Policija (02.07.15)
Hórnikecy. Runje hišće hóršemu zadźěwać móhł je zawčerawšim młodostny pola Hórnikec. Tam bě 18lětny ze swojim kwadom typa Adly Moto na zawodowym puću do Łaza po puću. Jězbneho zmylka dla zajědźe wón na runym puću na prawy bok jězdnje a měrješe so runu smuhu na štom. Krótko do zražki so jemu poradźi z jězdźidła skočić, wokomik pozdźišo kwad do štoma prasny. Młodostny so na zbožo njezrani.
Policija (01.07.15)
Bambruch. Twarski płót słuži poprawom tomu, paducham přistup na twarnišća znjemóžnić. W Bambruchu pola Kamjenca pak so njeznaći runje na tajki twarski płót měrjachu a pokradnychu štyri pola, z kotrymiž bě tam twarnišćo wobhrodźene. Škodu trochuja na něhdźe 200 eurow. Hewak skućićeljo z twarnišća ničo sobu wzali njejsu.
Policija (30.06.15)
Rakecy. Dokelž z woknom wjacebydlenskeho domu na Rakečanskim Kastaniowym kruhu kur sapaše, je kedźbliwy wobydler wčera wječor wohnjowu woboru alarmował. W tym wokomiku nichtó njewědźeše, hač něchtó w bydlenju přebywa. Spěšnje bě 45 kameradow wohnjowych woborow z Rakec, Njeswačidła a Jeńšec na městnje a so přez zakurjene schodźišćo hač do bydlenja předrě. Woheń w kuchni móžachu spěšnje zhašeć, ludźi pak žanych w bydlenju njenańdźechu. Bórze na to móžachu wobydlerjo domu zaso do swojich bydlenjow. Policija přepytuje, čehodla bě woheń wudyrił.
Policija (29.06.15)
Ćichońca. Najprjedy raz wudźenja wzdać dyrbi so muž, kotremuž běchu njeznaći minjeny pjatk při Budyskim spjatym jězoru jeho wudźenski grat pokradnyli. Tón bě sej wón popołdnju pola Ćichońcy k wudźenju spřihotował, dyrbješe pak hišće raz wróćo k awtu. Krótki wokomik su njeznaći wužili a grat w hódnoće 1 200 eurow spakosćili. Policiji škodowany pozdźišo rozprawješe, zo bě na jězoru ludźi widźał, kotřiž tam čołmikowachu. W tym zwisku pyta policija za módrym VWjom Passatom.
Łuty. Njemało stróžili su so wobsedźerjo jednoswójbneho domu we Łutach, jako so sobotu z dowola wróćichu. Njeznaći běchu so w tym času pola nich zadobyli a mjez druhim sterejopřiprawu typa Bose, MP3-playeraj kaž tež krutu kompjuterowu tačel pokradnyli.
Policija (26.06.15)
Kamjenc. Na statnej dróze S 95 na kromje Kamjenca je wčera wječor ke krawnemu rozestajenju dóšło. Tam namakachu žonu, do kotrejež bě něchtó kłół, pódla jeje awta ležo. Jedne wokno awta bě rozbite, pódla jězdźidła ležeše nóž. Helikopter dowjeze žonu do chorownje.
Policija (25.06.15)
Zhorjelc. Policija warnuje wobydlerjow wuraznje před wosebitym wašnjom paduchow awtow. Na terenje Zhorjelskeje policajskeje direkcije je w zašłymaj měsacomaj k wjacorym padam tak mjenowaneho „homejackinga“ dóšło. Při tym so paduši najprjedy do bydlenja zadobudu, wozmu sej tam namakany awtowy kluč a pokradnu na to wotpowědne awto. Zwjetša zadobychu so njeznaći přez zachodne durje, w někotrych padach wone ani zamknjene njeběchu, štož skućićelam „dźěło“ wolóži. Kluč wisaše často direktnje pódla durjow, druhdy ležeše na kamorčku na chódbje. Pokradnyli su paduši zwjetša awta typa Ford, Audi, VW, Škoda a Mercedes. Policija tuž radźi, chěžne a bydlenske durje stajnje zamknjene měć a awtowy kluč w bydlenju po móžnosći do kamora połožić a nic widźomnje ležo wostajić. Podhladnje zadźeržace so wosoby měli wobydlerjo spěšnje policiji přizjewić.
Policija (24.06.15)
Kamjenc. Z woporom paducha sta so zawčerawšim rentnar w Kamjenskej kupnicy. Tam je njeznaty 83lětnemu ručnu tobołku z nakupowanskeho wozyčka spakosćił. Jako sej starc wšelku zeleninu wobhlada, dosahaše skućićelej krótki wokomik, zo sej tobołku hrabny a so zhubi. W tobołce běchu snadne mnóstwo pjenjez, kluče za awto a bydlenje kaž tež mobilny telefon. Sprawny pasant tobołku pozdźišo na Sydlišćowym puću namaka a w měšćanskim zarjadnistwje woteda. Hač na pjenjezy móžachu 83lětnemu wšitko zaso wróćić. Kriminalna policija tónle pad dale přepytuje.
Policija (23.06.15)
Jědlica. W běhu krótkeho časa stej so wčera popołdnju a nawječor wosobowej awće na statnej dróze S 101 mjez Zejicami a Hornim Wujězdom blisko wotbóčki do Jědlicy z jězdnje sunyłoj. Krótko po 16 hodź. bě to starši muž ze swojim Citroënom, kiž zajědźe do přirowa. Dobrej dwě hodźinje pozdźišo so wodźerka BMWja z awtom hižo na dróze dźeržeć njemóžeše a zajědźe na polo. We woběmaj padomaj bě jězdnja mokra. Křiwicy na S 101 su chětro wuske, tak zo tam často k njezbožam dochadźa, tež hdyž šoferojo kaž předpisane 70 km/h jědu.
Policija (22.06.15)
Ochranow. K ćežkemu wobchadnemu njezbožu dóńdźe wčera připołdnju na zwjazkowej dróze B 178 mjez Ochranowom a Žitawu. Po zdaću po přesćehnjenju běštej Opel Chorsa a Wartburg 353 na wysokosći wotbóčki Großhennersdorfa do so zrazyłoj. Nimo kameradow wohnjoweje wobory běchu tež policisća a zasadźenske mocy wuchowanskeje słužby na městnje a zranjenych zastarachu. Po prěnich dopóznaćach stej dwě wosobje hišće na městnje njezboža zemrěłoj, pjećo so ćežko zranichu.
Policija (19.06.15)
Połčnica. Jako chcyše wodźer transportera wčera připołdnju w Połčnicy z ležownosće na puć wujěć, přewidźa wón bližacy so moped. Mopedist zrazy do transportera a padny. Při tym so tak zrani, zo dyrbjachu jeho w chorowni lěkować.
Biskopicy. Na křižowanišću blisko Schilleroweho naměsta w Biskopicach je wčera něhdźe w 19 hodź. 71lětna wodźerka VWja stopowe znamjo přewidźała a jědźeše prosće dale. Při zražce z napřećo přijěducym Peugeotom so w nim sobujěduca 62lětna zrani. Ju dowjezechu do chorownje. Šofer wosta njezranjeny.
