Po měsacy trajacym přetwarje pjekarnja wot dźensnišeho wotewrjena

Pančicy-Kukow (SN/mwe). W Pančicach-Kukowje su dźensa rano w pjekarni klóštra Marijineje hwězdy po měsacy trajacym přetwarje zaso prěni króć čerstwy chlěb, całty a dalše słódne twory pjekli. Zawjazani do toho su tuchwilu třo zbrašeni z dźěłarnje swj. Michała. „To nas jara wolóža a so jara wjeselimy. Wšako njetrjebamy kaž w zašłosći hižo wšědnje do Tornowa-Lipoja pjec jězdźić, štož bě dosć wulke logistiske wužadanje. Nětko mamy lěpše dźěłowe wuměnjenja. Smy klóštrej za projekt jara dźakowni a wosebje europskemu teritorialnemu zhromadnemu dźěłu Interreg“, wuswětla wjednica dźěłarnje Karin Cyžowa.