Wučerka so natyknyła
Ralbicy/Budyšin. Serbska zakładna šula Ralbicy je wot korony potrjechena, kaž Budyski krajnoradny zarjad wčera wozjewi. Infekciju su pola wučerki zwěsćili, jednu rjadownju 4. lětnika pósłachu do karanteny, dalše kontakty tuchwilu přepruwuja. Wčera bě w Budyskim wokrjesu 16 wobkrućenych nowonatyknjenjow z koronawirusom, cyłkownje 654. Schorjenych je 75 wosobow (+12).
Nobelowe myto Němcej
Stockholm. Nobelowe myto fyziki dóstanu lětsa hnydom třo, kotřiž su wo čornych dźěrach w swětnišću slědźili a kompaktny objekt w centrumje našeje galaksije wotkryli. Połojcu pjenježneho myta spožča Rogerej Penrose z Wulkeje Britaniskeje. Tamnu połojcu dźělitaj sej Andrea Ghez z USA a Reinhard Genzel z Mnichowa, zdźěli wčera akademija wědomosćow w Stockholmje.
Pilotojo a politika
DGB: Žadyn socialny pasyk
Drježdźany. Přichodny etat Sakskeje nastupajo warnuje předsyda DGB Sakskeje Markus Schlimbach dźensa před socialnym pasykom (Kahlschlag) w swobodnym staće. „Runje w krizy dyrbiš do přichoda ludźi inwestować. Nětko w dźěłowičnej abo socialnej politice lutować je wopačny puć.“ Žadanje zwjazkow dźěłodawarjow, bóle lutować, Schlimbach wotpokazuje.
Nobelowe myto za medicinu
Stockholm. Lětuše Nobelowe myto za medicinu spožča biochemikarjej Michaelej Houghtonej (Wulka Britaniska) kaž tež wirologomaj Harveyjej J. Alterej a Charlesej M. Ricej (wobaj USA). To zdźěli wčera Karolinska-institut w Stockholmje. Mjenowani třo su wirus hepatitis-C wotkryli. Dźakowano jich slědźenjam je chorosć hepatitis C nětko lěkujomna.
Rigorozne naprawy korony dla
Žana wučba hač do prózdnin
Budyšin. Po tym zo je Budyski wokrjes minjeny pjatk wo zwěsćenych 14 nowych infekcijach z koronawirusom informował, je ličba sobotu wo dalše dźewjeć na 638 rozrostła, kaž z aktualneho přehlada Roberta Kochoweho instituta wuchadźa. W Budyskej Curiejowej zakładnej šuli korony dla hač do nazymskich prózdnin tuž wučba wupadnje. Tež 11. lětnik Wojerowskeho powołanskošulskeho centruma dyrbi doma wostać.
Nowe postajenje płaćiwe
Podstupim. Nowe braniborske serbske postajenje wo narunanju kóštow wotnětka płaći. Wo tym je přisłušne ministerstwo za wědomosć, slědźenje a kulturu dźensa w Podstupimje informowało. Z njej susodny zwjazkowy kraj kulturu a rěčnu mnohotnosć we Łužicy skrući, zdobom pak wuswobodźi komuny z kóštow nastupajo nałožowanje serbšćiny. Serbska rada je postajenju přihłosowała.
97 próstwow dóšło
Ličba natyknjenjow přiběra
Budyšin. W Budyskim wokrjesu zwěsćichu wčera sydom dalšich z koronawirusom natyknjenych wosobow. Dohromady je jich po wčerawšim stawje 615. Ličba schorjenych je wo pjeć na 43 přiběrała. W postajenej karantenje bě 162 wobydlerjow (+25). Srjedu su 25 testow přewjedli. Strašnosće koronapandemije dla wažne mnóstwo nowonatyknjenjow w minjenych sydom dnjach je 35 na cyłkowne wokrjesne wobydlerstwo.
Chcedźa Zahrodku wozrodźić
Wojerecy. W Delnim Wujězdźe planuja klětu składnostnje jeho 100. róčnicy wobstaća towarstwo Zahrodka wozrodźić. To potwjerdźi Sonja Hrjehorjowa, regionalna rěčnica Domowiny za teritorij župy „Handrij Zejler“, wčera na wuradźowanju regionalnych rěčnicow we Wojerecach. Tež z rěčnym kursom a wustajeńcu wo serbskich stawiznach chcedźa serbskosć we wsy zaso wožiwić.
Wobčušlenje wobmjezowane
Třoch stacionarnje lěkuja
Budyšin. Z dalšimi pjeć zwěsćenymi padami je ličba z koronawirusom inficěrowanych w Budyskim wokrjesu wčera na 608 rozrostła. Schorjenych je 38 wosobow (+ 3), z kotrychž tři (+ 1) stacionarnje lěkuja. Nastupajo natyknjenu šulerku Budyskeho powołanskošulskeho centruma (BSZ) ze Zhorjelskeho wokrjesa kontaktne wosoby dale zwěsćeja, zdźěli krajnoradny zarjad. Strach, zo dyrbja BSZ zawrěć, tuchwilu njehrozy.
Filmy festiwala online hladać
Choćebuz. Wot 3. do 8. nowembra njewotměje so 30. Choćebuski filmowy festiwal jenož w kinach, ale tež online. Zajimcy móža so za 30 eurow z internetnym formularom akreditować, zo bychu sej nimale 200 filmow online wobhladać móhli, a to hač do 25. oktobra. Jednotliwe filmy su w Němskej bydlacym tež přez poskitk Pay-per-view bjez akreditacije přistupne.
Nowy staršiski list wušoł
Polěpšenje na dźěłowych wikach
Budyšin. We wuchodnej Sakskej bě w septembrje 18 299 bjezdźěłnych, 496 mjenje (-2,6 procentow) hač w awgusće. Kaž Budyska agentura za dźěło dźensa zdźěli, přizjewichu předewzaća regiona tónle měsac zaso jasnje wjace dźěłowych městnow. Nimo toho su młodźi ludźo wukubłanje započeli a zawody dalšich dźěłopřijimarjow přistajili. Bjezdźěłnostna kwota wučinješe 6,6 proc.
Dźesać nowych infekcijow
Budyšin. Znowa wo dźesać je wčera ličba zwěsćenych koronainfekcijow w Budyskim wokrjesu rozrostła, cyłkownje su jich 603. Wčera bě 35 wosobow schorjenych, z kotrychž dwě dale w chorowni lěkuja. Předwčerawšim su 44 testow přewjedli. Zhorjelski wokrjes rozprawješe wčera wo štyrjoch nowonatyknjenych, cyłkownje 392. Třo su w Hamorje, jedyn w Zhorjelcu.
Z přistajenymi so dojednali
Němski hrajny film dobył
Großhennersdorf. Hłowne myto 17. nysoweho filmoweho festiwala je němski hrajny film „Jiyan“ (žiwjenje) režiserki Süheyle Schwenk dobył. Z 10 000 eurami dotěrowane wuznamjenjenje je sakske ministerstwo za kulturu a turizm spěchowało. Drama wo dwěmaj ćěkancomaj w Berlinje přeswědča z „originelnymi, sugestiwnymi, zmužitymi a cineastiskimi srědkami bjez kompromisa. Film će hišće dołho po kóncu zaběra“, rěkaše ze stron jury.
Studentow witaja w dźiwadle
Budyšin. W Němsko-Serbskim ludowym dźiwadle chcedźa lětsa swjatočnje 150 nowych studentow Budyskeje studijneje akademije witać. Za to maja so naprawy škita a hygieny dodźeržeć, akademija wčera zdźěli. Za hospodarski a techniski wobłuk je ličba studowacych někak jenaka. Moderne labory stejnišća skića jim najlěpše wuknjenske wuměnjenja.
Zjawny transport podróša
Olympiada so njewotměje
Budyšin. Lětuša 54. centralna olympiada serbšćiny wupadnje. To zdźěli předsydka Serbskeho šulskeho towarstwa Ludmila Budarjowa. Přičina su aktualne wuwiće koronapandemije dla a wotprajenja ze stron šulow. Pod tajkimi wuměnjenjemi njehodźi so charakter wubědźowanja zaručić. Přichodna olympiada ma klětu wot 14. do 16. apryla we Wodowych Hendrichecach być.
Šulerjo a wučerjo w karantenje
Budyšin. Pada korony dla su šulerjo wjacorych rjadownjow, wjacore wučerki a hortnerki Zakładneje šule Frèdèrica Joliota Curieja w karantenje. Wšitcy budu na koronawirus testowani. Nětko pak maja doma wuknyć a nadawki spjelnić. Minjeny pjatk wozjewi strowotniski zarjad Budyskeho wokrjesa tři dalše nowoinfekcije z koronawirusom. Tuchwilu je we wokrjesu 25 schorjenych, z kotrychž jednoho w chorowni lěkuja.
Myto Budyskej hwězdarni
Po tankowanju do karanteny
Berlin/Praha. Nimo Ústeckeho wokrjesa a Morawsko-Šleskeho wokrjesa je zwjazkowe knježerstwo spochi zwyšenych koronainfekcijow dla wčera za cyłu Čěsku pućowanske warnowanje wozjewiło. Štóž wottam do Němskeje zapućuje, dyrbi so hnydom do karanteny podać. To płaći tež za tankowanje a nakup cigaretow hnydom po mjezy. Dojězdźowarjow to njepotrjechi, za nich płaća hišće wosebite prawidła.
Dwě dyrbještej do chorownje
Budyšin. Natyknjenje z koronawirusom su wčera pola dalšeje wosoby w Budyskim wokrjesu zwěsćili. Krajnoradny zarjad je wo aktualnje 29 schorjenych informował. Dwě wosobje, jedna wjace hač předwčerawšim, stej w stacionarnym lěkowanju. Zhorjelski wokrjes je wčera štyri nowe infekcije přizjewił. Jednu wosobu dyrbjachu tam za intensiwne medicinske zastaranje do chorownje dowjesć.
Konje tola poběža
Tři nowe koronapady zwěsćili
Budyšin. W Hornjej Łužicy registrowachu wčera tři nowe natyknjenja z koronawirusom, dwě w Budyskim a jedne w Zhorjelskim wokrjesu, kotrež běchu pola šulerki šule w nutřkownym měsće Zhorjelca zwěsćili. W Budyskim wokrjesu je 42 schorjenych wosobow, z nich jednu dale stacionarnje lěkuja. Ličbje postajenych karantenow běštej wčera 86 (-42), rozprawja Budyski krajnoradny zarjad, a 106 (+16), kaž ze Zhorjelca rěka.
Jewišćowy bal wotprajeny
Budyšin. Tradicionalny, 13. a 14. nowembra planowany jewišćowy bal Němsko-Serbskeho ludoweho dźiwadła lětsa wupadnje. „Smy dołho rozmyslowali a zwěsćili, zo pod wokomiknymi wuměnjenjemi korony dla zarjadowanje ze sceniskim programom, reju a pohosćenjom přewjesć njemóžemy“, informuje Budyske NSLDź na swojej internetnej stronje.
Korčmy wot 22 hodź. zawrjene