Krótkopowěsće (13.04.21)
Křižerjo bjez pozitiwneho testa
Budyšin. Wšitcy po hygienowym koncepće po jutrach testowani křižerjo běchu negatiwni, informowaše wčera Budyski krajnoradny zarjad. Zdobom poda ličbu 48 nowonatyknjenjow z koronawirusom kaž tež 136 za sobotu a 160 za předwčerawšim. Po RKI wučinja incidenca dźensa 241,9. Zhorjelski wokrjes rozprawješe wčera wo štyrjoch infekcijach, aktualna incidenca po RKI je tam 193,1.
Wojerecy zahaja hudźbne lěćo
Drježdźany. Po wothłosowanju připosłucharstwa je rozhłosowy sćelak MDR wčera připowědźił, zo zahaji 30. hudźbne lěćo lětsa we Wojerecach. Koncert pod hołym njebjom planuje 19. junija na tamnišim Łužiskim naměsće. Wjace hač 22 000 ludźi je so na naprašowanju wobdźěliło. Za Wojerecy wupraji so něhdźe 37 procentow z nich.
Tank a kanonu wotedał
Krótkopowěsće (12.04.21)
Incidenca hranicu 200 překročiła
Budyšin. Z incidencu 233,2 zwěsći Roberta Kochowy institut dźensa za Budyski wokrjes nahladny postup natyknjenjow z koronawirusom. Dokelž su w strowotniskim zarjedźe kónc tydźenja nowu software instalowali, hakle jutře najnowše ličby wozjewja. W Zhorjelskim wokrjesu informowachu wčera wo 80 natyknjenjach a dwěmaj smjertnymaj padomaj. Po RKI wučinja tamniša incidenca dźensa 198,2.
Předpředań zahajili
Zły Komorow. Nowe jewišćo w Złym Komorowje je wčera předpředań za lětnju sezonu w Kóšynskim amfiteatrje při Złokomorowskim jězorje zahajiło. Mjez 70 zarjadowanjemi su tři swójske nowoprodukcije planowane. Koronapandemije dla předawaja tuchwilu jenož 50 zastupnych lisćikow na jednotliwe předstajenje. Poskitk pak chcedźa přichodnym předpisam přiměrić.
Dźensa koncert Caroliny Eyckec
Krótkopowěsće (09.04.21)
Społnomócnjeny za digitalizaciju
Budyšin. Daniel Zoba je nowy społnomócnjeny za digitalizaciju při Załožbje za serbski lud, zdźěli dźensa załožbowy direktor Jan Budar. 45lětny Bukečan nastupi městno 1. julija. Jedyn z jeho nadawkow budźe naprawy digitalizaciskeho koncepta, kiž je w zamołwitosći swobodneho poradźowarja Měrka Šenka nastał, zwoprawdźić. Za čas studija je so Zoba ze spóznawanjom serbskeje rěče zaběrał.
Dalši smjertny pad
Budyšin/Zhorjelc. RKI je za Budyski wokrjes aktualnje 203 nowoinfekcijow z koronawirusom a incidencu 131,1 podał. Dalši pacient w starobje 86 lět je zemrěł. Wot spočatka pandemije zwěsća tu dohromady 807 smjertnych padow. W Zhorjelskim wokrjesu je 139 nowych inficěrowanych, incidenca minjenych sydom dnjow je 136.
Njewobdźěla so na Folkloriadźe
Krótkopowěsće (08.04.21)
Incidenca woteběra
Budyšin. Po aktualnym podaću RKI je incidenca korony w Budyskim wokrjesu na 97,7 spadła. Wčera su tu 39 nowoinfekcijow zwěsćili, dohromady je 893 inficěrowanych ludźi. Mjeztym je nimale 14 000 ludźi dwójce šćěpjene. W Zhorjelskim wokrjesu je aktualna incidenca 118,3. Wot 122 nowych inficěrowanych je tam wosom dźěći. Dalša wosoba w starobje 91 lět je zemrěła. Wjace hač 17 000 ludźi je kompletnje šćěpjene.
Nowe Płomjo je online
Budyšin. Aprylske wudaće dźěćaceho časopisa „Płomjo“ je wot wčerawšeho online, zdźěla redaktor Pětr Šołta. Na stronach Rěčneho centruma WITAJ pod www.witaj-sprachzentrum.de čitaja zajimcy mjez druhim wo mumijach, wo prawobydlerjach Ameriki a wo kajkosćach čłowjekow. Dalšej temje stej twórba swětoweje literatury „Mały princ“ a kak su Indianojo w Americe dźensa žiwi.
Wubědźowanja přestorčene
Krótkopowěsće (07.04.21)
Tež domjacy lěkarjo šćěpja
Drježdźany. Wot dźensnišeho móža tež domjacy lěkarjo w Sakskej pacientow přećiwo koronawirusej šćěpić. Praksy dóstanu šćěpiwo přez wulkowikowanje a apoteki. Po wobzamknjenju ministerskich prezidentow přewostaja kóždej praksy najprjedy raz pobrachowaceho dodawanja dla něhdźe 20 šćěpjenskich dozow na tydźeń.
Incidenca trochu niša
Budyšin/Zhorjelc. W Budyskim wokrjesu su wčera 19 nowoinfekcijow z koronawirusom zwěsćili, 32 pacientow je so wustrowiło. Po informacijach RKI je incidenca dźensa na 125,8 spadnyła. W Zhorjelskim wokrjesu je 18 nowych inficěrowanych, mjez nimi jedne dźěćo. Incidenca leži tu ze 97,7 samo snadnje pod sto. W chorownjach lěkuja aktualnje 106 ludźi, z nich 21 na intensiwnej staciji.
Jutrowne spěwanje wožiwili
Krótkopowěsće (06.04.21)
Nimale tysac ludźi inficěrowanych
Budyšin. Dohromady 358 nowoinfekcijow z koronawirusom su wot zeleneho štwórtka hač do wčerawšeho w Budyskim wokrjesu zwěsćili. 994 wosobow je tuchwilu inficěrowanych. 65 pacientow lěkuja w chorownjach, z toho 16 na intensiwnej staciji. Ličba smjertnych padow powjetši so na 806. RKI je tu dźensa incidencu 166,1 podał, za Zhorjelski wokrjes 132,2.
Płoniny za fotowoltaik pytane
Podstupim. Zaměr, do lěta 2030 něhdźe 3 500 megawattow z pomocu solarnych připrawow produkować, je Braniborska z nimale 38 900 připrawami hižo docpěła. Z instalowanym wukonom 3 700 megawattow móža milion domjacnosćow jedne lěto z milinu zastarać. Nětko pytaja nowe płoniny za dalše solarne připrawy. Rozmysluja, łužiske jězory z brunicowych jamow za płuwace připrawy wužiwać.
Linguist wohroženu rěč škita
Krótkopowěsće (01.04.21)
Serbske gmejny njejsu ćežišćo
Budyšin. Incidencna hódnota w Budyskim wokrjesu je znowa zwyšena. Po wozjewjenju RKI wučinja wona 155,5. Wčera zličichu 157 dalšich natyknjenjow, jedna wosoba je zemrěła. W serbskich a dwurěčnych gmejnach je mało infekcijow. Zwjetša maja tam pod dźesać pozitiwnymi padami – Worklecy, Njebjelčicy a Pančicy-Kukow samo wjacore dny za sobu scyła žadyn. W Zhorjelskim wokrjesu zličichu wčera 105 nowoinfekcijow, incidencu podawa RKI ze 183,2.
Portugal klětu hóstny kraj wikow
Lipsk. Wotprajenja Lipšćanskich wikow 2021 dla přestorča za lětsa planowany wustup hóstneho kraja Portugala na klětu. We wobłuku zarjadowanja „Lipsk čita ekstra“ wot 27. do 30. meje prezentuje so Portugal hižo z digitalnymi a analognymi zarjadowanjemi. Lětsa wuńdźe něhdźe 50 knihow z Portugala a portugizišćinu rěčacych krajow w němskej rěči.
Přihotuje modelowe projekty
Krótkopowěsće (31.03.21)
Incidenca trochu woteběrała
Budyšin. Wot jutřišeho płaći w Sakskej nowe škitne postajenje koronawirusa dla, přistupne pod . W Budyskim wokrjesu rozprawjachu wčera wo sydom dalšich natyknjenjach, ličba smjertnych padow powjetši so wo dwaj na 801. RKI je dźensa incidencu 135,1 podał. W Zhorjelskim wokrjesu běchu wčera 103 nowoinfekcije, incidenca po RKI je tam dźensa 170,9.
Dźěłowe wiki zaso wožiwjeja
Budyšin. We wuchodnej Sakskej bě w měrcu 19 582 bjezdźěłnych, 251 mjenje hač měsac do toho. Kaž Budyska wotnožka agentury za dźěło dźensa informuje, je wjace wosobow swoju bjezdźěłnosć zakónčiło a nowe dźěło nastupiło. To zwisuje ze sezonalnym wožiwjenjom dźěłowych wikow. 4 731 socialneho zawěsćenja winowatostnych dźěłowych městnow je k dispoziciji.
Zwisk zasadnje polěpšić
Krótkopowěsće (30.03.21)
Ličba schorjenych dale stupa
Budyšin. Budyski wokrjes je wčera wo 36 dalšich natyknjenjach z koronawirusom rozprawjał. Ličba schorjenych rozrosće wo 28 na 860, z kotrychž 37 stacionarnje lěkuja. Incidenca minjenych sydom dnjow na 100 000 wobydlerjow bě dźensa rano po RKI 168,8. Dalše testowanske centrumy su dźěłać započeli, tak w Budyšinje a Kulowje. W Zhorjelskim wokrjesu bě wčera jedna nowoinfekcija. Po RKI je incidenca dźensa 174,9.
Dale stacionarne kontrole
Berlin. Němska w koronakrizy zawjedźene stacionarne kontrole na mjezy k Čěskej republice wo dalšej dwě njedźeli podlěši. Wo tym je zwjazkowy minister nutřkowneho Horst Seehofer (CDU) dźensa w Berlinje informował. Kontrole k awstriskemu zwjazkowemu krajej Tirolej porno tomu dlěje njewobsteja.
Morawscy narodowcy aktiwni
Krótkopowěsće (29.03.21)
Wot jutřišeho wolóženja cofnu
Budyšin. Wokrjes Budyšin wot jutřišeho wolóženja pod wuměnjenjemi koronapandemije zaso cofnje. Wšako bě minjena sobota třeći dźeń za sobu, hdźež bě incidenca wokrjesa po RKI hódnotu sto překročiła. Sakske škitne postajenje korony dla krok předpisuje. Přez kónc tydźenja zwěsćichu tu 299 nowych infekcijow a dwaj smjertnej padaj. RKI mjenowaše dźensa rano incidencu 185,5.
Za a přećiwo MSPI
Kiel/Podstupim. Hinak hač Braniborski krajny sejm je parlament Schleswigsko-Holsteinskeje pjatk wobzamknył wobydlersku iniciatiwu Minority SafePack (MSPI) dale podpěrać. Wjetšina wšitkich frakcijow bě za to hłosowała. Srjedu bě so w braniborskim sejmje dwanaće zapósłancow za podpěru MSPI wuprajiło, 53 přećiwo tomu – mjez nimi ministerski prezident Dietmar Woidke –, jedna zapósłanča so hłosa wzda.
Čas a městnosć kongresa jasnej
