Njeznaći wobsah kasety pokradnyli
Łaz. Dotal njeznaći su w času wot 1. julija nawječor do 3. julija nawječor parkowanski awtomat na přibrjoze Třižonjanskeho jězora we Łazu skóncowali a z njeho pjenježnu kasetu pokradnyli. Kelko pjenjez je w njej było, dotal znate njeje. Wěcna škoda wučinja něhdźe tysac eurow.
Při wróćostorkanju njekedźbował
Běła Woda. Na Heinricha Heinowej w Běłej Wodźe je sobotu dopołdnja 44lětny ze swojim awtom marki Opel ducy z ležownosće wróćo wujěł. Při tym zrazy do wosoboweho awta marki Mercedes, kotryž tam parkowaše. Cyłkowna škoda wučinja 2 200 eurow.
Bankownica kedźbliwa była
Kulow. Wobšudnicy po telefonje su póndźelu 81lětnu rentnarku poćežowali. Žona z Noweje Wsy pola Kulowa bě sej wěsta, zo žadyn dołh nima, čuješe pak so pod ćišć stajena. Tak so rozsudźi žadanu sumu 1 500 eurow zapłaćić. Sobudźěłaćerka banki pak je ju na móžne wobšudnistwo skedźbniła a přeswědči starušku, pjenjezy njepřepokazać, ale so radšo na policiju wobroćić.
Sprawna wobydlerka
Wojerecy. 77lětna žona je wutoru dopołdnja na policajski zarjad we Wojerecach přišła. Při sebi měješe móšnju z pjenjezami, dokumentami a pjenježnej kartku, kotrež bě na Radskej dróze namakała. Krótko na to přizjewi so 84lětna žona, zo by tam swoju zhubjenu móšnju přizjewiła, a ju nablaku zaso dósta. Wulki dźak słuša sprawnej namakarce.
Papagaj přilećał
Běła Woda. Wobydlerka Gutenbergoweje w Běłej Wodźe měješe wutoru njewočakowany wopyt. W nocy bě papagaj z wotewrjenym woknom do jeje bydlenja přilećał. Nětko so zwěrinoškitne towarstwo tak dołho wo ptaka stara, doniž sej mějićel po njeho njepřińdźe.
Ćežke njezbožo na A 4
Słona Boršć. Wčera krótko do połnocy sta so na awtodróze A 4 mjez Hornim Wujězdom a Słonej Boršću ćežke wobchadne njezbožo. Z dotal njeznateje přičiny zrazy transporter marki Renault za wotpočnišćom Hornja Łužica do transportera marki Fiat. Renault na to z dróhi zjědźe a prasny do štoma, při čimž so wodźer awta ćežko zrani. Šofer Fiata wosta njezranjeny. A 4 běše tři a poł hodźiny dospołnje zawrjena a wobchad so po dołhosći pjeć kilometrow kopješe. Policija přičiny njezboža nětko přepytuje.
Do štoma zajěł
Rakecy. Póndźelu popołdnju je wodźer VWja Caddy na zwjazkowej dróze B 96 mjez Rakecami a Budyšinom w křiwicy z awtom z dróhi zjěł a do štoma zrazył. W jězdźidle zatłusnjeneho šofera dyrbješe wohnjowa wobora z ćežkej techniku wuswobodźić. Z helikopterom dowjezechu jeho wuchowanske mocy do kliniki. Wohnjowej woborje z Rakec a Njeswačidła stej ze 37 kameradami na městnje pomhałoj. Zwjazkowa dróha bě něhdźe hodźinu za zjawny wobchad dospołnje zawrjena.
Awto so paliło
Wojerecy. Na parkowanišću superwikow na Kulowskej dróze we Wojerecach je so sobotu wječor pozdźe paliło. Krótko do połnocy, wokoło 23.25 hodź., su z wosoboweho awta typa Mazda CX 3 płomjenja wysoko k njebju sapali. Wohnjowa wobora zamó je spěšnje zhašeć. Přičiny wohenja policija nětko přepytuje.
Kolesa awta kradnyli
Nadźanecy. Wšitke štyri kolesa Mercedesa su njeznaći w nocy na srjedu w Nadźanecach (Nadelwitz) wotšrubowali a sobu wzali. Při dalšim awće su šruby kolesow pušćili, policija wčera zdźěli.
Zražce na wotpočnišću
Budyšin. Hnydom dwójce je wutoru na wotpočnišću Hornja Łužica při awtodróze A 4 k zražce dóšło. Popołdnju bě 53lětny Słowak ze swojim sedłowym wlečakom při zaparkowanju do nakładneho awta z kranom zajěł. Škoda wučinja 4 000 eurow. Wječor zrazy Ukrainjan ze swojim Lkw-jom do Mercedesa Vito a je škodu 3 000 eurow načinił.
Pakostnicy zwrěšćiłoj
Kamjenc. Na Saarskej w Kamjencu su wjacori kupcy póndźelu w předawanišću dwě padušnicy zadźerželi. Žonje běštej připołdnju napoł jednej spytałoj sej twory bjez zapłaćenja sobu wzać. 23lětna pjelnješe nakupowanski wóz z tworami w hódnoće 140 eurow a pakowaše je do dweju tobołow. Před wobchodom čakaše na nju 36lětna pomocnica, kotraž jej durje wočini. Jako jej sobudźěłaćerjo a pasanća narěčachu, pušćištej wonej tobole a spytaštej twochnyć. Policisća zwěsćichu pola młódšeje 0,3 promile alkohola. Po wšěm zdaću bě wona tež drogi brała.
Pod wliwom drogow jěł
Wojerecy. Hnydom wjackrótnu přičinu mějachu zastojnicy policije, mužej njeprawe postupowanje porokować. Njedźelu rano by 37lětny we Wojerecach ze swojim bydlenskim mobilom nimale do policajskeho awta zajěł. Z Budyskeje aleje přijěwši njebě wón předjězbu na křižowa- nišću Grodkowska šoseja wobkedźbował. Kaž zastojnicy zwěsćichu, steješe šofer pod wliwom drogow, test na alkohol pokaza 0,3 promile a muž bě bjez jězbneje dowolnosće po puću. Wodźerja caravana dowjeze policija na to k wotewzaću kreje, wotewza jemu awtowy klučik a přizjewi jeho wohroženja wobchada a wodźenja wozydła bjez jězbneje dowolnosće dla.