy (jb/SN). Na Serbskej zakładnej šuli „Michał Hórnik“ we Worklecach rozžohnowachu njedawno wjelelětnu wučerku Gabrielu Roblowu na wuměnk. Po studiju na Budyskim Serbskim wučerskim instituće wuwučowaše Serbskopazličanka najprjedy w Kamjencu, doniž njenastupi wučerske městno 1983 we Worklecach. Tam bě hač donětka zasadźena, byrnjež jendźelšćiny dla – předmjet, kotryž je sej přidatnje přiswojiła – stajnje zaso w druhich šulach wupomhać dyrbjała. Tak bě mjez druhim do Ralbic, Budyšina, Chrósćic a Pančic-Kukowa „delegowana“, zo by tamnišim šulerkam a šulerjam swětowu rěč spřistupniła.
Bydyski serbski hort je pódla była wo durje Wanje kłapał
Swoju knihu spisać a ju na kóncu hišće w rukomaj dźeržeć – to je so dźěćom poradźiło, kotrež chodźa do horta Serbskeje zakładneje šule Budyšin w nošerstwje wokrjesa. Zhromadnje z kubłarjom Pětrom Sćapanom su cyły tydźeń na njej dźěłali.
Budyšin (SN/MiR). Na kóncu njeje zhromadna kniha wšitkich wobdźělnikow nastała. Ně, kóždy z nich dźeržeše swójski wudźěłk w rukomaj. Zmóžnił bě to projekt Budyskeje měšćanskeje biblioteki. Zhromadnje ze Sebastianom Hänelom (Buchkinder Görlitz) su šulerjo na drohoćince dźěłali. „Naš hort stajnje w prózdninach z měšćanskej biblioteku hromadźe dźěła“, kubłar horta na Serbskej zakładnej šuli Budyšin Pětr Sćapan rozprawja, „lětsa pak njeběchmy na městnje, ale wobdźělichmy so na zarjadowanju online, štož bě za nas absolutna nowosć.“ Přeprosyła bě jich sobudźěłaćerka biblioteki Kristin Lehmann.
Za syć młodźinskich klubow
Mjeztym šěsć tydźenjow Virginia Hanuzowa w zarjedźe Domowiny dźěła. Jako kubłanska referentka za młodźinu ma wona wulce wabjacy nadawk. Z Miłoćic pochadźaca 33lětna mać dweju dźěsći je w přewažnje němskej swójbje wotrostła, rěči pak serbsce. Wuchodźiwši Worklečansku zakładnu šulu „Michał Hórnik“, a po tym zo je něšto lět na Serbskim gymnaziju Budyšin wuknyła, maturowaše wona na Kamjenskim Lessingowym gymnaziju. Pobywši aupair na kupomaj Korsika a Madagaskar, je w durinskim Nordhausenje socialne dźěło studowała. „Dlěši čas sym z Wěteńcy, hdźež ze swójbu bydlu, do zapada na dźěło jězdźiła. Z mandźelskim smój sej to zarjadowałoj“, wona powěda. „Jako pak so Marko Kowar loni prašeše, hač nochcyła so za městno požadać, njejsym dołho rozmyslowała. Poskitk bě po mojim słodźe. Wšako chcych po dlěšim času z małymi dźěćimi zaso z młodźinu dźěłać.“
