Policija (20.05.21)
Wjacore přeńdźenja zwěsćili
Krušwica. Na zwjazkowej dróze B 115 pola Krušwicy su policisća wčera rano awto marki Opel Astra kontrolowali a hnydom wjacore přeńdźenja zwěsćili. Pólski šofer njeměješe žanu jězbnu dowolnosć, steješe pod wliwom drogow a měješe nimo toho 0,8 promilow alkohola w kreji. Tež awtowej čisle k Opelej njesłušeštej. A skónčnje namakachu specialny grat, z kotrymž hodźa so pod jězdźidłami katalyzatory wotrězać. Dokelž njebě na městnje jasne, komu awto słuša, je policisća sćazachu.
Policija (19.05.21)
Policija (18.05.21)
Z policajskim čisłom jězdźił
Oberlichtenau. Při kontroli mopeda předwčerawšim w Oberlichtenauwje so policisća njemało dźiwachu. Na jězdźidle bě wopačne čisło přičinjene, mjenujcy tajke, kotrehož kombinacija pismikow „DD-Q“ je zasadnje za policajske jězdźidła w Swobodnym staće Sakskej rezerwowana. Dokelž bě moped nimo toho tak přetwarjeny, zo by trochu spěšniši był, jón zastojnicy sćazachu. 17lětny wodźer změje so nětko mjez druhim falšowanja wopismow a přeńdźenja přećiwo zakonjej wo winowatostnym zawěsćenju dla zamołwić. Zwotkel wón policajske čisło měješe, njeje znate.
Policija (17.05.21)
W parkowanskim domje znjezbožił
Budyšin. Ćežko zranił je so předwčerawšim 14lětny hólc w parkowanskim domje na Budyskej Wonkownej Lawskej. Kaž policija rozprawja, bě wón na třěchu domu zalězł a přez swětłowy šacht pjeć metrow w schodźišću do hłubiny padnył. Alarmowane wuchowanske mocy so wo znjezboženeho na městnje starachu a dowjezechu jeho do chorownje. Mjeztym wón hižo w žiwjenskim straše njeje. Kak je so njezbožo dokładnje stało, policija nětko přepytuje. Pomhać naležnosć rozrisać móhli młodostni, kotřiž běchu ze 14lětnym hromadźe w parkowanskim domje.
Policija (14.05.21)
Mandźelskeju ilegalnja hladała
Budyšin. 54lětnu sobujěducu w busu do Ukrainy je zwjazkowa policija tele dny nachwilnje zajała. Wona bě wot februara 2021 bjez wizuma w Němskej jako hladarka dźěłała. Při kontroli busa na awtodróze A 4 pola Słoneje Boršće wona zastojnikam powědaše, zo bě staršu žonu a jeje mandźelskeho hladała Za to pak njeměješe ani dźěłowu dowolnosć ani wizum. Nimo toho njebuchu žane dawki kaž tež žane zawěsćenske wotedawki płaćene. Žona změje so nětko njedowoleneho zapućowanja kaž tež njedowoleneho přebytka a dźěła dla zamołwić. Zwjazkowa policija zaběra so w tym zwisku tež z tymi ludźimi, kotřiž za tajke dźěło nadawki dawaja abo je ludźom z wukraja posrědkuja.
Policija (12.05.21)
Moped do awta zrazył
Jědlica. Jězba wjacorych młodostnych z mopedami měješe wčera nawječor na statnej dróze S 101 pola Jědlicy zły wukónc. Něhdźe we 18.15 hodź. njebě jedyn z mopedistow po wšěm zdaću předjězbu wobkedźbował a zrazy do BMWja. Při tym bu młodostny na polo ćisnjeny a so ćežko zrani. Z wuchowanskim helikopterom jeho do chorownje dowjezechu. Wosobowe awto bu chětro wobškodźene, jeho wodźer wosta njezranjeny.
Policija (11.05.21)
Bjez dowolnosće palili
Wulki Wjelkow. Na parkowanišću we Wulkim Wjelkowje su w nocy na póndźelu wjacori młodostni lěhwowy woheń zamiškrili. Po policajskich wustawkach města Budyšina pak to tak dowolene njeje. Jako tam policija krótko do połnocy přijědźe, dwě wosobje ćeknyštej, zastojnicy jednu z njeju po krótkim přesćěhanju dosahnychu. Kaž so při alkoholowym tesće wukopa, měješe młodostny 2,46 promilow alkohola w kreji. Policisća woheń zhašachu a přepodachu młodostneho jeho staršimaj.
Policija (10.05.21)
Bjez zawěsćenja a pod alkoholom
Budestecy. Sobotu wječor kontrolowachu w Budestecach 19lětneho, kiž bě tam z e-scooterom po puću. Za swoje jězdźidło pak njeměješe młodostny trěbne zawěsćenje. Nimo toho zastojnikam napadny, zo bě wón alkohol pił. Pola njeho naměrichu 0,49 promilow. Tež za to změje so 19lětny zamołwić. Wšako w probowym času jězbneje dowolnosće scyła pod wliwom alkohola jězdźić njesmě.
Policija (07.05.21)
Třoch podhladnych zwěsćili
Běła Woda. Woheń w něhdyšim Běłowodźanskim ludowym domje je hobersku škodu načinił. Něhdźe 200 wohnjowych wobornikow bě wot 25. apryla hač do přichodneho zažneho ranja płomjenja hašało. Kriminalna słužba je hižo za čas hašenja zjawnje za swědkami pytała. Po wuhódnoćenju wjacorych pokiwow je policija nětko třoch podhladnych zwěsćiła. Wumjetuja jim, zo su njedźelu, 25. apryla, na ležownosći kulturneho domu woheń zamiškrili. Kaž kriminalisća mjeztym zdźělichu, běchu skućićeljo stólcy a plany zapalili, štož bě přičina wudyrjeneho wohenja. Kak běchu so do domskeho dóstali, ma so z wuhódnoćenjom slědow zwěsćić. Zamiškrjenja wohenja podhladni su dwaj młodostnaj a jedyn dorosćacy němskeho pochada.
Policija (06.05.21)
Pilota slepili
Halštrow. Dotal njeznaći su wutoru w nocy z laserowym pokazowakom pilota helikoptera sakskeje policije slepili, kotryž bě nad awtodróhu A 4 pola Porchowa po puću. Wužiwanej laseraj běštej jara intensiwnej a swěćeštej ze směra Halštrowa na helikopter. Najebać wohroženje je so tón wěsće na zepěranišćo wróćił. Bjez wuspěcha wostachu zastojnicy, kotřiž za podhladnymi pytachu.
Lětacy trampolin
Kamjenc. Chětro nastróžił je so šofer linijoweho busa w Kamjencu, jako wón wutoru popołdnju swoju jězbu zakónči. Na wotbóčce Macherowa/Hansa Gradowa je lětacy trampolin do busa zrazył. Wichor bě nastroj do toho na přestrjeni předewzaća ze zakótwjenja wutorhnył. Lětacy objekt wobškodźi wokno a motorowu hawbu busa.
Wodźer awta wopak šaltował
Słona Boršć. Na wotpočnišću Hornja Łužica na A 4 pola Słoneje Boršće je tohorunja wutoru popołdnju 84lětny muž z awtom marki Ford Transit do twarjenja zastanišća zrazył. Po wšěm zdaću bě so wón w awtomatiskim šaltowanju mylił. Po prěnim trochowanju wučinja cyłkowna škoda něhdźe 10 000 eurow.
