Krótkopowěsće (20.12.24)
Město kołu přistupi
Choćebuz. Město Choćebuz je wot noweho lěta sobustaw Łužiskeho koła. Zastupjerjo měšćanskeje rady hłosowachu zawčerawšim za přistup města do zhromadneho zwjazka komunow. Kaž Choćebuski wyši měšćanosta Tobias Schick zwurazni, je město lokomotiwa změny strukturow a tuž běše přistup logiska konsekwenca. Łužiskemu kołu budźe wot 1. januara 57 komunow přisłušeć.
Płaćizny znowa stupali
Kamjenc. Twarić je w Sakskej dźeń a dróše. Hladajo na loni je indeks twarskich płaćiznow za bydlenske domy wo 3,3 proc. stupał, zdźěli wčera krajny statistiski zarjad Kamjenc. Hižo loni zwěsćichu statistikarjo rozrost wo 10,5 proc. Předewšěm je wutwar domu droha naležnosć.
Serbske powěsće z pomocu KI
Krótkopowěsće (19.12.24)
Jednanja wobkrućili
Zhorjelc. Kaž z rešeršow sćelaka MDR Investigativ wuchadźa, mějićel Zhorjelskeje twornje Alstom hižo měsacy z brónjenskim koncernom KNDS jedna. Tole je Alstom nětko samo wobkrućił. Detaile hišće žane znate njejsu. Po informacijach MDR pak chcedźa tam mjez druhim dźěle za pancer typa Boxer zhotowić.
Dalši móst zawrjeny
Großenhain. Po pruwowanju mosta B101 na juhu Großenhaina we wokrjesu Mišno, je twar wotnětka za wobchad zawrjeny. Nětko tam krótkodobnje spotorhanje mosta přihotuja, zdźěli krajny zarjad za dróhotwar. Z toho potrjechene su šoferojo jězdźidłow a zwisk Němskeje železnicy mjez Drježdźanami a Berlinom. Po tym, zo je so Drježdźanski Caroliny móst sypnył, fachowcy w Swobodnym staće mosty přepruwuja.
„Ludowědne“ kachle wuchowali
Krótkopowěsće (18.12.24)
Liča z haćenjemi
Zhorjelc. Twarnišća w tunlu pod Limasom a wjele wobchada do směra Pólskeje wokoło hód dla warnuje Zhorjelska policajska direkcija tele dny před haćenjemi na zwjazkowej awtodróze A4. Policija so hižo na wosebitu situaciju hotuje. Jelizo budźe potrjeba, chce techniski pomocny skutk zastojnikow podpěrać. Předewšěm wot jutřišeho do 23. decembra do směra Pólskeje kaž tež 2. do 5. januara do směra Drježdźany maja šoferojo z haćenjemi ličić.
Mjenje ludźi přichadźało
Kamjenc. Ličba ludźi, kotraž je z wukraja do Sakskeje přišła, je so loni trochu znižiła. Předewšěm mjenje migrantow z Ukrainje dla, sakski statistiski zarjad wčera w Kamjencu zdźěli. Cyłkownje je loni 76 005 ludźi z wukraja do Swobodneho stata přichadźało. Runočasnje wupućowaše 41 239 wosobow do wukraja.
Planuja hižo nowotwar mosta
Krótkopowěsće (17.12.24)
Za wjace sporta w pěstowarnjach
Budyšin/Miłoćicy. Budyski wokrjesny sportowy zwjazk a Křesćansko-socialny kubłanski skutk (CSB) ze sydłom w Miłoćicach stej kooperaciske zrěčenje podpisałoj. Jimaj dźe wo to, sport a pohib w kubłanišćach spěchować. K tomu słušeja sportowe zarjadowanja a kursy za pedagogiski personal. CSB wobhospodarja mjez Wojerecami a Pančicami-Kukowom dohromady dźesać pěstowarnjow.
Přihoty za festiwal po planje
Hochoza. Posedźenje přihotowanskeho wuběrka Domowiny za 15. mjezynarodny folklorny festiwal Łužica wčera w Hochozy je wujewiło, zo su tamniši partnerojo třěšnemu zwjazkej nadal poboku. Jeničce dwór bywšeho wjesnjanosty Fryca Wojta njeje „strowotnych přičin dla“ klětu pódla. Tuchwilu pytaja za alternatiwu, maja pak „hižo nuzowu wariantu“, kaž Pětr Brězan z wuběrka wuzběhny.
Hospodu škitać?
Krótkopowěsće (16.12.24)
Serbja do wučbnych planow
Berlin. Konferenca kultusowych ministrow, mjeńšinowa rada štyrjoch awtochtonych mjeńšin Němskeje a zwjazkowa rada za delnjoněmčinu su pjatk zhromadne poručenje zwjazkowym krajam wobzamkli. Wone njech we wučbnych planach šulerjam informacije wo danskej mjeńšinje, friziskej ludowej skupinje, Sintach a Romach, serbskim ludźe a delnjoněmsce rěčacych sposrědkuja.
Radlubin přetwarja
Ralbicy. Drježdźansko-Mišnjanske biskopstwo je nowotwarej wosadnicy „Radlubin“ přizwolił. Wosadni zhonja tole we wozjewjenjach. Dalše informacije dóstanu woni přichodny pjatk, hdźež ma so twarski projekt předstajić. Wosadnica Ralbičanskeje fary je po spisowaćelu a duchownym Mikławš Bjedrich Radlubin pomjenowana, kotryž bě tam tež farar wosady.
Nawrótnik k wólbam nastupi
Krótkopowěsće (13.12.24)
Čitansku turneju přewjedli
Budyšin. Dźěćacy časopis Płomjo je wčera čitansku turneju na třoch šulach přewjedł. W pjatych a šestych lětnikach wyšeju šulow we Worklecach a Kulowje kaž tež na Budyskim Serbskim gymnaziju awtor Měrćin Wjenk z powědkow čitaše. Nimo toho Jadwiga Dyrlichowa z Rěčneho centruma WITAJ dźěło lektorki předstaji, a redaktor Płomjenja Pětr Šołta so z šulerjemi wo pisanju a čitanju rozmołwješe.
Móst wostanje dale zawrjeny
Bad Schandau. Město Drježdźany je wčera na wuprajenje měšćanosty za twarstwo Stephana Kühna reagowało. Wón je potwjerdźił, zo móže so móst w Bad Schandauje bórze zaso wužiwać. Kaž nětko rěka, drje so tole jenož na łódźe poćahuje a nic na wobchad. Hdy móhli zaso jězdźidła po mosće jěć, dale jasne njeje.
Wabja z tuńšim ćěriwom
Krótkopowěsće (12.12.24)
Na uniwersiće čitał
Drježdźany. W Drježdźanach zetkachu so wčera wječor předewšěm młodźi Serbja, zo bychu knihu „Znowa namakany přećel“ zeznali. Podpěrałoj stej zarjadowanje Zwjazk serbskich wuměłcow a Institut za slawistiku Drježdźanskeje Techniskeje uniwersity. Z knihi čitał je Enrico Hanke, jemu poboku bě wudawaćelka Lubina Hajduk-Veljkovićowa. Tomu přizamkny so rozmołwa.
„Sorbisch? Na klar“ přepytali
Drježdźany. Přirada kampanje „Sorbisch? Na klar.“ je so wčera w Drježdźanach zešła. Woni su so z ewaluaciju hladajo na skutkownosć kampanje zaběrali. Zwjeselace je, zo mjeztym wjac hač połojca wobydlerjow serbskeho sydlenskeho ruma „Sorbisch? Na klar.“ znaje – to je wuslědk naprašowanja eksterneje agentury. Kampanja je akceptancu serbšćiny w zjawnosći polěpšowała.
Móst bórze zaso wotewrjeny
Krótkopowěsće (11.12.24)
Přećiwo ekstremizmej a rasizmej
Budyšin. Wučomnicy Budyskeho wokrjesa móža so hač dosrjedź januara wo „žołtu ruku“ požadać. Je to wubědźowanje přećiwo prawicarskemu ekstremizmej a rasizmej na dźěłowym městnje a zwonka njeho. Dźěłarnistwo IG twarstwo-agrar-wobswět pyta projekty, kotrež so kreatiwnje za wjace tolerancy a přećiwo diskriminaciji zasadźeja. Najkreatiwnišej ideji kiwa 1 000 eurow.
Rektor je dowěru senata zhubił
Rózbork. Senat policajskeje fachoweje wyšeje šule Rózbork je wčera z trěbnej dwutřećinowej wjetšinu za wotsadźenje amtěrowaceho rektora šule hłosował. Nětko rozsudźi nutřkowne ministerstwo wo tym, hač dyrbi Dirk Benkendorf zastojnstwo wopušćić. Dwaj wysokošulskaj wučerjej wumjetowaštaj jemu njeaktiwnosć a falowacu zamóžnosć při nawjedowanju šule. Dołhož pruwowanje traje, so rektor do ministerstwa wotrjaduje.
Zaso wjace pjenjez w móšni
Krótkopowěsće (10.12.24)
Nowa skupina PEN-centruma
Darmstadt. Dohromady 21 awtorkow a awtorow z Durinskeje, Berlina a Braniborskeje kaž tež ze Sakskeje a Sakso-Anhaltskeje je minjenu sobotu Skupina Lipsk mjenowanu nowu sekciju Němskeho PEN-centruma załožiło. Zaměr skupiny je mjez druhim, „dialog z kolegami z wuchodnych a južnych susodnych krajow aktiwizować“. Jako prěnjeho rěčnika wuzwolichu Benedikta Dyrlicha.
Zažny rabat za filmowy festiwal
Wulke Hendrichecy. Towarstwo Kunstbauerkino přijimuje hišće hač do kónca lěta namjety za program klětušeho Nysoweho filmoweho festiwala (NFF). Zdobom zarjadowarjo informuja, zo su wotnětka tak mjenowane Early-bird-tikety na předań, zmóžnjace zajimcam sej wšitke předstajenja za 40 eurow wobhladać. NFF wotměje so wot 20. do 25 meje.
„Hodowny pokoj“ w zarjedźe
Krótkopowěsće (09.12.24)
Woheń w milinarni wudyrił
Hamor. W Hamorskej milinarni je so zawčerawšim rano paliło. Po informacijach energijoweho koncerna LEAG bě woheń krótko po połnocy wudyrił. Potrjechena bě připrawa, kotraž zawod z brunicu zastaruje. W zwisku z wohenjom dyrbjachu zamołwići dwaj blokaj milinarnje wotšaltować. Zastaranje z ćopłotu města Běłeje Wody je dale zaručene.
Serbja w SPD koaliciju chwalili
Drježdźany. Krajne dźěłowe koło „Serbja“ sakskeje SPD je z koaliciskim zrěčenjom CDU/SPD spokojom, wšako su jich žadanja kaž reformu Serbskeho zakonja wobkedźbowali. Kaž ko-rěčnik koła Měrćin Krawc připowědźi, chcedźa nětko na konkretnym zwoprawdźenju postajenja sobu skutkować, za ma serbowanje požadarja w přichodźe plusdypk na wupisanjach w zjawnej słužbje być.
Němčina jako hamtska rěč?
