Wokoło Běłeje Wody najmjenje domjacych lěkarjow w Hornjej Łužicy
Drježdźany/Budyšin (SN/at). Prěni tak mjenowany lěkarski report za Saksku je statne ministerstwo za socialne a škit přetrjebarjow wčera w Drježdźanach předstajiło. W srjedźišću steji potrjeba lěkarskeho a dalšeho strowotniskeho zastaranja ambulantneho razu.
Wot Centralneho instituta za kasowolěkarske zastaranje w Němskej zdźěłana studija definuje za wokrjesaj Budyšin a Zhorjelc pod aspektomaj demografiskeje změny kaž tež socialneho połoženja trěbnosć jednanja w dohromady 69 padach. Při tym su so wědomostnicy na lěkowanske a diagnozowe daty wotličenja ze systema kasowolěkarskeho zjednoćenstwa z lěta 2013 złožowali. Poručenja předleža za wobłuki Budyšin, Biskopicy, Kamjenc, Wojerecy, Radeberg, Běła Woda, Lubij, Zhorjelc kaž tež Žitawu. Za Hornju Łužicu definowanu potrjebu zwěsćichu za štyri z pjeć podatych ćežišćow. Su to wućeženje na stejnišću, potrjeba zastaranja na bydlenskim městnje, struktury zastaranja kaž tež jich změna.
