Maltezojo pytaja dale noweho nošerja tež za Kamjensku chorownju
Kamjenc (SN/mwe). Na fakće, zo chcedźa maltezojo šěsć swojich chorownjow w Němskej, mjez nimi Kamjensku swj. Jana a Zhorjelsku swj. Carolusa nanajspěšnišo předać, so tež spočatk lěta 2020 ničo změniło njeje. Na naprašowanje Serbskich Nowin, kajki je aktualny staw pytanja za nowym nošerjom, je Stephanie Hänsch z marketingowa a běrowa za zjawnostne dźěło Kamjenskeje hojernje wčera zdźěliła: „Nam žane nowe informacije k temje njepředleža.“ Z wotmołwy pak wuchadźa, zo je powšitkownowužitna towaršnosć ze zajimcami wobšěrne dowěrliwe dojednanja podpisała. „Njemóžemy a njesměmy wašemu wječornikej tuž žane konkretne mjena mjenować.“ To rěka, doniž so z nowym wobsedźerjom dojednali njejsu. Zaměr pak wostanje dale nowy nošer za wšitke šěsć domow maltezow. Trjebaja tajkeho, kiž zamóže wysoke medicinske a hladanske zastaranje bjezposrědnje a dołhodobnje zawěsćić. W Kamjencu z toho wuchadźeja, zo budźe proces w prěnim kwartalu 2020 wotzamknjeny.
