Krótkopowěsće (25.03.25)
Wjac ćahow do stolicy
Budyšin. Wot spočatka apryla pojědźe na kóncach tydźenja wjace ćahow z Budyšina směr Drježdźany. Sobotu zasadźa jedyn přidatny, njedźelu samo štyri dalše ćahi. Tak zaruča zaměrowy zwjazk ZVON, zo kóždu hodźinu spěšny ćah do Biskopic a wottam dale do Drježdźan jědźe. Jězba wšak budźe dróša, dokelž zwjazk VVO płaćizny jězdźenkow wot 1. apryla wo něhdźe 6,9 procentow powyši.
Ze Zhorjelca do Würzburga
Zhorjelc. Dr. Daniel Morgenroth, intendant Gerharta Hauptmannoweho dźiwadła Zhorjelc-Žitawa, so „z wosobinskich přičin“ po štyrjoch lětach z Łužicu rozžohnuje. Po wčera wozjewjenej zdźělence nastupi Morgenroth wot hrajneje doby 2026/2027 intendantstwo dźiwadła Mainfranken we Würzburgu. Wotpowědny rozsud bě tamniša měšćanska rada hižo minjeny štwórtk wobkrućiła.
LEAG w čěskich rukach
Krótkopowěsće (24.03.25)
Literarnu dźěłarničku přewjedłoj
Budyšin. Lubina a Dušan Hajduk-Veljkovićec staj znowa literarnu dźěłarničku w nošerstwje Załožby za serbski lud zarjadowałoj. Ćežišćo dźěłarnički w Budyskim Serbskim domje bě literarne přełožowanje. Pjeć zajimcow je so wobdźěliło. Woni běchu někotre wotrězki dźěćaceje knihi „Kuzłarska kula“ Steffena Gemmela z němčiny do hornjoserbšćiny přełožili. Na zakładźe rěčneje a stilistiskeje analyzy přełožki diskutowachu.
Dawidowski do Mišna
Chrósćicy. Drježdźansko-Mišnjanski biskop Heinrich Timmerevers je Chróšćansku wosadu z dekretom wo tym informował, zo zakónči farski wikar farar Tomaš Dawidowski k 1. aprylej swój nadawk we wosadźe a zdobom nowy nadawk přewozmje. Wón ma w přichodźe měšniske słužby we wosadźe swjateho Bena w Mišnje wukonjeć.
Najdlěšu tramwajku předstajili
Krótkopowěsće (21.03.25)
W Sakskej rady piwo warja
Berlin/ Drježdźany. Po cyłej Němskej je dźeń a mjenje piwarnjow, nawopak je tomu w Sakskej. Wot lěta 2019 do 2024 bu w zwjazkowym kraju dohromady sydom nowych piwarnjow wotewrjenych. Tole zdźěli Zwjazk piwarcow Němskeje, kiž so na nachwilne daty Zwjazkoweho zarjada za statistiku powołuje. Cyłkownje wobsteji w Sakskej 84 piwarnjow.
Po jězoru nětko tež z čołmom
Drježdźany/Bjerwałd. Sakska krajna direkcija je z powšitkownymaj wukazomaj trajne wužiwanje Bjerwałdskeho jězora za čołmy dowoliła. Wot 1. apryla móža jězor tuž wšitcy z čołmom wužiwać, wšojedne hač ma čołm motor abo nic. Z cyłkownej płoninu 13 kwadratnych kilometrow je něhdyša brunicowa jama najwjetši jězor Sakskeje.
„Šćežka Goetheho“ nastawa
Krótkopowěsće (20.03.25)
Wjac mzdy za přistajenych LEAG
Choćebuz. 7 200 sobudźěłaćerjow LEAG dóstanje w dwěmaj kročelomaj hač do klětušeho 1. februara zwyšenje mzdy wo 7,5 procentow. Čłonojo dźěłarnistwa IGBCE, kotrež je wuslědk w jednanjach z koncernom přesadźiło, móža so přidatnje nad 1 000 eurami wjeselić. Dale smědźa rozsudźić, hač chcedźa klětu přidatnej płaćenej wólnej dnjej abo 500 eurow přiražki wot dźěłodawarja přijimać.
Nowa ideja za wobchad na A4
Budyšin/Zhorjelc. Měšćanosća a wjesnjanosća Hornjeje Łužicy su sej stajny zakaz přesćahowanja za šoferow nakładnych awtow na awtodróze A4 mjez Drježdźanami a Zhorjelcami žadali. Sakski zwjazk městow a gmejnow we wokrjesomaj Budyšin a Zhorjelc je žadanje w lisće krajnej direkciji Sakskeje sposrědkował. Tajki zakaz by prěnja a realistiska kročel přećiwo přećeženju awtodróhi była.
Namołwa knježerstwu
Krótkopowěsće (19.03.25)
LND so w Lipsku předstajiło
Lipsk. Jednaćel Ludoweho nakładnistwa Domowina (LND), Syman Pětr Cyž, je dźensa na nowinarskej konferency w Lipšćanskim Domje knihow prezentaciju serbskeho nakładnistwa za knižne wiki 27. do 30. měrca předstajił. Dźensniši termin z 30 nakładnistwami je zaso krajny zwjazk bursoweho towarstwa knihikupstwa w Němskej jako platformu nakładnistwa medijam wuhotował.
Požadanje Łužicy w Brüsselu
Drježdźany/Brüssel. Zastupjerjo komunalneho Łužiskeho koła a statnaj sekretaraj Thomas Kralinski (Sakska) a dr. Friederike Haase (Braniborska) su wčera w Brüsselu EU požadanje regiona wo prěni Net Zero Valley přepodali. EU-komisar Stéphane Séjourné wočakuje, zo budźe Łužica prěni region Europy, kiž wustorkowanje wuhlikoweho dioksyda tak redukuje, zo klimje hižo nješkodźi.
Kónc za „Swobodnu Europu“?
Krótkopowěsće (18.03.25)
Prěni Lětopis lěta 2025
Budyšin. Serbski institut (SI) je prěnje lětuše wudaće digitalneho časopisa Lětopis wozjewił. Dr. Lubina Malinkowa předstaja nowe dopóznaća wo „Statistice Łužiskich Serbow“ Arnošta Muki, dr. Robert Lorenc wěnuje so digitalizaciji w serbskim muzealnym wobłuku a dr. Ines Kellerowa zjima lońšu konferencu „Kulturna diwersita w slědźenskej a poradźowanskej praksy k imaterielnemu kulturnemu herbstwu“. Lětopis je na internetnej stronje SI zdarma přistupny.
Drježdźanscy Serbja nalěćo witaja Drježdźany. Serbja chcedźa so pod hesłom „Witaj, nalěćo!“ sobotu, 22. měrca, w 10 hodź. na lěsnym hrajkanišću w Albertowym parku zetkać. Nadja Herbichowa prosy wo přizjewjenje za serbsko-němski dźěćacy kružk hač do zajutřišeho na z ličbu wosobow a starobu dźěsća. Zajimcy njech napoje, jědźe a něšto, štož móža z druhimi dźělić, sobu přinjesu. W 15 hodź. so serbski BBQ přizamknje.
Nimale połojca na gymnazij?
Krótkopowěsće (17.03.25)
Drews kritizuje Vogta
Budyšin. Budyski wyši měšćanosta Karsten Vogt (CDU) je město w zjawnej wotmołwje na naprašowanje wobydlerja „nadregionalny hotspot prawicarskeje sceny“ mjenował a sej wjac akcije „srjedźišća towaršnosće“ kaž demonstraciju spočatk 2024 přał. Měšćanski radźićel a šef firmy Hentschke Bau, Jörg Drews, jemu na to wumjetowaše, zo hinak myslacych potłóčuje. Wón rjekny, zo bě na demonstraciji „namócna a teroristiska antifa“ prezentna.
Wědomostnica z Łužicy dobyła
Choćebuz. Dr. Charlotte Gerling z Braniborskeje Techniskeje uniwersity Choćebuz-Zły Komorow je jedyn milion eurow dóstała. Z pjenjezami chce wona slědźensku skupinu wutworić. Zhromadnje z teamom chce so wona ze škitom družinow a z ratarstwom w zwisku ze změnu klimy zaběrać. Pjenjezy je wona we wobłuku wubědźowanja „Postdoc Network Braniborska“ dobyła.
Insolwency wospjet přiběraja
Krótkopowěsće (14.03.25)
Mjeztym 32. jutrowne wiki
Budyšin. Spěchowanski kruh za serbsku ludowu kulturu jutře a zajutřišim (10–18 hodź.) w Budyskim Serbskim domje mjeztym 32. serbske jutrowne wiki zarjaduje. Nimo debjerjow jutrownych jejkow wustajeja tam Birgit Patokowa wudźěłki ze škleńcy a Weronika Suchowa a Adelheid Herrmanowa tykawčki. Andrea Pawlikowa na temu „Purpurčerwjene a pisane“ wo serbskich jutrownych jejkach přednošuje.
Čara je dale zawrjena
Budyšin. Železniska čara mjez Rychbachom, Lubijom a Budyšinom wostanje dlěje zawrjena hač bě planowane. Přičina toho su dlijace so twarske dźěła, zdźěla Krajna železnica. Poprawom mějachu tam dźensa připołdnju zaso ćahi jězdźić. Sobujěducy měli so informować, kotre linije móža wužiwać. Mjez Budyšinom a Lubijom su busy zasadźene.
Testuja ćiche hodźiny
Krótkopowěsće (13.03.25)
Kandidataj nastupitaj
Kamjenc. W Kamjencu dyrbja wobydlerjo lětsa 28. septembra noweho wyšeho měšćanostu wolić. Mjeztym staj so kandidataj přizjewiłoj, kotrajž k wólbam nastupitaj. Prěni je Kamjenski decernent za twarstwo Michael Preuß. Dalši kandidat je jurist Alex Theile. Tuchwilny wyši měšćanosta Roland Dantz (Swobodni wolerjo) hižo njenastupi.
Nowych lěkarjow witali
Budyšin. W Budyskim Hornjołužiskim klinikumje su zamołwići wčera noweho šeflěkarja prof. dr. med. habil. Steffena Schöna witali, kotryž je fachowc na polu mediciny wutroby. Wón je hnydom swój cyły team kardiologije sobu do Budyšina wzał. To su lěkarjo prof. dr. Carsten Wunderlich, dr. Andreas Preißner, dr. Stephan Wiedemann a dr. Alexander Francke kaž tež sobudźěłaćerka Nicole Fröhlich. Do toho su wšitcy w Pirnje hromadźe dźěłali.
Trump Čechow wubudźił
Krótkopowěsće (12.03.25)
Wokrjes woła wo pomoc
Budyšin. Dale a wyšich wudawkow socialnych naprawow dla su zamołwići Budyskeho wokrjesa nětko reagowali. Hišće tónle tydźeń chcedźa so ze šefomaj frakcijow sakskeje koalicije a sakskim ministerskim prezidentom Michaelom Kretschmerom (CDU) wo krizy rozmołwjeć. Hladajo na tuchwilne financne wobstejnosće wokrjes samo skóržbu njewuzamknje.
Pjenjezy za projekty
Rakecy. Towarstwo za wuwiće Hornjołužiskeje hole a haty (OHTL) je swoju pjatu spěchowansku namołwu zahajiło. Cyłkownje steja za to nimale 1,7 milionow eurow k dispoziciji. We strategiji za wuwiće su štyrnaće wobłukow definowali. Mjez druhim su to zakładne zastaranje, žiwjenska kwalita, bydlenje abo přiroda a wobswět. Priwatne wosoby, předewzaća atd. móža so wo spěchowanske pjenjezy za swoje projekty požadać.
Wjace pjenjez za zakitowanje
