Policija (22.02.21)
Dróha zawrjena była
Šešow. Sobotu něhdźe w 23.30 hodź. je 26lětna šoferka awta marki VW Golf na wokrjesnej dróze ze Šešowa do směra na zwjazkowu dróhu B 96 z jězdnje zjěła a do štoma zrazyła. Při tym je so awto wo 180 stopnjow zwjertło a do směra na Šešow stejo wostało. Njeswačanska dróha bě dlěje hač hodźinu zawrjena. Ćežko zranjenu žonu lěkuja w chorowni.
Policija (19.02.21)
Třoch podhladnych zajeli
Nadźanecy. W zašłej nocy je patrulja Budyskeje policije w Nadźanecach (Nadelwitz) třoch Polakow w starobje 29 a 49 lět zajała, po tym zo bě słužbna straža wobkedźbowała, kak woni dźěłowe graty z předawanišća noša. Zawołana patrulja jědźeše za awtom podhladnych, jako woni ležownosć wopušćichu. Na Krakečanskej wona VW Passat zadźerža. Zastojnicy nimo toho zwěsćichu, zo steješe 29lětny šofer pod wliwom drogow.
Wjacorym ludźom porok wuprajili
Rakecy. Zastojnicy policije zwěsćichu w nocy wot srjedy na štwórtk přeńdźenja nastupajo škitne naprawy přećiwo koronje. Tak su w Rakecach wjacorym ludźom porok wuprajili a jich na korektne wužiwanje nahubnika skedźbnili. Dwaj wobydlerjej měještaj lěkarski atest.
Wojerecy. Na Wojerowskej Hasy měra warnowachu policisća srjedu wječor tři wosoby ze wšelkich domjacnosćow. Napadnyło wobydlerjam domu bě, zo so mužej a žona w starobje 35 do 40 lět wótře wadźa a hudźbu poskaja. Na to wołachu policiju.
Policija (18.02.21)
Cybercop prašany
Zhorjelc. Kriminalita w interneće, tak mjenowana cybercrime je tema, kotraž zastojnikow policije dźeń a bóle zaběra. Hač do kónca apryla móža so pola njeje zajimcy přizjewić, kotřiž chcyli digitalnje za kriminelnymi slědźić. Trěbny za to je studij na přikład informatiki, hospodarskeje informatiki abo komunikaciskeje techniki.
Policija (17.02.21)
Pos do Němskeje twochnył
Wulki Šunow. Čěska mějićelka psa prošeše policiju w Němskej wo pomoc. Jeje pos bě přez mjezu twochnył. Postajenjow korony dla njemóžeše žona sama za nim pytać. Z pomocu GPS-sćelaka posrědkowaše zastojnikam poziciju psa Edyja. We Waltersdorfje jeho widźachu a za nim wołachu. Wočiwidnje z wulkim wjeselom jim Edy do awta skoči. Při bawdźe Krakonoša psa jeho mějićelce přepodachu.
Policija (16.02.21)
Kiwkawu pokradnyli
Kamjenc. Samo dźěćace hrajki njejsu před paduchami wěste, kaž dyrbjachu minjeny kónc tydźenja w Kamjencu nazhonić. Sobotu wječor su njeznaći na Macherowej dźěćacu kiwkawu (Wippe) znački Hudora pokradnyli. Módry nastroj typa HD 2000 bě něhdźe 70 eurow hódny, rěka w rozprawje Zhorjelskeje policajskeje direkcije. Při zadobywanju načinichu nimo toho dźesać eurow wěcneje škody.
Awto kačku přejěło
Spale. Swoju zmužitosć, z BMWjom so nasadźować, dyrbješe předwčerawšim wječor dźiwja kačka w Spalach ze žiwjenjom zapłaćić. Chrobły ptak so z puća njehibny, jako so 53lětny z awtom bližeše a skónčnje kačku přejědźe. Na BMWju nasta 450 eurow škody.
Policija (15.02.21)
Smjertnje znjezbožił
Syjk. Tragiski wukónc měješe wobchadne njezbožo sobotu rano na statnej dróze S 126 mjez Slepom a Syjkom (Graustein) 32lětny wodźer BMWja bě tam krótko do 4 hodź. do směra na Braniborsku po puću, jako kontrolu nad wodźidłom zhubi a na lěwy bok jězdnje zajědźe. Mužej so poradźi awto zaso na puć wodźić, při čimž pak so wone suwać započa. Jězdźidło znowa dolěwa zajědźe, prasny do štoma a skónčnje na třěše ležo wosta. Najebać prěnje pomocne naprawy njemóžachu mužej hižo pomhać. Wón hišće na městnje njezboža wudycha.
Policija (12.02.21)
Lětnje wobruće kradnyli
Běła Woda. Najskerje hižo na přichodne lěćo myslili su paduši, kotřiž zadobychu so minjene dny do garaže w Běłej Wodźe. Z njeje pokradnychu štyri kompletne lětnje wobruče. Jich hódnotu trochuje wobsedźer na něhdźe 300 eurow. Nimo toho načinichu skućićeljo něhdźe 500 eurow wěcneje škody. Kriminalisća nětko za paduchami pytaja.
Policija (11.02.21)
Alarm na rewěrje
Budyšin. W normalnym padźe přismali policija k městnu njeskutka, njezboža abo tež wohenja. Wčera připołdnju bě tele městno Budyski policajski rewěr na Dwórnišćowej sam. Štwórć po dwanaćich přizjewi awtomatiska připrawa woheń na rewěrje a alarmowaše powołanskich wobornikow runje tak kaž dalšich dobrowólnych kameradow. Zastojnicy twarjenje bjezposrědnje na to wopušćichu a so na předpisanych městnach zhromadźichu. Wobornicy so na terenje a w twarjenjach rozhladowachu a přičinu alarma spěšnje wuslědźichu. Jednaše so wo techniski defekt tepjenskeje připrawy. Bórze na to móžachu policisća w swojej słužbje pokročować.
Policija (10.02.21)
Šoferaj do so šłoj
Kinspork. Na zwjazkowej dróze B 97 mjez Kinsporkom a Łužnicu staj so předwčerawšim wodźerjej čěskeho nakładneho awta a němskeho wosoboweho awta typa Mercedes mjez sobu wo zadźerženju we wobchadźe powučowałoj. Na kóncu situacija eskalěrowaše. Najprjedy spyta šofer Mercedesa Lkw přesćahnyć, štož pak so njeporadźi. Jako bě wón skónčnje nimo, awto před Lkw-jom wotpohladnje pomału jědźeše. We Łužnicy dyrbještaj wobaj před twarskej amplu zastać. Tam dóńdźe skónčnje k rozestajenju, při čimž šofer Pkw-ja tamnemu šmóratko z ruki dyri. Šofer Lkw-ja wotmołwi z dyrom mjezwoči a tamneho snadnje zrani. Wobaj změjetaj so nětko nuzowanja w nadróžnym wobchadźe a zranjenja ćěła dla zamołwić.
Policija (09.02.21)
Bjez rubizny ćeknyli
Budyšin. Kašćiki z prózdnymi blešemi běchu sej njeznaći předwčerawšim wječor w Budyskej Strowotnej studni jako rubiznu wupytali. Swědk jich wobkedźbowaše, kak sej kašćiki přez płót dawachu, a zazwoni policiju. Skućićelam pak so poradźi ćeknyć. Zastojnicy zličichu dwanaće kašćikow w hódnoće wjace hač 50 eurow, kotrež cuzy stejo wostajichu.
