Wjele škody – mało rubizny
Budyšin. Hdyž so paduši něhdźe zadobudu, načinja woni druhdy jara wjele wěcneje škody, mjeztym zo je hódnota pokradnjenych wěcow skerje snadna. Tajki pad sta so w nocy na wutoru na Nowosólskej w Budyšinje. Tam zadobychu so skućićeljo do wikowanišća a wzachu z njeho někotre tyzy cigaretow sobu. Kaž Zhorjelska policajska direkcija rozprawja, wučinja wěcna škoda na wšěch 8 000 eurow mjeztym zo běchu cigarety jenož 20 eurow hódne.
Wulke dobyće slubili
Sepicy. Z woporom wobšudnikow je so minjene dny muž w Sepicach (Schwepnitz) stał. Najskerje bě wón na wabjenje za tak mjenowanu kryptowu měnu Bitcoin reagował. Za to měješe jeničce 250 eurow inwestować, za čož slubichu jemu 413 000 eurow. Skónčnje tak daloko bě, zo dyrbješe pjenjezy wupłaćene dóstać. Do toho pak měješe muž za nastate wudawki hišće kredit brać a 24 000 eurow přepokazać. To wón bohužel tež sčini. Wot slubjeneho dobyća pak wón ničo dóstał njeje, kaž policija zdźěli.
Na polu so paliło
Pančicy-Kukow. Wohnjowych wobornikow z Pančic-Kukowa wołachu předwčerawšim nawječor k hašenju na wotžnjate žitnišćo na kromje wsy do směra na Wěteńcu. Něhdźe 4 500 kwadratnych metrow šćernišća so tam paleše. Dokelž běchu płomjenja wosrjedź pola wuchadźeli, přepytuje kriminalna policija podhlada zapalerstwa dla.
Holanske jahody pokradnyli
Slepo. 87lětna žona w Slepom je so sobotu dopołdnja do bliskeho lěsa podała, zo by holanske jahody šćipała. Po tym zo měješe tři mjeńše žonopowe bowy połne jahodow, poda so domoj. Dokelž wjedźeše jeje puć nimo kěrchowa, so wona rozsudźi, row jeje zemrěteho mandźelskeho wokrjepić. Tónle čas paduši wužichu a njezamknjene koleso rentnarki kaž tež jeje sprócnje našćipane holanske jahody pokradnychu.
Na křižowanišću prasnyło
Budyšin. Dźensa w nocy je so na Budyskim křižowanišću při Serbskim ludowym ansamblu wobchadne njezbožo stało. Krótko do połnocy, jako bě ampla hasnjena, tam wosobowej awće nimale frontalnje do so zrazyštej. Jednoho ze šoferow dyrbjachu do chorownje dowjezć.
Do rododendrona zajěła
Kamjenc. Na Pastwinej horje w Kamjencu budu rododendrony klětu snano trochu mjenje kćěć. Přičina je wobchadne njezbožo, kotrež je so tam předwčerawšim stało. Wodźerka Seata chcyše tam něhdźe w 17 hodź. po nahłym puću horje jěć. Najskerje pak bě při tym wopačny chód zapołožiła. Jeje jězdźidło na to wróćo jědźeše a hakle při jednym z wulkich rododendronow stejo wosta. 23lětnu šoferku Seata, kotraž so při tym snadnje zrani, móžachu na městnje lěkarsce zastarać. Jeje wosobowe awto pak dyrbjachu wotwlec. Na nim nasta něhdźe 2 000 eurow škody.
Z konopju po puću byłoj
Łuty. Kolesowu jězbu trochu hinašeho razu je policija předwčerawšim we Łutach skónčiła. Mužej w starobje 23 a 29 lět jědźeštaj tam po připołdnju z něhdźe dwaj metraj wysokej konopjowej rostlinu po měsće. Zastojnicy jeju zadźeržachu a rostlinu sćazachu. Mužej změjetaj so nětko přeńdźenja přećiwo zakonjej wo drogach dla zamołwić.
Pomnik pomórali
Bart. Předwčerawšim rano dyrbjachu w Barće zwěsćić, zo běchu njeznaći informacisku taflu a fasadu historiskeho bazaltoweho zawoda pomórali. Bywši zawod je dźensa techniski pomnik, kiž je na dnju wotewrjeneho pomnika zajimcam přistupny. Skućićeljo namórachu tam wšelake ličby a pismiki. Škoda wučinja dohromady něhdźe 500 eurow. Policija pyta swědkow, kotřiž su snano něšto wobkedźbowali.
Bjez dowolnosće jězdźił a znjezbožił
Slepo. Wonkownej špihelej dweju jězdźidłow buštej minjenu sobotu při wobchadnym njezbožu w Slepom skóncowanej. 20lětny wodźer transportera bě předaloko na prawy bok zajěł a so parkowaceho dalšeho transportera šmórnył. Zawinowar drje so najprjedy z městna njezboža zhubi, policija pak jeho bórze na to lepi. 20lětny jenož njezbožo njepřizna, ale tež, zo scyła žanu jězbnu dowolnosć nima. Wón změje so nětko za ćeknjenje z městna njezboža kaž tež za jězdźenje bjez dowolnosće zamołwić.
Wobšudnistwu zadźěwała
Wojerecy. Kedźbliwa předawarka kupnicy na Wojerowskej Gagarinowej hasy je minjeny pjatk tomu zadźěwała, zo stanje so starša žona z woporom wobšudnikow. Njeznaći běchu rentnarku zazwonili a jej zdźělili, zo je 38 500 eurow w loteriji dobyła. Za to měješe wona dobropisy w hódnoće tysac eurow kupić. 79lětna chcyše je w bliskej kupnicy wobstarać. Předawarka pak žonje rozłoži, zo drje jedna so wo wobšudnistwo, a je ju tak před móžnej škodu wobchowała.
Na mosće mórałoj
Wuježk. Na awtodróze A 4 su policisća předwčerawšim popołdnju grafitijoweju mórakow z Hessenskeje při tak mjenowanym Wuježčanskim mosće pola Wósporka lepili. 30lětna žona a jeje 25lětny komplica běštaj něhdźe dwaj metraj wulkej wobrazaj zwěrjatow a wšelake pismiki na móst mórałoj. Zastojnicy sćazachu jimaj 21 tyzow barby.