Policija (29.05.20)
Wulku sumu pjenjez a drogi našli
Mały Wjelkow. Zastojnicy Budyskeho policajskeho rewěra a inspekcije kriminalneje policije su minjenu wutoru z pomocu stafle slědźacych psow přepytowanje w Małym Wjelkowje přewjedli. W podhladnym „bydlenskim objekće“ namakachu „něšto mariuany, srědki za woćeńšenje drogow a něhdźe 10 000 eurow“. Třoch muži w starobje 25 do 28 lět a 19lětnu žonu policija zaja, statne rěčnistwo dale přepytuje.
Policistow nadběhował
Niska. Wočiwidnje wopojeny 25lětny muž je so předwčerawšim zajeću spjećował a za policistami kopajo škleńcu słužbneho awta zastojnikow wobškodźił. Wěcnu škodu trochuja na něhdźe 300 eurow. Skućićel spyta z kolesom ćeknyć, štož pak so jemu njeporadźi. Nětko je w přepytowanskej jatbje.
Policija (28.05.20)
Žonu wurubić spytał
Kamjenc. 40lětny muž je wutoru na Kamjenskej Humboldtowej po wšěm zdaću kolesowarku bił a storkał. Wón spyta 22lětnej žonje mobilny telefon z ruki wutorhnyć a na to ćekny. Policisća su pozdatneho rubježnika pozdźišo zajeli. Drogowy test je wunjesł, zo steješe muž pod wliwom amfetaminow.
Móšni spakosćił
Budyšin. Dotal njeznaty je so wčera popołdnju do objekta na Budyskej Frederica Joliota Curiejowej zadobył, byrnjež tam ničo pytać njeměł. Wužiwajo njewobkedźbowany wokomik pokradny wón z dweju ručneju tobołkow móšnju z pjenjezami a wosobinske dokumenty.
Nukl a wujk pokradnjenej
Wojerecy. Njeznaći su so wutoru rano do towarstwoweho domu we Wojerowskim starym měsće zadobyli. Informant widźeše dwě zakuklenej wosobje, kotrejž stej ležownosć spěšnje wopušćiłoj. Jednoho wujka a jednoho nukla wonej w kistomaj wotnjeseštej. Cyłkowna škoda hladajo na pokradnjenej zwěrjeći a wobškodźenje wučinja něhdźe 250 eurow. Nětko so kriminalna policija z padom zaběra.
Municija pod mostom
Policija (27.05.20)
Z mopedom njezbožił
Konjecy. Na dróze mjez Konjecami a Koćinu je póndźelu rano napoł dźewjećich 17lětny mopedist znjezbožił. Młodostny běše ze swojej Simson w křiwicy, kotraž doprawa wjedźe, z dotal njeznateje přičiny na lěwym boku z jězdnje na polo zjěł, so tam walił a so při tym ćežko zranił. Wuchowarjo jeho zastarachu a transportowachu znjezboženeho z helikopterom do chorownje. Na mopedźe nasta škoda 500 eurow. Wobchadna słužba nadrobnosće njezboža nětko přepytuje.
Złote rybički spakosćili
Běła Woda. Wobydlerka Puškinoweje hasy w Běłej Wodźe je wčera rano na swojej ležownosći njeznatych wobkedźbowała, kak spytachu rybički z jeje haćika wułójić. Jako to podhladni pytnychu, so z dwaceći złotymi rybami zminychu. Pjenježna škoda wučinja něhdźe 30 eurow. Kriminalna policija z padom so nětko zaběra a pyta dalšich swědkow.
Do zawoda so zadobyli
Policija (26.05.20)
Podhladna wóń
Wojerecy. Njedźelu, krótko do połnocy, je policiji na Wojerowskej Hasy Käthy Niederkirchner Ford ze skóncowanym wobswětlenjom awtoweje znački napadnył. Jako zastojnicy Mondeo zadźeržachu a šofer wokno dele wjerćeše, stupaše z jězdźidła markantna wóń konopje. 38lětny Polak reagowaše pozitiwnje na test drogow. Wón njesmědźeše dale jěć a dyrbi nětko z chłostanjom ličić.
Policija (25.05.20)
Dom sportowcow cil był
Njeswačidło. W nocy na sobotu su so dotal njeznaći skućićeljo na Njeswačanskej Kastanijowej aleji namócnje do tamnišeho domu sportowcow zadobyli. Při tym rozłamachu woni wjacore mjezydurje a spakosćichu hišće njeznatu sumu pjenjez. Wěcna škoda wučinja něhdźe 2 000 eurow. Kriminalny technikar je na městnje slědy zawěsćił. Policija pad nětko dale přepytuje.
Dalokowid sobu wzali
Budyšin. Njeznaći su so w nocy na sobotu do lawby w zahrodce na Budyskej Salvadory Allendowej zadobyli a tam dalokowid pokradnyli. Dalši zaměr běše dom towarstwa. Tam pak wuspěch njemějachu. Přiwšěm načinichu 700 eurow škody. Spakosćeny dalokowid bě połsta eurow hódny. Tež tam kriminalna policija nětko za winikami slědźi.
Alkohol piła a jěła
Budyšin. Při wobchadnej kontroli je policija sobotu wječor šoferku Dacije na Budyskej Dr. Pětra Jordanowej zadźeržała. Při rozmołwje zastojnikaj zwěsćištaj, zo bě wona alkohol piła. Naslědny test wunjese 1,3 promile. 50lětna dyrbješe krej a jězbnu dowolnosć wotedać.
Policija (22.05.20)
Třěcha so paliła
Budyšin. Palace so kózły wjaceswójbneho domu na Schliebenowej w Budyskej měšćanskej štwórći Zapadne předměsto su wčera wječor zasadźenje něhdźe 70 wohnjowych wobornikow wuskutkowali. Dźakowano spěšnej reakciji je so kameradam poradźiło tomu zadźěwać, zo so woheń na cyłu třěchu wupřestrěje.
Wo móžnych wěcnych škodach w bydlenjach je tuchwilu runje tak mało znate kaž kelko móhło wuporjedźenje skóncowaneje třěchi płaćić. Nastupajo strowotniske škody dyrbješe wuchowanska słužba třoch wobydlerjow, kotřiž takrjec pod třěchu domskeho bydla, medicinsce zastarać, chutnje zranił pak so po wšěm zdaću nichtó z nich njeje. Dalši wobydlerjo njeběchu potrjecheni.
Policija bě tohorunja spěšnje na městnje. Zastojnicy areal zawěsćichu a zaraćichu. Zajeli su „psychisce nadpadnu wosobinu“, kotraž je „wjacore zasadźenske mocy kaž tež přihladowacych ludźi našćuwała a napluwała“, w zdźělence policije rěka. Wokoło wjaceswójbneho domu běchu so tójšto pasantow zešli, zo bychu na njezbožo sutali.
Policija (20.05.20)
Předjězbu njewobkedźbowała
Nowa Łuka/Hory. Při njezbožu na křižowanišću mjez Nowej Łuku a Horami pola Wojerec su so póndźelu tři wosoby ćežko zranili. 64lětna wodźerka VW Golfa njeje předjězbu Peugeota wobkedźbowała a zrazy do njeho. Wona bě awto přewidźała, kaž policija zdźěli. Při zražce so 56lětna šoferka Peugeota, jeje 84lětna sobujěduca kaž tež šoferka Golfa zranichu. Škodu trochuje policija na něhdźe 20 000 eurow. Přichodny tydźeń započnu křižowanišćo na kružny wobchad přetwarić.
Policija (19.05.20)
Pytaja swědkow
Berthelsdorf. Njeznaći su minjeny pjatk wječor konja w Berthelsdorfje zranili. Wobydlerka, kotrejež pos bě šćowkał, zwěsći, zo měješe kóń 20 centimetrow dołhu ranu. Na to informowaše wona policiju a wobsedźerku konja. Kriminalna inspekcija złóstnistwo nětko přepytuje a prosy wobydlerjow wo pomoc. Zdobom pruwuje zwisk k zahinjenemu konjej 11. meje w Suchich Hendrichecach (Dürrhennersdorf).
Policija (18.05.20)
Z motorskim do štoma
Wojerecy. Ćežke wobchadne njezbožo sta so sobotu wječor na B 96 mjez Wojerecami a Łutami. 43lětny motorski je z dotal njeznateje přičiny w křiwicy z puća zajěł a do štoma zrazył. Spěšnje jednajo su prěni pomocnicy tomu dopomhali, zo bě nuzowy lěkar bórze na městnje. Ćežko zranjeneho motorskeho dowjezechu z helikopterom do chorownje. Při njezbožu nasta wěcna škoda něhdźe 15 000 eurow, a zwjazkowa dróha bě dlěje hač hodźinu dospołnje zawrjena.
Pjany z awtom jěł a so přewalił
Bretnig. W nocy na njedźelu su hnydom pjeć woborow a to z Bretniga, Hauswaldy, Großröhrsdorfa, Kleinröhrsdorfa Ohorna, wo pomoc wołali. Mjez Bretnigom a Ohornom bě 45lětny šofer Mercedesa w njepřewidnej křiwicy dalše jězdźidło přesćahnyć spytał, je při tym kontrolu nad wodźidłom zhubił, z puća zajěł a so přewalił. 45lětny móžeše so na to sam z awta wuswobodźić a bě jenož lochko zranjeny. Přičina njezboža bě spěšnje jasna. Alkoholowy test wunjese 1,92 promilow. Wěcnu škodu trochuje policija na wjac hač 11 000 eurow.
Policija (15.05.20)
Proša wobydlerjow wo pomoc
Kamjenc. Hnydom 26 pakćikow parfima je njeznaty z wobchoda na Kamjenskim torhošću spakosćił. Kupča bě wobkedźbowała, kak sej paduch twory w cyłkownej hódnoće 900 eurow do zakow tyka. Byrnjež awtomatiski alarm wobchoda zaskočił, móžeše něhdźe 1,80 metrow wulki muž ćeknyć. Policija nětko wobydlerjow wo pomoc prosy. Štóž je něšto widźał abo ma informacije k padej, njech to Kamjenskej policiji zdźěli.
